DOAk osasuna Parte Zaharretik Hego Amerikara darama
Denok Osasunaren Alde GGKEk hamar urte beteko ditu igandean. Sendagile eta erizainek osatutako boluntario taldeak osasun eta hezkuntza programak gauzatzen ditu Guatemalan eta Bolivian.
Gainditu gabeko irakasgaia zen guretzat, ogibide honek duen alderdi humanistarengatik, kaltetuenei eta behar gehien dutenei lagundu nahi genien”. Hala laburbildu zuen Juanjo Martinez lehendakariak Denok Osasunaren Alde (DOA) GGKE sortzearen arrazoia. Martinez Gipuzkoa Ospitaleko sendagilea da, eta 2002an, beste hamasei mediku nahiz erizainekin batera eratu zuen Parte Zaharrean egoitza duen erakundea. Antza, ez ziren irakasgaia gainditzeko zuten bakarrak, egun, hamarkada geroago, Gipuzkoako osasun etxetan jarduten duten 172 langilek osatzen baitute boluntario taldea. Igandean lehen hamarkada beteko dute, eta hori ospatzeko prestatzen ari diren jai egitarauaren lehen ekitaldia aurkeztu zuten atzo.
«Aberastasun ikaragarria»
Hemengo osasun zerbitzua ona izanik, herrialde txiroei laguntzea erabaki zuten. Guatemalan hasi ziren lanean, eta urte gutxitan, 2005ean, Boliviara egin zuten jauzia. “Hango ospitaleek ez dute gaixoei eskaintzeko ezer, beraiek erosi behar dituzte sendagaiak farmazian, edo ebakuntza baterako torlojuak”, azaldu zuen Martinezek.
Gutxika, ekimen berriak batu zaizkio GGKEri, hala nola, odontologia, hezkuntza, edota lanbide heziketa. Horrela, hangoak artatu eta osasun zerbitzuak eskaintzeaz gain, ikasle laguntza programa ere badute. Hauen bidez, batetik, baliabiderik ez duten gazteei ikasteko aukera ematen diete; eta bestetik, medikuek espezializazioa egin dezakete. Aurrera daramatzaten proiektuak erakundeen diru-laguntzen nahiz boluntarioen ekarpenen bidez finantzatzen dituzte. Osasun materialaren gehiena, berriz, osasun etxeen dohaintza izan ohi da.
Oporraldia baliatuta, urtean zehar prestatutako lana egitera Hego Amerikara joaten dira boluntarioak. Horietako bat Marian Atin da. Zumarragako ospitaleko erizainak zortzi urte daramatza Guatemalako La Antigua herriko biztanleak artatzen. Beharra “izugarria” dela eta zailtasun nagusia “baliabide falta” dela gogoratu zuen Atinek. “Nolako etxetan bizi diren ikusita ezin duzu asko eskatu, haien erara egokitu behar duzu”. Bertakoekin elkarlanean ur edangarriaren kontrola eta higiene neurriak lantzen dituzte.
Egoera orokorrean txarra bada, are latzagoa da emakumeentzat. Hauekin DOAk prebentzioa lantzen du, ugalkortasuna kontrolatzeko. Egindako lanak bere fruituak ematen hasia dela uste du Atinek. “Aldaketa handia izan da, bereziki, azken hiruzpalau urteetan. La Antiguako ospitalekoak, guk gainbegiratu arren, euren kasa uztea erabaki dugu, eta Retalhuleuko ospitalera joango gara”. Ondo egindako lanaren sariaz gain, jasotzen duena emandakoa baino gehiago dela aitortu zuen Atinek. “Aberastasun ikaragarria da. Mugaraino lana egin eta nekatzen naiz; baina bete egiten nau. Hemen tontakeriek estresatzen gaituzte”.
Egitasmoa gizarteratu
Urteurrenarena ospakizun gazi-gozoa izango da. Ibilbidearekin pozik dauden arren, krisia dela eta, ekimenak %30 murriztu beharko dituztelako. Horregatik, jai egitarauaren bidez, beraien proiektuak ezagutzera eman eta dirua biltzen saiatuko dira. Lehen ekitaldia, Donostiako Orfeoiren kontzertua izango da. Larunbatean, urteurrenaren bezperan, San Bizente elizan, 20:30ean. Atinek jendea “kontzertu interesgarrira” joatera animatu zuen; baina, bereziki, “gu, gure lana eta gure filosofia ezagutzera”.
Denok Osasunaren Alde GGKEk baliabiderik ez duten lagunei osasun zerbitzua ematen die. (Argazkia: DOA)
ELKARTASUNA ZENBAKITAN
- Boluntarioak. 2.000 lagun baino gehiagok parte hartu dute proiektuetan.
- Gaixoak. 18.000tik gora artatu dituzte.
- Tratamendu odontologikoak. 5.500 bat gauzatu dituzte.
- Ekografiak eta erradiologia azterketak. 3.000tik gora.
- Azterketa anatomopatologikoak. Ia 200.
- Ebakuntzak. 6.000tik gora. pEskolak. Bana Guatemalan eta Bolivian.
- Ospitalizatze aretoak. Bi Bolivian. Bat, 96 ohekoa; eta bestea, 24 ohe eta ebakuntza gela dituena.
- Liburutegiak. Bi Guatemalan.
- Eskola bereziak. Bi, elbarritasuna duten haurrentzako.
