Irutxuloko Hitza

«Espainia momentuz ez dago finalean»

Irutxuloko Hitza — 2026-07-14 12:27:14

Frantzia eta Espainia aurrez aurre ariko dira gaur Munduko Futbol Kopako finalerdietan. Irabazten duena iritsiko da finalera, eta Espainia bada, Donostian finala ikusteko pantaila erraldoirik jarriko ote den galdegin diote Jon Insausti alkateari, Tokiko Gobernu Batzorde osteko agerraldian.

Ezer baino lehen, Donosti Cup txapelketari egin dio erreferentzia Insaustik: “Txikitasunetik handiak garela nabarmendu behar dut. Munduko Kopa aurreko astean jokatu zen Donostian; Donosti Cup txapelketa. 30 herrialde, 60 zelai eta 2.300 partida. Uste dut horrek erakusten duela Donostia ere mundiala dela”.

Galderari erantzunez, “poliki-poliki eta partidaz partida” joan behar dela adierazi du. “Espainia momentuz ez dago finalean, eta ikusiko dugu zer gertatzen den. Hipotesi berririk bada landuko dugu, inolako konplexurik gabe”, nabarmendu du. Horiek horrela, ez du baztertu hirian pantaila erraldoi bat jartzea, Espainia finalera iristen bada.

Realarekin konparazio bat egiteko ere aprobetxatu du gaia: “Gogoan dut Realaren kopari buruz hitz egiterakoan, pantailari buruz ez genuela hitz egin finalera iritsi ziren arte. Beraz, zuhurtzia bera izango dugu. Hori bai, bihar goizean beste egoera batean egongo gara. Beharko balitz, prest nago kiroletako zinegotziarekin hitz egiteko”.

Hain zuzen ere, Iñaki Gabarain Kiroletako zinegotziak El Diario Vasco egunkariari baieztatu dio udalak pantaila erraldoi bat jarriko duela, Espainia finalera iristen bada. Era berean, esan du pantaila hori ez litzakeela Alderdi Ederren jarriko, hiriko beste toki batean baizik.

Arin y Embil altzari denda historikoa itxi dute, ia mende eta erdiko ibilbidea eginda

Irutxuloko Hitza — 2026-07-06 13:07:51

Donostiako beste saltoki historiko batek agur esan du azken egunotan: Amara Berriko Arin y Embil altzari dendak. Egungo arduradunek erretiroa hartu dutela eta, hainbat aste zeramatzaten beherapenekin, eta joan den asteartean ireki zuten azkenekoz denda, El Diario Vasco egunkariak argitaratutako informazioaren arabera.

Familia bereko hainbat belaunaldi pasatu dira Arin y Embiletik, 1887an Orion enpresa sortu zutenetik; 139 urteko ibilbidea egin du saltokiak, hain zuzen ere. Orioko lantegia dagoeneko itxita zegoen, bertako langileek erretiroa hartu zutenetik. Orain, Antso Jakitunaren hiribideko saltokia itxita, bukatu da enpresaren ia mende eta erdiko ibilbidea.

Loiolako Erriberako auzo elkarteak «atsekabetuta» bukatu du politikariekin egindako bilera sorta

Irutxuloko Hitza — 2026-07-06 11:41:44

Alderdi politikoekin eta erakundeekin bilera sorta bat egin du Loiolako Erriberako auzo elkarteak, auzoaren hirigintza egoerari buruz hitz egiteko. Bilera horien balantzea ohar baten bidez plazaratu du, eta “atsekabetuta” daudela adierazi dute: “Alternatibarik eza ez ezik, ordezkari publikoek hirigintza irtenbide bideragarririk ere ez dituzte guretzako”.

Alderdiak “sorbaldak altxatzera” eta “etxeak egin behar ditugu” esatera mugatu zirela diote: “Jarrera horrek agerian uzten du etxebizitzaren erabilera propagandistikoa, etorkizuneko etxebizitzen bizigarritasun baldintza errealak eta aurretik dauden sustapenen narriadura alde batera utzita. Horrek etxebizitzaren arazoarekiko benetako interesik eza eta epe laburreko hauteskunde etekinaren obsesio kezkagarria adierazten du”.

Auzo elkarteak gogorarazi du Loiolako Erribera dagoeneko “oso konprometitua” dagoela etxebizitza publikoekin, “etxebizitza sozialen %33 dituelako”. Hala ere, eremu horri etengabe eskatzen zaion “ahalegin neurrigabea” hiriko beste leku batzuetan ere ez islatzea deitoratu dute, batez ere eragile politikoek urte asko daramatzaten auzoetan, “lurzorua gutxieneko aprobetxamenduarekin kontsumitzen duten hotel eta txaleten hirigintza lehenesten”.

Udal gobernuarekin ere kritiko agertu dira: “Haien utzikeria ez eraginkorraren ondorioa bizilagunek ordainduko dute, eta beraien ekipamendu partzelak betiko konfiskatuko dizkiete. Inori ez litzaioke bururatuko beste edozein auzotan frontoi bat edo kultur etxe bat eraistea etxebizitza eraikitzeko. Hala ere, hemen onargarri ikusten dute zerbitzu publikorik ez izatea, bizilagunek sortu ez duten bizitegi arazo bat konpontzen gutxienez laguntzeko”.

“Jazarpen mediatikoa”

Politikariekin, erakundeekin eta udal gobernuarekin ez ezik, hedabide batzuekin ere haserre daude Loiolako Erriberako bizilagunak. Haien hitzetan, “jazarpen mediatikoa” jasaten ari direla salatu dute. Hedabideak beraien jarrera “kriminalizatzen eta desitxuratzen” saiatzen ari direla diote, “auzoek bidezko eskubidea duten oinarrizko zerbitzu publikoak eta hiri oreka defendatzeagatik”. Horren aurrean, nabarmendu dute ez dutela “atzerapausorik emango”, eta “borrokan” jarraituko dutela udalaren etxebizitzaren “kudeaketa txarrak” auzoaren etorkizuneko garapena eta bizi kalitatea “arriskuan” jar ez ditzan.

Amara Berriko azken sexu erasoa salatu du Itaiak: «Indarkeria matxistaren aurka borrokatzea dagokigu»

Irutxuloko Hitza — 2026-07-06 10:22:07

Ertzaintzak 22 urteko gizonezko bat atxilotu zuen joan den asteartean Donostian, Amara Berriko gozoki denda batean adingabe bati sexu erasoa egitea leporatuta. Horren aurrean, Itaia Emakumeen Antolakunde Sozialistak deituta, hainbat herritarrek elkarretaratzea egin zuten ostiral arratsaldean auzoko Olaeta plazan, sexu erasoa salatzeko. “Egoera gehiago larritzen du lehenengo aldia ez dela jakiteak; izan ere, gazte honek kasu antzekoengatik aurrekariak izanda ere, inpunitate osoz jardun du, beste behin”, deitoratu zuen Itaiak.

Horrela, “indarkeria matxistaren aurkako borroka indartzera” deitu zuten: “Matxismoa ukatzen duten diskurtso erreakzionarioei aurre egiteko beharra azpimarratu nahi dugu: indarkeria matxistaren normalizazioa dakarrelako eta ondorioz, erasotzaileen inpunitatea areagotzen duelako: momentua da matxismoa asmakizun ideologikoa dela dioenari erantzuteko, momentua da gure inguruan gertatzen diren erasoetan aurpegia eman eta erasotzaileei aurre egiteko, momentua da matxismoaren aurka kaleak hartzeko”.

Era berean, azken asteotan Donostian izandako beste sexu eraso eta gertakari batzuk ekarri zituzten hizpidera: “Soilik ekainean zehar, Egian emakume bat bortxatu zuten eta Antiguan trata sare ilegal bat atzeman zuten. Gainera, aurreko urteko urrian, prostituzio etxe bat atzeman zuten gure auzoan [Amara Berrin], non gutxienez bost emakume prostituitzera behartzen zituzten. Matxismoaren normalizazioak eraso matxisten gorakada nabarmena dakar eta Donostian ere argi ikusten ari gara”.

Horregatik, “babesa antolatu eta indarkeria matxistaren aurka borrokatzea dagokigu”, gaineratu zuten: “Ezinbestekoa da indarkeria matxistaren aurka posizionatzea, eraso bakoitzari aurre eginez eta horien aurka kaleak hartuz”.

Uraren bidezko bi herriren arteko anaitasun besarkada

Irutxuloko Hitza — 2026-07-03 00:00:53

Donostiak bereizgarri ugari ditu bere paisaian. Amara Berri auzoari begiratuta, zerrenda horretan huts egingo ez lukeenetako bat Pio XII.a plazako iturria da. 60 urte daramatza bertan, Antso Jakituna hiribidearen amaiera ikusgarri gisa. 1966ko urtarrilaren 20an inauguratu zuten, hiriaren egun handian, lotura historiko baten ikur gisa: donostiarren eta katalanen arteko adiskidetasunarena. Izan ere, 1936ko gerran 30.000 bat kataluniarrek beren etxea topatu zuten hemen.

Jasotako babesa eskertzeko, Amics de San Sebastian en Catalunya elkarteak iturria jartzea proposatu zuen eta horretarako dirua bildu. Emaileen artean zeuden Bartzelona, Tarragona, Lleida eta Gironako udalak, baita hainbat erakunde eta norbanako ere. Hura sortzeko enkargua, berriz, Carlos Buigas ingeniari bartzelonarrari egin zioten. «Uraren eta argiaren arkitektoak» elektromekanika, argiztatze kromatikoa eta uraren mugimendua uztartzen zituen eta halako iturri monumentaletan berezitua zegoen. Berea da, esaterako, Bartzelonako Montjuiceko Iturri Magiko ospetsua.

Ura eta argia

Garaiko egunkarietan jasotako kroniken arabera, urtarrilaren 19an hasi ziren San Sebastian egunarekin batera amaituko ziren ospakizun ekitaldiak. Gipuzkoako agintariek ohorezko harrera egin zieten Kataluniako ordezkariei eta zenbait oroigarri trukatu zituzten. Iturriaren ideia izan zuen elkarteko kideei, esaterako, San Sebastian santuaren tailu bat oparitu zien Jose Elosegi alkateak; bertan bizi ziren kataluniarren ordezkariei, berriz, karabela baten irudia.

La Vanguardia egunkariak jaso zuen arratsalde horren kontaketan dioenez, 19:00ak aldera, gotzainak bedeinkatu egin zuen monumentua. Jarraian, Bartzelona, Sabadell eta Sants auzoko neskatila banak Rosesko golkotik anforetan ekarritako Mediterraneoko ura bota zuten eta hiriko elkarteetako zenbait emakumek, berriz, Kantauri itsasokoa. Ondoren, «Artikutzako ura bota zuen iturriak, koloretako ortzadar batek Pio XII.a plaza argitzen zuen bitartean, Donostiako ereserkiaren doinupean».

Plazako berdegunean, Sebastia Badia i Cerda artistak egindako Sardana harrizko behe-erliebea dago. Bertan, bi gizonezko eta bi emakumezko ageri dira sardana bat dantzatzen. Haien moduan, euskal eta kataluniar jantzi tradizionalak soinean, bi bikotek adiskidetasun sardana bat dantzatu zuten.

San Sebastian egunean inauguratu bazuten ere, bezperan, jarri zuten martxan.Foto Mari / Kutxateka

«Ezkontza eraztuna»

Inaugurazio ofiziala, esan bezala, biharamunean egin zuten. Bertan parte hartu zuen Haur Danborradak. Horrexegatik berezia izan zen, Urbieta kalean buelta eman beharrean, Antso Jakituna hiribidean barrena egin zuelako; baina baita guztien buru, zaldi gainean zihoan jenerala Silvestre Manuel Gari de Sentmenat haur bartzelonarra izan zelako ere.

Kataluniako eta Gipuzkoako agintariak han elkartuta zeuden danborrada heldu zenean, baita iturria inguratzen zuen jendetza ere. Goizaldi dantza taldeak bi dantza egin zituen, eta ondoren, Donostiako Orfeoiak Goiko mendiyan eta Sardana de las Monjas abestu zituen. Gero, Bartzelonako alkate Jose Maria Porciolesek adierazpen «eder eta hunkigarriak» egin zituen bi lurraldeak lotzen dituen anaitasuna nabarmenduz. La Vanguardia-ko kronistaren hitzetan, ekitaldia euskaldunen eta katalanen arteko ezkontzaren zilarrezko ezteien ospakizuna zela baieztatu zuen, eta iturria, eraztuna. Lotura horretan sakondu zuen Elosegik kataluniarrek donostiarrekin bat eginda bizitzen jakin izan zutela zehaztuz, «Kantauriko urak eta Mare Nostrum mitikokoak iturri honetako txorrotetan sinbolikoki elkartu diren modu berean».

San Sebastian Martxa-rekin amaitu zuten inaugurazioa, aurreikusitakoa baino lehentxeago, euria hasi baitzuen. Ospakizunek, ordea, aurrera jarraitu zuten: bazkaria, pilota partidak, afaria Gran Kursaal kasinoan…

Amara Berriko auzo elkartea: 30 urte auzoaren alde lanean, nekaezin

Irutxuloko Hitza — 2026-07-03 00:00:44

Duela 30 urte sortu zuten ABAE Amara Berriko auzo elkartea zenbait bizilagunek, Amara-Osinaga auzuneko bizilagunen elkarte gisa: «Orduan berria zen auzo horrek zituen beharrei erantzuteko antolakundea zen hasieran», gogoratu du elkartean 28 urte daramatzan Iñaki Olasagastik.

Laster hasi ziren, ordea, Amara Berri guztiko bizilagunen beharrei erantzuteko lan egiten: «Urteotan, erronka handia izan da elkartea ezagutaraztea eta jendeari ulertaraztea Amara Berri osorako elkartea garela», nabarmendu du Xabier Berridi presidenteak, elkartean hamar bat urte daramatzanak.

Donostiako auzo handienetako bat da Amara Berri, eta, beraz, lan militante handia eskatzen du auzo elkartean aritzeak. Lan hori guztia ospatzeko, festa eder bat egin zuten pasa den larunbatean auzoan, auzotar askorekin, auzo elkarteko kide eta kide ohi ugarirekin eta udaleko hainbat zinegotzirekin, besteak beste: «Oso egun polita izan zen», esan dute Berridik eta Olasagastik. Hiru hamarkadotako ibilbidea errepasatu zuten egun hartan jendaurrean eta horixe bera egin dute orain IRUTXULOKO HITZArekin.

Lana egiteaz gain, pazientzia ere eduki behar dela adierazi dute kideek: «Udala oso mantsoa da, eta egun batetik bestera inprobisatu, eta hitz egindako guztia aldatzen du, inorekin kontsultatu gabe»

Garaiak eta mugarriak

Olasagastik azaldu duenez, lau presidente eduki ditu urteotan elkarteak: «Enrique Fernandez, Jose Luis Fernandez, Mari Sol Txokarro eta ni, Iñaki Olasagasti. Eta, orain, Xabier Berridi da presidentea, bosgarrena».

Denek eduki dute eragina elkartean eta auzoan, noski, baina Jose Luis Fernandezen lana nabarmendu du, lehen mugarri gisa: «Oso garai presidentzialista izan zen, nolabait esatearren, berak baitzeraman elkartearen pisu gehiena; gero, saiatu gara gauzak denon artean egiten. Baina Jose Luisi esker pasatzen da saihesbidea gaur egun pasatzen den lekutik, hasieran, Amaiur parkearen ondotik pasatzekoa baitzen, auzoa erditik zeharkatuz. Hori berak borrokatu zuen eta lortu zuen».

Hori ez da izan, ordea, 30 urteotako garaipen bakarra. Ikasketen plazaren eraberritzea, Amezketa kaleko palmondoen esku hartzea, Isabel IIaren eraberritzea, Antso Jakitunaren hiribidekoa, Aita Donostia plaza berria, Caritasen Aterpearen inguruan egindako lana eta, batez ere, Karlos Iaren hiribidearen eraberritzea aipatu dituzte, hain zuzen ere. «Karlos Iaren hiribidea hesi fisiko zein mental bat zen lehen, han bizi ginenok ez ginen asko etortzen auzoaren alde honetara. Baina, orain, lasai etorri gaitezke, zebrabideak daude, semaforoak…», nabarmendu du Berridik.

Hori bai, lana egiteaz gain, pazientzia ere eduki behar dela adierazi dute kideek: «Udala oso mantsoa da, eta egun batetik bestera inprobisatu, eta hitz egindako guztia aldatzen du, inorekin kontsultatu gabe». Armeris eta Olaeta plazetako eraberritzearen parte hartze prozesua da jarri duten adibideetako bat: «Lortu genuen udalak parte hartze prozesua onartzea, baina bi legealdi eta erdi pasatu dira martxan jarri duen arte. Eta ikusiko dugu noiz egiten duten eraberritzea bera!», dio Berridik.

Iñaki Olasagasti eta Xabier Berridi, ABAE Amara Berriko auzo elkarteko kideak.Beñat Parra

Auzoa egitea

«Auzoa egiteko» bidean, auzoko hainbat eragileren laguntza goretsi dute kideek: Ikasbide kultur elkartearena, Amara Berri ikastetxearena eta abar. Eta, hain zuzen ere, gero eta auzo bizitza handiagoa dagoela azaldu dute: «Segur aski, Donostiako turistifikazioak eragina izan du, baina jendea konturatu da auzoan bizitza egin daitekeela, auzoan gelditu daitekeela, auzoan giroa dagoela».

Ildo beretik, aisialdi arloko jarduerek elkartean duten garrantzia ekarri dute hizpidera: «Olentzero, San Tomas eguneko ospakizunak, Karmengo jaiak, San Joan sua, Amara Berri Eguna eta abar. Auzoa egiteko oso garrantzitsuak dira, eta urtero-urtero egiten ditugu, gero eta arrakasta handiagoarekin».

Etorkizunerako erronkak

30 urte beteta, ABAEkoek argi dute auzoaren alde lan nekaezinean jarraituko dutela. Eta erronkak ez zaizkie falta: «Topoaren trenbidearen estaltzearekin gabiltza buru-belarri, Gobernu Zibila auzoarentzat izan dadila aldarrikatzen jarraituko dugu, Anoetako partida egunetan sortzen den guztiari aurre egiteko neurriak eskatzen, Easoko trenbide eremuaren proiektuan ere sartuta gaude eta abar luze bat», azaldu du Berridik.

«Auzo sarea» indartzea da erronka nagusietako bat, halere: «Jende berria sartu da elkartean, eta zaintzan jarri dugu fokua azkenaldian, beraien bidez. Auzotik harago doan erronka da, gero eta gizarte zaharragoa baikara, baina garrantzitsua da auzoetan zaintza sare indartsuak edukitzea. Horretarako, ordea, ezinbestekoa da erakundeen inplikazioa», dio Berridik. «Lan handia» egin beharko dute, baita «pazientzia handia» eduki ere, baina horretarako prest dago Amara Berri, ABAEren eskutik.

Donostiako haur eskola berrietan emateko izena ekainaren 29an zabalduko dute

Irutxuloko Hitza — 2026-06-24 15:47:20

Gros, Intxaurrondo Hegoa eta Loiolako Erribera auzoetako haur eskola berriak irailaren 4an irekiko dira. Horietan izena emateko ezohiko epe bat ezarri dutela jakinarazi du Donostiako Udalak. Izan ere, Haurreskolak Partzuergoarekin batera sustatu eta handitu egingo baita 0-2 urteko haur hezkuntzako sare publikoa, eta, hala, haur eskola berri batzuk ere izango dira.

Interesa duten familiek ekainaren 29tik uztailaren 8ra, biak barne, izango dute eskabideak Udalinforen bulegoetara bertara joanda aurkezteko modua. Deialdi hau 2025ean eta 2026an jaiotako haurren familiei eta legezko tutoreei egina da.

“Izena emateko aparteko epe hori berri ona da lana, bizitza pertsonala eta familia uztartu ahal izateko baliabide publikoak behar dituzten Donostiako familia askorentzat. Haur eskoletan leku gehiago izateak eta plaza horiek eskuratzeko modua errazteak lagundu egiten du familiek euskarri gehiago izan ditzaten haurrak hazteko etapa garrantzitsu horretan”, nabarmendu du Ane Oiarbide Berdintasuneko zinegotziak.

Haur eskola berriak

Duela gutxi bukatu ziren hiriko hiru haur eskola berrien lanak. Guztira, 89 leku publiko berri izango dituzte 0 eta 2 urte bitarteko haurrek. Hala, orain arte mota horretako baliabide gutxiago zituzten auzoetan, hezkuntza eta kontziliazio eskaintza handiagoa izango da.

Loiolako Erriberakoa Gabriel Laffitte plazan dago, 34 toki izango ditu; horietatik zortzi urtebetetik beherakoentzat izango dira. Aldiz, 26 leku urte 1 eta 2 urte bitarteko haurrentzat. Intxaurrondo Hegoa eremukoa, berriz, Baratzategi kalean dago. 21 toki izango ditu; zortzi urtebetetik beherakoentzat eta hamahiru urtebetetik 2 urtera bitartekoentzat. Azkenik, Grosekoa Zemoria kalean dago, eta 34 toki eskainiko ditu; zortzi urte bat baino gutxiagoko haurrentzat, eta 26 leku urte 1 eta 2 urte bitarteko haurrentzat.

Datozen egunetan irekiko dute Anoetako estadio txiki berritua

Irutxuloko Hitza — 2026-06-23 12:08:24

Prest dago Anoetako estadio txiki berritua, eta datozen egunetan irekiko dutela baieztatu du Jon Insausti alkateak, Tokiko Gobernu Batzorde osteko agerraldian. “Ekaina bukatu baino lehen prest egongo da. Lizentzia batzuk falta dira, erremate batzuk, baina horretan lanean dabiltza udaleko teknikariak”, adierazi du alkateak.

Hobekuntza ugari egin dituzte estadio txikian. Esaterako, atletismoko pisten zoladura berritu dute, belar naturaleko azalera birdimentsionatu dute —errugbi zelaiak guztira 113 x 70 metroko belar naturala izango du, homologazio araudiaren arabera—, lehiaketak birkokatu dituzte aldi berean egin ahal izateko —luzera, hirukoitza, pisua, mailua, diskoa, xabalina, …—, estalki berria jarri diote, eta gimnasioak zein aldagelak berritu dituzte.

Harmailari dagokionez, 1.298 lagunentzako edukiera izango du, eta horietatik 26 mugikortasun murriztua dutenentzako izango dira.

Topoaren Anoetako geltokiaren atari berria, ia prest: «Udazken hasieran egongo da funtzionamenduan»

Irutxuloko Hitza — 2026-06-22 13:11:17

Aurrera doaz topoaren Anoetako geltokiaren atari berriaren lanak, eta hedabideentzako bisita egin dute astelehen goizean geltokian Susana Garcia Chueca Mugikortasun Jasangarriaren sailburuak, Jokin Aperribai Realeko presidenteak, Miguel Angel Paez Azpiegituren eta Mugikortasun Jasangarriaren sailburuordeak, Antonio Lopez ETSko zuzendari nagusiak eta kirol taldeko ordezkaritza batek.

Sailburuak azaldu duenez, Anoetako geltokiaren bigarren atariaren egitura amaituta dago, eta estaldura lanei ekin diete langileek. Horrela, Eusko Jaurlaritzaren aurreikuspena da azpiegitura hori “udazken hasieran” irekitzea. Garciak eta Aperribaik euren hitzartzeak hasi dituzte “doluminak” adieraziz joan den astean metroaren igarobidearen lanetan hildako langilearen gertukoei.

Atari berria funtzionamenduan jartzean, bi atari izango ditu, beraz, Anoetako geltokiak: egungoa eta udazkenean irekiko dutena. Izan ere, Anoetako geltokiaren eraberritze integraleko proiektuaren barruan sartzen dira gainazaleko bigarren atari horren eraikuntza, egungo atariaren birmoldaketa eta nasen berriztapena eta luzapena. Era berean, “inguruko bideen berrantolaketa konplexu eta sakona egin da”, sailburuaren hitzetan. “Atari berriaren helburua Anoetako terminalaren edukiera hobetzea da, haren fluxuak hobetuz, batez ere pertsona asko biltzen diren ekitaldietan (partidak, kontzertuak, eta abar)”, gaineratu du.

Horrela, bigarren ataria martxan jartzen dutenean hasiko dituzte egun funtzionamenduan dagoenaren birmoldaketa lanak, “bi eraikinek beharrezko koherentzia izan dezaten”, sailburuaren hitzetan. Era berean, Garciak nabarmendu du “lanen lehen faseetan, inguruko bideen berrantolaketa osoa” egin zutela, “Aita Donostia plazako biribilgune zaharra barne, Donostiako Udalak zirkulazioaren arloan ezarritako jarraibideei jarraituz”. “Etapa horren ondoren, eragindako zerbitzuak desbideratu ziren, hau da, lurpeko elektrizitate, telefono edo ur horniduren hodiak, nasetarako sarbide berriko pantailak (hormak) egin aurretik”, gaineratu du.

Hiru milioi joan-etorri

Sailburuak azaldu duenez, Anoetakoa gehien erabiltzen den bigarren geltokia da, 2025ean hiru milioi joan-etorri erregistratu baitzituzten: “Obra honek pertsonen fluxua errazten du partida eta ekitaldietan, Anoetara joaten diren herritarren segurtasun eta erosotasun baldintzak hobetuz”. Gaineratu duenez, “zelaiaren inguruan oinezkoentzako espazioak zabaltzea lortu da”.

Horrela, “Gipuzkoak aurten biziko duen garraioaren iraultzaren” testuinguruan kokatu du Garciak Anoetako geltokiko bigarren ataria, Altza-Galtzaraborda tartea “hilabete barru baino lehenago irekitzearekin” eta “udazkenean” abiaraztekoak diren metroaren igarobidearekin batera —%50eko gainkostua aurreikusi zuen joan den astean Garciak—.

Paella lehiaketa eta jana Amara Berriko sanjoanetan, larunbataz gozatzeko

Irutxuloko Hitza — 2026-06-20 17:24:29

San Joan bezperaren bueltan antolatzen ditu urtero Ikasbide kultur elkarteak Amara Berriko sanjoanak, eta, hain zuzen ere, asteburu honetan ari dira ospatzen jaien asteburu indartsua.

Larunbat goiz osoan zehar, eguraldia lagun, giro ederra egon da auzoko kaleetan, eta, ohiko legez, paella lehiaketa arrakastatsua egin dute Probestu plazan. Eta, noski, baita paella jana ere, are arrakastatsuagoa.

Jarraian, irudi bilduma ikus dezakezue:

Kantuan omendu dute Joxean Urbieta

Irutxuloko Hitza — 2026-06-19 12:11:44

Amara Berriko Xirula Mirua musika eskolak ateak itxiko ditu 42 urteko ibilbidearen ondoren. Izan ere, martxan jarri zuen Imanol Urbietaren seme Joxeanek erretiroa hartuko du. Musika irakasteaz ez ezik, euskaraz egiteko toki bat ere izan da eta auzoan eusk kulturaren alde egindako lana eskertzeko, egungo ikasleek, ikasle ohiek, gurasoek eta lagunek ezusteko omenalditxoa egin zioten ostegun iluntzean. Azken eskola amaitu eta ikasleak agurtzeko atera zenean, dozenaka lagun zain zituen ondoko plazatxoan.

Erik semearen lagunek eta Xirula Mirulako haurrek dantzatu zioten Agurra, eta musikariek lagunduta, bere aitak sortutako Bizitza kantu bat da, Behin betik eta Txoria nintzela kantak abestu zizkioten, berari espresuki sortutako pare bat ere, eta opari, oroigarri batzuk eman zizkioten. Hunkituta jaso zituen denak, baita besarkada eta muxu pila ere.

Ez zuen hitzik egin nahi izan, eskerrak eman soilik, ezta askotan askok eskatuta ere, txisterik (txar) kontatu. Zahatoari trago bat egin zion, “gure santua”, esan ondoren, eta ohartarazpen bat ere. “Ez naiz gauza hauen zale, baina onartu egin behar dira. Gauza hauen zale, bai alde. Beraz hurrena jubilatzen denak, ederra dauka!”. “Mila esker! Badakizue non gauden, zeozer behar baduzue, etorri”. “Txispun eta etxera” esanez, agurtu zituen bertaratutakoak, baina une hori amaiera izatetik urruti zegoen, opari, marrazki, muxu eta besarkada eman nahi zioten haurrek eta helduek inguratu baitzuten. “Ez al duzue etxera joan behar?” galdetu bazien ere, denei kasu egiteko tartea hartu zuen Urbietak.

Loiolako Erriberako, Intxaurrondoko eta Groseko haurreskola berrien lanak bukatu dituzte

Irutxuloko Hitza — 2026-05-27 15:43:53

Donostiako Udalak lehen zikloko hiru haurreskola berrien obrak amaitu ditu, eta 2026-2027ko ikasturtean irekiko dituzte. Haurreskola berri horiek Loiolako Erriberan, Intxaurrondon eta Grosen daude, eta 89 plaza berri eskainiko dituzte zero eta bi urte bitarteko haurrentzat. Horren bidez, eskari historiko bati erantzuten zaio, hain zuzen ere orain arte eskaintza nahikorik ez zuten hiriko eremuetan.

“Haurreskoletako plaza berri bakoitza aurrerapauso zehatz bat da, emakumeek lan-bizitzaren eta seme-alabak zaintzearen artean hautatu behar ez izateko. Orain arte haurreskolarik ez zuten auzoetan eskaintza publikoa zabaltzea berdintasun-politika bat ere bada”, adierazi du Ane Oiarbide Berdintasuneko zinegotziak.

Eusko Jaurlaritzaren diru laguntza bati esker egin dira obrak. Ekarpen hori Europar Batasunak Next Generation EU funtsen bidez finantzatutako Suspertze, Eraldatze eta Erresilientzia Planaren barruan dago, eta 1.828.313,70 euroko aurrekontua izan du guztira.

Hiru haurreskola berriak

Loiolako Erriberako haurreskolak, Gabriel Laffitte plazan kokatua, 34 plaza eskainiko ditu: zortzi plaza, urtebetetik beherakoentzat, eta 26, urtebetetik bi urtera bitarteko haurrentzat. Intxaurrondokoak, Baratzategi kaleko 19. zenbakian, 21 plaza izango ditu, honela banatuta: zortzi, urtebetetik beherakoentzat, eta hamahiru, 1 eta 2 urte bitartekoentzat. Bestalde, Groseko Zemoria kaleko 20. zenbakiko haurreskolak ere 34 plaza izango ditu, eta horietatik zortzi urtebetetik beherakoentzat izango dira, eta 26, 1 eta 2 urte bitarteko haurrentzat.

Datozen asteetan matrikulazio prozesua abian jarriko da, herritarren arretarako UdalInfo udal zerbitzuaren bidez. Plaza esleipenaren kudeaketa Eusko Jaurlaritzaren zerbitzuaren ardura izango da. Zerbitzu horrek haurreskola publikoetarako sarbidea koordinatzen du, eta leihatila bakarra da haur hezkuntzako lehen zikloan plaza eskatzen duten familientzat.

“Emakumeak lan merkatuan berdintasun baldintzetan sartu eta mantentzeko faktore erabakigarrienetako bat da oraindik ere haur hezkuntzan plaza bat eskuratzea”, nabarmendu du Oiarbidek. Gaineratu duenez, “eskaintza publikoa, doakoa eta etxetik gertukoa bermatzea tresna eraginkorrenetako bat da berdintasunean aurrera egiteko eta emakumeek beren karrera profesionalaren eta seme-alaben zaintzaren artean hautatu beharrik ez izateko”.