Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Loiolako Erriberako, Intxaurrondoko eta Groseko haurreskola berrien lanak bukatu dituzte

Irutxuloko Hitza — 2026-05-27 15:43:53

Donostiako Udalak lehen zikloko hiru haurreskola berrien obrak amaitu ditu, eta 2026-2027ko ikasturtean irekiko dituzte. Haurreskola berri horiek Loiolako Erriberan, Intxaurrondon eta Grosen daude, eta 89 plaza berri eskainiko dituzte zero eta bi urte bitarteko haurrentzat. Horren bidez, eskari historiko bati erantzuten zaio, hain zuzen ere orain arte eskaintza nahikorik ez zuten hiriko eremuetan.

“Haurreskoletako plaza berri bakoitza aurrerapauso zehatz bat da, emakumeek lan-bizitzaren eta seme-alabak zaintzearen artean hautatu behar ez izateko. Orain arte haurreskolarik ez zuten auzoetan eskaintza publikoa zabaltzea berdintasun-politika bat ere bada”, adierazi du Ane Oiarbide Berdintasuneko zinegotziak.

Eusko Jaurlaritzaren diru laguntza bati esker egin dira obrak. Ekarpen hori Europar Batasunak Next Generation EU funtsen bidez finantzatutako Suspertze, Eraldatze eta Erresilientzia Planaren barruan dago, eta 1.828.313,70 euroko aurrekontua izan du guztira.

Hiru haurreskola berriak

Loiolako Erriberako haurreskolak, Gabriel Laffitte plazan kokatua, 34 plaza eskainiko ditu: zortzi plaza, urtebetetik beherakoentzat, eta 26, urtebetetik bi urtera bitarteko haurrentzat. Intxaurrondokoak, Baratzategi kaleko 19. zenbakian, 21 plaza izango ditu, honela banatuta: zortzi, urtebetetik beherakoentzat, eta hamahiru, 1 eta 2 urte bitartekoentzat. Bestalde, Groseko Zemoria kaleko 20. zenbakiko haurreskolak ere 34 plaza izango ditu, eta horietatik zortzi urtebetetik beherakoentzat izango dira, eta 26, 1 eta 2 urte bitarteko haurrentzat.

Datozen asteetan matrikulazio prozesua abian jarriko da, herritarren arretarako UdalInfo udal zerbitzuaren bidez. Plaza esleipenaren kudeaketa Eusko Jaurlaritzaren zerbitzuaren ardura izango da. Zerbitzu horrek haurreskola publikoetarako sarbidea koordinatzen du, eta leihatila bakarra da haur hezkuntzako lehen zikloan plaza eskatzen duten familientzat.

“Emakumeak lan merkatuan berdintasun baldintzetan sartu eta mantentzeko faktore erabakigarrienetako bat da oraindik ere haur hezkuntzan plaza bat eskuratzea”, nabarmendu du Oiarbidek. Gaineratu duenez, “eskaintza publikoa, doakoa eta etxetik gertukoa bermatzea tresna eraginkorrenetako bat da berdintasunean aurrera egiteko eta emakumeek beren karrera profesionalaren eta seme-alaben zaintzaren artean hautatu beharrik ez izateko”.

Mariaren Bihotza luxuzko hotel bihurtzeko lizentzia onartu du udalak, araudiaren salbuespen bat baliatuta

Irutxuloko Hitza — 2026-05-21 16:08:06

Groseko Mariaren Bihotza eraikinean bost izarreko luxuzko hotel bat egiteko lizentzia onartu du aste honetan Nekane Arzallus Donostiako Udaleko Hirigintza zinegotziak. Hala baieztatu dute udaleko iturriek, El Diario Vasco egunkariak ostegun honetan aurreratutako informazioaren harira. Donostiako ostatu turistikoak mugatzeko hiri antolamenduko plan orokorraren (HAPO) aldaketaren behin betiko onartu zuen udalak urte hasieran, 2023tik indarrean zegoen behin-behineko muga behin betikotuz, baina hainbat salbuespen aurreikusten ditu muga horiek.

Hain zuzen ere, ondarea babestearen ingurukoa da salbuespenetako bat, eraikin eta etxe historikoei eragiten diena, arauaren arabera, eraikinak mantentzeko helburuarekin. Hain zuzen ere, Mariaren Bihotza B mailako babesa dauka Eraikitako Hiri Ondarea Babesteko Plan Berezian (EHOBPB), eta, beraz, presio turistiko handia jasaten duen Grosen moduko auzo batean egonda ere, posible da bertan hotel bat irekitzea. Hain zuzen ere, aipaturiko HAPOaren aldaketan, muga zorrotzenak dituzten auzoen multzoan dago Gros, Antigua-Ondarreta, Ibaeta, Erdialdea eta Ategorrieta-Ulia eremuekin batera —Parte Zaharrean mugatuta zegoen ostatu turistikoen irekiera, aurretik—.

Horrela, salbuespen hori baliatuta onartu dute lizentzia, Satrustegi dorrearekin eta Arte Ederrak eraikinarekin egin zuten moduan eta Grosen bertan dagoen Maria Inmaculada eraikinarekin gertatu daitekeen moduan, besteak beste. Era berean, gogoratu behar da eraikina hotel bihurtzeko lizentzia 2023ko martxoaren 12an eskatu zuela promotoreak, aipaturiko HAPOaren aldaketa onartu baino hilabete inguru lehenago.

Hala ere, aspalditik datorren afera da Mariaren Bihotza eraikineko hotelarena, urteotan bolo-bolo ibili dena. Izan ere, Donostiako Udal Gobernuak 2021ean onartu zuen Bi Berri Donosti enpresak eraikina birkalifikatzeko aurkezturiko plan berezia. Horrela, hirugarren sektoreko erabilera eman zioten eraikinari. Horrez gain, duela urtebete inguru, Idealista atariak eraikin osoa saltzeko iragarkia zabaldu zuen bi egunez, 36,5 milioi euroan.

Aipaturiko hedabideak argitaratutako informazioaren arabera, hotelak itsasora begirako 36 logela edukiko ditu, Nafarroa etorbidearen eta Sagues artean. Era berean, taberna eta jatetxea ere edukitzea da aurreikuspena. Gogoratu behar da, hala ere, eraikinak duen babes mailarengatik, fatxadak mantendu behar dituztela promotoreek.

EH Bildu, haserre

Beste eragile eta alderdi batzuek egin izan duten moduan, EH Bilduk behin baino gehiagotan salatu ditu urteotan ostatu turistikoak mugatzeko udal araudiak jasotzen dituen salbuespenak, baita Mariaren Bihotza eraikinean hotel bat irekitzearen aurka agertu ere. Horrela, albistearen inguruko adierazpenak egin ditu Izar Hernando zinegotziak ostegun goizean, lizentzia onartu izana salatuz: “2023ko neurriarekin, ohartarazi genuen salbuespenen bidez, atea irekitzen ziola hotel gehiago irekitzeari, baita Grosen moduko eremu tenkatuetan ere”.

“Aurreikusita zegoena gertatu da, Groseko bizilagunentzat etsigarria dena: gurearen moduko auzo tenkatu batean, non ez dagoen etxebizitza babestu bakar bat ere, Mariaren Bihotzaren moduko eraikin enblematiko batean luxuzko hotel bat irekiko dutela”, gaineratu du Hernandok, baita udal gobernuari exijitu ere “erantzunak” emateko: “Erantzunak eman behar ditu, hotel bat gehiago irekitzeak erantzuleak dituelako eta ondorioak dituelako”.

Eraikinaren historia

Ramon Cortazar arkitektoak 1926an diseinatutako eraikinak 1.500 metro karratuko azalera du, eta altuera aintzat hartuta, 5.000 metro koadroko espazioa du. Klaretarrek 2020ko abuztuaren 31n itxi zuten parrokia, salgai jartzeko. Bertan urte luzez egon zen Claret ikastola, berriz, 2019ko ekainaren 28an itxi zuten.

Bi Berri Donosti enpresak aurkeztu zuen proiektuak teilatupean 330 metro koadroko beste solairu bat eraikitzeko asmoa jasotzen du, eta, horretarako, elizarekin bat egiten ez duen teilatupeko zatia egokituko lukete. Proiektuan, aipatu solairuaz gain, 70 aparkaleku egitea aurreikusten da; EHOBPB-ak ez du baimentzen elizaren azpian egitea, beraz, ez da aurreikusten lur azpian beste solairurik eraikitzea, lursailaren ondoan egitea baizik. Era berean, bizikletentzako 50 aparkaleku ere aurreikusten ditu proiektuak.

Maria Inmaculada eraikinean «eragiketa espekulatibo» berri bat egin nahi dutela salatu du Elkarrekin Donostiak

Irutxuloko Hitza — 2026-05-15 09:53:58

Elkarrekin Donostia salatu du Ategorrietako Maria Inmaculada orubean aurrera eraman nahi duten “eragiketa espekulatibo handi berria”. Victor Lasa bozeramailearen esanetan, auzoko azken eremu estrategiko handietako bat da eta kritikatu du proiektuak ez duela azaltzen zein izango den erabilera komertziala, “agerikoa denena hotel bat izango dela”. Izan ere, gogoratu duenez, eraikinaren jabeek 2021ean eskatu zuten hotel lizentzia. Gainera, proiektuaren sustatzailea den Kategoraren profila, merkataritza egoitzetan berezitua, eta eraikigarritasun handia ikusita agerikotzat jo du zertara bideratuko duten.

Udalaren dokumentazioaren arabera, 10.444 metro koadrotan hirugarren sektoreko eraikigarritasuna aurreikusten du, sei solairu lur arras gainean eta lau azpian. Lur sailak Ategorrieta, Marino Tabuyo eta Jose Maria Soroa kaleen arteko etxadi erdia hartzen du.

Hori horrela, proiektuak hiriko eremu honek, haien ustez, bizi duen “espiral espekulatibo eta turistifikatzailearen atal berri bat” da. “Operazio honen helburu bakarra higiezinen errentagarritasunean, turismo presioan eta auzo bizitzaren pixkanakako ordezkapenean oinarritutako hiri eredu bat elikatzen jarraitzea da”.

Hori horrela, “erabateko gardentasuna” eskatu dio Udal Gobernuari erabilerari buruz eta Grosek behar duen hiri eta gizarte ereduari buruzko herritarren eztabaida irekitzea. “Grosek arnasa hartu behar du, espazio berdeak irabazi eta komunitate-bizitza indartu. Ez Basque Culinary Centerren eta hirigunearen arteko turismo-negozioko korridore handi bat bihurtu”, ondorioztatu du Lasak.

«Kalitatezko fruta eta barazkiak edukitzen saiatzen gara»

Irutxuloko Hitza — 2026-05-15 00:00:27

Non: Nafarroa Beherea plaza, Gros.
Telefonoa: 638-81 21 34
Webgunea: Munobaserria.eus

Nola egin duzue jauzia baserritik hiriko dendara?

Muno baserria nire familiakoa da, aitaren aldetik datorrena, Irizartarrena. XVI. mendekoa da, eta beti egon da baratzearekin lotuta: lehen, fruta arbolak ziren nagusi, gero animaliak sartu ziren, eta gaur egun biak uztartzen dira. Behi esnea ere ekoitzi izan dugu, aita jubilatu arte. Amak, gaur egun ere, Bretxara eramaten ditu barazkiak. Nik txikitatik bizi izan dut giro hori: amonarekin eta gero amarekin joaten nintzen merkatura. Beti izan dut denda propioa irekitzeko gogoa, eta 2020ko uztailean, pausoa eman nuen. Baserriaren izena jarri nion.

Zein da dendaren bereizgarria?

Batetik, etxeko produktuak ditugu, gure baratzetik datozenak. Bestetik, ekoizle txikiekin lan egiten dugu: guk geuk jasotzen dugun eztia, artisau batek egindako marmeladak… Gertutasuna bilatzen dugu beti, nahiz eta %100ean ezinezkoa izan. Beti kalitatezko fruta eta barazkiak edukitzen saiatzen gara.

Horixe da produktuak aukeratzeko irizpidea?

Bai, kalitatea, baina logikoki, izugarrizko preziorik ez duten heinean. Badira kalitate handiagoko produktuak, baina prezioak ez badu justifikatzen aldea, ez dugu beharrezkotzat jotzen.

Jendeak badaki garaian garaikoa kontsumitzen?

Ezjakintasun handia dago, oraindik. Denda honetan ahalegina egiten dugu azaltzeko: adibidez, neguan lekak eskatzen badituzte, esaten diegu ez dela garaia hemengoentzat. Bai, kanpotik iristen dira lekak, baina hemen ez da garaia. Badago ikasi nahi duen jendea, eta badago gaia batere interesatzen ez zaiona.

Bezeroek eskertzen dute orientazio hori?

Bai. Askok diote ez dakitela noiz den fruta edo barazki bakoitzaren garaia, eta gustura jasotzen dute azalpena. Konfiantza sortu da eta bezeroek galdetu egiten dute. Harreman hori oso polita da.

Zein leku du euskarak dendan?

Hiru langile gara, eta, horietatik, bi euskaldunak gara eta hirugarrenak ulertzen du, baina ez du hitz egiten. Bezero euskaldunek euskaraz egiten digute; jendea saiatzen da, behintzat.

Zer duzu gustukoen eta zer da zailena egunerokoan?

Zailena goizeko bostetan jaikitzea da [barrez]. Gustukoena, berriz, jendearekiko harremana da: kalean bezeroekin topo egitea, elkar agurtzea… Denda prestatzea ere asko gustatzen zait: goizean, itxita dagoenean, dena txukun-txukun jartzen dut bezeroak sartzerako prest egon dadin. Momentu hori asko disfrutatzen dut.

Osasun publikoaren alde mobilizatuko dira Grosen

Irutxuloko Hitza — 2026-04-07 10:39:44

DOPA Donostialdeko Osasun Publikoaren Aldeko plataformak elkarretaratzera deitu du ostegun honetarako (hilak 9) Groseko anbulatorioaren aurrean, “Osakidetzak jasaten dituen egiturazko arazoei egiazko irtenbideak eskatzeko”. 11:30ean egingo dute elkarretaratzea, eta herritarrak parte hartzera deitu dituzte, osasungintza publikoaren alde.

OPA Herri Plataformak koordinakundearen parte da DOPA, eta, hain zuzen ere, Bilbon eta Gasteizen ere egingo dituzte mobilizazioak egun berean. Horrez gain, manifestazioak antolatu dituzte Donostian, Bilbon eta Gasteizen apirilaren 18an, “kalitatezko osasun arretaren alde”. Donostian, 12:00etan abiatuko da manifestazio hori, Bulebarretik. Mobilizazio horri begira, manifestua argitaratu dute, baita sinatzeko aukera ireki ere.

GOE eraikinaren inguruko gaueko lanak «abisatu gabe» egin dituztela salatu dute bizilagunek

Irutxuloko Hitza — 2026-03-12 16:38:57

Basque Culinary Centerren Gastronomy Open Ecosystem (GOE) eraikina funtzionamenduan badago ere, inguruko lanak ez dituzte bukatu oraindik, eta, hain zuzen ere, gauez aritu dira bertan lan egiten bart. Hainbat bizilagunek salatu dutenez, ordea, ez dute gaueko lan horien inguruko jakinarazpen ofizialik jaso, lanak oso zaratatsuak izan badira ere, goiko bideoan ikus eta entzun daitekeenez. Duela urtebete inguru, antzeko salaketa publikoa egin zuten bizilagunek.

IRUTXULOKO HITZAk bizilagunetako baten salaketa jaso du: “Urte baten ondoren, denak berdin jarraitzen du. Amenabar berriz ere nahi bezala ibiltzen da, lanak gauez egiten, bizilagunei abisatu gabe. Duela urtebete, bizilagunok egoera bera salatu genuen, eta, kasualitatez, ez zuten lizentziarik lanak egin zituzten egunetarako, beste egun batzuetarako zuten; hala ere, ez zen ezer gertatu. Bizilagunei jakinarazteko eskatu genuen eta hitz onak izan ziren, baina gaur, berriro, gauza bera egin dute”.

Udal gobernuaren jarrera kritikatu du bizilagunak, baita ere: “Goiarekin gertatzen zen bezala, Insaustirekin ere Donostian nahi dutena egiten jarraitzen dute Amenabarrek eta bestelakoek, bizilagunak kontuan hartu gabe eta bizilagunen gainetik. Non dago atsedenerako eskubidea? Non daude Culinaryk, Amenabarrek edo udal gobernuak hainbeste goraipatzen zuten elkarbizitza eta enpatia? Hau lotsagarria da!”.

Groseko Hondarpe auzo elkarteari eraso egin diote, berriz ere

Irutxuloko Hitza — 2026-03-11 09:48:06

Groseko Hondarpe auzo elkarteak salatu duenez, beste eraso bat pairatu du aste honetan: “Sarrailan kola bota eta sarrera baldintzatu dute”. Hala ere, dagoeneko konpondu dute arazoa, eta auzo elkartearen lokala “parez pare irekita” dago, berriz ere.

Gogorarazi dutenez, ez da halako eraso bat jasan duten lehenengo aldia: “Abuztuaren 5ean izan zen aurrekoa, pegatina arrazista eta faxistekin batera”. “Ez dugu uste kasualitatea denik”, gaineratu dute: “Auzo elkarteak mugimendu itzela du oraintxe: hamaika eragile zein bizilagun komunitate batzen dira bertan eta, gainera, greba orokor batean atarian gaude”.

Hala ere, argi adierazi dute “tinko” jarraituko dutela auzo elkartean, “auzotik eta auzoarentzat lanean”. “Pozarren diogu, gainera, atea ireki berritan sartu diren lehenak auzoko haurrak izan direla, erraldoiak ikusteko!”, gehitu dute.

Larunbatean abiatuko da Sahararen aldeko euskal karabana

Irutxuloko Hitza — 2026-03-09 12:34:22

Saharako Errepublika Arabiar Demokratikoaren Lagunen Elkartean antolatuta, Saharako errefuxiatuen aldeko janari bilketa egin du azken asteetan. Donostian urtarrila amaieran aurrera eraman zuten hainbat merkatalgunetan, eta bai horietan, bai ikastetxeetan 13.000 kilo janari eta lau paleta konpresa jaso zituzten.

Gipuzkoan jasotako 50 tonekin bi trailer osatu dituzte eta aurtengo karabana, Gipuzkoa eta Bizkaiko trailerrekin Zurriolatik irtengo da larunbatean, hilak 14, Tindufeko kanpamentuetara bidean. 10:00etan egingo diote agurra.

Elkarteko kideek eskerrak eman dizkiete udalari, herritarrei, ikastetxeetako komunitateari, gidariei, grafiteroei, hedabideei eta lan honetan lagundu dieten guztiei.

BSiete tabernaren beheko solairuan kokatuko dute Zabaltza jubilatuen elkartea

Irutxuloko Hitza — 2026-02-05 17:07:47

Groseko Zabaltza jubilatuen elkarteak hilabeteak pasatu ditu borrokan, behin betiko ateak itxi behar ez izateko, Zabaleta kalean zuten lokalak ez zuelako araudia betetzen. Azkenean, ordea, Grosen jarraitu ahal izango du elkarteak, BSiete tabernaren beheko solairuan, Donostiako Udalak jakinarazi duenez: “Datorren hilabetetik aurrera, elkarteak Bermingham kaleko 7. zenbakian dagoen lokal horren beheko solairuan egin ahal izango ditu bere jarduerak, eta prezio bereziak izango ditu bazkideentzako kontsumizioei eta eguneko menuari dagokienez, eta, beraz, berehala ekin ahal izango diote beren jarduerari”.

Jon Insausti alkatea eta elkarteko kide batzuk bertan egon dira ostegun honetan, eta Insausti pozik agertu da erdietsitako akordioarekin: “Udaletik lan handia egin dugu adinekoen elkarte honek zuen arazoari alternatiba on bat eskaintzeko. Konponbidea erraza ez bazen ere, erabiltzaileak poztu dituen baliabide bat aurkitu ahal izan dugu, promesa hutsetan erori gabe, irtenbide erreal eta eraginkorrekin baizik”.

Era berean, lokala kudeatzeaz gain, udalak adierazi du “Zabaltza elkartearekin elkarlanean” jarraituko duela, diru laguntza moduan, “bere jarduera garatzen jarrai dezan, hiriko adinekoen gainerako elkarteekin bezala”.

Jon Insausti alkatea eta Mariaje Idoeta Gizarte Ekintzako zinegotzia, Zabaltza elkarteko kide batzuekin.Donostiako Udala

Groseko Zabaltza egoitza zabalik mantentzeko «alternatiba bideragarriak» daudela dio EH Bilduk

Irutxuloko Hitza — 2025-12-19 15:04:35

Hilaren 22an itxiko dute Groseko Zabaleta kaleko Zabaltza adinekoen zentroa. Auzoko bakarra da, eta 43 urtez eskaini duen zerbitzua bertan behera geratuko da. Donostiako Udal Gobernuak “arrazoi teknikoak” medio hartu zuen ixteko erabakia, eta ordezko leku bat proposatu arren, erabiltzaileek uko egin zioten ez delako “nahikoa eta duina”. Hori dela eta, azken asteotan hainbat mobilizazio egin dituzte auzotarrekin eta hainbat eragilerekin.

EH Bildu udal taldeak bat egin du erabiltzaileen eskaerarekin, eta gai udaleko batzordeetara eta osoko bilkurara eraman dute. Gaur, berriz, agerraldia egin dute udaletxean Izar Hernando eta Ricardo Burutaran zinegotziek. “Badakigu auzoan bertan lokal erabilgarrien alternatiba bideragarriak daudela, eta horien inbertsioa udal honek bere gain har dezakeela erabat. Badakigu, baita ere, aukera horiek mahai gainean jarri direla”, adierazi du Hernandok.

“Itxieraren arrazoia teknikoa bada ere, alternatiba baten falta bai da erabaki politikoa, eta hori da kritikagarria, salagarria. Planifikazio falta egon da, eta aurreikuspena eza. Hau da, Insaustiren taldearen kudeaketa txar bat”, kritikatu du Burutaranek. Gaineratu duenez, “hori baieztatzea ez da zuhurtziagabekeria, koherentea baizik, are gehiago metro gutxira GOE eraikitzeko auzoan bertan ekipamendu partzela bat laga denean”.

Udal gobernuak eskainitako alternatiba ez dela nahikoa esan du Hernandok: “Nafarroa Beherea plazako lokalak, behin-behinekoa izateaz gain, ez du bermatzen proiektuak modu integral batean irautea, eta, hain zuzen ere, horrek izan behar du helburua”.

Zabaltza jubilatuen elkartearentzat irtenbidea «urgentziaz» bilatzeko eskatu dio EH Bilduk udal gobernuari

Irutxuloko Hitza — 2025-11-25 10:12:50

EH Bilduren udal taldeak Groseko Zabaltza jubilatuen elkarteari buruzko mozio bat aurkeztuko du azaroko udalbatzarrean (hilak 27), elkartearentzako “irtenbide bat emateko konpromiso bat hartu dezan ez ezik, bete dezan eskatzeko” udal gobernuari. “Groseko Zabaltza jubilatuen etxea hilabeteren buruan itxiko duela iragarri ondoren, eta EAJ eta PSE-EEren udal gobernu honek gaur egun ezagutzen dugun proiektuaren bideragarritasuna bermatuko duen alternatibarik mahai gainean jarri ez duenean (lau hamarkada dira etenik gabe egitasmoak martxan dela), EH Bildutik irtenbide bat bilatzeko premia berresten dugu, izan ere, Zabaltza ixteak, de facto, ezinbesteko funtzio soziala duen etxe honen desagerpena dakar”, nabarmendu du koalizioak.

Halaber, oposizioko taldea “larrituta” agertu da Gizarte Ekintzako zinegotzi Mariaje Idoetak udal batzordeetan esandakoarekin: “Proiektua iraunarazteko B planik ez dagoela berretsi dute, eta are larriagoa dena, ez dago zerbitzu guztiak barne hartuko dituen beste lokal baten aurreikuspenik. Izan ere, hasieran buruan zuten aukerak, Oiartzun kalean kokatutakoak, ez ditu baldintza teknikoak betetzen eta bideraezin bihurtzen du. Kezkagarria da iragarri eta urte batzuetara baieztatzea hau”.

Auzoan kezka sortu duen auzia da Zabaltza elkartearena, eta, hain zuzen ere, elkarteari babesa adierazteko eta gaia sozializatzeko auzo batzarra egin zuten astelehenean Zabaltzan bertan Hondarpe auzo elkarteak eta Zabaltza elkarteak, 80 bat auzotarren parte hartzearekin.

Horrela, hiru eskaera egingo dizkio EH Bilduk udal gobernuari udalbatzarrean: “Lehenik, Zabaltza erretiratuen egungo egoitzaren alternatiba izango den toki bat aurki dezala urgentziaz, elkarteak gaur egun bertan egiten dituen jarduera guztiak egiten jarraitu ahal izan dezan, kafetegi-jatetxekoa barne; bigarrenik, Gros auzoko Zabaltza jubilatuen etxeari 2026an zehar behin betiko konponbidea emateko konpromisoa hartzeko eskatzen zaio udal gobernuari; eta, hirugarrenik, EAJ eta PSE-EEren gobernu taldeari eskatzen diogu Zabaltzako zuzendaritza batzordeari unean uneko informazioa eman diezaiola honen guztiaren inguruan egiten diren kudeaketa eta urratsei buruz”.