Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

20 urtez hiriaren kontakizuna eraikitzen

Irutxuloko Hitza — 2025-07-28 13:03:30

IRUTXULOKO HITZA hiria den horretan kontatzea eta garaiaren kronika egiteko misioa du. Hiria aldatzen doa, eraldatzen, baina Donostiako errelatoa idazteko dago. Mundu bat dago hirian eta tokikoak mundu bat kontatzen du, mundu osoa tokiko bilakatuz. Kezkak, porrotak, arrakastak, arazoak edota gertakariak, horien kontakizuna egin nahi bada, ikuspegi herrikoi batetik, tokikotik kontatu behar dira. Tokikoak Komunitatea eraikitzen duelako.

Horretarako, ardatz nagusia euskara da, euskalgintzatik jaio baikinen eta hori baita gure oinarria. Mundua tokikotik eta euskaraz kontatu ez ezik, feminismotik, antiarrazismotik, elkartasunetik, ekologismotik eta klase ikuspegitik kontatzen dugu, modu independentean, pluraltasunez eta zintzoki.

Txikitasunetik, hirian eragin nahi dugu, donostiarra izateaz harro egon daitekeela erakusteko, donostiartasun berriak sustatzeko, Donostia guztiak kontatzeko, kontraesanak mahaigaineratzeko eta mundua Donostiatik gorpuzteko. Hori guztia, Komunitatearekin elkarlanean, bakarrik ezin delako.

Ez dugu ulertzen hiria eta mundua kontatzeko beste modurik, herritik ez bada.

Komunitatetik. Tokikotik.

Mundu osoa delako tokikoa.

HARPIDETU

EH Bilduk Martuteneri buruzko hiru interpelazio aurkeztuko ditu biharko batzordeetan

Irutxuloko Hitza — 2024-01-14 11:42:49

Iazko abenduaren 1ean Martutenen abiatu zuen EH Bilduk Plazatik dinamika, auzoetako eragile, enpresa eta herritarrekin hitz egin, eta landutako edukia udal eztabaidara bideratzeko. Hala, Martuteneko lehen bilkuran jasotako behar, gabezi eta kezkak bilduta, koalizio abertzaleak hiru interpelazio defendatuko ditu biharko batzarretan, Udal Gobernuak auzoaren funtsezko gaiei buruzko azalpenak eman ditzan.

Lehenengoa, Pilarreko Andre Mariaren, Tranbiaren eta Martuteneko pasealekuaren kaleetatik datorren trafikoa kudeatzen duen biribilgunearen proiektuari buruzkoa izango da. Obra eta Zerbitzu Publikoen Batzordean,”egungo trazadurak dakarren arriskua” eta Arantzazuko Ama ikastolaren aurrean jazotako istripuak” sortzen dute kezka mahai gaineratuko dute.

Eh Bilduk adierazi duenez, “zebra bideei buruz hitz egitea komeni da, izan ere, biribilgunetik gertu, espaloira beharrean, aparkaleku batera bideratuta dagoen bat irudikatzen da”. Era berean, egungo errepideak ikastolaren inguruan sortzen duen arriskua saihesteko, Tranbia bidetik bideratzea posible ote den galdetuko du batzordean.

Industriaguneko beharrak

Bigarren eta hirugarren interpelazioak 27. poligonoari buruzkoak dira. Izagirreren taldekideek azaldu dutenez, industria eremu horretako Ubarburu pasealekuan partzela bat ez da erabiltzen, eta horren arrazoien inguruan galdetuko dute Lurraldearen Garapen eta Plangintza Batzordean. Azaldu dutenez, APEMIrekin —Martuteneko 27. Poligonoko Jabeen eta Erabiltzaileen Elkartea— bildu ostean, industria guneak urbanizazio gabezia nabarmenak dituela egiaztatu dute, baita aparkaleku falta dagoela ere. Hartara, industria gunea urbanizatzea ahalbidetuko duen neurri sorta egitea ezinbestekoa da koalizio abertzalearen iritziz, espaloiak eta bidegorriak bezalako azpiegiturekin, besteak beste.

Era berean, Gune Publikoen Batzordean, Astigarragatik 27. poligonorako sarbidea aztertuko dute. 2022ko ekainean industriagunea AP-1 autobidearekin eta Urumeako autobiarekin zuzenean lotzeko sortu zen. EH Bilduk jasotakoaren arabera, baina, oso erabilera eskasa du egun eta GI-40 errepideari lotutako biribilgune nagusiak pilatuta jarraitzen du egunero.

59. Jazzaldian parte hartzeko izen ematea ireki dute

Irutxuloko Hitza — 2023-10-27 14:07:32

Donostiako 59. Jazzaldian arituko diren hamar euskal taldeen hautaketa prozesua ireki berri dute ostiral honetan. Antolatzaileek azaldu dutenez, Jazzaldiak euskal taldeen aldeko apustuarekin jarraitu nahi dute etorkizunean ere eta lekua egin nahi diote bertako talentuari.

Hautaketa prozesua Gipuzkoako Foru Aldundiaren bidez egingo da, Gipuzkoako talentu gazteak bultzatzen dituen Katapulta Tour Gipuzkoa deialdiaren barruan. Hala, prozesuan parte hartzeko, taldeek Jazzaldiaren webgunean izen-ematea osatu eta hautaketa prozesu horren oinarrietan zehazten den materiala bidali beharko dute, azaroaren 23ko 14:00ak baino lehen.

Jasotako proposamen guztien artean, hamabost talde aukeratuko dituzte Jazzaldiko antolatzaileek, “aurkeztutako musikaren kalitatea eta jaialdiaren programazioarekiko izan dezaketen egokitzapena kontuan hartuta”. Horren ostean, hamabost talde horiek Donostiako hainbat antzoki eta guneetan kontzertuak eskainiko dituzte 2023ko abendutik 2024ko apirilera bitarte, eta emanaldi horietako arrakastaren arabera aukeratuko dituzte 2024ko uztailean oholtza gainean egongo diren hamar finalistak.

Euskal Jazz taldeen artean hautaketa prozesu bat aurrera eramateko ekimena 2006an jarri zen abian lehen aldiz eta harrezkero arrakasta handia izan du, antolatzaileen arabera. Azken edizioan esaterako, 47 talde aurkeztu ziren.

Lau hilabeteko espetxe zigorra ezarri diete Kontxan euren semeari tratu txarrak eman zizkioten gurasoei

Irutxuloko Hitza — 2023-08-09 15:01:38

Hilaren 1ean, Ertzaintzak gizon bat atxilotu zuen Kontxa inguruan, bere semeari kalean bertan tratu txarrak ematea egotzita. Joan den astean bertan egin zuten epaiketa azkarra, eta haurraren bi gurasoei lau hilabeteko espetxe zigorra ezarri zieten, integritate moralaren aurkako delitu batengatik.

Halaber, Gipuzkoako Foru Aldundiak bere gain hartu zuen haurra atxiloketak iraun zuen bitartean, baina ez zien gurasoei tutoretza kendu, hedabide batzuek zabaldu duten moduan; hala azaldu du Eider Mendoza diputatu nagusiak Urnietan gaur (hilak 9) egindako agerraldi batean, kazetarien galderei erantzunez. Familia txekiar bat da, hirian turismoa egiten ari zena, eta hainbat hedabidek zabaldu duten informazioaren arabera, haurra Cervantes plazako banku batean lotu zuen gizonak, zakurrentzako uhal batekin.

Bi urtetik beherako zigorra izanik, aurrekari penalik gabe ez da kartzelara sartzen, beraz, aldundiak haurra itzuli die gurasoei; gainera, gurasoek gertakariak zein zigorra onartu zituzten epaiketan. Hala ere, aldundiko Gizarte Zerbitzuen Sailak Txekiako Errepublikako departamentu berari eskatu dio familiari jarraipena egiteko.

Normaltasun berria

Irutxuloko Hitza — 2022-12-23 00:15:58

Normaltasunerako itzuleraren urtea izan behar zuen 2022ak. Baina normaltasun berriak zaharraren antza gehiegi ez ote duen galdetzen dugu. Zeren ez da batere normala gure normaltasun berri hau, ezta?

Hizkuntza gutxitu eta gutxietsi bat besterik ez dugu, eta ingurura begiratuta gero eta gutxiago dira ezagutzen ditugun denda, taberna eta bizilagunak. Zahartzen ari den hirian bizi gara, baina etengabe ari dira berritzen asfaltoak, fatxadak, zubiak eta lurrazpiak. Soldatak ez bezala, etxebizitzaren, elikagaien eta energiaren prezioa etengabe ari da igotzen; Donostia bihurtu da bizitzeko hiririk garestiena.

IRUTXULOKO HITZA-n garaia kontatzea dugu erronka, eta garaian nahasi hauetan ere argia bota nahi dugu ilun dauden eremuetan.

Hiriko kultur eragile eta elkarteekin harremanak estutzen saiatzen gara, ahalik eta gertuen jarraituz haien egitasmoak eta elkarlanak sustatuz. Auzoetako jaiak itzuli diren honetan, adibide ona da egindako lana: irutxuloko hitza da auzoko jai guztiei jarraipena egin dien hedabide bakarra. Jai txiki zein handi, komunitatearen sorreran duen garrantzia nabarmentzen dugu.

2022an egindako proiektu garrantzitsuenen artean, Ongi Etorri Eskolara elkartearekin sortu dugun ‘Ongi Etorri Auzora’ egitasmoa aipatu nahiko genuke. IRUTXULOKO HITZA-n kulturartekotasuna lantzeko tresna gisa. Tokiko kazetaritzak zubiak eraikitzen lagundu behar duela uste dugu, komunitateen arteko harremana sustatuz. Donostiako euskalgintzak erronka handia du norabide horretan, eta guk ere gure aletxoa jarri nahi dugu.

Iritzi atala berritzen ari gara ere, ahots berriak ekartzen saiatzen gurera. Astero ekartzen dugu gurera hiriko ahots ezberdin bat, aniztasunari balioa emanez. Gure komunitatea gaztetzeko eta emakumeen presentzia handitzeko lanean ari gara etengabe.

Halako anormaltasun kroniko batera ohitzea aukera izan daiteke akaso. Normaltasunik ez dugulako nahi. Eskerrik asko beste urtebetez, normaltasunetik aldendu eta IRUTXULOKO HITZA babesten duzuen orori.

Arkaitzerrekan hesi moduko bat agertu dela ohartarazi dute

Irutxuloko Hitza — 2022-09-08 18:59:00

Arkaitzerreka errekastoan hesi moduko bat eta hainbat objektu jarri dituzte, Erraustegiaren Aurkako Mugimenduak zabaldutako bideo batean ikusten denez. Hain zuzen ere, Zubietako erraustegitik jaisten da errekasto hori, eta duela hainbat aste kutsadura agertzen hasi zen, baita hainbat astez agertu ere.

Bideoa grabatu duen herritarrak dioenez, baliteke uraren laginak hartzeko izatea jarri dituzten objektuak, baina ez da ziurra. URA agentziako eta beste erakunde batzuetako langileak inguruan ikusi dituztela aipatu du, baina ez diote argitu zertan dabiltzan. Erraustegiaren Aurkako Mugimenduak gertatzen ari dena salatu du: “Bain,a zer da hori? Eta, agintariek noiz eman behar dute neurketen berri? Gaia ahazten zaigunean… Beraien ingurumen zentroari kiratsa dario!”.

Jarraian, aipatu bideoa:

ELAk jazarpen sindikala salatu du Antiguako Metropolitan gimnasioan

Irutxuloko Hitza — 2022-07-27 09:34:16

Antiguako Pio Baroja pasealekuan dagoen Metropolitan gimnasioaren aurrean protesta egin du ELAk. Salatu dutenez, enpresako hauteskunde sindikalen prozesuan parte hartu zuen langile bat kaleratu dute.

Donostiako Metropolitan gimnasioa 2021eko urrian ireki zuten. 40 langile inguru ditu, salatu dutenez, “lan baldintza eskasekin, LGStik hurbil dauden soldatak jasoz eta lan ezegonkortasun altuarekin”. Testuinguru horretan, maiatzean hauteskunde sindikalak egin ziren enpresan, eta ELAk hiru ordezkariak lortu zituen.

Orain, enpresak hauteskunde sindikalen prozesuan plantillaren eta sindikatuaren arteko lotura eginez parte hartu zuen langile bat kaleratu du. Lanean inolako gorabeherarik izan ez duen langilea da, sindikatuak adierazi duenez.

ELAk Metropolitan gimnasioaren jazarpen sindikala salatu du, eta “langile horren, eta enpresako gainerako langileen, lan eskubideak defendatzeko konpromisoaz ohartarazi du, bai bide juridikotik, bai salaketa publiko eta sindikalaren bidez”.

Mitomania eta fikzioaren katea

Irutxuloko Hitza — 2022-07-08 00:00:04

‘Bergman Island’

Zuzendaria: Mia Hansen-Løve

Urtea: 2021.

Herrialdea: Frantzia.

Mia Hansen-Løve Frantziako zineak mende honetan eman duen ahots nabarmenetarikoa da. Zine kritikan hazia, bere lehen filmek lilura eragin zuten, istorio berez xeheak idatzi eta pantailaratzeko sentsibilitatea medio, garaiaren pultsua, horren etereo eta iheskorra den balore horren elementuak josteko gaitasuna adierazten baitzuen. Edonola, Hansen-Løven zinearen inguruan arazoak ikusten dituztenak badira, bere filmen itxura berdintsuegia delaren oihartzuna zabaltzeraino. Pertsonaia, oro har, urbanoak; erlazioen, generoaren edo denboraren igarotzean arreta fokua dutenak, eszenaratze naturalistaren bitartez garatuak. Estiloaren depurazioa gauzatu bitartean, bere irudiek indarra galdu ote dute? Hau, jakina, garaiaren arabera bertute edo gabezia da. Nork esan lezake Yasujiro Ozu edo Woody Allenena ez dela egile nortasun nabarmenez eraikiriko zinea?

Kontuak kontu, Bergman Island-ek aldaketa nabarmena dakar zuzendariaren ibilbidean, bere sinopsitik bertatik abiatuta: Anthony eta Chris (Tim Roth eta Vicky Krieps) adin ertaineko bikote dira. Biak zine idazle eta zuzendariak dira, eta erlazio sano eta orekatua dutela ematen du. Kutsu urbanoa erabat hautsi egiten da, pelikularen background-a Fårö Suediako irla ikonikoa baita, Ingmar Bergman zuzendariaren paradisu eta erretiro tokia, bere film askotako errodaje parajea. Bikoteak bertara joateko gonbita jasoko du eta biek baliatuko dute inspirazio iturri bezala. Inguruaren ezagutzearen eta norberaren sortze-bidearen koordenadak (gizona etxean ezarriko da, emakumea errotan) eraginkorki markatu ondoren, laster azaleraziko da Chrisek arazoak dituela bere gidoia garatzeko. Hala, senarrari egingo dion kontaketan sartuko gara filmaren haustura nagusienean, etorkizuneko pelikula hori pantailaratuko baitzaigu (adierazkorki, Hansen-Løven Un amour de jeneusse-en osagai ugarirekin).

Fikzioaren agerpenak, hain zuzen ere, markatuko du filmaren adiera tematikoaren ardatza. Fårö irlako agertoki berdinetan garatua, ispiluen jokoa zabalduko da ‘errealitate’ eta fikzioaren artean (Chrisen irudia askotan bikoiztuko da era grafikoan, plano orokor ugaritako bazterrean bere ispilukoetako isla beha baitaiteke). Eta jokoa urrutiago ere eraman liteke, izan ere, Anthony eta Chrisen errealitate hori… ez al da funtsean fikzioa? Zentzu honetan, pertsonaia bezala, Hansen-Løve bera ere Olivier Assayas zuzendariaren bikote izan da urte askotan. Hala, Bergman Island panpin errusiarren mekanismoaren bitartez pentsa genezake, etengabe eta elkarri kateatuta jaiotzen diren narrazioak baitira. Era ederrean planteatzen ditu, halaber, Hansen-Løve-ek istorio berrion haziaren bi poloak: norberaren bizitza, lehenik, propio ditugun beldur, maitasun, gorroto eta gaitasunekin; eta denon eskura dauden erreferenteak, bestalde. Eta hor altxatzen da Ingmar Bergmanen figura totemikoa. Irla bera zinefiliaren parke tematiko gisa dago marraztua, eta pertsona bakoitzak, maisu suediarraren pelikuletako existentzialismo, jainko eta mamuak edo krudeltasuna era pertsonalean ulertuko ditu. Bergmanenganako mitomania erreferente unibertsalen zeinu nabarmena da, gure istorioak iritsi aurretik bertan zeuden kontaketena.

Filmaren azken pasarteetan pertsonaia berria azalduko da: erdiguneko bikotearen alaba, irlara iritsiko dena eta bere gurasoen narrazioek zipriztindu dezaten utziko duena. Elkarri segidan doazen istorioen hurrengo katebegia bertan dugu.

Gaur estreinatuko da 'Irabazi Arte!' telesaila

Irutxuloko Hitza — 2022-02-11 17:18:55

Gaur Irabazi Arte! haur eta gazteentzako fikziozko telesail berriaren estreinaldi izango da ikusgai ETB1en eta eitb.eus-en, 21:00etatik aurrera. Telesailak emakumezkoen futbol talde bat hartzen du oinarri eta protagonisten bitartez gaur egun gizartean ematen diren askotariko gaiak landuko dituzte: “Futbolaren inguruan eta kirolean bizi den giroa, emakumeen ahalduntzea, nerabeen eta gurasoen arteko harremanak, familia eta, oro har, gaur egungo gazteek dituzten erronkak” islatuko dituzte.

Sua Enparantza (Antigua, 2003) izango da telesaileko protagonista. Joan den urrian elkarrizketa luzea egin zion IRUTXULOKO HITZA-k serieari buruz eta Enparantzaren gainontzeko lanei buruz, tartean, Kukai dantza taldeko esperientziaz.

Sinopsia

Arene (Sua Enparantza) bere familiarekin Bartzelonatik Learora bizitzera etorriko den nerabe bat da. Une horretatik aurrera, bizitza berri batera egokitu beharko du. Aitonarekin bizitzen ikasi beharko du eta lagun berriak ere egin beharko ditu. Baina, batez ere, Arenek denen aurreiritzien aurka kementsu borrokatu beharko du emakumezkoen futbol talde bat sortu ahal izateko, herrian inoiz izan den lehenbizikoa.