Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Luis Garcia Lozano omendu du udalak, plaka batekin

Irutxuloko Hitza — 2026-06-06 18:47:11

Foruen pasealekuko 4. zenbakiaren parean gogoratu dute eguerdian 1991ko urtarrilaren 2an ETAk eraildako Luis Garcia Lozano Lurreko Armadako koronela. Udalak bere omenezko plaka bat jarri du bertan, Etxaide kaleko eta Foruen pasealekuko bidegurutzeko semaforoan autoa gelditzean bi etakidek metrailetaz tiro eginda hil zuten lekuan.

Omenaldi ekitaldi xumean, Garcia Lozanoren senide eta lagunez gain, Jon Insausti alkatea eta udal taldeetako ordezkariak bildu dira. Ekitaldia udalak duela bi legealdi terrorismoaren eta indarkeria politikoaren biktimei gune publikoan ikusgarritasuna emateko bultzatutako egitasmoaren parte da. Hala, 38 dira orain arte jarritako oroigarriak

Cetinan (Zaragoza) jaioa, Amarako bizilaguna eta bost seme-alaben aita zen Garcia Lozano. 56 urte zituen hil zutenean. Lurreko Armadako koronela eta Gipuzkoako jarduneko gobernadore militarra zen.

Metroaren lanek eragindako Loiola eta San Martin kaleen urbanizatzea esleitu dute

Irutxuloko Hitza — 2026-05-07 16:32:33

Euskal Trenbide Sareak 1, 2 milioi eurotan esleitu dio Jaizubiari Topoaren lurpeko saihesbidearen obrak jasan dituzten Loiola eta San Martin kaleen urbanizazio lanak. Enpresa esleipendunak zortzi hilabeteko epea izango du lanak osatzeko. Esku hartuko duten azalera 3.500metro koadro ingurukoa da.

Urbanizazioaren ondorioz, San Martin kaleak hiru errai izatetik, oinezkoentzat izatera pasako da, Urbieta eta Hondarribia kaleen arteko tartean. Izan ere, obrek eragindako mozketara arte, ibilgailuen trafiko bolumena handia baitzen Urumea ibairako norabidean. Halaber, bidegorria ere izango du tarte horrek.

Jarduketak memoriaren eta erabilera berrietara egokitzeko beharraren arteko oreka lortu nahi du, eta, amaitzeko, eragindako zerbitzuak berrezarriko dituzte, hala nola saneamendu, euri eta hornidura sareak, hiri altzariak, argiak eta lorategiak. Azken urtean, Erdialdean obren I. fasea hasi zenetik okupatutako azaleratik 3.7o0 metro koadro itzuli zaizkio pixkana hiriari.

Frantzia pasealekuko zirkulazioan eragozpenak izango dira, maiatzaren 7tik 16ra

Irutxuloko Hitza — 2026-05-06 15:03:17

Datozen asteetan, Frantzia pasealekuko zirkulazioak aldaketa garrantzitsuak jasango ditu, Euskal Trenbide Sareak (ETS) Egiako behin-behineko pasabidea desmuntatzeari ekingo baitio. Obra hauek egiteko, garabi handi bat jarri beharko dute pasealekuan, eta horrek ibilgailuen zein oinezkoen mugikortasuna baldintzatuko du, hilaren 7tik 16ra arte.

Aldaketak trafikoan

Frantzia pasealekuak errei bakarra izango du zabalik, egun horietako tarte gehienetan:

Maiatzaren 7tik 9ra: 24 orduetan zehar.
Maiatzaren 10ean: 00:00etatik 14:00etara (une horretatik aurrera erabat itxiko da).
Maiatzaren 11tik 15era: 06:00etatik 22:00etara.

Bestalde, pasealekuaren eta Iztuetaren arteko elkargunea erabat itxita egongo da (garaje partikularretarako sarbidea izan ezik):

Maiatzaren 10eko 14:00etatik maiatzaren 11ko 06:00etara.
Maiatzaren 11tik 15era, 22:00etatik 06:00etara.
Maiatzaren 16an, 06:00etatik 14:00etara.

Ondorioz, autobus eta taxi geltokiak beste kokaleku batzuetara lekualdatuko dituzte, behin-behinean.

Aldaketak oinezkoentzat

Oinezkoen joan-etorrietan ere aldaketak egongo dira:

Ezkerreko espaloia: Frantzia pasealekuko 18-20 atarietara soilik baimenduko da sarbidea.
Eskuineko espaloia: Gipuzkoako Sendagileen Elkargoaren ondoan dagoena irekita egongo da eta trafikotik babestuta.
Pasabideak: Sendagileen Elkargoaren ondoko oinezkoen pasabidea itxi egingo da eta semaforoak kendu egingo dira.

Udalak eremu horretatik autoen zirkulazioa ahalik eta gehien mugatzea eskatu du, eta, era berean, joan-etorriak aldez aurretik planifikatzea eta behin-behineko seinaleei zein langileen jarraibideei arreta jartzea gomendatu du.

Aldaketak autobus zerbitzuan

Dbusek jakinarazi duenez, maiatzaren 7tik 10era (eguerdira arte) eta maiatzaren 11tik 15era (egun osoan), autobusek Norteko Geltokiko ohiko geralekua baino metro batzuk lehenago hartuko dituzte bidaiariak:

17, 24 eta 37 lineak Frantzia pasealekuko 12. zenbakian geldituko dira (behin-behineko zutoina).
45 linea, Frantzia pasealekuko 9. zenbakian (behin-behineko zutoina).

Hala, maiatzaren 10ean (14:00etatik aurrera), maiatzaren 11tik 15era (22:00etatik aurrera) eta maiatzaren 16an (eguerdira arte), hiriko hainbat autobus lineek ibilbidea aldatuko dute:

17 eta 24 lineek, Colon eta Norteko Geltokiaren ordez, Kursaalean eta Bilbo plazan egingo dituzte geldialdiak.
37 lineari dagokionez, Askatasunaren Hiribidea 7 eta Norteko Geltokia zerbitzurik gabe geratuko dira, eta autobusak Gipuzkoa plazan eta Federico Garcia Lorca 6an geldituko dira.
45 lineak Okendo kalean (Camino kalearen izkinan) eta Askatasunaren Hiribideko 18. zenbakian hartuko ditu bidaiariak.

Ramon Saizarbitoriak idatzitako Donostian barrena

Irutxuloko Hitza — 2026-04-24 08:14:04

Liburuaren Eguna da apirilaren 23a, Miguel de Cervantes eta William Shakespeare idazleen heriotza egun partekatua omen. Hori, ordea, kondaira besterik ez da. Zergatiak zergati, liburu azokak hartu du beste behin Gipuzkoa plaza. Salmenta postuekin batera, zenbait jarduera antolatu ditu Donostia Kulturak, ohi moduan. Horietako bat, duela bi egun urteak bete zituen Ramon Saizarbitoria idazle donostiarra eta bere literatura ardatz izan dituen ibilaldi literarioa.

Hogei bat laguneko taldeak errazago entzutea ahalbidetzeko, entzungailu bana hartu dute partaideek. Hala, belarrira “xuxurla” egingo ziela esan du gidari lana egin duen Itxaro Borda idazle baionarrak. Kontakizun gozoaren lehen azalpenak lekuan bertan eman ditu, Donostia Kulturaren karpan. Esan duenez, izan du hausnarketan ari zen Saizarbitoriarekin Urumea ertzean paseoan gurutzatzeko zortea. Donostiarra dela badaki ere, bere auzoa “misterio bat” zaiola esan du Bordak, norbaitek laster argitu diona: Erdialdea, Grosen bizi bada ere. Datu biografikoak, Friburgon egindako soziologia ikasketak, Euskadiko Ezkerrako zinegotzi garaia… “Polisean inplikatuta” egoteaz gain, gauza askoren hasieran ere izan zela aipatu du baionarrak. Esaterako, Lur argitaletxearena, “funtsezkoa, besterik ez zegoelako”, edota zenbait literatur aldizkarirena, esaterako, Oh Euzkadi, Koldo Izagirre altzatarrarekin batera.

1960-1970eko hamarkadetan sortzen ari zen literatur berrian hiriak indarra izan zuen, bereziki, bi idazle nabarmenen eraginez: Txillardegi eta Saizarbitoria bera. Idazle asko “atera” ziren, eta “intimoagoa den” literaturaz harago, kantagintzan ere izan zen loraldia. Ez dok Amairu edota Lourdes Iriondo aipatu ditu Bordak, nabarmenduz, “galdua genuela dirudien” memoria hori berreskuratzen ondorengo belaunaldiak egiten ari diren ahalegina. Halaber, garai horretan modernismoak, aitzindari izateko nahiak, zuen pisuaz ere aritu da.

Egunero hasten delako, Ehun metro eta Ene Jesus, “eromenari buruzkoa, gutxitan aipatzen da eta nik ere ez dut aipatuko”. Hemezortzi urteko etenaren ondoren, Hamaika pauso, “beste mugarri bat”, Bihotz bi, Gorde nazazu lurpean, Gudari zaharraren gerra galdua, Rossetiren obsesioa, Bi bihotz, hilobi bat, Kandinskyren tradizioa, Martutene, Lili eta biok eta, oraingoz, Miren eta erromantizismoa. “Eremu zabala hartzen duen literatura da, 60 urtean sortua izan delako”. Testuinguruan kokatuta idazlea eta 2019raino luzatzen den obra, lehen kokalekurantz abiatu aurretik, iradokizuna eta ohartarazpenaren arteko zerbait egin die gidariak: “Galderak badituzue, ez dakit dena; baina, egia da, dena irakurri dudala”.

Plaza Berritik Zuloagara

Plaza Berria. Ehun metro amaitzen den tokia. Hornitzaileen ibilgailuen artean, “hiriaren bihotza, festen gunea” hartu dute partaideek. Liburuetan oinarrituta egindako lehen filmetako bat izan zen Saizarbitoriaren bigarren nobela. Santa Mariatik horra bidea egiten du Jon pertsonaiak nobelan eta inoiz neurtu duela onartu du Bordak. Frankismo betean, lehen saiakera zentsurak atzera bota zion Saizarbitoriari. Iparraldeko sariketaren batera aurkeztuta argitaratzen ahalegindu zen, baina ez zuen irabazi. Azkenean, 1976an argitaratu zen, eta Bordak kontatu duenez, “askatasun zirrikitu bat” izan zen.

Eleberri arrakastatsua izan zen garaian, eta hala izaten jarraitzen du, hein batean eskoletan irakasten delako. Baionarraren ustez, belaunaldi berriak ETAren mundura hurbiltzeko bidea da askotan. Sakelakoan idatzitako oharrak begiratu ditu Bordak, noizean behin, leku bakoitzerako prestatua zuena azaldu duela ziurtatzeko. Handik, Zuloaga plazarantz egin dute, ehun metroak osatu eta “gazte garaiko giroari buruz” gogoeta egiteko gonbitarekin.

Han, inguruan jolasean haur talde bat zebilela, Egunero hasten delako izan du hizpide, Iparraldera begiratzeko itsasaldetik, izan ere, hirian gertatzen ez den liburu bakarra da, Frantzia eta Suitza artean kokatuta. Gisele gaztearen istorioa jasotzen du, Mauricek “behartuta” haurdun gelditzen denetik. Riemmesera doa abortatzera, haurra edukitzeko baliabiderik ez duelako.

Garai hartan abortua “itsusia” zen, legez kanpokoa izateaz gain, eta modu klandestinoan gauzatzen zituzten eta emakume asko hiltzen ziren infekzioengatik. 1969an argitaratu zen, abortuaren legeztatzeari buruzko ahotsak entzuten zirenean Frantzia aldean. “Adi zegoen hemendik kanpo gertatzen zenari”. “Eztabaida guztiak sartuko ditu nobelan, aldekoak eta kontrakoak”. Orain, politikariak abortuaren legeetan atzera egitera tentatuta dauden honetan, obra berriz irakurtzea gomendatu die partaideei.

Hausnarketa ugari egin ditu Bordak Saizarbitoriaren obrari buruz. Adibidez, bere lanetan Donostia kontatzen duela uste du, Ibon Sarasolak Donostia garaikidea kontatzen duen moduan, “bere argi-ilunekin”. Hala, lotu du Hamaika pauso liburuarekin. Ia hogei urteko isiltasunaren ondoren, Hondarribia, Donostia eta Bartzelonaren artean girotutako lana kaleratu zuen Saizarbitoriak. ETAren garaiko gertakari bat jasotzen du, “anbiguetatez betea”. Partaideei galdetu die irakurri duten eta parte har zezatela zer sentitu zuten, non irakurri zuten… kontatuz. Ez du erantzunik izan, beraz, hurrengo geltokirantz bidea hartu dute.

Okendotik, abiapuntura

2012an kaleratu zuen Martutene-ren txanda izan da Okendon. Bere nobela luzeena. Max Frishen Montauk eleberria du erreferentzia nagusi, eta haren Lynn protagonista bere orrien artera eraman zuen donostiarrak. Desagertzen ari den Martutenen kokatzen du historia eta bi bikote ditu ardatz, “beti bizpahiru bikote daude”, bat klase burges ertainekoa, medikuak, eta bestea, idazleak. Lynn izeneko neska gazte atzerritar batek dena nahasiko du.

Eleberria ETAk armak utzi eta desegitea erabaki ondorengo urtean argitaratu zuten eta, hain zuzen ere, armagabetzearen urtebetera. “Egoera berri bat irekitzen zaio idazleari eta gizarteari” eta, hala, “eta orain zen?” galderari erantzuten diola. Lynn euskal mundu itxira heltzen den kanpoko airea da, bi bikoteen bizitzara. Bere iritziaz ari dela ohartarazita, Bordaren arabera, metafora bat da “neke handitan aterako den Euskal Herri berriarena, egun bizi duguna”.

Hariak ondoren etorriko zen Lili eta biok eleberrian ere jarraitzen du, “batasuna” ikusten du bien artean Bordak, eta dioenez, ez daki nola ez duten oraindik telesail bilakatu. “Pasionatu gaitu, kasik Goenkale-k bezain beste”, onartu du.

Ordu eta erdiko bidea abiapuntuan amaitu dute. Eguerdiko sirena entzun berritan gertatu da, azken gonbidapen batekin: “Saizarbitoriaren putzura jauzi egin eta bertan ito”.

Raimundo Sarriegi omenduko dute bihar udal txistulariek

Irutxuloko Hitza — 2026-04-22 15:12:59

Donostiako Udaleko Txistulari taldeak bi hitzordu berezi ditu aste honetan. Bihar, hilak 23, Raimundo Sarriegiren omenezko ekitaldia aurrera eramango du, bere heriotzaren urteurrenean, eta igandean, hilak 26, berriz, Arabako doinuekin osatutako kontzertua, San Prudentzio egunaren bezperetan.

1913ko apirilaren 23an hil zen Raimundo Sarriegi konpositorea. Horregatik, bera oroitzeko, Sarriegi plazako plazaren monumentu aurrean kokatu eta haren obraren parte diren hainbat pieza joko dituzte, 10:30ean hasita. Bretxako merkatariek lore sorta eskainiko diote maisuari eta dantzari talde batek Ohorezko kontrapasa dantzatuko diote. Ekitaldia Donostiako Martxarekin amaituko da. Bihar, Liburuaren Nazioarteko Eguna ere badenez, diana joko dute omenaldiaren aurretik liburu azoka egongo den Gipuzkoa plaza inguruan.

Bestalde, igandean, ohiko kontzertuak Araba izango du ardatz, asteartean San Prudentzio eguna dela iragartzeko. Hala, entzungai izango da Arabako txoko eta efemerideei eskainitako programa. Beste lan askoren artean: Añana, Baranbio, Inguruko dantza, Hartzaren ehiza edo Zeledon.

Pasio berak bultzatuta, tradizioa bueltan ekarriko dute 400 bat lagunek

Irutxuloko Hitza — 2026-04-03 11:00:05

1976eko Aste Santuan irten zen azkenekoz prozesio bat Donostian. Mende erdi geroago, galdutako tradizio hori berreskuratu, hautsa kendu, eta distira berri bat eman dio herritar talde batek. Nondik norakoen berri izateko, Artzain Onaren katedralera bertaratu da kazetaria, martxoaren 24an, 19:30ak bueltan. Entsegua egiten ari dira 70 bat lagun: hiru pausoak garraiatzen, daramatzaten haiek babesten eta danborra jotzen. Une batean, eliza berriko bisitariek joan egin beharko dute, eta ateak itxita daudela, Fernando Prado Ayuso gotzaina ere agertuko da. Artean, hamar egun eskas gelditzen zaizkie gaurko une handia heltzeko.

Josune Otxotorena da egitasmoaren sustatzaileetako bat. Lagun artean sortutako zerbait izan zela azaldu du. Bilboko eta Iruñeko prozesioetan ikusitako giroak galdera bat piztu zien: “Zergatik Donostian, ez?”. Euren iritzian oinarrituta topatu zuten erantzuna aurrera aterako litzatekeela izan zen. Partekatutako ilusio hori zuen taldetxo bat bazirela ikusita, sei kide, hiruna gizon eta emakume, Artzain Onera joan ziren, erretorearekin hitz egitera. Halaber, azken urteetan, zaletasunez, pausoak berreskuratzen ari direnekin ere elkartu ziren. “deia zoragarria iruditu zitzaien. Gogotsu zeuden eta nolabait taldea eman genien”. Hala, 1927an eratutako Nazareteko Jesusen Kofradia eta prozesioa berreskuratzeko erronkari heldu zioten.

Usteak, baieztapen

Berehala, ordea, kezka bat sortu zitzaien: Denbora emango ote zien? Urri inguruan lanak banatzen hasi ziren eta bi hilabetera, interesa zuen edonori zabaldu zioten. Orduan, jaso zuten erantzunak zalantza guztiak argitu eta baieztapenak ekarri zizkien. “Ezustekoa izan zen”, aitortu du Otxotorenak, “400 bat pertsona batu dira, beren ekarpena egiteko. Ez genuen uste horrelako oihartzunik izango genuenik, ezta jendearen erantzuna ere”.

Askotariko jendea erakarri dute, eta horixe da Otxotorenak nabarmendu nahi duena. “Adin, itxura, testuinguru sozial edo kultural… jende oso desberdina da. Izugarri gustatzen zait”. Sustatzailea fededunak eta kristauak dira, eta beraien fedea partekatzeko modu bat da. Batu zaizkienen artean, aldiz, beste motibazio batzuk dituztenak ere badaude: Jakin-minak edo zaletasunak bultzatu dituena, amari oparitu diona, senideren batek lehen parte hartzen zuelako, musika edo tradizioa gustuko dutelako… “Den-denak ongi etorriak dira”. Eta bakoitzak ere bere ekarpena egin du: josi, pausoak margotu edo garbitu, entseatzen lagundu, iraganeko prozesioei buruzko lekukotza eman…

Lekukotzeko ahalegina

Lehengo kofradiaren oinarrien gainean aritu dira, eta hura ez bezala, bertakotzeko asmoz, sustraiei tiraka txistuak eta danborrak sartu dituzte. Astero-astero bildu dira eta egin behar zena zehaztu ondoren, zereginak partitu dituzte. Prozesioa hutsetik antolatzeak lan eskerga eskatu du azken hilabeteotan.

Boluntarioek astero-astero egin dituzte bilerak eta lan saioak: abituak josten, pausoak margotzen, farolak garbitzen eta irudiak berritzen. Zenbait gastu ere badituzte, eta horiek ordaintzeko, urtean 35 euroko kuota ordaintzen du kofradiako kide bakoitzak, 25 urtez gorakoak badira. Parte hartzeko interesa dutenak catedraldelbuenpastor.org webgunearen bidez harremanetan jar daitezke.

Abituak, historikoan oinarritu dituzte, tunika zuri bat eta txano morea. Irudi edo pausoei dagokienez, berriz, badakite Donostiakoak ikusgarriak zirela, baina ez dakite zehazki non dauden orain. Hiru original berreskuratuko dituzte, baliatuko duten Nazaretarra elizan bertan zegoen, besteak, biak, Seminarioan. Ondo bidean, datorren urtean pausoren bat gehituko dute, nahia baitute zortziak berreskuratzea.

Arrakasta, taldea

Hain zuzen ere, beste bostak azken asteetan katedralean ikusgai daude. Batzuk prozesiorik ospatzen ez duten Gipuzkoako beste herri batzuetatik berreskuratu dituzte eta mantuetako batzuk ere utzi egin dizkiete. Irudia, moldatu dute kasuren batean, puskatuta zegoela baliatuta; jantziak zaharberritu dituzte baita elementu batzuk konpondu edo gehitu ere. Batek, esaterako, goroldioa du, norbaitek eramandakoa. “Oso polita izan zen. Norbaitek goroldioz betetako poltsa batzuk utzi zituen, anonimoki”.

Bidean sortu duten komunitate hori da garrantzitsuena, antolatzaileentzat. Edozein arazo edo behar izan duten bakoitzean, asko izan dira laguntzeko prest agertu direnak. “Gauzarik politena jendea da. Nolako ilusioa daukaten. Oso polita izaten ari da, horrekin ari gara disfrutatzen”, baieztatu du Otxotorenak.

Gaur dute estreinako prozesioa, baina erantzuna ikusita, etorkizunean Aste Santuko egun gehiagotara zabaltzea pentsatu al dute? Hausnartu beharko dutela onartu arren, orain ez da unea. “Egunetik egunera goaz, bidearekin disfrutatzen eta asimilatzen”; baina argi dute asmatu dutela: “Hemen dagoen gogo bat landu, lotu eta atera dugu”.

Ilusioa eta zirrara
Otxotorenak hanka minduta du eta ezingo du irten, beste modu batean parta hartuko du, datorren urtean egongo da aukera. Danborra joko dutenek astean hirutan edo lautan entseatzen dute, eta urte osoan zehar jarraitzeko nahia dutela adierazi dute. “Harrigarria da”. Horietako bat da Asun Lopez aietearra. Albistea ikusi zuen eta galdetegia bete zuen, “azkar batean” eta berehala jaso zuen onarpen mezua.

“Hemen egotea pasioa da niretzat. Gainera, Nazareteko Jesusenganako jaieraduna da. Nola edo hala sartu behar nuela pentsatu nuen. Eta, egia esan, pozik eta oso hunkituta nago, hau da, bizirik sentitzen naiz eta eta izugarrizko ilusioarekin”. Pausoa jarraitu besterik ez dela dio, erritmoa hartzen erraza dela; jotzen dituzten hiru piezetako bat, aldrebesagoa bada ere.

Danborraz gain, bestelako zereginetan ere parte hartu du, boluntarioak behar zituztelako zenbait zereginetarako: argiontziak garbitu, margotu… Taldean askotariko pertsonak daudela nabarmendu du, gazteak eta helduak, “pasada da topatu dudan jendea”. Intentsitate handiz bizi du eta egunak kontatzen egon da azken astean. “Barrutik oso desberdina da, oso hunkigarria. Emozio handiarekin bizitzen ari naiz”.

Egun handiaren zain

Nazaretarraren irudia garraiatu nahi zuen, baina horrenbeste jendek izena eman duenez, ezinezkoa izan da. Edonola, danborra jotzen ere pozik dago. “Bi danborradatan ateratzen naiz, danborrak zoratzen nau”. Lopezek desio zuena Asier Morenok lortu du. Izan ere, Parte Zaharreko 20 urteko gaztea Nazaretarraren irudia garraiatuko duenetako bat da. Fededuna da eta egunkariak ikusi zuen urte askoren ondoren prozesioa egingo zutela. Izena ematea pentsatu zuen, “ea zer geratzen den”, eta gertatu zena, baieztapena jaso zuela izan zen. Eta nahi zuen aukera esleitu ziotela, gainera. “Uste nuen pauso gehiago aterako zituztela eta jende gutxiagok izena emango zuela. Harritu egin ninduen, gazte ugari gaude, gainera”.

Irudi bakoitza eramateko zortzi lagun behar dira, eta atseden hartu ahal izateko, bi talde daude. Lau entsegu egin dituzte egun handiaren aurretik. Dioenez, sorbaldaren altuera antzekoa izatea da garrantzitsuena, pisua ondo banatu dadin. Zailagoa izango zela uste bazuen ere, ez da hala izan, koordinazioa da gakoa.

Emozioa nabari du eta gogotsu dago prozesioa bera nolakoa den ikusteko. “Ehun metroko prozesioa da, nahiko luzea, denak elkarren atzetik goaz. Gotzaina ere egongo da, musika banda…”.

Erdialde zahar etxea birgaitzeko lanak lizitatu dituzte

Irutxuloko Hitza — 2026-03-24 15:54:50

Donostiako Udalak Erdialde zaharren egoitza birgaitzeko lanak lizitatu ditu. 1.719.981 euroko aurrekontua du eta lanak egiteko hamabi hilabeteko epea. Duela hiru urte luze onartu zuten proiektua idazteko kontratua, eta atzerapenak atzerapen, obra adjudikatzeko urratsa egin du udalak.

Hirian erabiltzaile gehien dituen eta urte osoan zehar jarduera handia duen zentroa da. Idiakez kaleko 6. zenbakian dagoen lokalak hobetu beharreko arazoak ditu, hala nola segurtasun falta sute arriskuaren aurrean, irisgarritasun unibertsaleko mugak, osasungarritasun arazoak eta zaharkitze orokorra instalazioetan.

Lanei esker, zaharren egoitza handitu egingo dute, ezkerrean dagoen lokalaren azalera gehituz, eta lokalaren birgaikuntza funtzional, ingurumenekoa eta teknologikoa egingo da, haren gabeziak zuzenduz.

San Bartolomeko «garaipenaren» ondoren, «gardentasuna» falta dela dio Victor Lasak

Irutxuloko Hitza — 2026-02-25 17:40:18

Pozik agertu dira San Bartolomeko herritarren plataforma eta Ahal Dugu alderdia, gaur goizean udaletxean egindako agerraldian. Jon Insausti alkateak atzo jakinarazi zuen udal gobernuak behin betiko baztertu duela San Bartolomeko magalean merkataritza zentro bat eta lur azpiko aparkaleku bat eraikitzeko proiektua.

“Udal gobernuak onartu du San Bartolomen soilik parke publiko bat egongo dela, herritarren presioari eta Ahal Dugu-ren lan instituzionalari esker”, adierazi du Victor Lasak, Elkarrekin Donostiaren bozeramaileak eta Ahal Dugu-ko kideak. “Herritarren eta tokiko demokraziaren garaipena da. Orain gardentasuna falta da. Ez dakigu zein den sinaturiko kontratua, ezta ere inbertsio funtsarekin egindako akordioa eta konpentsazioa. Enpresa eraikitzaileek aise berreskuratu dute inbertsioa, eta ezin dute lursailarekin gehiago espekulatu”, nabarmendu du.

Partaidetza prozesua

Pasa den astelehenean, alkatearekin bilera egin zuen San Bartolomeko herritarren plataformak. Besteak beste, San Bartolomeko magalaren partaidetza prozesuaz aritu ziren. Udalak Aste Santurako aurreikusten du abiatzea, herritarren eta eragileen ekarpenak jasotzeko.

Magalaren erabilera aldatzeko eta egungo hirigintza plana baztertzeko, hiri antolamendurako plan orokorraren aldaketa partziala egin behar da. Hasierako onarpena ekainerako edo uztailerako onartu daitekeela uste du udalak. Behin betikoa, berriz, 2027ko uda baino lehen.

La Perla gunea bere horretan mantentzeko emakida 2045era arte berritu dute

Irutxuloko Hitza — 2026-01-28 10:53:53

Eusko Jaurlaritzak ontzat jo du La Perla gunearen emakida berritzea beste hogei urtez, 2045era bitarte. Erabakia atzo argitaratu zuen Euskal Herriko Agintaritzaren Aldizkariak (EHAA), eta, beraz, irmoa da. Hortaz, Donostiako Sustapenak aurkezturiko proposamena onartu dute. Emakida beste hamar urtez luzatzeko aukera ere jasotzen du; hau da, 2055era arte.

Lagapenak bere gain hartzen ditu talasoterapia, Bataplan diskoteka, Cafe de La Concha establezimendua, eta Donostiako Atletiko eta Eguzki kluben instalazioak. Orain, Donostiako Udalak lehiaketa publiko bidez adjudikatu beharko ditu gune horien erabilerak. Emakida berriak urteko 585.000 euroko kanona izango du.

Jon Insausti alkateak La Perla hiriko “sinbolo” bat dela nabarmendu du, eta guneak bere baitan dituen erabilerak “berritu” behar dituela. Hori bai, La Perlaren egungo eskaintza mantentzeko konpromisoa agertu du.

Gogoratu behar da, iazko apiriletik, Eusko Jaurlaritzaren eskumena dela Araba, Bizkai eta Gipuzkoako Kostaldeko zuzendaritza. Hori dela eta, La Perla gunearen emakida berritzeko prozesua udalaren eta Jaurlaritzaren artean bideratu dute.

El Rincon taberna itxi dute

Irutxuloko Hitza — 2026-01-06 09:38:21

Donostiako beste taberna maitatu batek agur esan du. Hain zuzen ere, Donosshopping atariak jakinarazi duenez, Erdialdeko Errege Katolikoen kaleko El Rincon taberna eta jatetxe ezagunak behin betiko bota du pertsiana. Urte luzeko ibilbidea egin du bertan tabernak, ia 60 urtekoa, hain zuzen ere.

Insaustik berretsi du San Bartolomen ez dutela merkataritza zentrorik jarri nahi

Irutxuloko Hitza — 2025-12-16 12:04:24

San Bartolomeko herritarren plataformak Jon Insausti alkatea interpelatu zuen atzo, udaletxean egindako agerraldi batean. Plataformaren bilera eskaerei erantzun ez izana egotzi zioten, eta San Bartolomeko aferan udal gobernuaz ez direla fio. Biharamunean, Insaustik kritika horiei erantzun die Tokiko Gobernu Batzorde osteko prentsaurrekoan.

Alkateak adierazi du “baikorra” dela gaiarekin, eta denbora pixka bat gehiago eskatu du. “Uste dut leku onera iritsiko garela. Horretarako, lana eta diskrezioa behar ditugu. Leku onera iristea niretzat da ez egotea merkataritza zentrorik eta aparkalekurik. Korapilo hori askatzeko, denbora pixka bat gehiago eta diskrezioa behar dugu. Hori lortzean, ez dut arazorik izango azalpen guztiak emateko”, azaldu du.

Plataformarekin bildu ez den arren, udala bizilagunekin “etengabe” harremanetan dagoela esan du: “Bilera eskaerak jaso ditugu, bai, baina ahal den neurrian zehazten ari gara. Plataformarekin ere elkartuko naiz, noski. Dena dela, gustatuko litzaidake beraiekin elkartzea albiste on bat emateko”.

Merkataritza zentroa eta aparkalekua baztertuta, San Bartolomen udal gobernuak beste eraikinen bat jartzeko asmorik duen galdegin diote Insaustiri. Ordea, ez du argitu etorkizuna. “Pausoz pauso goaz. Beste korapilo batzuk askatu behar dira, eta lortu behar duguna da merkataritza zentrorik ez egotea eta lur azpiko aparkalekurik. Hori lortzean, San Bartolomeren etorkizunaz hitz egingo dugu bizilagunekin eta plataformarekin”, adierazi du.