Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Faroltxoa piztuta, jai giroan bazkaldu dute Morlansen

Irutxuloko Hitza — 2026-05-16 16:10:24

Piztu dute faroltxoa, eta eman diete hasiera aurtengo Morlansko jaiei. Bigarren eguna dute gaur, eta, urtero bezala, jarduerarik arrakastatsuenetako bat herri bazkaria izan da. Auzotar ugari elkartu dira plazan, mahaiaren inguruan, jai giroan.

Goizetik hasitako jarduera n ondoren, eguerdirako mahaiak prest zeuden. Menuan, ez da errioxar erara prestatutako patatarik faltatu, eta otorduak iraun duen bitartean, hainbat belaunalditako auzotarrek espazioa eta algarak konpartitu dituzte, noski, lumadun kapela buruan.

Hona hemen argazkiak:

Morlansko jaiak: harri-orri-ar txapelketa eta Bad Bunnyren Superbowla!

Irutxuloko Hitza — 2026-05-08 00:00:04

Ez dira hiriko jairik handienak, baina jada hamahiru urtetik gora, Morlansko jaiak auzoko erreferentzia puntua dira, inolako zalantzarik gabe. Faroltxoa piztearekin batera abiatuko dira datorren ostiralean, hilak 15. Egitarau guztia hemen ikusgai duzue. Auzoaren historiari keinu bat egin nahian Morlansko bizilagunek asmatu eta urtez urte errepikatu duten ohitura da.

Auzoko gas fabrikaren garaiko kale-argietan du bere oinarria. Bizilagunek hala eskatuta, udalak auzoko faroltxo historikoen antza duten kale-argiak mantendu zituen Morlansen, hiriko beste auzoetan ez bezala. Hori dela eta, auzo elkarteak ikur gisa hartu zuen faroltxoa, eta festetako sinbolo modura erabiltzea erabaki zuten.

Ostiralean, beraz, 18:15ean piztuko dute faroltxoa, eta, ostean, Jon Urbieta DJ-arekin hasiko da festa, Asier Aguilar jai batzordeko kideak azaldu duenez. «Iaz giro bikaina jarri zuen DJ-ak, eta, aurten, haurrentzat ez ezik helduentzat ere arituko da gauean».

Larunbatean, berritasunak

Larunbatean hainbat izango dira berritasunak. Jai xumeak izanik, urtero funtzionatzen duten jarduerak mantentzea erabaki dute jai batzordekoek, baina berritasun batzuekin. Horietako bat «erokeria» bat da Aguilarren ustez. Originala gutxienez, bai: harri-orri-ar txapelketa egingo dute eta jaietan. Larunbat eguerdian eman beharko da izena, eta kategoria bakarra izango da: haurrak, gazteak eta helduak elkarren kontra. Kanporaketa bidez izango da eta, final handia, arratsaldeko seietan, plazan.

Bazkariak ere emango du zer esana. Urtero gai berezi bat izaten da mozorrotzeko. Bada, aurtengoa, mundu mailan zer esana eman duen gai batekin izango da: Bad Bunnyren Super Bowla! Jai Batzordeak prestatuko ditu dekorazioaren zati batzuk, baina Morlansko bizilagunen sormenera irekita geratuko da gainontzekoa. Horren ondoren, inguruko auzoetatik etorriko dira olinpiadak jokatzera, eta, eguna amaitzeko Eremu taldearen eta Sutargi erromeriaren kontzertuak izango dira.

Aguilarren ustez, oso «herrikoiak» dira Morlansko jaiak: «Urtero luzatzen diegu auzotarrei parte hartzea eta denon artean antolatzen saiatzen gara». «Ez da egitarau handia, baina auzokideei eta donostiarrei luzatzen diegu hona hurbiltzeko gonbidapena», dio umoretsu.

Morlansko tunela itxita egongo da lau hilabetez, eraberritze lanengatik

Irutxuloko Hitza — 2026-04-14 09:36:16

Morlanseko tunela itxita egongo da gaurtik aurrera bizikleten joan-etorrietarako pasabide hori eraberritzeko lanak hasiko baitituzte. Lanek lau hilabete iraungo dute eta denbora horretan, Lugaritz eta Morlans lotzen dituen korridorea ezingo da erabili.

Orain arte bizikletentzako soilik izan den bidegorria, partekatu bihurtuko dute, alde banatan, metro bateko zabalera izango duen espaloi bana sortuko baitute. Hala, oinezkoen eta txirrindularien joan-etorria bateragarri egingo dute, 1,4 kilometroko bide horretan.

Proiektu eta Obretako zinegotzi Juantxo Marrerok azaldu duenez, esku hartzeak “eskaera historiko” bati erantzuten dio Duela hamazazpi urte tunela ireki zenean “pasabidearen estutasunak, bide segurtasuneko balizko arazoek eta drainatze sistema egoki bat mantentzeko beharrak” erabilera txirrindulariei mugatzera behartu zuen. Hala ere, “istripurik ez egoteak eta hormigoizko ertzak tunelaren hormaraino zabaltzea ahalbidetzen duten irtenbide teknikoak garatzeak, drainatze funtzioa arriskuan jarri gabe, jarduketa hori bideragarri egin dute”.

Tunela 4,2o metroko zabalera du eta obrek oinezkoentzako alboko espaloiak gehituko dizkiote 2,2 metroko bidegorriari. Erabiltzaileen arteko bizikidetza bermatzeko, argi eta garbi seinaleztatuko dira bakoitzarentzako espazioak, sinbolo espezifikoak margotuz. Halaber, paretetako asfaltozko oihal iragazgaitza presiozko uraren bidez garbituko da.

Horrez agin, segurtasun sistema bat ere ezarriko dute. 35 kameraz eta hogei bozgorailuz osatua, tunelaren giltzarritik esekitako erretilu batean jarriko dute, eta Udaltzaingoak kontrolatuko du.

Morlansko tunela oinezkoentzat egokitzen hasiko dira

Irutxuloko Hitza — 2026-03-10 11:54:38

Donostiako Udalak Lugaritz eta Morlans arteko tunela oinezkoentzat birgaitzeko lanak adjudikatu dizkio Jaizubia enpresari. 377.436 eurokoa da aurrekontua, eta lanak egiteko epea lau hilabetekoa.

Proiektuaren xede den zatia Lugaritzeko tren geltokian hasten da, eta tuneleko bidegorria Morlans pasealekuko bidegorriarekin lotzen da. Proiektu honen bidez, espaloi zati bana eraikiko dute bidegorriaren alde banatan, eta, beraz, oinezkoek ibiltzeko duten espazioa handitu egingo da, tunelaren alde bakoitzean metro bat inguruko zabalera lortuz. Bidegorriak 2,20 metroko zabalera izango du, eta ondoan metro bateko bi erreiak jarriko dituzte, bai Lugaritz aldera, bai Morlans aldera.

Era berean, seinaleak berrituko dituzte oinezkoen lasaitasunerako eta segurtasunerako, baita dauden interfonoak kendu eta tunel osoari estaldura emango dion telefonia ekipo bat jarri ere.

Morlanstarrak eta Erriberatarrak danborradak, iruditan

Irutxuloko Hitza — 2026-01-20 19:41:30

Auzo guztietan entzuten dira jo eta su danbor eta upelen hotsak. Morlansen Morlanstarrak eta Loiolako Erriberan Erriberatarrak dira arratsaldeko danborrada nagusiak. Morlansekoan, urteroko legez atera da Jon Insausti, baina, aurten, lehen aldiz, alkate moduan. Giro ederrean igaro dira guztiak.

Morlansko tunela oinezkoentzat egokitzeko lanak onartu dituzte

Irutxuloko Hitza — 2025-11-18 14:01:38

Donostiako Udalak abuztuan iragarri zuen Lugaritz eta Morlans arteko tunela oinezkoentzako birgaituko zuela, eta gaurko Tokiko Gobernu Batzordean onartu du lanen kontratazio espedientea, 381.634 euroko lizitazio aurrekontuarekin eta lau hilabeteko egikaritze epearekin. Jon Insausti alkateak azaldu duenez, proiektu horrek “hiri komunikazioak kohesionatzea ahalbidetzen du, auzoak oinezkoentzako modu irisgarrian lotuz”.

Proiektuaren xede den zatia Lugaritzeko tren geltokian hasten da, eta tuneleko bidegorria Morlans pasealekuko bidegorriarekin lotzen da. Proiektu honen bidez, zolata bana eraikiko dute bidegorriaren alde banatan, eta, beraz, oinezkoek ibiltzeko duten espazioa handitu egingo da, tunelaren alde bakoitzean metro bat inguruko zabalera lortuz. Bidegorriak 2,20 metroko zabalera izango du, eta ondoan metro bateko bi erreiak jarriko dituzte, bai Lugaritz aldera, bai Morlans aldera.

Era berean, seinaleak berrituko dituzte “oinezkoen lasaitasunerako eta segurtasunerako”, baita dauden interfonoak kendu eta tunel osoari estaldura emango dion telefonia ekipo bat jarri ere.

Morlansko tunela eta bidegorria birgaituko dituzte, erabilera berriak sortzearekin batera

Irutxuloko Hitza — 2025-08-27 14:44:58

Lugaritzeko tren geltokia eta Morlans pasealekua lotzen dituen tunela berrituko du Donostiako Udalak. Baita bi gune horiek lotzen dituen bidegorri zatia ere. Lanen lehen fasea onartu dute, 381.634 euroko aurrekontuarekin eta lau hilabeteko egikaritze epearekin.

Lan hauen helburua da Morlansko tunela eta bidegorria birgaitzea. Obrak ere aurreikusten du Lugaritzeko biribilgunearen azpian dagoen hormigoizko tunel faltsua berritzea. Horrez gain, bidegorrian erabilera berriak sortuko dituztela jakinarazi du udalak.

Morlansko jaiak, iruditan

Irutxuloko Hitza — 2025-05-19 14:07:48

Auzoko jaiak ospatu dituzte, beste urte batez, Morlanesen. Faroltxoaren piztearekin batera, hiru egunez hainbat jarduera izan dituzte auzoan. Auzoen arteko dema eta konklabea barne.

Konklabea egingo dute Morlansko jaietako herri bazkarian

Irutxuloko Hitza — 2025-05-16 00:00:57

Morlansko jaiei gaur emango diete hasiera, eta asteburu osoan zehar, ez da aspertzeko tarterik izango auzoan. Askotariko jarduerak izango dituzte, baina nabarmentzekoa da gaur gaua La Fulana DJ-ak girotuko duela. Bestalde, Asier Aguilar (Morlans, 2004) jai batzordeko kideak azaldu duenez, bihar, rockaren ordez, erromeria antolatu dute auzoan. “Dirutza uzten genuen rock kontzertuetan, eta jai batzordeko inori ez zitzaizkigun kontzertu horiek gustatzen. Beraz, erromeria jartzea pentsatu dugu”, azaldu du Aguilarrek.

Ohiko moduan, faroltxoa piztuz eta txupinazoa botaz ekingo diete jaiei, eta aurten, auzoko emakume helduak arduratuko dira suziria botatzeaz. “Urtero, auzoari ekarpena egiten dion norbaitek botatzen du, eta aurtengoan, auzoko emakumeak izango dira arduradunak”, zehaztu du jai batzordekoak.

Konklabea, Morlansen

Aita Santu berria aukeratzeko prozesua amaitu bazen ere, Morlansen konklabearen edizio berezi bat egingo dute. Izan ere, 133 tiket saldu dituzte biharko herri bazkarirako —konklabeak parte hartzaile kopuru bera izan zuen—, eta umorea lagun, auzoko jaietan ere konklabea egitea erabaki dute. “Aita Santuarenaren itxurako txapeltxoak eskatu ditugu, eta iristen bazaizkigu, asmoa da guztiok txapel horiek jantzita bazkaltzea. Horrez gain, parrilladan Fumata zuria dioen kartela jarriko dugu, kea bertatik ateratzen delako. Ez gaude burutik ondo!”, esan du Aguilarrek, barrez.

Igandean amaituko dira jaiak, auzoko Aita Santuarekin edo gabe, baina behintzat, disfrutatu izanaren sentsazioarekin. Jai batzordeak komertzioen eta tabernen laguntza eskertu du, jaiak antolatzeko “funtsezkoak” baitira.

Egitaraua osorik, hemen.

Topoaren trenbidea estaltzearen alde agertu da berriz ere Amara Berriko auzo elkartea

Irutxuloko Hitza — 2025-03-26 16:12:41

Amara Berriko bizilagunek, auzo elkartearen bidez, urteak daramatzate topoak Amara Berritik igarotzean sortzen duen kutsadura akustikoa salatzen eta trenbidea lurperatu edo estali dezatela eskatzen. Auzo elkarteak azaldu duenez, berriki, Euskal Trenbide Sarea (ETS) Eusko Jaurlaritzaren mendeko erakunde publikoak Morlanstik Anoetara doan tartean pantaila babesleak jartzeko proposamena jarri die mahai gainean, eta Anoetatik Loiolako Erriberako trukagailura doan proiektuan (idazketa fasean dago) trenbidea estaltzeko proposamena “sartzen saiatzea”. Proposamen hori, ordea, baztertu egin du auzo elkarteak.

Izan ere, “topoaren bideetan behin betiko jarduteko unea” dela uste dute bizilagunek, “topoak sortzen duen kutsadura akustikoaren arazoa konpontzen ez duten partxeetan erori gabe”. “Kontuan izan behar da topoaren igarobidea inauguratu ondoren, Amara Berriko eremua izango dela lur gainean geratuko den bakarra”, gaineratu dute.

Bestalde, nabarmendu dute trenbidea estaltzeko irtenbidea, “hiri garapenari dagokionez lurperatzea baino maila txikiagoko irtenbidea bada ere, dezente merkeagoa da, eta aukera ematen du pasealeku handi bat eraikitzeko egungo bideen gainean; Errondo pasealekua eta San Juan de Dios mendia igarotzeko eta Atano III .a frontoira eta Gasca kiroldegira beste sarbide bat izateko, gaur egun nahiko degradatuta baitago eremua”. Halaber, gogorarazi dute trenbide estaltzea egin dutela duela gutxi Eibarren eta laster egingo dutela Galtzarabordan (Errenteria).

Bilera asko

Amara Berriko bizilagunen aspaldiko aldarrikapena da auzotik pasatzen den trenbidearen zatia estali edo lurperatzearena, auzoan sortzen duen “kutsadura akustikoagatik” eta “inguruko bizilagunen atsedenerako eskubidea urratzen” duelako; besteak beste, kanpaina bat egin zuten 2022ko martxoan auzoan. Horrela, aldarrikapen horri helduta, bilera ugari egin dituzte urteotan agintari politikoekin: “Aurreko legegintzaldian, bilerak izan genituen alkatearekin, ETSrekin eta Eusko Legebiltzarreko azpiegituren batzordearekin. Baita Arriola sailburuarekin izandako korrespondentzia ere”, gogoratu du auzo elkarteak.

Gaineratu dutenez, Eneko Goia alkateak “hasieratik” lagundu zien “irtenbidea bilatzen”: “Zehazki, Morlans-Anoeta tartea lurperatzea eta Anoeta-Loiola tartea estaltzea zen asmoa”. “Bestalde, Legebiltzarreko batzordean agerraldi bat egin ondoren, bertan onartu zen TYPSA enpresari Morlans-Anoeta tarterako konponbide azterlan bat enkargatzea”, gehitu dute.

2024ko hauteskundeen ondoren, Eusko Jaurlaritzako aldaketak zirela eta, Gabonetara arte egon dira “zain”: “Joan den otsailaren 20an, azkenean, bilera izan genuen biekin udaletxean. Bilera horretan, ETSk Morlans-Anoeta tartean pantailak jartzea baino ez zigun proposatu, eta proiektu berrian (idazketa fasean) Anoeta-trukagailua tartean estaldura proposamena sartzen saiatzea. Hori dela eta, kaltetutako bizilagunekin bilera bat egiteko deia egin genuen martxoaren 18an, eta bilera horretan, gehienak agertu ziren erakundeei bi tarteak estaltzeko eskatzearen alde”.

«Donostian bizi garenak Ñoñostiara ohituta gaude; baina hau ere Donostia da»

Irutxuloko Hitza — 2024-06-28 00:00:22

Familiako lagun batek zeraman Larratxo Oinetakoak denda, baina osasun arazoengatik utzi behar izan zuen, eta Velasquezek hartu zuen duela hiru hilabete eskas. «Langa oso goian utzi zuen», aitortu du: «Sari bat eman zion udalak, eta auzoan oso ezaguna eta maitatua zen. Horregatik, hasiera batean, jendea apur bat ezkorra izan da; are gehiago kontuan izanda kanpotarra naizela».

Edonola ere, dagoeneko bezeroak «irabazi» dituela dio harrotasunez Velasquezek: «Emakume helduak datoz gehienbat, eta produktu ona bilatzeaz gain, zerbitzu ona bilatzen dute. Eta gertukoa».

«Askotan, bakarrik dagoen jendea da, eta babestuak eta maitatuak sentitu nahi dute. Era berean, auzoko emakumeak dira, eta kontzientzia handia dute tokiko merkataritza babesteko. Eta horregatik ere, exijenteagoak dira», hausnartu du.

Tokiko merkataritzak komunitatea sortzen duela argi du Velasquezek: «Garberara zoaz, eta ez dakizu ezta norekin hitz egiten duzun ere. Hona, ordea, hitz egitera datoz, eta geure arazoez eta kontuez hitz egiten dugu. Nik asko maite dut! Eta esku ona daukat, buelta ematen diet», dio, barrez.

Pili Velasquez, bere zapata dendan lanean.Xalba Ramirez

Larratxo ez da Ñoñostia

Donostian 25 urte daraman arren, Larratxora «behin ere ez» zela igo onartu du Velasquezek: «Donostian bizi garenak Ñoñostiara ohituta gaude; bizi maila bat, estetika bat… Auzora igotzeak burua zabaldu dit: hau ere Donostia da».

Auzoko emakumeen ahotik entzunda daki Larratxo «langile auzo bat dela, betidanik»: «Espainiako hegoaldetik jende mordoa etorri zen hona lanera, eta auzo identitate hori mantentzen du oraindik. Bizitza handia du auzoak, komertzio pila bat daude, eta jendeak hemen egiten du bizitza. Donostian baino bizitza handiagoa dago».

«Kulturartekotasun handiagoa dago Larratxon», Velasquezek onartu duenez: «Alokairuak baxuagoak dira, eta adibidez, kanpotik datorren norbaitentzat, bizitza berri bat egiten hasi denarentzat, askoz errazagoa da: Donostian alokairua lotsagarria da».

Gipuzkoako Merkataritza Ganberak dendari emandako saria.Xalba Ramirez

Artisautza Perun

Antiguan hasi zen lanean, Perutik eta Thailandiatik ekarritako bitxiekin eta eskulanekin lanean. Tamalez, «pandemia iritsi zen, eta ez nuenez inongo zorrik izan nahi, lokala utzi nuen segituan».

Perun ikasi zuen artisautza. «Argizarizko kandelak egiten nituen. Liman, lagun batek tailer bat zuen, eta bertan ikasi nuen. Ez dira kandela erabilgarriak soilik: koloreak nahasten ditut, piramideak egin… artistikoagoak dira».

Azaldu duenez, Perun oso ohikoa da jendeak eskuzko lanak egitea. Kandelez gain, harriekin lan egiten ikasi zuen eta bitxiak saltzen egon zen hainbat azoketan Velasquez. «Orain, gutxi batzuk saltzen ditut dendan, baina bezeroei zer gustatzen zaien ari naiz aztertzen», dio, barrez.

Beste bizitza baten bila

Liman bizi zenean, gida turistikoa zen eta antzerkia ikasi zuen. «Oso ezegonkorrak ziren lanak, antzerki pixka bat, turismo pixka bat… eta horrela ateratzen nuen bizitza. Horregatik, nik ez nuen nire herrialdea utzi behar ekonomikoagatik. Ni oso librea naiz, nahi dudan moduan jantzi nahi dut, inork ezer esan gabe. Horregatik, beste bizitza bat nahi nuen».

Velasquezek azaltzen duenez, Peruko gizarteko gauza batzuk ezin zituen jasan: «Emakumea izateagatik kalean astakeriak entzun behar izatea, dagoen matxismoa astakeria bat da. Eta baita arrazakeria ere: Perun, arrazakeria hemen baino gogorragoa da. Ezin nuen jasan aukera falta, nire azalaren koloreagatik soilik». Orain apur bat aldatu dela onartzen duen arren, jatorri indigena dutenek aukera gutxiago izateak «amorratu» egiten du.

Liman, mutil euskaldun bat ezagutu zuen, eta urtebetez harekin egon zen. «Lana topatu genion, eta urtebete igaro zenean, berarekin etorri nintzen Donostiara», azaldu du. «Ez dakit zer gertatu zen, baina iritsi nintzenean, kale gorrian utzi ninduen; literalki, kalean. Ezin nuen sinistu ere egin, baina aurrera egitea erabaki nuen».

Lehen lana lortzea

1999a zen, eta Velasquezek oroitzen du oso bestelakoa zela Donostia orduan: «Ez zegoen kasik migranterik, eta gehienek arraro begiratzen ninduten. Lan bila joaten nintzen eta ez zekiten ezta zer kontinentekoa nintzen ere!». Zailtasun handiak izan zituen lana lortzeko, batez ere, publikora begira ziren lanetan, «gaztelera, ingelesa eta frantsesa jakin arren». Azkenean, kaian, plater garbitzaile gisa hartu zuten: «Elkarrizketa egitera joan nintzen, eta jabeak, hasiera batean, ez zidan lanik eman nahi. Orduan, aurre egin nion, eta esan nion platerak garbitzeko ez zela ezer berezirik behar, eta zergatik ez zuen nigan konfiantzarik». Jabea konbentzituta, bere lehen lana lortu zuen, eta gutxika, joan zen bere bidea egiten hirian.

«Aurreiritzi handiak zeuden garai hartan, ez zegoelako hegoamerikarrik. Eta gaur egun, kontrakoa da: ez dago taberna bakar bat ere hegoamerikarrik gabe», dio, sarkasmoz.

Emakume bat, dendako erakusleihoa begiratzen.Xalba Ramirez

Aurreiritziei aurre

Aniztasunari «beldurra» dagoela sumatzen du Velasquezek. «Bidaiatu duen jendeak gutxiago duela uste dut. Jendeak migranteak pobreziarekin eta ezjakintasunarekin erlazionatzen ditu». Aurreiritzi hori borrokatzen saiatzen da.

Badaki zer lur zapaltzen duen, eta bere egitekoa argi ikusten du Velasquezek: «Nik ez dut eraso pertsonal gisa hartzen, erronka gisa baizik: jendea hezteko beharra sentitzen dut».

«Agian, oso harroa dirudi honek, baina sentitzen dut badudala kanpotarrak errepresentatzeko ardura, eta aurreiritzien kontra egitekoa. Nik Ez ditut ghettoak maite. Ni Euskal Herrira etorri naiz, euskal herritarra izateko. Migrante gisa, gure egitekoa dela uste dut, hemengoa ere sentitzea. Beti baldin bazaude itzuleran pentsatzen, ez zara zoriontsu biziko».

Hegoamerikarren kasuan, «laguntzetatik bizitzera gatozela diotenei, argi erakutsi behar diegu, gezurrak direla. Aukera ematen badigute, lan egiten dugu».

Bera baino adibide hoberik ez da. Hamaika lan izan ditu Donostian eta inguruotan, eta beti «erronka berrien bila». Orain, Larratxon, bertako bizitzan integraturik, eta auzokideekin eguneko ikasten, eta irakasten.