Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Easoko airearen kalitatearen estazioa lekualdatzeko eskatu du Ekologistak Martxanek

Irutxuloko Hitza — 2026-03-18 14:45:51

Ekologistak Martxan taldeak Trafikoa eta hiri-airearen kalitatea Espainiako Estatuan txostena argitaratu berri du. Bertan, estatuko 25 hiriburutan airearen kalitatea neurtzeko hiri estazioen kokapena aztertu du. Horien kokapena airearen kalitatearen kudeaketaren alderdi eztabaidagarrienetako bat da, izan ere, administrazio autonomiko eta lokal askok geltoki “gatazkatsuenak” bigarren mailako trafiko bideetan birkokatu dituzte, laginketa-puntuak kokatzeko lege-irizpideak betetzeko aitzakiarekin.

Europako araudi berriak ezartzen duenez, giza osasuna babesteko laginketa puntuen kokapena zehaztu beharko dute datu fidagarriak eman ditzan atmosferaren kutsadurarako puntu kritikoetako kontzentrazio mailei buruz eremuen barruan, ahal dela eremu sentikorretan, hala nola bizitegi-guneetan, eskoletan, ospitaleetan, lagundutako etxebizitza-zentroetan eta bulego-guneetan. Eta helburua ibilgailuen trafikoaren ekarpena ebaluatzea denean, laginketa-puntuak kontzentrazio handienak gertatzen diren kaleei buruzko datuak emateko moduan kokatu behar dira, trafiko bolumena tokiko sakabanatze-baldintzak eta lurzoruaren erabilera espaziala kontuan hartuta.

Egindako azterketaren ondorioz, egiaztatu dute aztertutako estazioen hiru laurdenek (25etik 19k) mugaren bat dutela ezarritako ezarpen-irizpideei dagokienez, ez-betetze partzial edo osoen ondorioz, besteak beste, Donostian Eason dago, Isuri Gutxiko Eremuaren kanpoko perimetroan dagoena. Gainera, Easo kaleko eta Antso Jakitunaren hiribideko trafikotik urrun dago. Mikroezarpenari dagokionean, galtzadaren ertzetik baimendutako 10 metrotik gorako distantzian dago, zehazki, Errondo pasealekuko bidetik 15 metrora dago. Distantzia are handiagoa da Easo (22 m) edo Antso Jakitunaren hiribideko bide nagusiekiko.

Hori horrela, erakunde ekologistak Jaurlaritzari eskatu dio bere ardura diren estazio guztiek kokapena berrikusteko prozesua has dezala, baita funtzionamendu baldintzak eta atmosferako kutsatzaileak hartzeko baldintzak ere, “gardentasunez eta udalaren eta herritarren parte hartzearekin”. Espainiako Gobernuari urtebeteko epea ezar diezaiela agintari eskudunei estazioen kokapena berrikus dezaten.

Alboka taberna danbor eta upel hotsez omendu dute, itxi berritan

Irutxuloko Hitza — 2026-01-21 11:55:37

Ia mende erdiko ibilbidea eginda, Jon Martinez Ona amaratarrak joan den asteburuan itxi zuen Easo kaleko Alboka taberna historikoa. Oraindik ez da ziurra itxiera behin betikoa izango ote den, tabernaren ardura hartzeko interesa agertu duten pertsona batzuk baitaude, baina, momentuz, urte luzez donostiar askoren aterpe izan den tabernari agur esan dio Amara auzoak eta Donostia osoak.

Hain zuzen ere, Amarako Kirol Elkartea danborradak tabernaren aurrean egin zuen geldialdia hilaren 19tik 20rako gauean, Martinez bera han zela, Alboka omentzeko; behean ikus dezakezue bideoa.

1978tik irekita

Alboka taberna 1978an ireki zuten, eta izaera propiodun taberna izateaz gain, tokiko kulturaren aterpe ere izan da: “Gogoan dut 1970 eta 1980ko hamarkadetan, herri askotan ireki zirela horrelako tabernak, ohikotik ateratzen zirenak. Eta lana ere bazen arren, baina gehiago zeukan: lagunak biltzeko lekuak ziren, musika entzuteko, erakusketak egiteko, liburuak aurkezteko, kontzertu solidarioak egiteko, poesia errezitaldiak… Gauza asko egin dira hemen, baita Mintzalagun praktikak ere”, azaldu dio Martinezek egunotan Argia hedabideari.

LGTBI komunitatearentzako leku kutuna izan dela nabarmendu zuen Martinezek aipaturiko hedabidean: “Bereziki aipatu nahi nuke, eta oso harro gainera, gay eta lesbianen komunitatea biltzeko leku garrantzitsua izan dela leku hau. Hasierako garai haietan ez zen erraza horrelako lekuak aurkitzea, eta duela urte batzuk fatxadan hori aitortuz plaka bat jarri zidatenean, izugarrizko ohorea sentiarazi zidaten”.

Horrela, “harro eta pozik”, bere Albokaren ibilbidea amaitutzat eman du Martinezek, beste norbaitek tabernaren ardura hartzeko itxaropenarekin. Aterpe izango den izaera propiodun taberna bat bizirik mantentzea albiste bikaina litzateke Amararentzat eta Donostiarentzat.

Astelehenean hasiko dira San Rokeko arrapala mekanikoa konpontzen

Irutxuloko Hitza — 2026-01-09 15:46:43

Donostiako Udalak jakinarazi duenez, datorren astelehenean (hilak 12) hasiko dira San Roke kaleko arrapala mekanikoaren lehen zatia konpontzeko lanak egiten. Zehazki, arrapalaren bigarren zatian egin berri duten moduan, euriak eta kresalak eragindako elementu herdoildu guztiak aldatuko dituzte.

Hain zuzen ere, udalak azaldu duenez, “pieza berreskuragarriak saneatu eta pieza berriak fabrikatuko dira, dauden osagaiak berrerabili ezin diren kasuetan”. Udalak aurreikusi du lanak lau-sei astetan amaitzea, eta, beraz, denbora tarte horretan arrapala geldirik egongo da. Lanen kostua 55.500 eurokoa izango da.

“San Rokeko arrapala bizilagunek asko erabiltzen duten azpiegitura da, eta egoera onean egotea nahi dugu. Lan horiek beharrezkoak dira segurtasuna bermatzeko eta bizitza baliagarria luzatzeko”, adierazi du Carlos Garcia Hiri Mantentze eta Zerbitzuetako zinegotziak.

San Silvestre lasterketa 100 iruditan

Irutxuloko Hitza — 2025-12-31 18:14:03

Amarako San Silvestrea da donostiar askorentzat urte amaitzeko modurik hoberena. 40 urte dira hasi zutenetik, eta 140 inguru izan ziren hasiera baten. Aurtengoa, bereziki arrakastatsua izan dela nabarmendu dute, sei mila korrikalariko errekorra lortuta.

Iraitz Arrospidek eta Fernanda Fleischmannek irabazi dute Donostiako San Silvestre lasterketa. Arrospidek 21 minutu eta 45 segundotan bete ditu 7,9 kilometroak, helmugara bakarrik helduz. Villabonako korrikalariak, maratoilaria eta Realeko kidea. Bigarren postua Enaitz Aginagalde gaztearentzat izan zen (22:04), eta hirugarrena, Gonzalo Fuentes atleta ohiarentzat (22:08).

Emakumezkoen kategorian, garaipena eta lehen postuak etxean geratu dira. Helmuga zeharkatzen lehena Fernanda Fleischmann (25:59) izan da, Lea Andre Maria Zuriaren klubeko atleta donostiarra. Arabako lasterketetan arrakasta handia izan du, baita ere Gasteizko maratoi erdian edo Almendrako Konkistan. Maite Arraiza (26:04) eta Eguzkiñe Zabaleta (26:45) donostiarrek osatu dute podiuma, eta Nerea Egia (26:50) laugarren izan da.

Udalak amaitu ditu Miramongo bi euste urmael berriak, Amarako uholde arriskua murrizteko estrategian

Irutxuloko Hitza — 2025-12-22 13:26:24

Donostiako Udalak bi euste-urmael eraiki ditu Pakea eta Altzaerreka erreketan, Miramongo basoan, hiriko drainatze-sistema naturalaren funtsezko puntuak direlako horiek. Esku hartzearen helburua da Amararen uholde arriskua murriztea eta Urumea ibaira isurtzen den uraren kalitatea hobetzea.

Girder Ingenieros enpresak idatzi zuen proiektua, Udaleko Hiri Mantentze eta Zerbitzuetako Zuzendaritzak hala eskatuta, eta ‘Ibai-ekosistemak lehengoratzeko eta hiri-inguruneetan uholde-arriskua murrizteko jarduketak’ estrategiaren parte da. Estrategia hori 2022an hautatu zen, Trantsizio Ekologikorako eta Erronka Demografikorako Ministerioaren Biodibertsitate Fundazioaren laguntzen barruan, NextGeneration EU Europako funtsekin finantzatuta.

Carlos Garcia Hiri Mantentze eta Zerbitzuetako zinegotziak azaldu moduan, “jarduketa horrekin bi helburu lortu nahi izan dira: alde batetik, uraldiak geruzetan banatzea, euri jasen pareko aldi bihurtuz, kolektoreen edukiera gaindi ez dadin eta Amaran uholderik sor ez dadin; eta, bestetik, Urumeara iristen den ur-bolumena murriztea eta ur horren kalitatea hobetzea, era horretan, ibaiaren ingurumena babesten laguntzeko”.

Pakea errekan euste-urmael bat sortu da eta 480 metro kubikoko gehieneko edukiera du. Oinezkoen pasabide batetik ibaian behera dago kokatuta, erreka GI-20 errepidearen azpian lurperatu baino lehen. “Paisaiari dagokionez, harri lubeta begetatuaren bidez dago integratuta egitura, eta ohiko emari ekologikoa igarotzea ahalbidetzen du. Euri-jasa handiak daudenean baino ez da kargatuko urmaela, puntako ur-emariei eusteko. Horrela, uraldiak kontrolatu ahal izango dira, oinezkoen pasabidea urez bete ez dadin”, udalak azaldu duenez.

Altzaerreka errekaren kasuan, edukiera handiagoko urmael bat sortu da: 901 metro kubikoko euste bolumena du. Miramongo errepideko azpiko lurperatzetik ibaian gora dago kokatuta, eta uraldiei eusteko diseinatuta dago, bidegorria eta inguruko eremuak babesteko. Pakean bezala, natura-ingurunean integratzen da egitura, inpaktu txikiko eta landaredi biziko eraikuntza-soluzioen bidez.

Bi jarduketek ur mailaren sentsoreak dituzte, horien bidez erreken portaera hidraulikoa etengabe kontrolatzeko. Jarduketak hiri basoaren ingurunea zorrotz errespetatuz egin dira, eta makineria astuna erabiltzeko orduan mugak ezarri dira, dagoen landarediari kalterik ez egiteko.

Obraren aurrekontua 821.800,57 eurokoa izan da, BEZa barne, eta aurreikusitakoa baino egikaritze epe laburragoa izan du, 5 hilabetetik 3 hilabetera pasatuz.

Herritarrek 750 proposamen egin dizkiete Easoko trenbide eremuaren garapen proiektuei

Irutxuloko Hitza — 2025-11-17 11:57:33

3.000 lagunek baino gehiagok bisitatu dute Hurrengo geltokia: Amara-Easo erakusketa eta 750 proposamen egin dituzte Easoko trenbide eremurako. Udalak, Jaurlaritzako Etxebizitza eta Hiri Agenda Sailak eta Euskadiko Arkitektura Institutuak antolatuta, hilaren 14 arte egon da suhiltzaileen etxe zaharrean ikusgai. Aurrerantzean, berriz, Euskadiko Arkitektura Institutuaren egoitzako klaustroan ikusteko aukera izango da, urtarrilaren 11ra bitarte —astegunetan, 17:00etatik 20:00etarara, larunbatetan, 11:00etatik 14:00etara eta 17:00etatik 20:00etara, eta igandeetan, 11:00etatik 14:00etara—.

OFF Mugak Euskadiko Nazioarteko Arkitektura Bienalaren parte da, eta auzo berria nolakoa izango den ezagutzeko topaketa, gogoeta eta elkarrizketarako gune izan nahi du erakusketak. Herritarrek egindako ekarpenen arabera, honakoak dira adierazitako kezka nagusiak

Natur eta berdeguneei lehentasuna ematea (%34): berdeguneak, parkeak eta zuhaiztiak mantendu eta hedatzeko beharra. Araba parkearen jarraipena babestea eskatu dute herritarrek, eta azpiegiturek edo eraikinek eragindako zatiketak saihestea.
Etxebizitza eskuragarria eta soziala (%19): antolamendu berriak etxebizitza babestuaren eskaintza handitzea, etxebizitzarako bidezko sarbidea bermatuta eta bazterketa prozesuak saihestuta.
Mugikortasun jasangarria eta irisgarritasuna (%13): garraio publikoa, oinezkoen eta bizikletazaleen mugikortasuna lehenestea eta motordun trafikoa murriztea. Auzo berria erdigunearekin eta inguruko auzoekin lotzeko bulebar berde bat egitearen ideiak indarra hartu du.
Ekipamendu publikoak eta gertukoak (%12): anbulatorio eta kiroldegi bana, baita adin guztientzat zabalik dauden kultur, kirol eta aisialdi guneak ere.
Ingurumenarekiko eta ongizatearekiko kezkak (%8): zarata eta kutsadura murrizteari buruzko aipamenak ageri dira, baita lasaitasuna mantentzearen eta gune horren bizitoki izaeraren garrantziari buruzkoak ere.
Beste batzuk: haur-parkeak eta belaunaldien arteko aisialdia (% 5), auzoko merkataritza eta tokiko bizitza (% 3) eskatu dituzte herritarrek. Eraikuntzaren (% 2) eta beste gai batzuen aurka (% 4) ere egin dute.

Herritarren zati handi batek prozesua positiboki baloratu badu ere, nolabaiteko kezka adierazi dute bere eraginkortasunari dagokionean, behin eta berriro azpimarratu baitute ekarpenek isla zehatza izan behar dutela azken erabakietan.

Herritarren ekarpenak Hiri Antolamendurako Plan Orokorraren (HAPO) Aldaketa Puntualerako lehiaketa publikoan aukeratutako hiru proiektu finalista hauetan oinarritu dira: JPAM City Makers-en Habitar el bosque urbano, RAZ y Usandizagaren Kalerik kale plazarik plaza, eta Beldarrain Estudioren Hari berdez hiria josi.

Jaurlaritzak memorandum batean bilduko ditu jasotako proposamen eta iradokizunak. Dokumentu hori baliagarria izango da hiru proiektu finalistak baloratzeko, kontuan hartuta zenbateko gaitasuna duten herritarren ekarpenak integratzeko, zenbat etxebizitza publiko proposatzen dituzten, proiektuaren garapenaren bideragarritasun ekonomikoa eta osotasunaren hiri kalitatea. 2026ko udaberrian esleituko zaio ardura hautatutako ekipoari.

Easoko trenbide eremu berria: erakusketa eta bizilagunen kezka

Irutxuloko Hitza — 2025-10-24 00:00:51

Abian da egun Easoko trenbide eremua denean zer eraikiko den erabakitzeko lehiaketa publiko bat. Zenbait estudiok aurkeztu zuten beren partaidetza, baina bost dira, azkenean, saritu dituztenak —hiru pasatu dira bigarren fasera—. Herritarrei horien berri emateko, hala, erakusketa bat antolatu du Euskadiko Arkitektura Institutuak, Eusko Jaurlaritzako Etxebizitza eta Hiri Agenda Sailak bultzatuta, Donostiako Udalarekin lankidetzan. Hurrengo geltokia: Amara-Easo du izena, eta azaroaren 14ra arte egongo da ikusgai Amarako suhiltzaileen etxe zaharrean —Easo kalea, 43— asteartetik igandera, 17:00etatik 20:00etara.

Ibilbideak, panelak, planoak, maketak, marrazkiak eta errealitate birtualeko esperientzia bat uztartzen ditu erakusketak, bisitariek lehiaketa publikoan parte hartu zuten proiektuak xehetasunez ezagutu ahal izateko. Gainera, sarrerako panel batek jarduteko eremuaren historia eta trenbideak lurperatu ondorengo etorkizuneko plana jasotzen ditu, hiri eraldaketa handi horri testuingurua emateko. Auzo berria nolakoa izango den imajinatzeko aukera eskaintzen du erakusketak, baina bizilagunek irudikatu dute, sarritan, nola gustatuko litzaiekeen beraiei izatea. Mahai gainean jarritako horiek, ordea, ez dituzte inon ikusi.

Eskaerak, mahai gainean

Urteak daramatzate Amarako bizilagunek auzoa apur bat gehiago aberastuko duen zerbitzu zerrenda bat eskatzen; orain arte, ordea, ez dute erantzun zehatzik izan, eta Easoko trenbide eremuko proiektuak hausnarketarako tarte handia eman die auzotarrei: inork ez ditu beren eskaerak entzun, eta inor ez da beraiekin harremanetan jarri, diotenez. Proposamen itxiak izan dira guztiak.

«Etxebizitzaren inguruko tetris joko bat» dirudiela aitortu du Harkaitz Aranburu bizilagunak: «Letra asko dago, informazio asko, ezer ez esateko. Maketak oso politak dira, baina ez ditugu ulertzen». Hala, bilera bat hitzartu dute Denis Itxaso Eusko Jaurlaritzako Etxebizitza eta Kultur Agenda sailburuarekin, azalpenak jasotzeko itxaropenarekin; izan ere, maketetan ez dituzte beren eskaerak ikusi. «Badakigu proiektu hau kristoren aukera dela Donostiarentzat publikoki, eta aprobetxatu behar dugula, baina non dago kultur azpiegitura? Eta kiroldegia? Auzoko taldeentzako lokalak?».

Amararekin «bereziki sentikorrak» izan beharko luketela uste du Aranburuk, San Bartolomerekin egindako «astakeria» eta gero: «San Bartolomek ikasteko balio beharko luke berriro halakorik ez gertatzeko, eta, uste dut, bide beretik goazela».

Ibilbideak, planoak eta maketak hartzen ditu erakusketak, besteak beste.Irekia

Aurkezpen publikoa

Aurkezpen publiko batean ezagutaraziko dituzte proiektuak; hori, hala, bihar izango da, 11:00etan, Euskadiko Arkitektura Institutuaren egoitzan. Jardunaldian, hiru proiektu finalisten ordezkariek —PAM City Makers, RAZ y Usandizaga eta Beldarrain estudioak— beren proposamenak aurkeztuko dituzte eta eztabaidarako tartea izango da, herritarrek eremuaren etorkizunari buruzko euren galderak eta ikuspegia parteka dezaten.

Elkarrizketa eta bizilagunen parte hartzea sustatu nahi dute aurkezpenarekin; saioan biltzen dituzten iradokizunak nola txertatu ikusiko dute finalistek, auzoarekin bat etortzeko: «Amara-Easo berriaren prozesu kolektiboaren helburua da bertan bizi direnen aniztasuna, beharrak eta nahiak islatzea, guztion artean Donostia konektatuagoa, habitagarriagoa eta partekatuagoa eraikita», adierazi dute arduradunek.

Hala ere, planoak ikusi eta «polita» geratuko delakoan, zalantza asko sortzen ditu, oraindik ere, honek guztiak auzotarrengan. Aranburuk dio ez dituztela proiektuak «interpretatzen», eta azalpenetan arduradunak «zintzoak» izatea nahiko luketela.

Donostiarrak Donostian, ere bai

Erronka nagusia donostiarrak Donostian bizitzea izan beharko lukeela uste du Aranburuk: «Hona bizitzera datorren jendea auzoetan integratu behar dugu, eta horretarako, garrantzitsua da gure hitza entzutea, gure auzoaz ari direnean. Hemengoak garenok hemen geratzea ere bada kontua, eta auzoa auzotik eraikitzea».

Auzotarrek ere irudikatu izan dute beren auzo berria: «Gentrifikazio prozesu honi aurre egin behar zaio eta aukera ona dagoela uste dugu. Baina ditugun gabeziak eta eskatzen ditugun zerbitzuak presente egon beharko lukete, aspalditik aldarrikatzen aritu garenak». Sarritan esan diete zentroan bizi direla, eta horrek askotariko zerbitzuez disfrutatzeko aukera ematen diela; beraiek, ordea, ez daude guztiz ados horrekin: «Zerbitzu horietako bat bera ere ez da auzoari begira eskainia».

Erabakia 2026ko udaberrian hartzea aurreikusten dute. Orduan, aukeratutako proiektuaren taldeak idatzi beharko du Hiri Antolamenduko Plan Orokorraren (HAPO) aldaketa puntuala; udalak onartu eta tramitatu beharko duena. 21.000 metro koadroko eremua eraldatuko duen hiri proiektu jasangarriaren lanak, babestutako 400-500 etxebizitza barne, berriz, 2030ean has daitezkeela uste dute arduradunek.

Errondoko aparkalekuetako lanak hasiko dira astelehenean

Irutxuloko Hitza — 2025-09-28 14:02:02

Amara eta Amara Berri arteko Errondo pasealekuaren inguruko aparkalekua berrantolatzeko lanak hasiko dituzte astelehenean, hilaren 29an, Donostiako Udalak jakinarazi duenez. Lanak urte amaieran bukatzea aurreikusten dute eta, amaitzean, “Amara Berrik egoiliarrentzako plaza gehiago izango ditu eta motoek Anoetatik gertu dagoen aparkaleku bat izango dute ekitaldi egunetan”, nabarmendu du udalak.

Lau fase izango dituzte lanek: lehenengo fasean, oinezkoentzako pasabide berri bat eraikiko dute Karlos I.aren taulen azpian; bigarrenean, lanak Errondotik Olaeta kalera igarotzen den oinezkoen pasabidean egingo dituzte, hori igotzeko; hirugarrenean, erdibitzailea eraikiko dute Aita Donostia plazatik hurbilen dagoen oinezkoentzako pasabideraino iristen den tartean eta, laugarrenean, oinezkoentzako pasabideak amaitu ondoren, horiek lotuko dituen erdiko erdibitzailea eraikiko dute, baita asfaltatu eta egoiliarrentzako aparkaleku berriak margotu ere.

Lanek, udalak ohartarazi duenez, unean-unean eragingo die lanak egiten ari diren inguruko aparkalekuei, izan ere, obrako materiala Olaeta kalean jarriko dute eta horrek zortzi bat aparkalekuri eragingo die, lanak amaitu arte.

Pertsona bat atxilotu dute Donostian, Amaran moto bati su eman eta inguruan kalteak eragiteagatik

Irutxuloko Hitza — 2025-09-04 17:10:44

Arroka plazan eman diote su moto bati.Irutxuloko Hitza

Ertzaintzak 22 urteko pertsona bat atxilotu du bart Donostian, Amaran izandako sute baten ustezko egilea delakoan. Hain zuzen ere, Arroka plazako moto bati su eman diote gauerdia pasatuta, ibilgailua erabat suntsituta utziz eta ondoko La Burguessia ostalaritza establezimenduan eta etxebizitza bateko balkoian kalteak eraginez.

Motoaren suteak La Burguessia ostalaritza establezimenduari eragin dio.Irutxuloko Hitza

“Goizaldeko ordu batak eta laurden aldera, Ertzaintzak jakin du Donostiako Amara auzoan motozikleta bat sutan zegoela. Bertaratu diren polizia baliabideek une horretan erabilgarri zeuden baliabideak erabili dituzte, baina, sugarrak kontrolatzerik izan ez dutenez, suhiltzaileen laguntza eskatu behar izan dute premiaz, sugarrak inguruko eraikin batera iristen ari baitziren”, azaldu du Eusko Jaurlaritzako Segurtasun Sailak.

Iturri beraren arabera, bertaratutako ertzainek susmagarri bat aurkitu dute inguruan, gauean bertan: “Gazteak erredurak zituen esku batean, eta gorputz miaketa egin diotenean, bi metxero, mailu bat eta tenaza batzuk aurkitu dizkiote bere gauzen artean. Gainera, berez egiaztatu die agenteei motozikletaren sutean inplikatuta zegoela”. Horrela, kalte delitua egotzita atxilotu eta komisariara eraman zuten.

Begihandi lehiaketa, argazkietan

Irutxuloko Hitza — 2025-08-13 19:19:10

Bigarrenez egin da gaur Begihandi bere tintan lehiaketa, 17:00etan hasita, Amara Berriko Aitzol plazan. Txipiroiak kozinatzen aritu dira hamabi bikote aurten.

Epaimahaia gastronomia munduko bost adituk osatu dute: Ines Montes sukaldaritza irakaslea, Mikel de Francisco sukaldaria, Super Amarako marketin arduradun Alfonso Reiriz, Bar Lyukaren jabe Eva Cruz eta Euskal Gastronomia Kofradiako kide Carlos Arruebarrena. Haiek hautatuko dute irabazlea 20:00etan, plater guztiak dastatu ondoren.

Hiru saridun egongo dira: lehenengo postuak 450 euro irabaziko ditu erosketa baletan, bigarrenak, 300, eta hirugarrenak, berriz, 200. Irabazleak, gainera, txapela lortuko du.

Hemen dituzue lehiaketaren argazki batzuk.

Amarako jaien hasiera, irudietan

Irutxuloko Hitza — 2025-08-01 10:33:41

Amarako jaiak asteazkenean hasi ziren, txupinazoa, pregoia eta jai seguru eta askeen aldeko argazkiarekin. Buruhandi eta erraldoiak, zezensuzkoak, euskal dantzak eta bestelakoak egon dira ordutik, baina oraindik egun ugari gelditzen dira egitarauan aurkitu daitezkeen jarduerak egiteko. Azken egunetan erraldoiak, zezensuzkoa, euskal dantzak eta bestelakoak egon dira. Horregatik, momentu berezietako hainbat argazki bildu ditugu zuentzat.

Hemen dituzue Joseba Parronek txupinazoan atera zituen argazkiak.

Halaber, ostegunean herri krosa jokatu zuten eta Asier Gonzalez de San Pedrok atera zituen argazkiak hemen eskuragarri dituzue.