Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Urtea beteta, eraikinaren erabilera egonkortu nahi dute

Irutxuloko Hitza — 2026-06-19 00:30:31

Guardetxea da Parte Zaharreko gaztetxea. Urte bat bete da Alde Zaharreko Gazte Asanbladak (AZGA) eraikina okupatu zuenetik. Zehazki, iazko Maiatzaren Lehenaren testuinguruan sartu ziren bertara, eta han jarraitzen dute. Urteurrenaren harira, agerraldi jendetsua egin zuten maiatzaren 1ean, Donostiako eragile sozial eta politiko ugariren babesarekin, Parte Zaharreko Trinitate plazan. «Balio dezala Guardetxeak, eta urteurren honek, eragile eta militanteon arteko aliantzak indartu eta bestelako Donostia baten eraikuntzan aurrerapauso bat emateko», nabarmendu zuen AZGAk.

Atzera begira jarrita, urtearen balantzea egiteko elkartu da IRUTXULOKO HITZA Guardetxeko eta AZGAko bi kiderekin: Nerea Irastorza eta Hegoi Goñi. Sei urtez hutsik egon zen eraikina okupatu zuten lagunetako bi izan ziren, eta hasieratik bizi ahal izan dute Guardetxearen proiektuak egindako urtebeteko bidea. AZGAk plazaraturiko balorazio orokorrarekin bat egin dute: «Udal gobernuak errepresioaren bitartez erantzun zion martxan jarritako gaztetxearen proiektuari. Honen erakusle dira aurre egin behar izan diegun epaiketak, huste saiakerak, martxan dauden muntaia polizial eta prozesu judizialak edota 32.000 euroko isuna, errekurtsoa jarri dioguna. Hala ere, elkartasuna antolatu eta erresistentziari eutsi diogu, eta oztopoak oztopo, ez dute gure jardun politikoa etetea lortu».

Horrekin batera, «harro» daude «etenik gabeko» eskaintza kultural eta politikoa garatu dutelako Guardetxean: «Doako kirol komunitarioko proiektuak sortu ditugu eta hamaika elkarte, eragile eta kolektiboen jarduerak garatzeko aterpe izan da. Milaka pertsona igaro dira bertatik eta auzoko eta Donostiako elkarte eta gizarte mugimendu ugariren babesa dugu».

Nerea Irastorza eta Hegoi Goñi Alde Zaharreko Gazte Asanbladako kideak, Guardetxeko tabernaren aurrean.Joseba Parron San Sebastian

Laugarrenean

Hainbat saiakera egin ondoren, laugarrenean lortu zuen AZGAk Guardetxera sartu eta han gelditzea. 2025eko apirilaren 30eko arratsaldean izan zen, baina asmoa askoz ere lehenagokoa dela gogoratu du Irastorzak: «Hiru urte lehenago, 2022an, Guardetxea okupatzea erabaki genuen asanbladan. Kijera gaztetxea itxi ostean, Parte Zaharreko gazteak elkartzeko eta jarduerak egiteko espaziorik gabe geratu ginen».

Guardetxea okupatzeko lehen saiakera 2022ko abenduan izan zen. «Hara sartu ginen eraikina auzoarentzat izan zedin, baina Udaltzaingoa berehala agertu zen, eta handik bota gintuzten», nabarmendu du Irastorzak. Bigarren saiakera, berriz, gutxira izan zen; 2023ko otsailean. «Auzolanean Guardetxea txukuntzera sartu ginen, baina udaltzainek berriz ere kaleratu gintuzten».

Egoera horren aurrean, denbora pasatu zen laugarren saiakera egiteko. 2024ko maiatzean asteburu osoko «okupazio sinbolikoa» egin zuten, eta udalari bilera bat eskatu zioten. «Espazio bat behar genuenez, Guardetxearekin zer gertatzen zen galdegin genion udalari. Izan ere, guretzat leku aproposa zen. Ez genuen erantzunik jaso», esan du Irastorzak. Erantzun faltak eragin zuen okupazio sinboliko hartatik okupazio iraunkor baten alde egitea. «Urtebeteko lanketa egin genuen. Auzoan babesak pilatu genituen, eragileekin elkartu ginen eta abokatuekin ere hitz egin genuen».

Eta iritsi zen eguna. «Aurreko egunetan, hainbatetan pasatu ginen Guardetxetik okupazioa prestatzeko, batez ere, behin sartuta barrutik itxi ahal izateko. Udaltzainak ere bueltaka zebiltzan egun horietan, eta bistan da zerbait espero zutela», azaldu du Goñik. «Maiatzaren 1ean okupatuko genuela uste zuten, baina aurreratzea erabaki genuen. Apirilaren 30ean sartu ginen lagun batzuk, arratsaldean, eta gaua han pasatu genuen. Udaltzainak handik pasatu ziren, baina pentsatu zuten ez geundela barruan», gehitu du Irastorzak.

Biharamunean, AZGAko kideak ez ezik, auzotarrak, familiak eta eragileak ere igo ziren Guardetxera, eta hori «oso garrantzitsua» izan zen. «Gerora jakin ahal izan dugunez, auzotar eta haur asko agertu zirenez, atzera egin zuten udaltzainek. Hori zen gure helburua, jende asko elkartzea kaleratzerik egon ez zedin, eta lortu genuen», zehaztu du Goñik.

Auzolana eta osoko bilkura

Guardetxea hartu orduko, auzolanean hasi ziren, eraikina barrutik oso zikina zegoelako eta kanpotik zeharo utzita. «Maiatzaren 1ean bertan hurbildu ziren pertsona guztiengatik izan ez balitz, oraindik han egongo ginen. Dena dela, auzolan asko antolatu behar izan ditugu barrutik gauzak ateratzeko, teilatuak konpontzeko, belarra mozteko, komuna jartzeko… lan asko egin behar izan genuen», adierazi du Irastorzak. Hasieratik argi izan zuten eraikina txukundu behar zutela. «Leku okupatuak eta autogestionatuak zikinak direla esan ohi dute udalek zein agintariek. Horregatik, lehen momentutik Guardetxea garbitzeari ekin genion», gaineratu du Goñik.

Udaletxera ere jo zuten AZGAko 40 bat kidek, eta 2025eko maiatzeko osoko bilkurara sartu ziren. Udalbatzari Guardetxea auzoarentzako ekipamendu bat izateko eskaera luzatu nahi izan zioten, baina hitz egiten hasi orduko, udaltzainek indarrez atera zituzten kanpora eta iskanbila sortu zen udal batzar aretoan. Horren ondorioz, kide bakoitzari 800 euroko isuna —32.000 euro, guztira— ezarri zieten hilabete batzuk geroago.

Udalak harturiko jarrera ikusita, Guardetxean gotortu ziren, edozein unetan hustu zezaketela pentsatu zutelako. «Erresistentziak hilabete eta aste bat gehienez iraun zuen. Okupatu eta hamabost egunera, udaltzainak gu identifikatzera etorri ziren, zinegotzi batek okupazioaren kontrako salaketa jarri zuelako. Ordea, epaileak ez zuen gu botatzeko agindua eman», azaldu du Irastorzak. «Hilabete luzez 24 orduko erresistentzia txandak egiten aritu ostean, erabaki genuen Guardetxea irekitzea eta jarduerak antolatzen hastea», esan du Goñik.

100 jarduera baino gehiago

Ordutik aurrera, egunak, asteak eta hilabeteak zenbatzen hasi zen Guardetxea. Ateak zabaldu orduko hasi ziren kontzertuak, hitzaldiak, aurkezpenak, bertso saioak, tailerrak, topaketak eta beste antolatzen. Parte Zaharreko eta Donostiako gainerako eragileekin indarrak batu zituzten, eta aurrez eraikina kudeatu zuen Banda Bat elkartearen babesa ere jaso zuten. «Hasieran, beldur ginen ea nola hartuko zuten okupazioarena, baina erabat ados daude harturiko bidearekin», adierazi du Irastorzak.

Elkarlan horren bidez, 100 jarduera baino gehiago antolatu dituzte 365 egunetan. Gehienak musika emanaldiak izan dira; taldeen kontzertuak eta musika jartzaileen saioak. Horietako pare bat ere nabarmendu nahi izan dituzte biek; Nogen eta Maruxak taldeek Guardetxean eskainitakoak. Txillardegi Udal Liburutegiaren batera egindako hitzaldia, eta kickboxing saioa ere aipatu dituzte.

Guardetxean egindako kickboxing saioa.AZGA

Ibilbide judiziala

Guardetxearen okupazioaren aurkako epaiketa bakarra urtarrilean izan zen, eta Donostiako epaitegiak absolbitu egin zituen okupazioan parte hartu zuten bi auzipetuak. Fiskaltzak argudiatu zuen ez zegoela nahikoa arrazoirik zigortzeko. Dena dela, beste bi prozesu daude abian.

Batetik, iazko maiatzeko osoko bilkuran gertaturikoarengatik ezarritako 32.000 euroko zigorra dago. AZGAko kideek isunaren kontrako helegitea jarri zuten, eta ebazpenaren zain daude. «Usurpazioarekin azkarrago ibili ziren, delitu arina zelako. Aldiz, osoko bilkurako aferaren instrukzio fasea pasatu dugu, deklaratu dugu, eta itxoiten ari gara instrukzioko epaileak zer erabakitzen duen, epaiketa noiz den, fiskaltzak zer eskatzen digun, eta abar», azaldu du Irastorzak.

Udal batzar aretora sartu ziren 40 lagunei ezarri dieten isun penalaz gain, horietako seiren kontrako beste prozesu penal bat ere martxan dago. Goñi eta Irastorza daude sei horien artean.

Elkartea eta esleipena

Okupazioaren urteurrenaren harira, AZGAk Guardetxearen elkartea osatu zuen apirila bukaeran, eta Donostiako Udalari proiektu autogestionatua eta komunitarioa aurkeztu zion. Hedabide honek jakin ahal izan duenez, udalak proposamena jaso zuen eta Jon Insausti alkateak hartu du ardura gai hori lantzeko. Alkateari horren inguruan galdetuta, ziurtatu zuen Guardetxea Parte Zaharreko ekipamendu bat izango dela.

Guardetxea urtebete luzez irekita mantentzea «mesedegarria» izan dela aitortu dute: «Badirudi alkate aldaketarekin egoera aldatu dela». Horren aurrean, Guardetxearen esleipena lortu eta eraikina kudeatu nahi dute, bere garaian Banda Bat elkarteak egin zuen moduan.

Udalaren asmoa esleipena eskaintzea izan daitekeela ikusita, hainbat lan ildo zehaztu dituzte: «Batetik, funtzionatzen jarraitzea da, hau bizirik eta irekita mantenduz. Era berean, eraikina txukuntzeko obra bat beharrezkoa da. Bestetik, esleipena adostu nahi dugu, eta horretarako sortu dugu elkartea. Prozesu hori aurrera eraman nahi dugu, auzotar guztien babesa lortuz. Azkenik, isunen arazoa konpondu nahi dugu. Beti saiatzen gara kontzertuak eta antzekoak antolatzen dirua ateratzeko, oso garrantzitsua iruditzen zaigulako kutxa betetzea. Isunak noizbait iristen badira, aurre egin ahal izateko prestatuta egon nahi dugu».

Esleipena adosterako orduan, «marra gorri» batzuk ere zehaztu dituzte. Guardetxea orain arteko moduan erabiltzen jarraitu nahi dute, hainbat eragilerekin elkarlanean jarduerak antolatuz. Horrekin batera, azken urtean antolaturiko jarduera kopuru bera mantendu nahi dute. «Alegia, esleipena adostu arren, berdin jarraitu nahi dugu. Azkenean, ez dauka zentzurik eraikina txukundu eta obra bat egin ondoren esatea ezin direla kontzertuak egin», esan du Irastorzak.

Urratsak «argi» dituztela dio Goñik: «Gu saiatuko gara obra egin baino lehen esleipena lortzen, eta ez badugu lortzen, ez gara hemendik joango bota arte. Bide horrek espazioa eskuratzeko balio badu, aprobetxatuko dugu, baina marra gorriak pasatzen badituzte, gu ez gara makurtuko. Orain arte defendatu duguna defendatzen jarraituko dugu».

Zaindegi militarra, etxebizitza eta kultur gunea

Irutxuloko Hitza — 2026-06-19 00:30:08

Urgull mendiko gotorlekuaren zaindegi militarra 1863an eraiki zuten. Joaquin Etxague ingeniari militarrak diseinatu zuen. Ofizialarentzako eta sarjentuentzako gelak, kalabozoak eta arkupeak zituen, besteak beste. 1872an, izaera militarra galdu zuen, eta udalak espazio publiko bihurtu zuen. Horrela, Urgulleko zaindariarentzako etxebizitza bihurtu zuten; hau da, Guardetxea.

Hamarkada batzuk geroago, udal eraikinean bi etxebizitza egin zituzten. Ordea, denbora bat pasatuta, hutsik geratu zen. 1990. urte inguruan, eraikina berritu, arkupeak kendu eta bizitoki izaten jarraitu zuen. Horrekin batera, 1995ean, babesturiko ondare izendatu, eta hirugarren mailako babesa eman zioten. Hamarkada horren bukaeran, udalak beste erabilera bat eman zion. 1999. urtean sortu zen Parte Zaharreko Banda Bat elkarte soziokulturalari laga zioten Guardetxea. Alde Zaharra Kirol Elkartearen alor kulturala sustatzeko sortu zuten Banda Bat elkartea, izen bereko musika taldean ibilitako batzuek.

Ordutik aurrera, era guztietako kultur jarduerak eta tailerrak antolatu zituzten, 2007an eraikinak su hartu zuen arte. Nahita edo nahigabe gertatu zen argitu gabe, udalak eraikina berritzea erabaki zuen. Suteak ez zuen egitura kaltetu, baina denbora behar izan zuten Guardetxea berriz ere irekitzeko. Bi urte geroagoa, 2009an, Banda Bat elkarte biziberrituari adjudikatu zioten eraikinaren erabilera, hamar urterako.

Denbora horretan, Guardetxea hiriko kultur gune garrantzitsu bilakatu zen. Bertako eragile eta artistentzako leku ireki bat eskaini eta kultur eskaintza eraldatzaile bat proposatu zuten. Ekitaldi propioak antolatu eta gainerako eragileen jarduerak koordinatzeaz arduratu ziren. Urtero, adin guztietarako hamarnaka ekitaldi jaso zituzten Urgulleko eraikinean, kontzertuak, antzerkiak, hitzaldiak eta bestelako hainbat egitasmo nahasiz.

2019ko uztailaren 30ean iraungi zen Banda Bat elkartearen emakida. Jarraitzeko asmoa zuten, eta eraikinean hobekuntza batzuk egiten hasi ziren, bukatu ez zituztenak. Udalak ez zien horretarako aukerarik eman. Izan ere, eraikinaren erabilera adjudikatzeko lehiaketa publiko bat iragarri bazuten ere, ez zen horrelakorik gertatu. 2020an, Guardetxearen saneamendu arazoak konpondu zituzten, eta, gerora, zigilatu egin zuten.

Bi urte geroago, 2022ko abenduan, Alde Zaharreko Gazte Asanbladak Guardetxea okupatu zuen, bertan Parte Zaharreko gaztetxea irekitzeko asmoz. Ordea, Udaltzaingoak eraikina itxi zuen handik gutxira. 2023ko otsailean, asanbladakoak Guardetxera berriz ere sartu eta auzolana egin bazuten ere, Udaltzaingoak berriz hustu zuen. Are gehiago, eraikina blindatu egin zuten. Parte Zaharreko gazteek ez zuten amore eman, eta okupazio sinboliko bat egin zuten 2024ko maiatzean. Urtebete geroago gertatuko zen okupazioaren aurrekaria izan zen.

Jakingura guraso elkartea: «Euskara ez da hizkuntza bat gehiago»

Irutxuloko Hitza — 2026-06-19 00:00:58

Antiguako Jakintza Ikastolako guraso elkarteak, Jakingurak, euskararen eta ikastetxean presente dauden gainontzeko hizkuntzen egoerari buruzko txostena argitaratu du. Dokumentua ez da helburu bat bere horretan, etorkizuneko hizkuntza plan baten abiapuntua baizik, Jakingurako kideek azaldu dutenez.

Txostena osatzeko ideia gurasoen artean urteetan pilatutako kezketatik sortu zen, euskararen erabileraren inguruko galderak gero eta maizago agertzen baitziren familien arteko elkarrizketetan, bai euskaldunen artean, bai beste hizkuntza eta jatorri batzuetako familien artean ere. «Argi genuen euskara plan bat egiten hasteko Jakintza Ikastolako egoera zein zen jakin behar genuela, abiapuntua zein zen jakin behar genuen», azaldu du Joxepa Bornaetxea Jakingurako kideak.

Kezka partekatuak datu bihurtzea

Txostena egiteko, bi behar nagusi identifikatu zituzten. Alde batetik, euskararen aldeko neurriak eta hizkuntzaren biziberritzea familiek zenbateraino babesten zituzten jakin nahi zuten. Bestetik, ikastetxeko familien hizkuntza errealitatea ezagutu nahi zuten, etorkizuneko neurriak datuetan oinarrituta diseinatzeko.

Horretarako galdetegi bat prestatu zuten, familien iritziak eta hizkuntza ohiturak jasotzeko. Emaitzek aurreikuspenak gainditu zituzten, eta familiek espero baino parte hartze handiagoa izan zuten. «Uste genuena baino interes handiagoa zegoela ikusi genuen», nabarmendu du Bornaetxeak. Gainera, datuek erakutsi zuten ikastetxean gero eta aniztasun handiagoa zegoela hizkuntzei dagokienez, eta horrek euskararen sustapena beste ikuspegi batetik lantzeko beharra azaleratu zuen, Jakinguraren arabera.

Haurrek eguneroko denboraren %15 inguru baino ez dute igarotzen ikastetxean, baina Jakinguraren ustez, espazio horrek eragin handia du hizkuntza ohituren eraikuntzan. Bertan sortzen dira lehen laguntasunak, harreman sareak eta sozializazio prozesu esanguratsuenak: «Soilik %15a da, baina ez da edozein %15», dio Bornaetxeak.

Hala ere, guraso elkarteak ez du uste euskararen inguruko ardura osoa eskolaren gain utzi behar denik. Aitzitik, familien, aisialdiaren, komunikabideen eta ikastetxearen arteko elkarlana aldarrikatu du. Haien ustez, euskararen biziberritzea ez da eragile bakar baten esku utzi daitekeen erronka.

Sistemaren ahuleziak, erronka nagusia

Txostena egin ondoren, Jakingurako kideek argi dute zein den gaur egun duten kezkarik handiena: hezkuntza sistemak euskararen erronkari erantzuteko duen gaitasun mugatua. Haien ustez, azken urteotan hezkuntzan bizi den ziurgabetasunak eta baliabide faltak zaildu egiten dute epe luzerako hizkuntza proiektu sendoak garatzea. «Hezkuntza sistemak momentu honetan ez du baliabiderik, estrukturalki ez da gai euskarak duen erronkari erantzuteko», azaldu dute elkartekoek.

Gainera, erakunde publikoek ikastetxe eta komunitateei gero eta babes gutxiago eskaintzen dietela deitoratu dute. Horren ondorioz, familiek eta ikastetxeek bultzatutako ekimenek sarritan ez dute behar duten laguntza jasotzen, nahiz eta euskararen etorkizuna bermatzeko gero eta premiazkoagoak izan.

Jakintzan eta Antiguan euskaltzale ugari daudela nabarmendu dute, eta indarrak batuz gero, emaitza hobeak lor daitezkeela

Hizkuntz aniztasuna

Familien %75ek galdetegia erantzun izanak interes handia erakusten duela uste dute Jakinguran. Gainera, txostenak agerian utzi du Jakintza Ikastolan hogei hizkuntza baino gehiago hitz egiten direla. Errealitate horren aurrean, guraso elkarteak euskara erdigunean mantentzea du helburu, baina hizkuntza aniztasuna errespetatuz.

Horretarako, hizkuntza irizpide argiak adostea proposatu dute, komunikazioan eta jardueretan. Era berean, hizkuntzen egoeraren inguruko kontzientzia sustatu nahi dute. «Euskara ez da hizkuntza bat gehiago», nabarmendu du Bornaetxeak. Bere esanetan, hizkuntza gutxitua denez, babes berezia behar du, eta horren inguruko kontzientzia partekatua eraikitzea funtsezkoa izango da datozen urteotan.

Antigua, arnasgunea eta alerta

Txostenak Antigua auzoaren egoera ere aztertzen du, euskarari dagokionez. Jakinguraren arabera, Antigua Donostiako auzorik euskaldunenetako bat da, eta hiri eremu batean euskarak duen presentziagatik salbuespen moduko bat da. Bornaetxeak «oasi» eta «arnasgune» gisa definitu du. Hala ere, datuek erakusten dute ezagutza maila handia izan arren, erabilera askoz txikiagoa dela.

Horregatik, baikortasuna eta kezka uztartzen dituzte. «Ez dugu mezu negatiborik eman nahi, baina argi eduki behar dugu, alerta puntu batetik, gure esku dagoela oasi bat izaten jarraitzea», azaldu du. Haien ustez, gaur egungo egoera ona izan arren, euskararen etorkizuna ez dago bermatuta.

Etorkizuna: elkarlanean urrutiago

Bost edo hamar urte barrura begira, Jakingurak ez du helburu idealizaturik marrazten. Ez dute uste errealista denik komunitate osoa erabat euskaldunduta egongo dela pentsatzea. Hala ere, ikastetxean, auzoan eta hirian dagoen euskararen aldeko sarean sinesten dute.

Jakintzan, Antiguan eta inguruko eragileetan euskaltzale ugari daudela nabarmendu dute, eta indarrak batuz gero, emaitza hobeak lor daitezkeela: «Ez dakit nora iritsiko garen, baina elkarrekin urrutiago», laburbildu du Bornaetxeak. Hori da, azken finean, txostenak helarazi nahi duen mezua: diagnostikoa ez dela amaiera, baizik eta euskararen etorkizuna elkarrekin eraikitzeko lehen urratsa.

Ttonttorro, zerura igotzeko prest; badatoz Igeldoko sanpedroak

Irutxuloko Hitza — 2026-06-19 00:00:46

Uda ate joka dugu, eta berarekin batera, Igeldoko kaleak ilusioz eta musikaz janzteko prest daude: bihar lehertuko da festaren txinparta San Pedro jaiekin.

Festen atariko gisa, aurtengo krosa larunbat goizera ekarri dute. Helduen oinkadek irekiko dute bidea, eta, sariak banatu ostean, haurren txanda izango da. Herriko txikienen lasterketa izaten da jarduerarik jendetsuenetariko bat, Leire Barrondo Ttonttorro jai batzordeko kideak azaldu duenez.

San Joan bezperak, berriz, kutsu magikoagoa izango du. Arratsaldeak aurrera egin ahala, txaranga edo txaparroi zaratatsuaren prestaketak eta fajita jate goxo batek berotuko dituzte gorputzak, eta, gaueko iluntasunean, etxez etxeko kantuak eta bertsolarien ahotsak entzungo dira, txoko guztietan.

Energia berrien eztanda

Festen benetako taupada, ordea, hilaren 26eko 20:00etan hasiko da. Ordu horretan igoko da zerura Ttonttorro, herriko astotxo maitea. Aurtengo txupinazoa, gainera, esangura handikoa izango da: izan ere, IKE (Igeldoko Kontsumo Ekologikoa) kooperatibak piztuko du metxa. Hala, une hori baliatuko dute herritarrei mezu eta hitzalditxo bat helarazteko.

Denboran izoztutako tradizioak

Itsasoko brisak jarduerak dantzarazten ditu, baina egitarauan bada «mugiezina» den egun bat: San Pedro eguna. Goizeko meza eta ondorengo hamaiketakoa, herri kirolen izerdia, toka eta bolo lehiaketen zehaztasuna, eta pilota partiden oihartzuna frontoian. Betikoak, betikoentzat izaten jarraitzen du.

Urteetan zehar tradizio sendoa izan den idi dema, ordea, airean dago aurten; izan ere, abereen artean dabilen dermatosi nodular gaixotasunaren itzalak Eusko Jaurlaritzaren baimenaren zain utzi ditu igeldotarrak.

Betikoa eta berria

Igeldoko festek jendearentzat iman berezia dute, eta ekitaldi batzuek izugarrizko arrakasta dute: euskal dantza emanaldia izaten da horietako bat: «Frontoia txiki geratu izan da», adierazi du Barrondok. Herri bazkariek eta berbenek ere pilatzen dute jendea, eta santaixabeletako gauerdiko aurreskua ere une berezia izaten da.

Plater fuertea, aldiz, musikaren arloan izango da: aurten poltsikoak pixka bat poztu direnez, Zopilotes Txirriaos taldeak joko du, Barrondoren hitzetan «garai batean pentsaezina zena» errealitate bihurtuz.

Auzolanean, hobeto

Jaien kudeaketaren pisurik handiena Ttonttorro jai batzordeko hiru lagunen sorbaldetan erortzen da, baina herritarren laguntza ezinbestekoa zaie. Hala, festen aurreko astean, herritarrak plaza txukundu, barra muntatu eta herria apaintzeko bildu dira.

Erronkarik handiena 16 eta 20 urte bitarteko gazteen arreta mantentzea izan ohi bada ere, aurten, batzordeak lortu du asmatzea: «Aurtengo kontzertuen eskaintzarekin oso pozik daudela esan digute», adierazi du Barrondok. Igeldok, beraz, besoak zabalik eta plaza prest ditu egun hauetaz gozatzeko.

Hemen duzue egitarau osoa.

Sanjoanak, «Intxaurrondoko euskal giroari eusteko»

Irutxuloko Hitza — 2026-06-19 00:00:44

Egun bakarreko egitarauarekin, baina ederki ospatzen dituzte San Joan jaiak Ipar Intxaurrondon, Bernart Etxepare plaza jai gune gisa hartuta. Urteroko legez, San Joan bezperan bertan ospatuko dituzte jaiak, hilaren 23an. Hemen daukazue egitarau osoa.

Arratsaldean hasiko da jai giroa eta afaldu ostean piztuko dute sua. Hain zuzen ere, sua eta haren inguruko dantzaldia izaten da jende gehien elkartzen duen jarduera, jai batzordeko kide Leire Gallastegiren hitzetan: «Auzoko dantzariek asteak pasatzen dituzte euskal dantzak prestatzen eta auzotar dezente etortzen dira ikustera».

Horrela, jaietako kartela da aurtengo berritasuna, Gallastegiren arabera: «Lauaizeta ikastetxeko DBHko laugarren mailakoen artean kartel lehiaketa egin dugu, beraz, beraiena da aurtengo kartela».

Intxaurrondotarrak jaietan parte hartzera deitu ditu Gallastegik, baita antolaketan ere: «Boluntario kuadrilla zabal bat behar izaten dugu eta lanak merezi du, beraz, ea hurrengo urtean gehiago garen antolaketan!».

80 urteotako esentzia mantenduta eta gaztetuta datoz Oletako sanjoanak

Irutxuloko Hitza — 2026-06-19 00:00:28

Zortzi hamarkada, 80 urte. Horixe da Oletako San Joan jaiek aurten ospatuko duten urteurrena, jai batzordeko kide Nora Lopezek nabarmendu duenez. 80 urtez jai batzuk antolatzeak esan nahi du auzotar askok urteak eta urteak pasatu dituztela jaiak buru-belarri antolatzen eta, hain zuzen ere, belaunaldi erreleboa bermatuta dute Oletan: «Hau izan da lehenengo urtea auzoko gazteok jaiak antolatzeko ardura serio hartu duguna, eta balio izan digu konturatzeko gure gurasoek eta aitona-amonek egindako lana ikaragarria izan dela», dio Lopezek. Egitaraua hemen daukazue osorik.

«Lan ikaragarria» izanik ere, Oletako gazteak «ilusioz» daudela nabarmendu du jai batzordeko kideak, Oleta «familia baten modukoa» delako: «Berez, Oleta ez da auzo bat ere, kale bat da, baina gutxi bagara ere, pertenentzia sentimendu handia dugu denok, erabateko auzo izaera dago hemen. Familia baten modukoa da Oleta». «Belaunaldiz belaunaldi pasatu dira jai hauek», gaineratu du.

«Esentzia» mantendu dute

Jai batzordea zeharo gaztetu da, baina Oletako jaien «esentzia» mantendu dute Lopezek azaldu duenez: «San Joan sua, sardina jana, pala txapelketa… hori dira Oletako jaiak, nahiz eta parranda pixka bat ere egiten dugun, noski!».

«Berez, Oleta ez da auzo bat ere, kale bat da, baina gutxi bagara ere, pertenentzia sentimendu handia dugu denok»

Horrela, gaur arratsaldean bertan lehertuko da festa Oletan, txupinazoarekin eta jarraian auzoan barrena egingo duten martxarekin, «auzo guztia jai giroan murgiltzeko». Haurrentzako jolasak ere izango dituzte eta denek elkarrekin afalduko dute, noski, eta Javi DJ-ak girotuko du gaua: «Nagusiki, auzokoentzat izango da, ostiralean ez baita kanpoko jende asko etortzen, gehiago etortzen dira larunbatean».

Larunbatean, bestalde, denetik edukiko dute: paella jate arrakastatsua, mus lehiaketa, arratsaldeko poteoa edo tardeoa berritasun nagusi gisa —«gurasoentzat bereziki», Lopezen hitzetan—, sardina jana eta festa tematikoa, bestek beste. Hain zuzen ere, txikiak zirenean heldutan izan nahi zuten horretaz mozorrotuko dira auzotarrak, «umoretik», jai batzordekoak nabarmendu duenez.

Gaua ederki luzatuko du batek baino gehiagok, ziur, baina indarrak gorde beharko dituzte igandeko Olinpiar Joko arrakastatsuentzako eta, bereziki, astearteko San Joan surako, horrekin borobilduko baitituzte jaiak.

Horretaz guztiaz gozatu nahi izanez gero, Oletara joatea baino ez dago, eta Lopezek argi dauka: «Etortzen den orok errepikatzen du, herri txiki baten modukoa delako hau».

Intxaur jaiek hamargarren urteurrena ospatuko dute, hazkunde etengabean

Irutxuloko Hitza — 2026-06-19 00:00:02

Noiz joko ote dute goia Intxaur jaiek? Duela hamar urte berreskuratu zituzten Sagastieder plazan egiten dituzten jaiak, eta hamarkada honetan etengabe egin dute gora: egitarau zabalagoa, parte hartzaile gehiago, gazte gehiago, heldu gehiago, haur gehiago eta dena gehiago. Horrela, hamargarren urteurrena ospatzera doazen honetan, COVID-19aren pandemiaren ostetik «egonkortuta» dagoen jai batzordeak lau eguneko jai indartsuak antolatu ditu aurten ere: «Hamargarren urteurrena dela eta, oso motibatuta gaude», nabarmendu du Manex Mendiburu jai batzordeko kideak. Egitarau osoa hemen daukazue.

Hamar urteotan antolatu dituzten Intxaur jaien aurretik, ordea, bazen jairik Sagastieder plazan, Kaldero Jaun jaiak hain zuzen ere, auzotar batzuek «hogei bat urtez» antolatu zituztenak, Mendiburuk gogorarazi duenez. Jai haiek antolatzeari utzi eta urte batzuetara jaio ziren Intxaur jaiak, auzoko jai giroa berreskuratu nahian.

Horrela, hamargarren urteurrenaren bueltan, aitortza egingo diete Kaldero Jaun jaiak antolatzen zituzten auzotarrei: «Txupinazoan, hitza eman nahi diegu, aitortza gisa, hortik gatozelako». Horrez gain, auzoan intxaurrondo bat ere landatu nahi du jai batzordeak, Intxaur jaien hamargarren urteurreneko lekuko gisa bertan gera dadin.

Aitortza egingo diete Kaldero Jaun jaiak antolatzen zituzten auzotarrei: «Txupinazoan, hitza eman nahi diegu»

Bigarren eszenatokia

Berritasun nagusi gisa, agertoki bakarra izatetik, bi agertoki izatera pasatuko dira jaiak, Mendiburuk azaldu duenez: «Basoa deitu diogu eszenatoki berriari. Agertoki nagusiaren atzealdean egongo da, zuhaitzak dauden eremuan, eta DJ-entzako izango da». Horrez gain, ostiral eta larunbat gauean ogitartekoak saltzeko jarriko duten txosna da beste berritasun nagusia.

Jai batzordeko kideak eta jaien inguruan mugitzen diren kuadrilla gehienak gazteak izanik ere, jaiak auzoko heldu zein haurrentzako ere izatea da antolatzaileen helburua, eta, horregatik, haurrentzako eta helduentzako jarduera gehiago sartu dituzte aurtengo egitarauan, azken urteotakoei eustearekin batera.

Horrela, biharko Intxaur Krosarekin motorrak berotu, eta ostegunean abiatuko dituzte jaiak, nahiz eta txupinazoa ostiralean izango den. «Horrenbeste hazi dira jaiak, ostegunak hartu duela auzokoontzako egunaren izaera, ostiralean eta larunbatean beste auzoetako jende asko etortzen baita», nabarmendu du Mendiburuk. Jaiak hazi izanarekin «oso pozik» daudela gaineratu du, eta, noski, Intxaur jaiez gozatzera animatu ditu herritarrak: «Mundu guztia da ongietorria!».

Atotxa Munduko Kopatik at utzi zuten EAJk eta HBk

Irutxuloko Hitza — 2026-06-12 00:00:56

Hasi berri da AEBetako, Kanadako eta Mexikoko Munduko Futbol Txapelketa. Euskal erakundeek, ordea, denbora daramate 2030ean Espainiak eta Portugalek elkarrekin antolatuko dutenari begira. Ekainaren hasieran, Bilbo-Donostia egoitza bateratuaren proposamena helarazi zioten FIFAri, «baldintza zorrotzengatik» zalantza asko agertu arren. Batez ere, Jon Insausti Donostiako alkate jeltzaleak.

Egoitza bateratua ontzat jotzen badu FIFAk, Donostiara historian lehen aldiz iritsiko da Munduko Kopa. Bestela, 1982an gertaturikoa errepikatuko da. Espainiak antolatu zuen urte hartako Munduko Kopa, eta Donostia egoitzetako bat izatea proposatu zioten Realari eta Donostiako Udalari. Dena dela, Atotxa futbol zelaiak ez zituen FIFAk ezarritako baldintza logistikoak betetzen —esaterako, gutxieneko edukiera—. Horren aurrean, Jose Luis Orbegozo orduko Realeko presidenteak, lursail batzuk erosi zituen Zubietan –egungo kirol instalazioak dauden lekuan—, eta estadio berria han eraikitzea proposatu zuen.

125 milioi pezeta

Donostiako Udalaren esku geratu zen estadio berriaren proiektua. Izan ere, 125 milioi pezetako inbertsioa egin behar zuen udalak, eraiki ahal izateko. Horrek zalantzak eta desadostasunak sortu zituen udal taldeen artean, eta osoko bilkura batean argitu zuten afera.

EAJk eta Herri Batasunak futbol zelai berria eraikitzearen kontra egin zuten, eta boto bakarreko aldearekin irabazi zuten bozketa. Aldiz, estadio berria egitearen alde agertu ziren Euskadiko Ezkerra, PSOE eta Coordinadora Independiente —UCD alderdiarekin loturikoa—. Ondorioz, 1979ko uztailaren 17an, Jesus Maria Alkain orduko alkate jeltzaleak Munduko Koparen talde antolatzaileari jakinarazi zion Donostiak uko egiten ziola egoitza izateari.

Beraz, Atotxan ez zen Munduko Kopako partidarik jokatu, baina bai lagunarteko ahaztezin bat. 1982ko ekainaren 11n, Munduko Kopa hasi baino bi egun lehenago, Reala eta Frantziako selekzioa elkarren aurka aritu ziren. Txuri-urdinek ordezko jokalari askorekin jokatu behar izan zuten, esanguratsuenak Espainiako selekzioarekin zeudelako. Partida frantziarrek irabazi zuten (1-3), Munduko Kopa ez bezala.

Argi izpi bat zapata artean

Irutxuloko Hitza — 2026-05-19 12:48:31

Donostiako Garibai kalea da akaso Donostiako kalerik dotoreenetako bat, baita joan-etorri handieneko bat ere. Hiriaren bihotzeko arteria garrantzitsu horretan, behinola, zapata denda dotore bat egon zen. Barriola letra larriz idatzia zuen goian, eta erakusleiho eder bat haren azpian, ingeles estilokoa. Barrura sartuta, obalo formako mahai batean, zapatak zeuden ikusgai, baita paretetako bitrina handi batean ere: zapatak eta larruak. Eskuz eta neurrira egiten baitzituzten oinetakoak; Espainiako Maria Cristina erreginari eginak zizkioten, adibidez.

1950eko hamarkada da. Frankismo betea Francok udak pasatzen zituen Donostia hartan, euskaraz egin ezin zen Donostia hartan, diktadurarekin bat ez zetozen donostiarrak isilik, ezkutuan edo erbestean zituen hiri hartan. Dendako zapata eta larruek arreta kendu ostean, aurrera begiratu du bezeroak, eta andre dotore bat aurkitu du mahai baten aurrean, urdinez jantzita. «Buenas tardes», esan dio. Bezeroaren beharrak argitu ostean, gela txiki batera joan dira: ispilu handi bat dago, eta haren aurrean erantzi ditu soinean daramatzan oinetakoak, berrien neurriak hartu ahal izateko.

Bezero horrek ez dakiena zera da: dendaren ondoko atariko atetxo batetik sartuta, dendaostean andre eta apaiz ugari daudela beste negozio bat egiteko zain. «Que tenga un buen día», esan ostean, dendaostera jo du dendariak, eta adeitsu agurtu ditu beste bezeroak. Buenas tardes-ak eta Que tenga un buen día-k ez daude han atzean: euskaraz ari dira. Urdinez jantzitako andrea dendaostean duen bulegotxoan sartu da, beste bezero haiei nahi dutena emateko: Nicolas Ormaetxea Orixe-ren Urte guziko meza bezperak liburua, Ixaka Lopez Mendizabalen Xabiertxo edota Martin Txilibitu. Frankismo bete-beteko Donostia erdi-erdiko zapata denda dotore hura hori baino askoz gehiago zen: euskarazko liburuak legez kanpo argitaratu eta banatzeko sare klandestino baten egoitza zen. Eta horren guztiaren buru, andre bat: Maritxu Barriola.

Erreportaje hau Berria-tik ekarri dugu, CC lizentziei esker; beraz, bertan jarraitu dezakezue osorik irakurtzen.

Auzoko Kafea Intxaurrondon, auzo hobe baten aldeko topalekua

Irutxuloko Hitza — 2026-05-01 00:00:42

Donostiako auzo eta herri guztietan, asko dira arlo batean edo bestean lan egiten, borrokatzen eta egitasmoak antolatzen dabiltzan eragileak eta bizilagun antolatuak. Sarritan, ordea, ez dute elkarren berri izateko tarterik aurkitzen, ezta elkarrekin lan egiteko biderik ere, nahiz eta auzoa bera eta auzoarekiko atxikimendua duten komunean. Horri heldu dio Intxaurrondoko Politki elkarteak, IZBE auzo elkartearekin batera, Auzoko Kafea egitasmoa antolatuz.

Maria Alonso Politki elkarteko kideak nabarmendu du «topaketa» bat dela Auzoko Kafea: «Helburuak dira harremanak sustatzea eta sakontzea, ideia garrantzitsuak eztabaidatzea eta gure auzoan aktiboki parte hartzea. Hori guztia, noski, topagune bat sortuz eta autoantolaketan oinarrituz, errespetuz eta elkarri entzunez».

Egitasmoa hilean behin elkartzean datza, eta bi saio egin dituzte dagoeneko, martxokoa eta apirilekoa. «Oso saio atseginak izan dira biak, eta askotariko gaiak atera dira, baita proposamen interesgarriak ere». Alonsok azaldu duenez, hainbat bizilagunek hartu dute parte saioetan, tartean, IZBEko, Plazara Goaz euskara batzordeko eta Intxaurrondo Berri emakumeen elkarteko zenbait kidek.

Auzoko Kafea egitasmoko saioak erabat irekiak dira, bai eztabaidatzeko gaiak proposatzeko orduan, baita parte hartzeko orduan ere

Mugikortasuna, hirigintza, laguntza sareak eta abar

«Askotariko gaiak atera ziren, baina garrantzitsuenetako bat izan zen auzo barneko komunikazioa», azaldu du Politkiko kideak, Intxaurrondoko aldarrikapen historiko bat hizpidera ekarriz: «Intxaurrondo Zaharretik anbulatoriora joateko, adibidez, ez dago komunikaziorik autobusez eta jende askorentzat, arazo handia da hori, distantziarengatik eta aldapengatik, besteak beste». Auzoko eragile ugarik urteak daramatzate Intxaurbusa aldarrikatzen, eta, horregatik, intxaurrondotar batzuk «haserre puntu batekin» atera ziren saioetatik, «konturatuta zenbat urte daramatzaten gauza berberak eskatzen».

Intxaurrondotarrek urteak daramatzate Intxaurbusa aldarrikatzen, testuinguru askotan; hala nola San Sebastian egunean.Beñat Parra

Anbulatorioaren egoera txarraz ere luze eta zabal hitz egin zutela kontatu du Alonsok, baita adineko jendearentzako laguntza sareen beharraz, euskarak auzoan bizi duen egoeraz, auzoa hobetzeko hirigintza beharrez eta, oro har «auzoa egiteaz» ere.

Gaiak eztabaidatzeaz gain, «ekintza proposamenak» ere egin daitezke Auzoko Kafean, eta halako batzuk atera dira aipaturiko bi saioetatik, Alonsok nabarmendu duenez: «Anbulatorioaren inguruan, adibidez, sortu zen idatzi bat egiteko ideia, udalari helarazteko, anbulatorioaren egoeraren berri emanez. Baita ere, artikulu bat idaztea IZBEk urtean behin argitaratu ohi duen aldizkarian argitaratzeko. Horiek hurrengo saiorako etxeko lanak dira, hain zuzen ere». Eta bestelako proposamenak ere mahaigaineratu zituzten parte hartzaileek, Politkikoak kontatu duenez: «Elkarren berri izateko aldizkari bat sortzea, adinekoentzako laguntza sareak lantzeko harremanak sendotzea eta abar».

«Ekintza proposamenak» ere egin daitezke Auzoko Kafean, eta halako batzuk atera dira aipaturiko bi saioetatik

Jarraituko dute

Maiatzaren 27an egingo dute Auzoko Kafearen hurrengo saioa, Larrotxene Kultur Etxean. «Printzipioz, azkena da, baina antolatzaileon zein parte hartzaileen balorazioa oso positiboa denez, hilean behin elkartzen jarraitzeko asmoa dugu, ekainetik aurrera edo udazkenetik aurrera».

Horrela, auzotar gehiagorengana heldu nahi dute, eta, horregatik, Alonsok nabarmendu du saioak erabat irekiak direla, bai eztabaidatzeko gaiak proposatzeko orduan, baita parte hartzeko orduan ere: «Edonor etor daiteke saioetara, elkarteetako kideak zein norbanakoak. Eskatzen dugun gauza bakarra da Intxaurrondorekin loturaren bat edukitzea, hemen bizita edo ez». Izan ere, argi dute tokikotik saretzea dela bidea: «Horrelako espazio irekiak, autoantolaketan oinarritutakoak, ezinbestekoak dira. Hortik etorri daiteke indarra: txikitik, tokikotik, partekatzen dugun toki horretatik; kasu honetan, auzotik, Intxaurrondotik».

Txanpontxok dakartza auzoetako lehen jaiak (eta txokolatezko txanponak)

Irutxuloko Hitza — 2026-05-01 00:00:41

Maiatzera heldu da egutegia eta bidebietarrek gorriz markatuta dituzten egunak gertu dira. Atzera kontaketa amaitzear dira jada: hiru egun, besterik ez. Jai hauen esperoan daudenak, ordea, ez daude soilik Bidebietan. Izan ere, hilabetetan luzatuko diren Donostiako auzoetako jaien lehen geltokia baitira Txanpontxo jaiak, festazaleen pozerako. Hemen daukazue egitarau osoa.

Ostegun arratsaldean jaitsiko da jaiei izena eta izana ematen dien pertsonaia Guardaplata bidetik, 17:30ean, Jaxikipe txarangak, erraldoiek eta buruhandiek lagunduta, eta auzoaren historiari esku emanez, —Moneta eta Guardaplata baserriak baliatzen baitzituzten itsas gizonek eta nekazariek beraien diru trukeetarako— txokolatezko txanponak eta gozokiak banatuko dizkie haurrei. Ordu eta erdi geroago pregoia botako du eta kuadrillen txanda izango da, aldapan behera egiteko.

Irribarre eta esku handiko pertsonaia gorpuzteko ardura Haizea Miranda gazteari egokitu zaio. Oso pozik dago. «Bizitza guztia, txiki-txikitatik parte hartu dut Txanpontxoren jaitsieran. Jaiak iristeko irrikaz egoten nintzen Txanpontxo ikusteko. Aurten ni izateak ilusio handia egiten dit», aitortu du. Lehen, haur txokoak aukeratzen omen zuen ardura hori hartuko zuena, baina azken urteotan, jai batzordeak bere gain hartu du. Proposamen asko jasotzen omen badituzte ere, urteren batean kostatu zaie pertsona topatzea. Aurten ez, Miranda bera antolatzaileei batu baitzaie.

Zortzi dira taldean, eta erdia, berriak dira. Horrez gain, gazteak ere badirenez, erreleboa badela bermatu dute. Duela bi bat hilabete batu ziren antolaketara, horregatik, bi hamarkada daramatzan Marisa Pedregosak dio aurten gaizki daramatela prestaketa. Urtarrilean hasi ohi dituzte zereginak, baina «berandu eta atzeratuta» joan dira. Lanpetuta badabiltza ere, ziur egun handietarako dena itxita izango dutela.

Mirandarekin batera, Udane Berruezo da beste fitxaketa berrietako bat. Urteak zeramatzaten haur jardueretan edo txosnan laguntzen eta aurten parte izatera gonbidatu dituzte, onartu dutenez, «betiko auzotarrak eta saltsa guztietako perrexila» direlako.

Antolatzaileen esanetan, janarekin eta musikarekin lotutako jarduerak dira arrakastatsuenak. Horietako aukera ugari daude egitarauan

Natura, gai

Natura hautatu dute gai, eta ondorioz, kolore berdea du jaien kamisetak. Halaber, horri lotutako mozorroak jantzi beharko dituzte, bai mozorro festan, bai inauteri danborradan. Animaliak, landareak, maitagarriak… hamaika aukera ematen ditu eta horixe espero dute, adimena martxan jarri eta askotariko pertsonaiez betetzea larunbat arratsaldean auzoa. Haurren txanda izango da lehenik, ondoren, danborradarena, eta azkenik, ia gauerdian, helduena.

Mozorro festaren parte hartzea sustatu nahian, urteak dira gai bat aukeratzen dutela. Hortaz, bai haurrek bai helduek adimena martxan jarri eta horri lotuta jantzi beharko dute. Horren aurretik, iaz hasitako bideari jarraituta, Thamessis konpartsak antolatutako inauteri danborradan izango dute beren jantzia erakusteko aukera. «Iaz egin zuten lehenengoz. Helburua mozorrotu eta dantza egitea da. Ohiko moduan jo beharrean, koreografia errazak —eta ez hain errazak— egitea», zehaztu du Berruezok.

Urtero jarduera pare bat barneratzen ahalegindu arren, aurten, ez dute berritasunik. Are gehiago, baten bat galdu dute bidean. Iaz, jaietako tradizio bat izandako Herri Krosa berreskuratu zuten, hamarkada inguruko etenaren ondoren, eta arrakastatsua izan bazen ere, antolatu zuten boluntarioek ez egitea erabaki dute.

Arrakasta duenari eutsi diote, bi ardatz nagusirekin: musika eta jana. Bost bat urte dira DJ-ak dakartzatela bosgarren blokeko agertokira, eta auzotar ugariz gain, kanpotik ere jendetza etortzen da. Mitx DJ-ak girotuko du larunbat gaua, eta Jo Ta Txok jaien agurra. Erakarmen handia du ere Txanpontxo Rock jaialdiak. Ostiralean, Band Jovi, Kontraband eta Infama taldeek joko dute zuzenean. Jatekoetan, berriz, paella, oilasko edo sardina jatea, saltseroen afaria, kuadrillena… Patata tortilla lehiaketa ere gero eta parte hartzaileagoa da; iaz, hamazazpi izan zituzten aukeran.

Motorrak berotzen hasteko, astelehenetik izango da jardueraren bat, esaterako, Zorionak Marimotots ikuskizuna, iazko arrakasta errepikatzeko gogoz. Horretarako eta gainerakoetarako, eguraldi ona besterik ez dute eskatu antolatzaileek.