Irutxuloko Hitza

«Espainia momentuz ez dago finalean»

Irutxuloko Hitza — 2026-07-14 12:27:14

Frantzia eta Espainia aurrez aurre ariko dira gaur Munduko Futbol Kopako finalerdietan. Irabazten duena iritsiko da finalera, eta Espainia bada, Donostian finala ikusteko pantaila erraldoirik jarriko ote den galdegin diote Jon Insausti alkateari, Tokiko Gobernu Batzorde osteko agerraldian.

Ezer baino lehen, Donosti Cup txapelketari egin dio erreferentzia Insaustik: “Txikitasunetik handiak garela nabarmendu behar dut. Munduko Kopa aurreko astean jokatu zen Donostian; Donosti Cup txapelketa. 30 herrialde, 60 zelai eta 2.300 partida. Uste dut horrek erakusten duela Donostia ere mundiala dela”.

Galderari erantzunez, “poliki-poliki eta partidaz partida” joan behar dela adierazi du. “Espainia momentuz ez dago finalean, eta ikusiko dugu zer gertatzen den. Hipotesi berririk bada landuko dugu, inolako konplexurik gabe”, nabarmendu du. Horiek horrela, ez du baztertu hirian pantaila erraldoi bat jartzea, Espainia finalera iristen bada.

Realarekin konparazio bat egiteko ere aprobetxatu du gaia: “Gogoan dut Realaren kopari buruz hitz egiterakoan, pantailari buruz ez genuela hitz egin finalera iritsi ziren arte. Beraz, zuhurtzia bera izango dugu. Hori bai, bihar goizean beste egoera batean egongo gara. Beharko balitz, prest nago kiroletako zinegotziarekin hitz egiteko”.

Hain zuzen ere, Iñaki Gabarain Kiroletako zinegotziak El Diario Vasco egunkariari baieztatu dio udalak pantaila erraldoi bat jarriko duela, Espainia finalera iristen bada. Era berean, esan du pantaila hori ez litzakeela Alderdi Ederren jarriko, hiriko beste toki batean baizik.

Zementon udalekuetatik etorri da

Irutxuloko Hitza — 2026-07-11 21:12:31

Hemen da, iritsi da Zementon, eta haren jaitsierarekin hasi dira ofizialki Añorgako Karmengo jaiak. Aurretik, ordea, urteak dituen hamabi hilabeteak zenbatu dituzte Añorgako plazan, horretarako apropos sortu zuten abestiarekin. Hilabete bakoitzean jaiotakoak plazaren erdira agertu dira dantzan… edo nahi izan dutenak, behintzat.

Ondoren agertu da Zementon, ohiko bidea eginez, frontoitik Jolas Etxekoa teilatura iritsi da, hari eskainitako abestiak iraun bitartean. Añorgako Kultur eta Kirol Elkarteko bandera eta ikurrina igo ostean, grisez jantzitako pertsonaia agertu da, mikroa eskuan zuela.

Añorgako udalekuetako arduradunetako batek bete du bere rola, eta herriari begirako pregoia irakurri du. Hamar urteko ibilbidea bete dute udalekuek, eta jai batzordeak keinu berezia egin nahi izan die jaien hasieran. “Makina bat kilometro osatu ditugu udaleku ibiltariok. Hamar urte, alajaina. Aisialdira allternatiborako eredu ederra osatu dute auzoko gazteek, eta dena auzolanean. Bejondeigula”, adierazi du. Horrekin batera, ehun urte bete dituen Arkaitz Añorgako Dantzariak taldeari esker oneko hitzak eskaini, zendutakoak gogoratu eta jaiei begirako aldarria askatu du: “Jarrai dezagun Añorga euskaratik, feminismotik, pozetik eta bihurrikerietatik eraikitzen. Gora Añorga!”.

Zazpi egun dituzte aurretik, eta hemen duzue egitaraua.

Goiz goizetan, oilasko biltzaileen ibilaldi on

Irutxuloko Hitza — 2026-07-11 17:44:45

Añorgako Karmengo jaien egitarauaren abiapuntua da oilasko biltzaileen ibilaldia. Aurten ere, Jolas Etxetik abiatu dira hogei bat lagun sanferminetako entzierroa ikusi ondoren, 08:30 inguruan.

Aldapan gora eta behera ibili dira, baserriz baserri. Soinu txikia eta panderoa izan dituzte alboan, dantzan aritzeko baserrien atarietan. Txabarrategi, Manttalin, Bertan Goxo, Bidarte, Txalak eta Añorga bisitatu dituzte. Baita ere, Errekalde elkartea eta Lukainkategi jatetxea, ibilaldiaren bukaera izan dena.

Añorgatar ugarik bat egin du oilasko biltzaileen txangoarekin, eta gustura aritu dira dantzan. Bitxikeria moduan, Irlandako Cork hiriko bost bat lagunek parte hartu dute ibilaldian eta dantzetan.

Joseba Parron San Sebastian argazkilariak osatu du irudi bilduma:

Umeentzako eskaintza handitu eta mozorrotzeko gogotsu daude

Irutxuloko Hitza — 2026-07-10 00:00:18

Buruhandi biboteduna prest dago Añorgako Karmengo jaietarako. Kartelean aizkora batekin agertzen bada ere, lasai, maskuria da erabiliko duena festetan. Kortatu taldearen estreinako diskoari keinua egin dio Unai Gaztelumendi marrazkilariak. «Duela urte batzuk, bi buruhandi ageri ziren kartelak izandako arrakastaren ondoren, gure buruhandi ezagunena protagonista bihurtu dugu», azaldu du Nerea Unanue Añorgako jai batzordeko kideak. Egitarau osoa hemen daukazue.

Zazpi eguneko egitarauak askorako emango du Añorgan, bihartik hilaren 19ra bitarte. Ohiko jarduerak eta berritasunak uztartu dituzte, herri giroan ospatzeko añorgatarrek estimatzen dituzten jaiak. «Auzotarrekin elkartu gara programazioa hobetzeko, eta pozik gaude osatu dugun jarduera sortarekin», dio Izaskun Elizegi jai batzordeko kideak.

Kartelak ere lotura du nobedadeekin, aurten egun gehiagotan programatu dituztelako erraldoiak eta buruhandiak. Izan ere, umeentzako eskaintza handitu dute, familiek eta guraso elkarteak eskatuta. Horrela, haurrentzako play-back lehiaketa egingo dute lehen aldiz, eta arratsaldeak haientzako jarduerekin betetzen saiatu dira. Bestalde, Añorgako artisauen azoka estreinakoz sartu dute egitarauan, martxoko Sagardo Egunean haien postuek harrera ona izan zutelako.

Kuadrillek, jubilatuek eta umeek ohiko egun propioa izango dute. Bihar, oilasko biltzaileak eta Zementonen jaitsiera ez dira faltako. Etzi, berriz, jubilatuek gustuko dituzten jarduerak egingo dituzte. «Gabezia handiena 13 eta 16 urte bitarteko gazteentzako eskaintzarekin dugu, eta horregatik 3×3 saskibaloi txapelketa mantendu dugu», esan du Iurre Marrahi jai batzordeko kideak. Dena dela, aitortu dute hilaren 16ko Orikiz eguna dela garrantzitsuena añorgatarrentzat. «Mozorrotzea derrigorrezkoa da, eta lehen aldiz gaia aldatu dugu; kolore gorria aukeratu dugu. Ikusiko dugu jendearen imajinazioa zenbaterainokoa den», adierazi du Elizegik.

Arkaitz Añorgako Dantzariak

Mendeurrena bete du Arkaitz Añorgako Dantzariak taldeak, eta aurtengo jaietan presentzia nabarmena izango dute. «Karmen egunean, hilaren 16an, mendeurreneko soka dantza egingo dugu, eta hainbat belaunalditako dantzari askok parte hartuko dute. Gainera, ohiko brokel zikloa eskainiko dugu», nabarmendu du Unanuek. Horrekin batera, festei bukaera emateko, hilaren 19an, Añorga Kultur eta Kirol Elkartearen egunean, dantza taldeak egingo du bandera jaitsiera. «Aurten, Añorgako bi talde omendu nahi ditugu. Txupinazoa Añorgako udalekuen taldeak botako du, hamar urte bete dituztelako. Bandera jaitsieraz, berriz, Arkaitz taldea arduratuko da», azaldu du Marrahik.

Añorgan etxegabetuak izatekoak ziren herritarrek alternatiba bat lortu dute

Irutxuloko Hitza — 2026-07-03 15:21:01

Etxebizitza Sindikatu Sozialistak jakinarazi duenez, Añorgako bizilagun batzuk etxegabetzekoak ziren ostiral honetan (hilak 3), eta, etxegabetzea gelditzeko, hara joatekoak ziren sindikatuko kideak. Sindikatuak azaldu duenez, ordea, etxegabetuak izatekoak ziren bi familiek bizitegi alternatibak eskuratu dituzte, eta, beraz, bertan behera utzi dituzte deialdi guztiak.

“Familia horiek, adin txikiko kideak tarteko, gaur, ostirala, etxegabetze agindua zuten eta azken unera arte alternatiba baten bila egon dira Etxebizitza Sindikatuarekin batera”, azaldu du sindikatuak. “Familietako bat ezagun baten etxera joan da egonkortasun bila, eta bestearentzat alternatiba lortu dutela adierazi du sindikatuak”, gaineratu du antolakundeak, baita nabarmendu ere antolatuko izan ez balira, “kalean” geldituko zirela.

Azpierrenta ugaritzen

“Azpierrentan” bizi ziren familia horiek, eta horrek oso egoera zaurgarrian uzten zituen: “Horrelako kasuak hedatzen ari dira. Eta gero eta gehiago dira hori onartzearen edo kalean bizitzearen artean aukeratu behar dutenak”.

“Etxebizitzaren negozioa handitzen eta prezioak igotzen doazen heinean, langile klaseko sektoreen pobretzea sakontzen joango da”, gaineratu du sindikatuak. Hain zuzen ere, testuinguru horretan kokatu du Añorgako etxegabetzea, baita azpierrenta kasuen igoera eta ikasturte honetan kalean bizi ziren lau pertsonen heriotza“.

“Gaurkoan bi familia alternatibarik gabe gelditzea ekidin da, baina, borroka ez da bertan amaitzen”, adierazi dute sindikatukoek. Era berean, “etxegabetze kopuruak gora doaz Donostian, izan prozesu juridikoen bidez ematen direlako eta etxebizitzaren negozioaren ondorio etxea utzi behar dutelako”, gaineratu dute. Horregatik, “etxebizitzarekin negozio egiten duten enpresari zein etxejabeen aurrean antolatzeko eta etxegabetze guztiak gelditzeko borrokara batzeko” deia egin du Etxebizitza Sindikatu Sozialistak.

Añorga Eguna ospatzen ari dira elkarteko kirol taldeak

Irutxuloko Hitza — 2026-06-06 17:20:33

Añorga Kultur eta Kirol elkartea bere eguna ospatzen ari da eguerditik. Frontoian, kirol atal guztiek elkarrekin bazkaldu aurretik, talde argazkiak atera dituzte. Egin ahala, esertzen joan dira, bakoitza zegokien lekuan. 400 bat lagun elkartu dira mahaien bueltan, eta asko badira ere, batzuk falta ziren. Izan ere, kirolarietako batzuek probak zituzten gaur eta ezin izan dute parte hartu, esaterako, triatletek. Otorduaren ondoren, bingoan jokatu dute eta festa giroa jarri dute Siwanaba eta Arte DJ-ek.

Hona Joseba Parron San Sebastianek goizean zehar egindako argazkiak:

Añorga Txikin 120 etxebizitzako bi eraikin egiteko lizentzia eman du udalak

Irutxuloko Hitza — 2026-06-02 14:52:42

Donostiako Udalak beste urrats bat egin du Añorga Txikiko Añorgako Geltokia hirigintza plana aurrera eramateko. 120 etxebizitzako bi eraikin egiteko lizentzia onartu dute, lokalak eta garajeak barne.

“Eraikin horiek eraikitzeak, eremua urbanizatzeko proiektua berriki onartzearekin batera, bultzada handia emango dio Añorga auzoaren ingurua berrituko duen garapen berri horri”, adierazi du Jon Insausti alkateak.

Añorga Txikin 250 etxebizitza eraikitzeko proiektua maiatza erdialdean onartu zuen behin betiko udalak. 50 tasatuak eta beste 50 alokairu sozialekoak. Auzotar asko kritiko agertu dira hasieratik proiektu horrekin, eta, hain zuzen ere, proiektua “auzotarrak entzun gabe” onartu zutela salatu zuen auzo elkarteak azaroan.

Ekainean eta uztailean egingo dute Añorgako Jolas Etxea Pilota Txapelketa

Irutxuloko Hitza — 2026-05-13 16:54:42

Añorga Kirol eta Kultur Elkarteak Jolas Etxea eskuz binakako txapelketa antolatu du aurten ere Añorgako frontoian, gizonezko senior eta emakumezko promesa mailetan. Zortzi bikote lehiatuko dira gizonezkoetan eta sei bikote emakumezkoetan. Beheko irudian ikus ditzakezue bikote parte hartzaileak eta partidak.

Ekainaren 7tik uztailaren 12ra egingo dute txapelketa. Final-laurdenetatik hasiko dira, eta igandeetan jokatuko dituzte partidak: ekainaren 7an, 14an, 21ean eta 28an. Finala uztailaren 12an izango da, Añorgako jaien barruan.

Sariei dagokionez, hauek izango dira finalean emango dituzten sariak: gizonezkoen senior mailan, bikote azpitxapeldunak 300 euro eta garaikurra jasoko du eta bikote txapeldunak 350 euro, txapela eta garaikurra. Emakumezkoen promesa mailan, aldiz, bikote azpitxapeldunak 100 euro eta garaikurra jasoko du eta bikote txapeldunak 150 euro, txapela eta garaikurra.

Añorgako oinezkoentzako eta bizikletentzako zeharbidea berrituko dute

Irutxuloko Hitza — 2026-03-11 10:00:58

Auzotarrak eta erabiltzaileak ez ziren gustura geratu 2022an udalak Añorgako zeharbidean egindako lanekin. Oinezkoentzako eta bizikletentzako egokitu zuten, baina ez zen oso txukun geratu. Hori dela eta, udalak berriz ere berrituko du Errekaldeko eta Rezolako biribilguneen arteko zatia.

“Zeharbidea berritu bazen ere, ez zen nahikoa izan. Hori dela eta, txukuntze lan batzuk egingo ditugu, urbanoagoa eta atseginagoa izan dadin. Auzoko paisaian hobeto txertatzea da helburua”, adieraz du Jon Insausti alkateak.

2022an berritu ez ziren udal azpiegiturak hobetuko dituzte. Oinezkoentzako espaloiak sortuko ditugu, eta bidegorri txukunago bat jarriko dute. Era berean, lorategi eremu zabalak sortuko dituzte.

Bi gauetan izango dituzte kontzertuak Añorga Txikiko jaiek

Irutxuloko Hitza — 2025-08-29 00:00:21

Auzo txikia da Añorga Txiki, baina baita bizia ere, eta horren isla dira bere jaiak: «Talde motor txiki bat gabiltza dena koordinatzen, baina, halaber, auzoko jende asko dago gure inguruan, jaien antolaketan laguntzen eta parte hartzen, tartean gazte asko», nabarmendu du jai batzordeko kide Silvia Osesek.

Gazte horietako bat da Jon Calzada batzordekidea, eta biek nabarmendu dute aurten ere «haur, gazte zein helduentzako» jarduerak antolatu dituztela irailaren 5ean eta 6an ospatuko dituzten jaietarako. Hemen daukazue egitarau osoa.

Berritasun batzuk

Bi berritasun nagusi dituzte aurtengo Añorga Txikiko jaiek: futbito txapelketa eta ostiraleko kontzertuak. Lehenengoari dagokionez, 18 urte inguruko auzotar talde batek antolatu duela nabarmendu dute jai batzordekoek: «Hori oso garrantzitsua iruditzen zaigu, gazte-gaztetatik dabiltzalako horrela gazteak jaien antolaketan. Bi egunez edukiko dugu txapelketa: ostiralekoa haurrentzako da, eta larunbatekoa, edonorentzat».

Bigarren berritasuna kontzertuei dagokiena da: «Aurten, ostiral gauean ere edukiko ditugu kontzertuak, ez soilik larunbatean. Gainera, adin desberdinetako jendearen gustukoak izan daitezkeen taldeak edukiko ditugu ostiralean: Mr. Luken lehenengo, gero Rock Kam Broom eta gero auzoko DJ-ak. Larunbatean, iaz ere etorri zen Olgetan erromeria taldea edukiko dugu lehenengo, eta ZKN Brothers DJ-ak ondoren».

Añorga Txikiko erraldoiak eta buruhandiak, 2024ko jaietan.Añorga Txikiko jaiak

Funtzionatzen dutenak

Berritasunetatik harago, noski, urtero arrakasta izaten duten jarduerak mantendu dituzte aurten ere: «Arrakasta handia izaten du, adibidez, arratsaldeko mozorro poteoak; jende asko animatu ohi da eta dibertigarria izaten da», azaldu dute batzordekideek. Ez dira faltatuko, ezta ere, larunbat goiz-eguerdiko sagardo eta sardina dastaketa maitatua eta ondorengo tortilla lehiaketa: «Auzotar ugarik hartzen dute parte, 45 inguruk; gurearen moduko auzo txiki batentzat asko da! Giro polita egoten da, lehia osasuntsu eta bizia egoten delako: askotan, familia bereko bi tortilla aurkezten dira eta euren arteko lehia egoten da, adibidez», nabarmendu dute.

Bestalde, iazko arrakasta ikusita, aurten ere mojitoak eskainiko dituzte larunbateko paella janaren ostean, alkoholdunak zein alkoholik gabeak, latin zumba saioarekin. Era berean, «aspaldiko partez», txaranga batek girotuko du larunbat arratsaldeko poteoa eta auzotarrak «ilusio handiz» daude.

Ziur larunbat gaua ederki luzatuko dutela añorgatar askok, baina jai batzordekoek gogorarazi dute igandean ongietorria izango dela laguntza oro, jai gunea garbitu eta txukun uzteko: «Laguntzera etortzeko eskatzen diegu auzotarrei, eta jaietan zehar ere edozein gauzatan laguntzera animatzen ditugu». Eta, ondo pasatzera ere deitu dituzte herritarrak: «Kalera jaitsi daitezela, denontzako moduko jarduerak antolatu ditugu eta! Eta auzokoak ez direnak ere etortzera animatzen ditugu, noski, beso zabalik hartuko ditugu!».

Baserriz baserri ibili dira Añorgako oilasko biltzaileak, dantzan, eskean eta giro ederrean

Irutxuloko Hitza — 2025-07-14 13:22:24

Azken txanpan murgiltzen hasi dira Añorgako Karmengo jaiak, gaur ospatzen ari diren Kuadrillen Egunarekin (hilak 14). Tradizioari eutsiz eta asteburuko neke eta ajeari aurre eginez, oilasko biltzaileak goizean goiz abiatu dira Jolas Etxetik, baserriz baserri eskean eta dantzan aritzeko.

Dantzatzeko, mokadua egiteko eta zintzurrak bustitzeko hainbat geldialdi egin dituzte, hala nola, Gaztelumenditarren etxean eta Errekalde elkartean. Jai giro ederrean ibili dira, eta horren erakusgarri da Joseba Parron San Sebastian argazkilariak egindako irudi bilduma, jarraian ikus dezakezuena.

Asteburu bakarrean, baina betiko indarrarekin datoz Añorgako karmenak

Irutxuloko Hitza — 2025-07-04 00:00:33

Dena batera izango da aurten; añorgatarrentzako gogorra, baina hobeto. Bakoitzak bere indarrak kudeatu beharko ditu», dio Añorgako jai batzordeko kide Jon Altunak aurtengo Karmengo jaiei buruz. Izan ere, horixe da berritasun nagusia: «Jaiak asteburu bakarrera mugatzea erabaki dugu, esperimentu gisa. Sentipena genuen ia uztaila osoa pasatzen genuela jaietan». Egitarau osoa hemen daukazue.

Horrela, etzi Jubilatuen eguna izango bada ere, ostegunean hasiko dira jaiak bere horretan, aurtengo beste berritasun nagusiarekin: kuadrillen arteko herri kirol desafioa.

Betikoak ez du huts egingo

Zikiroaren egun arrakastatsua, beraz, ostiralean izango da, mozorro festarekin: «Añorgarekin lotura duen edonork egutegian markatuta duen eguna da», nabarmendu du Altunak. Parrandak luze jo ohi du añorgatarrentzat, baina «berpizten» dira larunbateko kontzertuetarako: aurten, Ezpalak, Tapia eta Leturia Band eta Zurrunbilo Fest.

Igandean, bertso afaria daukate, Altunaren hitzetan, «autokontrol ariketa bat» izango dena, jaiak ez duelako etenik: «Kuadrillen eguna astelehenera pasatu dugu, eta oilasko biltzaileak 08:00etan aterako dira baserriz baserri». Horrez gain, gauera arte jarduera ugari prestatu dituzte egun horretarako.

Karmen egunarekin itxiko dituzte jaiak, eta ondoren baloratuko dute hurrengo urtean asteburu bakarreko formatua errepikatzea edo bi asteburuetara itzultzea. Motzagoak edo luzeagoak, gauza bat argi dago Añorgako jaietan: ez da aspertzeko astirik egongo!