Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Udaberriko Festa antolatu dute Uliako Mintegien Parkean

Irutxuloko Hitza — 2026-06-17 10:18:31

Uliako Lore Baratzak taldeak Udaberriko Festa antolatu du igande honetarako Uliako Mintegien Parkean, “urte osoko lana ospatu, proiektua ezagutarazi eta udari ongietorria emateko”. Egun osoko egitaraua prestatu dute, 10:00etatik 18:00etara, askotariko jarduerekin: yoga, dantza, haurrentzako jolasak, musika, proiektuaren hamar urteko ibilbidea jasotzen duen dokumentalaren proiekzioa, bisita gidatua parketik eta, noski, jateko eta edateko aukera ere eskainiko dute.

“Duela hamar urtetik, Uliako Mintegien Parkea auzolanean kudeatzen da, Uliako Lore Baratzak ingurumen elkartearen eskutik. Asteartero, baratzean eta parkeko belardiak txukun mantentzen aritzen gara, eta bi hilean behin auzolan deialdi irekia egiten dugu, mantenu lan handiagoak egiteko (zuhaixken kimaketa, zaborra biltzea, konponketak, etab.). Lan hori %100ean boluntarioa da”, nabarmendu du taldeak.

Erromeria ederra egin dute Uliako mintegietan, euriari aurre eginez

Irutxuloko Hitza — 2026-06-08 09:32:12

Urteroko legez, Intxaurrondo Zaharreko jai batzordeak antolatuta, erromeria egin zuten larunbatean Uliako mintegietan, egun osoko egitarauarekin. Eguzkiari aurre egin behar izan diote beste urte batzuetan, baina aurten, aldiz, euriari egin behar izan zioten aurre; hala ere, giro ederrean pasatu zuten eguna hamarnaka lagunek.

Goizean ireki zituzten guneko ateak, haurren jolasak egiteko. Eguerdian, hainbat kidek paellak prestatzen zituzten bitartean, Revolutionary Brothers reggae taldearen musikak jarri zuen giroa, gosea egiten joateko. Eguraldiaren ondorioz, aterpean egin zuten paella jana, eta, berriz ere, reggae doinuak izan ziren nagusi arratsaldean zehar, Revolutionary Brothers taldearekin.

Jarraian, eguneko irudi bilduma ikus dezakezue:

Erromeria egingo dute Uliako mintegietan larunbatean

Irutxuloko Hitza — 2026-06-03 10:01:14

Erromeria antolatu du aurten ere Intxaurrondo Zaharreko jai batzordeak, Uliako mintegietan. Larunbatean izango da, ekainaren 6an, eta egun osoko egitaraua prestatu dute, haur, gazte zein helduentzako jarduerekin.

11:00etan hasiko da festa, haurrentzako tailerrarekin, hamaiketakoarekin eta jolasekin, Intxhaurgunearen eskutik. 12:30etik aurrera, Revolutionary Brothers reggae taldearen musikak girotuko du gunea, bazkarien aurretik: 13:30ean bazkalduko dute haurrek eta 14:30ean helduek (paella). Bingoan jolastuko dira bazkalostean, eta 17:30etik 21:00etara, Revolutionary Brothers eta Lagunak taldeak kontzertua emango du. Bazkarirako txartelak Zulo Zahar eta Erdikoa tabernetan eta Artatxiki dendan daude salgai.

Auzolana eta protesta uztartuko dituzte igandean Ulian

Irutxuloko Hitza — 2026-05-22 14:51:26

Biodibertsitatearen Eguna da mundu osoan gaur, hilaren 22an, eta, horren harira, protesta ekintza eta auzolana uztartuko dituen jarduera antolatu dute iganderako (hilak 24) Ulian: landare inbaditzaileen erauzketa lanetan arituko dira, 10:30etik 12:00etara. Naturkon plataformak eta Haritzalde Naturzaleen Elkarteak antolatu dute egitasmoa, Gipuzkoan naturaren zaintza abandonatuta lelopean. Uliara oinez igo nahi izanez gero, 10:00etan elkartuko dira parte hartzaileak, Okendo Kultur Etxean; bestela, zuzenean aparkalekuan elkartzeko aukera dago, 10:30ean —Dbusen taxi-bus zerbitzuarekin igo daiteke—.

“Ulia parkean crocosmia x crocosmiiflora landare arrotz inbaditzailea auzolanean erauzteko deialdi irekia” da egitasmoa antolatzaileek azaldu dutenez. “Baten batek, ezjakintasunetik, toki batean zenbat eta espezie gehiago, edonongoak direla ere, orduan eta hobe izan daitekeela pentsa dezake. Errealitatea ordea oso bestelakoa da eta maiz, espezie batzuk tokiz kanpo daudenean, bertako beste batzuen desagerpena dakarte; izan daiteke besteak beste hiltzen edo kanporatzen dituztelako”, deitoratu dute.

Horrela, Gipuzkoako Foru Aldundiaren jarrera salatu dute: “Gipuzkoan, nagusiki, aldundiari dagokio estrategia bat garatzea, bertako espezieen populazioei zuzendutako kontserbazio eta berreskuratze planak onartuz eta gero aurrera eramanez. Kanpoko espezie inbaditzaileak erauzteko programak eta sentsibilizazio kanpainak burutu beharko lituzke. Gipuzkoako Foru Aldundiak, aldiz, biodibertsitateari ez dio garrantzirik ematen eta hutsaren hurrengoa egiten du. Kontserbazio planak ez ditu onartzen, aurrekontu urria eskaintzen dio, kontrako ekintza ugari babesten eta bultzatzen ditu eta dugun aberastasun naturala zaintzeko medio eskasak jartzen ditu”.

“Gipuzkoako Foru Aldundiak biodibertsitatearen kontserbazioari lotutako politikak aldatzen ez dituen bitartean, aurrean edukiko gaitu eta bere jarduna eta arlo batzuetan arduragabekeria (landare inbaditzaileei dagokienez esaterako) salatzen jarraituko dugu”, gaineratu dute Naturkonek eta Haritzaldek.

Ategorrietan barrena egingo dute Janen ibilaldia

Irutxuloko Hitza — 2026-05-05 11:34:20

Urteroko legez, Janen ibilaldia antolatu dute Donostian, munduko hainbat hiritan egin ohi den moduan, Jane Jacobs (Scranton, Pensilvania, AEB, 1916—Toronto, Kanada, 2006) hirigile eta aktibistaren jaiotegunaren bueltan, maiatzaren hasieran. Aurten, Ategorrieta auzunea ezagutuko dute parte hartzaileek. Jane’s Walk Donostia taldea, Ahiku elkartea, Nerea Lizarralde kazetaria eta Victor Aspe arkitektoa daude Ategorrietako ibilaldiaren antolatzaileen artean.

Larunbat honetan, maiatzaren 9an, izango da, 10:00etan Ategorrietako erlojutik abiatuta. Goiz osoko ibilaldia izango da, eta gune hauetan egingo dituzte geldialdiak: Basque Culinary Centerren (11:00), Altunaenean (11:45), bolatokian (12:30), Uliako mintegietan (13:00) eta Arzak jatetxean (14:00). Edonork hartu dezake parte, izena eman gabe.

2012tik antolatzen dituzte Donostiako Janen ibilaldiak. Helburua da kaleetan barrena ibiltzea eta kaleetan gertatzen dena zein gertatu dena kontatzea. Mugikortasuna, segurtasuna, zarata, etxebizitza motak, memoria kolektiboa, aldarrikapenak eta beste hainbat dira ibilaldietan ukitu ohi dituzten gaiak. Goiz osoa hartu ohi dute ibilaldiek, auzoan barrena ibili ohi baitira parte hartzaileak, tarteka geldialdiak egin eta gidarien azalpenak entzunez, auzoa ondo ezagutu eta ulertzeko.

Ategorrietakoaren aurretik, Egian, Parte Zaharrean, Loiolan, Amaran, Altzan, Grosen, Añorgan, Amara Berrin, Intxaurrondon, Bidebietan, Ibaetan eta Martutenen egin dituzte ibilaldiak. Pandemiaren eraginez, bi urtez ezin izan zuten ibilaldirik egin, baina 2021ean, Txomiñeneari buruzko dokumental bat egin zuten.

Baso bainua egingo dute igandean, Ulian

Irutxuloko Hitza — 2026-04-24 11:32:17

Cristina Enea Fundazioak hainbat urtez antolatu ditu baso bainuak naturaren bitartez parte-hartzaileek “ongizate fisiko zein mentala lortzeko” aukera izan dezaten. Hala, etzi, hilak 26, egingo dute saio berri bat, euskaraz, Ulia mendian. Doako jarduera da, baina aurrez izena eman behar da Fundazioaren webgunean.

Antolatzaileen esanetan, baso bainuak jarduera “bitxi edo exotiko” bat direla uste dutenak badira ere, egiaz, bestelakoa da. Hala dio, Basora proiektuaren arduradun Violeta Toranek. “Naturan oinarritutako ongizate praktika bat da; gure estresa murriztea eta ongizatea handitzea lortzen dugu, zentzumenak aktibatuz”. Uste orokortua da ere zuhaitzak besarkatzera mugatzen dela, eta horrela ere egin daitekeen arren, aurrera daramatena ez da hori. Ez da basoan paseatu edo landareak eta zuhaitzak identifikatzeko jarduera ere, harago doaz eta ongizate egoera bat eskaini nahi du: “estres maila murriztu, sistema immunologikoa indartu eta sistema kardiobaskularra hobetu”.

Bi ordu inguruko saio horiek edozein naturgune egokitan egin daitezke. Aditu baten dinamizazioaren bidez, naturan murgilduko dira inguratzen dituen guztiaz jabetzeko: basoko soinuak, aromak, koloreak…

Iñigo Garcia zinegotziak, berriz, halako ekimenek duten garrantzia nabarmendu du: “Donostian etxetik minutu gutxira balio handiko naturgunean ditugu. Baso bainuek bezalako jarduerek gogorarazten digute natura ez dela paisaia hutsa, guztion eskura dagoen osasun eta ongizate baliabidea baizik”. Gainera, jardueraren izaera inklusiboa eta eskuragarria azpimarratzen du: “Edozein adin eta egoera fisikotarako pentsatutako esperientzia da, profesionalek gidatua eta errespetuzko ikuspegi patxadatsuarekin”.

GOE eraikinaren inguruko gaueko lanak «abisatu gabe» egin dituztela salatu dute bizilagunek

Irutxuloko Hitza — 2026-03-12 16:38:57

Basque Culinary Centerren Gastronomy Open Ecosystem (GOE) eraikina funtzionamenduan badago ere, inguruko lanak ez dituzte bukatu oraindik, eta, hain zuzen ere, gauez aritu dira bertan lan egiten bart. Hainbat bizilagunek salatu dutenez, ordea, ez dute gaueko lan horien inguruko jakinarazpen ofizialik jaso, lanak oso zaratatsuak izan badira ere, goiko bideoan ikus eta entzun daitekeenez. Duela urtebete inguru, antzeko salaketa publikoa egin zuten bizilagunek.

IRUTXULOKO HITZAk bizilagunetako baten salaketa jaso du: “Urte baten ondoren, denak berdin jarraitzen du. Amenabar berriz ere nahi bezala ibiltzen da, lanak gauez egiten, bizilagunei abisatu gabe. Duela urtebete, bizilagunok egoera bera salatu genuen, eta, kasualitatez, ez zuten lizentziarik lanak egin zituzten egunetarako, beste egun batzuetarako zuten; hala ere, ez zen ezer gertatu. Bizilagunei jakinarazteko eskatu genuen eta hitz onak izan ziren, baina gaur, berriro, gauza bera egin dute”.

Udal gobernuaren jarrera kritikatu du bizilagunak, baita ere: “Goiarekin gertatzen zen bezala, Insaustirekin ere Donostian nahi dutena egiten jarraitzen dute Amenabarrek eta bestelakoek, bizilagunak kontuan hartu gabe eta bizilagunen gainetik. Non dago atsedenerako eskubidea? Non daude Culinaryk, Amenabarrek edo udal gobernuak hainbeste goraipatzen zuten elkarbizitza eta enpatia? Hau lotsagarria da!”.

Oihana Kortazar eta Amets Aramberri izan dira onenak Herri Ametsa Talaia Mendi Krosean

Irutxuloko Hitza — 2026-02-02 13:31:13

Eguraldi txarrak astebete atzeratu ondoren, atzo egin zuten zortzigarrenez Herri Ametasa Talaia Mendi Krosa, Ulia mendian barrena. Antolatzaileen esanetan, lasterketak ilusio eta gogoa berpiztu zuen korrikalarien, mendizaleen eta familien artean, eta giro bikaina izan zen nagusi.

Lehia nagusian, Oihana Kortazar eta Amets Aramberri izan ziren azkarrenak, maila handiko lasterketa osatuz. Horrez gain, Herri Ametsa saria Andoni Uzkianok jaso zuen. Une hunkarria izan zen, duela gutxi zendu den Eñaut Elizalde altzatarrari eskaini ziolako.

Lehiaz kanpoko parte hartzaileek, berriz, 3,7 kilometroko mendi martxan aritzeko aukera izan zuten, “presiorik gabe ibilbideaz eta naturaz gozatu nahi zutenentzat pentsatuta”. Era berean, kros txikia ere egin zuten, “txikienek ere kirolaz eta festaz gozatzeko aukera izan zezaten”.

Horrekin batera, atzo lorturikoa nabarmendu dute antolatzaileek: “Herri Ametsa ikastolak beste behin erakutsi zuen kirola, natura, euskara eta komunitatea uztartuz, denontzako dibertsioa eta emozioa eskaintzeko gai dela”.

Uliako askaldegia «epe laburrean» lizitaziora aterako du udalak

Irutxuloko Hitza — 2026-01-29 16:00:46

Bost urte baino gehiago darama itxita Uliako askaldegiak, Basollua elkartearena izandakoak. 2020an, taberna eta jatetxea kudeatzen zituen enpresak kontratuari uko egin ondoren, 2023ko apirilean, Donostiako Udalak lehiaketa publikoa abiatu zuen. Ordea, hutsik geratu zen, eta ez dute beste lehiaketarik egin.

Hori dela eta, EH Bilduk urtarrileko osoko bilkurara eraman du Uliako askaldegiari buruzko kontroleko mozioa. Udalbatzari eskatu dio lizitazio berriak “natura lehenestea” eta “erabilera komunitarioa” bermatzea. Udal talde guztiek babestu dute, PPk izan ezik.

Mozioaren harira, EAJko Kerman Orbegozo zinegotziak aurreratu du “epe laburrean” lizitaziora aterako dutela Uliako eraikina. Zehazki, urteko bigarren hiruhilekoan. Gaineratu duenez, establezimenduaren erabilera askotarikoa izatea aurreikusten du udal gobernuak. Hau da, ostalaritza zerbitzua mantenduko dute, baina beste erabilera batzuk emango dizkiote eraikinari. Horrekin batera, Orbegozok esan du askaldegiaren bideragarritasuna bermatzea dela helburua.

GOE eraikina protesta artean inauguratu dute

Irutxuloko Hitza — 2025-10-24 00:00:30

Plazera eta onuragarria batzuentzat, espoliazioa eta kaltegarria besteentzat. Denbora errekorrean eraiki eta inauguratu dute Gastronomy Open Ecosystem (GOE) eraikina. Basque Culinary Center fundazio pribatuak sustatu du, erakunde publikoen babes zabalarekin. Horrela ere, BCCk dio ez dela haien bigarren egoitza, Mondragon Unibertsitatearen Gastronomia eta Sukaldaritza Arteak gradua garatzeko gunea baizik. Asteartean egin zuten inaugurazio ekitaldia, batzuen pozarekin eta besteen haserrearekin.

Hitzak hitz, Gros eta Ulia arteko Okendo Alde eremua zeharo eraldatu dute «Donostiaren ikur izan behar duen berrikuntzaren» eraikin bat jartzeko. Hori da Nekane Arzallus behin-behineko alkateak aurkezpen ekitaldian adierazi zuena. «GOE ona izango da Donostiarentzat», gaineratu zuen, eta Eneko Goia alkate ohiari esker oneko hitzak eskaini zizkion, han zelako, beste askoren artean. Hain zuzen ere, inaugurazioan izan ziren Imanol Pradales lehendakaria, Eider Mendoza Gipuzkoako ahaldun nagusia eta Luis Planas Espainiako Nekazaritza, Arrantza eta Elikadura ministroa.

Joxe Mari Aizega Basque Culinary Centerreko zuzendariak ere hitz egin zuen, GOE «apustu handi bat» dela nabarmentzeko: «Hiritarrentzat pentsatutako proiektu bat da», adierazi zuen. Ordea, GOE eraikinaren inguruan eta Donostian bizi diren herritar ugarik proiektuaz pentsatzen dutena protesta gisara plazaratu zuten, iragan astelehenean. «Ondare publikoaren espoliazioa» salatu zuten, Ez dugu nahi, ez dugu behar lelopean. Okendoko kultur etxe parean hasi zuten elkarretaratzea, baina Poliziak hor egotea debekatu zien. Hala, Groseko anbulatorio aurrera mugitu zituzten, «Donostiaren irudi berria» errefusatzen dutela adierazteko. 23 erakundek, elkartek eta auzo elkartek babesturiko mobilizazioa izan zen.

22 metroko olatuak

Donostiako Udalak, Goia alkatea buru zuela, 2021eko abuztuaren 10ean iragarri zuen BCCri 5.500 metro koadroko lursail bat utziko ziola. Orduan abiatu zuten Okendo Alde eremuko plan berezia aldatzeko eta onartzeko tramitazioa. Izan ere, 2010eko hiri antolamendurako plan orokorrak ez zuen aurreikusten BCCren eraikinik. Bai, ordea, adinekoentzako eta gazteentzako eraikin bana —guztira, 90 etxebizitza—. Plan berezia aldatzean, aipaturiko apartamentuak mantendu zituzten arren, horien inguruko berririk ez dago.

Basque Culinary Centerrek 2022ko maiatzean jakinarazi zuen egoitzaren izena Gastronomy Open Ecosystem (GOE) izango zela. Horrekin batera, nazioarteko lehiaketa baten bidez erabakitako egoitza berriaren diseinua aurkeztu zuten: Danimarkako Bjarke Ingels Group (BIG) arkitektura estudioaren Olatuen bidea proposamena. Izen horren arrazoia Ingels arkitektoak berak azaldu zuen asteleheneko inaugurazio ekitaldian: «Ulia menditik itsasoraino Santiago Bideak egiten duen formari keinu bat da». Altua da olatuen bidea, eraikinak 22,5 metroko garaiera duelako.

Udal gobernuak 2023ko martxoan onartu zuen behin betiko U.01 Manteo-AU.01.4 Okendo-Alde azpieremuaren plan berezia. Ulia Auzo Elkarteak eta beste eragile batzuek erabaki horren kontra egin arren, udal gobernuak erritmoa azkartu zuen GOE ahalik eta azkarren eraikitzeko. Azkenik, 3.836 metro koadroko lursaila eman zion udalak BCCri. Finantziazioari dagokionez, 26 milioi euroko aurrekontua zehaztu zuten. Horietatik, Eusko Jaurlaritzak hemezortzi milioi euro jarri ditu, Gipuzkoako Aldundiak sei milioi euro eta BCCk bi milioi euro. Udalak, berriz, ez du dirurik jarri, lursaila doan lagatzeagatik.

Okendo Aldeko eremu berde horretan zeuden zuhaitz guztiak 2024ko urtarrilean bota zituzten, eta horren kontrako manifestazio jendetsua egin zuten bizilagunek. Egun batzuk geroago hasi zituzten lanak, eta azkar batean altxatu dute GOE. Pentsa, 24 hilabete behar izan dituzte lanak hasteko eta bukatzeko.

GOEren kontra protesta egin zuten herritarrak, Groseko anbulatorio aurrean.Nagore Garmendia Artano

Lau solairu

Pasa den asteko ostiralean, GOEren ate irekien jardunaldi bat egin zuten, eta aurretik izena emandako mila herritarrek baino gehiagok bisitatu zuten. Berrehun laguneko bost txandatan egin zuten bisita, eta eraikinean batetik bestera ibili ziren. Lau solairuetan izan ziren, hasiera batean proiektuak lur azaleko hiru solairu izatea aurreikusi bazuen ere. Lur azpiko beste bi ditu. Laugarren solairuan dago jatetxea, 2026ko urtarriletik aurrera martxan izango dena, eta berrogei pertsonarentzako lekua izango duena. Beraz, gastronomia eta berrikuntza zentro bat ez ezik, ostalaritza establezimendu bat ere izango da.

GOEk lau gune izango ditu, eta horren arabera egin dute gainerako solairuen banaketa. Harreraz aparte, lehen solairua izango da herritarren parte hartzeko gunea. Bigarren solairua zeharo irekia da, eta herritarrentzako zein profesionalentzako jardunaldiak antolatuko dituzte. Azkenik, hirugarren solairua prestakuntzara bideratuko dute. Han kokatu dituzte sukalde mugikorrak, zoru gorri baten gainean.

Inauguratu duten arren, GOE eraikinaren inguruko urbanizazio lanak bukatu gabe daude. Hain zuzen ere, Nafarroa etorbidea eta Manteoren goiko aldea lotuko dituen igogailua falta da, eskailerak dagoeneko jarri dituzten arren. Bestalde, eraikina berdetuko duten landaredia jartzen hasi badira ere, momentuz, marroia eta grisa baino ez da.

Basque Culinary Centerren GOE inauguratu dute

Irutxuloko Hitza — 2025-10-21 10:05:46

Iritsi da eguna: inauguratu dute, zazpi hilabeteren ostean, Gastronomy Open Ecosystem (GOe) eraikina. Atzo arratsaldean egin zuten ekitaldi ofiziala, instituzioen eta izen handiko sukaldarien presentziarekin, besteak beste.

Euskal Herrian tradizio den gisan, Aurreskua dantzatuz hasi zuten ekitaldia. Irekiera “gozo” bat izan da instituzioen hitzetan, bertan egon baitziren, besteak beste, Imanol Pradales lehendakaria, Eider Mendoza Gipuzkoako ahaldun nagusia, Nekane Arzallus Donostiako behin-behineko alkatea eta Luis Planas Espainiako Nekazaritza, Arrantza eta Elikadura ministroa. Agintariekin batera, BCCren patronatuko kide diren sukaldarietako batzuk ere parte hartu zuten: Elena Arzak, Pedro Subijana eta Martin Berasategi, bestea beste.

Joxe Mari Aizega Basque Culinary Centerreko zuzendariak hartu zuen hitza, estreinakoz; azpimarratu nahi izan zuen, GOe ez dela BCCren luzapen bat, baizik eta “apustu handi bat”: “Hiritarrentzat pentsatutako proiektu bat da”, adierazi zuen. Hala, gehitu zuen, helburu zehatz bat dutela honekin guztiarekin: “Jasotako konfiantza emaitzetan itzuli nahi dugu”. Eraikina inauguratzea “plazer bat” dela ere aitortu dute, bai berak, baita gainontzeko instituzioek ere.

Mondragon Unibertsitateko gastronomia fakultateko zabaltze bat izango da GOe; hala, eskolak emateaz gain, tailerrak, hitzaldiak eta erakusketak egingo dituzte bertan, besteak beste.

Olatuen antzera

Danimarkako Bjarke Ingels Group (BIG) arkitektura enpresak diseinatu du eraikina. Hala, proiektuaren buruak, Bjarke Ingels arkitektoak ere hartu du hitza aurkezpenean; azaldu du, besteak beste, Ulia menditik itsasoraino Santiago Bideak egiten duen formari keinu bat dela eraikinaren diseinua, eta Olatuen bidea jarri diote izena.

Kapak, testurak, dena ongi pentsatua dago proiektu honetan, atzerriko enpresa batek sortu duen arren, herriarena berarena dela sinistuta. Planoak erakutsi ditu arkitektoak, hala, bertaratutakoek prozesu guztia ikusi ahal izateko.

Donostiarentzat “onuragarria”

Begirada guztiak erakarri ditu eraikinak, gehienbat, negatibora. Inaugurazioa hasi baino lehen eta bitartean, bizilagunek, elkarteek eta sindikatuek Nafarroa Etorbidea bete zuten, eraikinaren aurrean, “espoliazioa” salatzeko.

Arzallusek, ordea, bestela pentsatzen du; GOe ona izango da Donostiarentzat: “Ez gara soilik ari gastronomiaz edo sukaldaritzaz; ari gara, batez ere, Donostiaren ikur izan behar duen berrikuntzaren aldeko apustua alor guztietara eramateaz”, adierazi zuen. Hala, Eneko Goia alkate ohiari esker onak adierazi zizkion, proiektuan hasieratik izan duen inplikazioagatik.

Mendoza Gipuzkoako ahaldun nagusiak aitortu zuen aldundiaren aurreikuspen guztiak gainditu dituela egitasmoak. Gastronomia eta zientzia GOeren antzera uztartzen dituenik ez dago mundu osoan, eta horrek hiriari “sekulako ekarpena” egiten diola deritzo: “Etorkizun gozoa eta oparoa nahi dugu herri honentzat, eta hau guztia ez da kasualitatea; ahalegin handia dago honen atzean”.

Azkenik, Pradales lehendakariak hartu du hitza, eta gogobeteta agertu da proiektuak izan duen emaitzarekin; ez du zalantzan jartzen GOe ona izango dela bai Euskadirentzat, baita Gipuzkoa eta Donostiarentzat ere: “Berrikuntza gastronomikoan munduko erreferente izateko anbizioari eusten diogu, beraz, eta ez hitzekin; gaurkoa bezalako ekimenekin baizik. Zuekin batera, denok batera”.

Inaugurazioaren argazki bilduma: