Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Udako azoka antolatu dute Bidebietan larunbatean

Irutxuloko Hitza — 2026-06-17 11:03:31

Bidebietako Bideak auzo elkarteak udako azoka antolatu du igande honetarako (hilak 21), Bidebietako frontoian.

Azoka goiz osoan zehar egongo da irekita, 10:00etatik 14:00etara, eta askotariko produktuak egongo dira salgai postuetan: artisautza, gaztak, liburuak, kremak, jostailuak eta abar. Horrez gain, Benetan musika taldeak kontzertua eskainiko du frontoian bertan, goiza girotzeko.

«Guardaplata jubilatu askorentzat bigarren etxea da»

Irutxuloko Hitza — 2026-06-12 00:00:07

Nola hasi zen Guardaplata elkartearen ibilbidea?

Elkartea 1976ko uztailaren 2an sortu zen. Inaugurazioa Carlos Garaikoetxea lehendakariak egin zuen, Donostiako alkatea Jesus Maria Alkain zenean. Hemen, eraikin honetan, ez dira 50 urte izan, 40 baizik. Izan ere, lehen, eskola publiko batzuk zeuden, barrakoi batzuk, eta eskolak kendu zituztenean, eraikin hau egin zuten. Gaur egun, komunitatearen egoitza gisa geratu da.

Nolakoa zen Bidebieta duela 50 urte?

Auzoa izugarri aldatu da. Duela 50 urte, etxe orratzak zeuden soilik, frankismo garaian eraiki zituztenak. Pixkanaka, dena eraikitzen joan da, ingurua, ia guztia, mendia baitzen. Tiro eremua ere bazegoen, baina hori guztia desagertu da. Auzoa erabat aldatu da, onerako.

Nork bultzatu zuen elkartea?

Adineko pertsona talde batek hasi zuen. Hau da, jende gutxirekin hasi ziren, eta pixkanaka hazten joan da. Gaur egun ia 800 bazkide gara.

Zein esanahi du elkarte honek erretiratuentzat?

Elkarte hau pertsona askorentzat bigarren etxea da. Haientzat, etxean ez geratzeko, kalera ateratzeko eta harremantzeko duten modua da: hemen, jendearekin elkartzen dira, kartetan aritzen dira, jateko zerbait hartzen dute eta abar. Beraz, erretiratuak oso gustura etortzen dira. Gainera, bi terraza eder izateko zortea dugu, eta horregatik ere atseginagoa da kanpoan egotea.

Bidebietako Guardaplata jubilatuen elkarteak 50 urte bete ditu aurten.Inge Arzensek Sanchez

Zein jarduera eskaintzen dituzue?

Hainbat jarduera eskaintzen ditugu: memoria lantzeko jarduerak, yoga, joskintza, dantza, astean hiru bingo egun ditugu, eta gimnasia ere badugu. Bestalde, sukaldaritza eta gozogintza, marrazketa eta pintura ere egiten ditugu. Udalak irakasle guztiak ordaintzen ditu, baina, adibidez, joskintza tailerra, bazkide batek ematen du; zuzendaritzako kidea ere bada, irakasle ohia.

Zein da jendeari gehien gustatzen zaion jarduera?

Bingoa, argi eta garbi. Astean hiru egunetan elkartzen dira hiru orduz jolasteko, eta primeran pasatzen dute. Gainera, intelektualki oso onuragarria da haientzat. Bestalde, gimnasiak eta dantzak ere arrakasta handia dute.

Zein txango eta ekitaldi egingo dituzue?

Normalean, hilabete eta erdiro edo, egun osoko txangoa egiten dugu. Eta orain, adibidez, zazpi egunez joango gara Maresmeko kostaldera (Bartzelona). Eta ondoren, urrian, beste bidaia bat prestatuta dugu Calpera (Alacant) joateko. Urtean bi egiten ditugu, normalean, zazpi egunekoak.

Ekitaldiei dagokienez, hitzaldiak antolatzen ditugu. Adibidez, Ertzaintzarekin hitzaldiak egin izan ditugu, lapurreten inguruan. Mugikorren eta ordenagailuen ikastaroak ere egiten ditugu.

Nola funtzionatzen du zuzendaritza batzordeak?

Erretiratuen elkarteetan garrantzitsuena zuzendaritza batzorde on batez inguratuta egotea da. Ni, pertsonalki, oso harro nago bost pertsona horiez, eta primeran moldatzen gara elkarrekin. Nire ustez, honek ondo funtzionatzen du, hain zuzen ere, zuzendaritzan ere ondo moldatzen garelako.

«Harroen sentiarazten nauena, adineko jendearen maitasuna eta aitortza da»

Aurten 50 urte bete dituzue. Nola ospatu dituzue?

Aurkezpen ofiziala, maiatzaren 30ean egin genuen. Udalaren ordezkari gisa, Gizarte Ekintzako zinegotzia etorri zen, Mariaje Idoeta. Bertan, Sevillako Feria eguna ospatu genuen hirian dagoen talde baten eskutik. Primeran pasatu genuen. Lehenengo aurreskua dantzatu zuten, eta, gero, sevillanen erakustaldi bat prestatu zuten kantariekin eta gitarrekin. Ondoren, bazkaria izan genuen: ia ehun lagunen arteko bazkaria. Azkenik, berriro dantza egin genuen, flamenkoarekin, gaueko bederatziak arte.

Ekainean, urdaiazpiko eta ardo dastaketa egiteko asmoa dugu, baina bai ala bai egingo duguna bazkideentzako bazkaria izango da.

Elkarte honek beste 50 urte iraun ditzake?

Hemen arazo bat dugu, elkarte guztiek dutena: presidente edo zuzendaritza batzorderako hauteskundeak daudenean, inork ez du bere burua aurkezten.

Tamalez, zuzendaritza batzorderik ez badago, egoitza itxi egiten da. Hau, jadanik, hiriko beste egoitzetan pasatu da. Hala ere, uste dut honek beste 50 urte iraungo dituela; gutxienez, saiatuko gara hala izan dadin. Guk egoitzaren zuzendaritza hartu genuenean, 200 bazkidek osatzen zuten elkartea; orain, berriz, 800ek. Beraz, jendeak Guardaplatak funtzionatzen jarraitzea nahi du.

Zerk sentiarazten zaitu harroen urte hauen ondoren?

Harroen sentiarazten nauena jendearen maitasuna eta aitortza da. Hemen adineko jendeak maitasunez tratatzen zaitu. Guk nahi dugulako gaude hemen, hori argi dago. Horregatik, ez digute inolako aitortzarik egin behar, ez dizkigute zertan eskerrak eman, baina, noski, ilusioa egiten dit.

Udalaren aldetik, babes osoa dugu, eta hori da argi utzi nahi dudan beste zerbait. Ez dugu inolako arazorik, alderantziz; eskatu dugun guztia eman digute.

«Kulturarteko txangoa» egin dute Bideberri institutuko ikasleek

Irutxuloko Hitza — 2026-06-01 16:19:11

Erasmus+ Europako programak sustatuta, hamaika eguneko “kulturarteko txangoa” egin dute hainbat ikaslek egunotan, Orreagatik Donostiara, Urrats bat, ahots bat Donostiarantz proiektuaren barruan. Maiatzaren 20an Orreagatik (Nafarroa) abiatuta, atzo, maiatzaren 31n, heldu ziren Donostiara, Done Jakue bidearen hainbat zati oinez egin ostean.

Bidebietako Bideberri BHI institutuko eta Lyongo (Frantzia) Osons Ici et Maintenant elkarteko 24 gaztek hartu dute parte egitasmoan: “Irakasleek eta hezitzaileek lagunduta, kultura arteko bizikidetza, autonomia pertsonala eta esperientziaren bidezko ikaskuntza sustatzea izan du helburu, eguneroko ibilaldiak hezkuntza, sormen eta hausnarketa jarduerekin konbinatuz”, azaldu du Bideberri institutuak.

Besteak beste Iruñetik, Doneztebetik, Lesakatik eta Irundik igaro den ibilbidean zehar, ikasleek “lankidetza, errespetua, inklusioa eta ingurumenaren kontzientziaren moduko balioak” landu dituzte, “nazioarteko testuinguru batean beren hizkuntza gaitasunak hobetzeaz gain”, Bidebietako institutuaren arabera.

Ekialdeko Barrutiaren eredua aldatzeko garaia dela uste du EH Bilduk

Irutxuloko Hitza — 2026-05-25 13:37:19

Zortzi urte beteko ditu Altza, Intxaurrondo eta Bidebieta barnebiltzen dituen Ekialdeko Barrutiak. Hori dela eta, zortzi urteotako balantzea egin du EH Bilduk, eta “txarra” dela deitoratu du: “Ez da lortu herritarrek sentitzea administrazioa gertuago dutela, eta erabaki gunea beti egon da EAJren eta PSEren udal gobernuak baldintzatuta”. Horrekin batera, proposamen asko bere horretan gelditu direla kritikatu dute, “Donostian hainbat erabaki hartzen direlako barrutian hauen berri eduki gabe”.

Udal taldeak jakinarazi duenez, Jon Insausti alkateak idatzi bat bidali berri die Ekialdeko Barrutiko herritarrei, besteak beste, udalak harturiko neurri batzuk azaltzeko. “Proposamen batzuk dagoeneko martxan daude, adibidez bi langile ahalbidetzea. Egindakoak nobedade gisa azaltzea onartezina da. Beste batzuk ez direla eraginkorrak izango aurreikusi daiteke eta oso modu inprobisatuan eginak daudela dirudi. Adibidez, departamentuetako pertsona erreferentzialak izendatzea, izan ere behar duguna da bertan egongo diren langileak antolaketa propioa eraginkorra izan dadin. Eta, larriago dena, alkateak dio eredu berdinarekin jarraitzeko asmoa duela gure ustez eredua denean aldatu beharrekoa”, kritikatu du EH Bilduk.

Alkateak aldaketarako “borondaterik” ez duela dio udal taldeak, eta “marketing pertsonalerako” beste eredu bat dela. Horrela ere, barrutiko presidente berriari eta udal gobernuari konfiantzazko denbora tarte bat emango dietela gaineratu dute: “Ohikoa da 100 eguneko epea jartzea, eta EH Bilduk ere 100 egun emango dizkie. Baina eskatzen dugu 100 eguneko epe honetan lehen urratsak egitea eraginkorra ez dena eraginkorra izaten hasteko”.

Ehun egun horietan, “gutxieneko urrats” hauek egiteko eskatu diete: “Barrutitik eskatzen diren langileen kopuruak eta beraien eraginkortasuna bermatzea. Barrutiak jasotzen duen diru kopurua bertan kudeatzeko ahalmena izatea, udal gobernuaren oniritziaren zain egon gabe. Benetan borondate politikoa erakustea. Horretarako, udal gobernuak erabakiak hartu beharko ditu Altza, Bidebieta eta Intxaurrondoko herritarrentzat barrutia erreferentziazko instituzioa bihurtu dadin”.

Hori guztia lortzeko, EH Bilduten ustez “ezinbestekoa” da herritarrek administrazioarekin dituzten hainbat tramitazio barrutian bertan egin ahal izatea. “Honek dakarrelako, EH Bilduren ustez, instituzio honen ezagutza eta bere erreferentzialtasuna indartzea eta handitzea”, adierazi dute.

Txanpontxok dakartza auzoetako lehen jaiak (eta txokolatezko txanponak)

Irutxuloko Hitza — 2026-05-01 00:00:41

Maiatzera heldu da egutegia eta bidebietarrek gorriz markatuta dituzten egunak gertu dira. Atzera kontaketa amaitzear dira jada: hiru egun, besterik ez. Jai hauen esperoan daudenak, ordea, ez daude soilik Bidebietan. Izan ere, hilabetetan luzatuko diren Donostiako auzoetako jaien lehen geltokia baitira Txanpontxo jaiak, festazaleen pozerako. Hemen daukazue egitarau osoa.

Ostegun arratsaldean jaitsiko da jaiei izena eta izana ematen dien pertsonaia Guardaplata bidetik, 17:30ean, Jaxikipe txarangak, erraldoiek eta buruhandiek lagunduta, eta auzoaren historiari esku emanez, —Moneta eta Guardaplata baserriak baliatzen baitzituzten itsas gizonek eta nekazariek beraien diru trukeetarako— txokolatezko txanponak eta gozokiak banatuko dizkie haurrei. Ordu eta erdi geroago pregoia botako du eta kuadrillen txanda izango da, aldapan behera egiteko.

Irribarre eta esku handiko pertsonaia gorpuzteko ardura Haizea Miranda gazteari egokitu zaio. Oso pozik dago. «Bizitza guztia, txiki-txikitatik parte hartu dut Txanpontxoren jaitsieran. Jaiak iristeko irrikaz egoten nintzen Txanpontxo ikusteko. Aurten ni izateak ilusio handia egiten dit», aitortu du. Lehen, haur txokoak aukeratzen omen zuen ardura hori hartuko zuena, baina azken urteotan, jai batzordeak bere gain hartu du. Proposamen asko jasotzen omen badituzte ere, urteren batean kostatu zaie pertsona topatzea. Aurten ez, Miranda bera antolatzaileei batu baitzaie.

Zortzi dira taldean, eta erdia, berriak dira. Horrez gain, gazteak ere badirenez, erreleboa badela bermatu dute. Duela bi bat hilabete batu ziren antolaketara, horregatik, bi hamarkada daramatzan Marisa Pedregosak dio aurten gaizki daramatela prestaketa. Urtarrilean hasi ohi dituzte zereginak, baina «berandu eta atzeratuta» joan dira. Lanpetuta badabiltza ere, ziur egun handietarako dena itxita izango dutela.

Mirandarekin batera, Udane Berruezo da beste fitxaketa berrietako bat. Urteak zeramatzaten haur jardueretan edo txosnan laguntzen eta aurten parte izatera gonbidatu dituzte, onartu dutenez, «betiko auzotarrak eta saltsa guztietako perrexila» direlako.

Antolatzaileen esanetan, janarekin eta musikarekin lotutako jarduerak dira arrakastatsuenak. Horietako aukera ugari daude egitarauan

Natura, gai

Natura hautatu dute gai, eta ondorioz, kolore berdea du jaien kamisetak. Halaber, horri lotutako mozorroak jantzi beharko dituzte, bai mozorro festan, bai inauteri danborradan. Animaliak, landareak, maitagarriak… hamaika aukera ematen ditu eta horixe espero dute, adimena martxan jarri eta askotariko pertsonaiez betetzea larunbat arratsaldean auzoa. Haurren txanda izango da lehenik, ondoren, danborradarena, eta azkenik, ia gauerdian, helduena.

Mozorro festaren parte hartzea sustatu nahian, urteak dira gai bat aukeratzen dutela. Hortaz, bai haurrek bai helduek adimena martxan jarri eta horri lotuta jantzi beharko dute. Horren aurretik, iaz hasitako bideari jarraituta, Thamessis konpartsak antolatutako inauteri danborradan izango dute beren jantzia erakusteko aukera. «Iaz egin zuten lehenengoz. Helburua mozorrotu eta dantza egitea da. Ohiko moduan jo beharrean, koreografia errazak —eta ez hain errazak— egitea», zehaztu du Berruezok.

Urtero jarduera pare bat barneratzen ahalegindu arren, aurten, ez dute berritasunik. Are gehiago, baten bat galdu dute bidean. Iaz, jaietako tradizio bat izandako Herri Krosa berreskuratu zuten, hamarkada inguruko etenaren ondoren, eta arrakastatsua izan bazen ere, antolatu zuten boluntarioek ez egitea erabaki dute.

Arrakasta duenari eutsi diote, bi ardatz nagusirekin: musika eta jana. Bost bat urte dira DJ-ak dakartzatela bosgarren blokeko agertokira, eta auzotar ugariz gain, kanpotik ere jendetza etortzen da. Mitx DJ-ak girotuko du larunbat gaua, eta Jo Ta Txok jaien agurra. Erakarmen handia du ere Txanpontxo Rock jaialdiak. Ostiralean, Band Jovi, Kontraband eta Infama taldeek joko dute zuzenean. Jatekoetan, berriz, paella, oilasko edo sardina jatea, saltseroen afaria, kuadrillena… Patata tortilla lehiaketa ere gero eta parte hartzaileagoa da; iaz, hamazazpi izan zituzten aukeran.

Motorrak berotzen hasteko, astelehenetik izango da jardueraren bat, esaterako, Zorionak Marimotots ikuskizuna, iazko arrakasta errepikatzeko gogoz. Horretarako eta gainerakoetarako, eguraldi ona besterik ez dute eskatu antolatzaileek.

Bertsioen gaua antolatu dute Txanpontxo jaietan

Irutxuloko Hitza — 2026-02-19 11:29:53

Maiatzaren 8an izango da Bidebietako XVI. Txanpontxo Rock festa. Bertsioen gaua izango da, eta hiru taldek parte hartuko dute. Band Jovi tributu talde arrakastatsua izango da esanguratsuena. Noski, Bon Joviren abestiak eskainiko dituzte. 10. urteurren bira egiten ari dira, eta Bidebietatik pasatuko dira.

Beste bi taldeak, berriz, Kontraband bertsio taldea eta Infama dira. Emanaldiak 22:00etan hasiko dira Serapio Mujika kaleko 33. zenbakian dagoen futbol kantxan. Antolatzaileek nabarmendu dutenez, karpa estali handi bat jarriko dute kontzertuetarako.

Kontadores gorputz eta mami aldatuko dute

Irutxuloko Hitza — 2026-02-16 09:52:01

Kontadores eraikinak bide berri bati ekingo dio. Aro bat osatuta, udalak eta aldundiak hura egokitzeko eta aktibatzeko aurreproiektua aurkeztu zuten ostiralean. Hala, Kolab Kontadores bilakatuko da, auzorako erreferentziazko laborategi eraikina eta espazioa. Aurreikusi dute behin betiko proiektua urte amaierarako izatea eta lanak datorren urtean hastea.

Asmoa da Kontadores ikaskuntzara, lankidetzara, proiektuak sortzera eta gazte ekimenei laguntzera bideratutako “gune ireki eta dinamiko” bihurtzea; gazteek benetako babesa izan, eta aktiboki parte har dezaten. Hala ere, proposamena gazteen eremutik harago doa, eta belaunaldi arteko eredu bat planteatzen du gazteen eta adinekoen arteko bizikidetza bultzatuko du, esperientzia trukea, auzo sareen sendotzea eta auzoaren aniztasunetik komunitatea eraikitzea sustatuz.

Gazteria zinegotzi Iñigo Garciaren hitzetan, “proiektu honen helburua ez da soilik eraikin bat prestatzea, baizik eta Bidebieta indartzea eta auzoaren eskaera historikoari erantzutea, entzunez eta hitz eginez”.

Maushaus arkitektura estudioak egindako aurreproiektuaren arabera, egun gaztelekua eta Gazteria Saila dauden beheko solairua gazteen topagune, parte hatzerako eta sormenerako gunea izango da, ikuspegi irekiagoarekin eta eraikinaren gainerakoari lotua. Gainera, egun erabilerarik ez duen hirugarren solairua berreskuratuko dute, kultura, prestakuntza eta komunitateari lotutako “askotariko erabilera berriak” hartzeko; ekipamendua handituz.

Lehen eta bigarren solairuetan, aldiz, ADSIS Fundazioa egongo da, eta elementu berritzaile gisa, hiri baratzeak osatutako landare estalki bat izango du. Estalkiak, higiezinaren ingurumen iraunkortasuna hobetzeaz gain, gune pedagogiko eta gizarteratzeko gune gisa funtzionatuko du, ikaskuntza praktikoa eta naturarekiko kontaktua erraztuz.

Azkenik, eraikinaren sarrera auzoari irekitako gunea izango da. Diseinuak argitasuna, espazioen malgutasuna eta askotariko erabileren bizikidetza lehenesten ditu.

Ekialdeko danborradak, iruditan

Irutxuloko Hitza — 2026-01-20 19:50:44

Donostiaren ertzetan ere entzuten dira danbor eta upel hotsak. Baita jo ere. Bazkalostetik iluntzera bitartean ibili dira kalez kale Altza, Bidebieta eta Intxaurrondo auzoetako danborradak. Hau da, ekialdekoak.

Horietako batzuen bidea konpartitu du hedabide honek. Intxaurrondoko Artzak Ortzeok eta Zulo Zahar, Altzako Kosakos eta Harri Berri Oleta —aurten bigarrenez atera dira—, eta Bidebieta danborra da, auzoa alaitzeaz arduratzen dena.

Jarraian ikus dezakezue irudi bilduma:

Frankismoan errepresaliatutako emakumeen testigantzak jasoko dituzte Herreran

Irutxuloko Hitza — 2025-10-23 12:53:01

Ekialdeko Barrutiko Berdintasun Lantaldeak egitasmo bat jarri du martxan, Donostiako Udaleko Berdintasun Sailarekin eta Aranzadi Zientzia Elkartearekin elkarlanean, frankismoaren errepresioa pairatu zuten Altzako, Bidebietako eta Intxaurrondoko emakumeen ahozko testigantzak jasotzeko. Emakumeen testigantzak ez ezik, LGTBI komunitateko pertsonen errepresio esperientziak ere jasoko dituztela zehaztu dute.

Ione Zuloaga Muxika Aranzadiko historialari eta ikertzailea izango da testigantzak jasotzeko arduraduna, eta hiru saio antolatu dituzte horretarako: urriaren 29an, azaroaren 5ean eta azaroaren 12an. Hiru saioak Herrera Kirol Elkartean izango dira (San Luis Gonzaga plaza, 8), 18:00etatik 20:00etara. Testigantzak bildu eta erregistratzeko, bertan egongo da Zuloaga, eta “emakume horien sufrimendua eta ausardia berreraikitzea eta aitortzea ahalbidetzen duen daturen bat partekatu dezaketen senideak edo pertsonak” gonbidatu dituzte antolatzaileek.

Nabarmendu dute, bestalde, emakumeen eta LGTBI kolektiboko pertsonen aurkako errepresio frankista askotarikoa izan zitekeela, eta guztien inguruko testigantzak direla baliagarriak: “Exekuzioak, espetxeratzeak, erbesteratzeak, bortxaketa edo abusu sexualak, seme-alaben lapurreta, umiliazio publikoak, ondarearen lapurreta edo suntsiketa, isunak, etengabeko zaintza, lana oztopatzea edo galtzea, euskara transmititzeko debekua, administrazio publikoan edo Elizan izapideak ukatzea, irainak eta abar”.

Zuloagak denbora asko darama emakumeek frankismoan pairatutako errepresioa ikertzen, eta 1936-1945 artean errepresio frankista jasan zuten emakumeak. Gipuzkoako kasua lana argitaratu zuen joan den urtean, Aranzadiren eskutik. Bestalde, horri buruzko hitzaldi mamitsua eskaini zuen duela gutxi Donostian, Gipuzkoako zein Donostiako zenbait kasu adierazgarri xehatuz; hitzaldiaren kronika egin zuen IRUTXULOKO HITZAk, eta hemen daukazue irakurgai.

Sei kultur laborategi eta zortzi pilula, Kontadoreseko eskaintza berrian

Irutxuloko Hitza — 2025-09-29 12:36:15

Bidebietako Kontadoresek udazken eta neguko ikastaro eskaintzaren berri eman du. Zehazki, 18 eta 30 urte arteko gazteei zuzendutako sei kultur laborategi eta zortzi pilula aurrera eramango dituzte bertan urria eta martxoa bitartean, eta, guztira, 85 ikaspostu daude. Antolatzaileen esanetan, proposamenak gazteen interesa, beharrak eta zaletasunak kontuan hartuta prestatu dituzte, baita haien “poltsikora egokitutako prezioarekin”.

Berrikuntza gisa, ohiko laborategi luzeez gain, formatu txikiko proposamenak ere badira eskaintzan. “Pilulak” izenarekin, arratsalde bat iraungo duten gai edo diziplina zehatz bati buruzko prestakuntza edo sorkuntza esperimentazioez gozatzeko aukera izango dira.

Hells. Urriaren 30etik urtarrilaren 15era, ostegunetan, 18:30etik 20:00etara. Maria Delassek dinamizatua. Gehienez, hamabi partaide. Prezioa, 18-24 urte: 22,50 euro; 25-30 urte: 24,75 euro.
El placer del teatro improvisado. Urriaren 18tik azaroaren 15era, larunbatetan, 17:00etatik 19:00etara. Julian Gilek dinamizatua. Gehienez, hamalau partaide. Prezioa, 18-24 urte: 12 euro; 25-30 urte: 13,20 euro.
Con Branding y a lo loco. Azaroaren 19tik martxoaren 18ra, asteazkenetan, 18:00etatik 20:00etara. Carlos Ndungmandumek dinamizatua. Gehienez, hamar partaide. Prezioa, 18-24 urte: 48 euro; 25-30 urte: 52,80 euro.
Dancehall. Urriaren 14tik otsailaren 10era, astearteetan 18:30etik 20:00etara. Andrea Vitoriak dinamizatua. Gehienez, hamasei partaide. Prezioa, 18-24 urte: 31,50 euro; 25-30 urte: 34,65 euro.
Oinarrizko argazkilaritza analogikoa, azaroaren 4tik abenduaren 2ra, astearteetan, 17:00etatik 20:00etara. Paula Andionek eta Eneko Miguelezek dinamizatuta. Gehienez, zortzi partaide. Prezioa, 18-24 urte: 26,25; 25-30 urte: 28,80 euro.
Mahaiondokoa: zeramikazko baxera laborategia. Urriaren 24tik urtarrilaren 23ra, ostiraletan, 17:30etik 20:00etara. Jone ZZ-k dinamizatua. Gehienez, hamar partaide. Prezioa, 18-24 urte: 60 euro; 25-30 urte: 66 euro.

Gipuzkoako Foru Aldundiaren Treba Gazteak programari esker, sexualitatea, ongizate emozionala eta begirada kritikoa landuko dira zazpi pilulatan. Era berean, Euskadiko Gazteriaren Kontseiluarekin batera, emantzipazioa gaia lantzeko, Nire lehen katilua, nire lehen etxea pilula aurrera eramango dute. Urriaren 2an aurrera eramango dute, 18:00etatik 20:00etara. Saioa doakoa da eta gehienez hogei lagunek parte har dezakete. Gainerako pilulak, berriz, dantzari lotutakoak dira: afrodance, vogue, burlesque eta twerk.

Jardueren helburua gazteak mugimendutik, sormenetik eta euren ongizatetik erlazionatzeko espazioak sortzea da. Hortaz, laborategietan, nork bere burua ezagutzeko, taldean gozatzeko eta sormen prozesuak partekatzeko aukera izango dute partaideek.

Oro har, 18 eta 30 urte bitarteko gazteei zuzenduak dira eta hirian erroldatutakoek dute lehentasuna. Edonola, 18 urtez azpikoek eta 30 urtez gorakoek ere parte hartzeko aukera izango dute, egokitzat joz gero eta plaza libreak egonez gero.

Loiola eta Bidebietako anbulatorioen ordutegia moldatuko dute udaran

Irutxuloko Hitza — 2025-06-19 09:08:01

Osakidetzak lehen arretako zentro batzuetako ordutegia murriztu eta beste batzuk itxi egingo ditu udan, langileen oporraldiei eta zerbitzuaren beherakadari egokitzeko. Donostiari dagokionean, Loiolako anbulatorioak jada murriztu du bere ordutegia 08:00etatik 17:00etara, eta hala mantenduko du irailaren 30era arte. Bidebietakoak, berriz, uztailaren 21etik abuztuaren 31ra moldatuko du, 08:00etatik 15:00etara bitartean.

Osasun zentro gehienetan, %63a, mantendu egingo du bere ordutegia, eta ez dute inolako moldaketarik izango. 37 anbulatorio unean-unean itxiko dituzte, baina ez modu jarraituan. Edonola, Osakidetzak bere webgunean egunero berrituko du lehen arretako zerbitzuen ordutegiari buruzko informazioa.