Irutxuloko Hitza

«Espainia momentuz ez dago finalean»

Irutxuloko Hitza — 2026-07-14 12:27:14

Frantzia eta Espainia aurrez aurre ariko dira gaur Munduko Futbol Kopako finalerdietan. Irabazten duena iritsiko da finalera, eta Espainia bada, Donostian finala ikusteko pantaila erraldoirik jarriko ote den galdegin diote Jon Insausti alkateari, Tokiko Gobernu Batzorde osteko agerraldian.

Ezer baino lehen, Donosti Cup txapelketari egin dio erreferentzia Insaustik: “Txikitasunetik handiak garela nabarmendu behar dut. Munduko Kopa aurreko astean jokatu zen Donostian; Donosti Cup txapelketa. 30 herrialde, 60 zelai eta 2.300 partida. Uste dut horrek erakusten duela Donostia ere mundiala dela”.

Galderari erantzunez, “poliki-poliki eta partidaz partida” joan behar dela adierazi du. “Espainia momentuz ez dago finalean, eta ikusiko dugu zer gertatzen den. Hipotesi berririk bada landuko dugu, inolako konplexurik gabe”, nabarmendu du. Horiek horrela, ez du baztertu hirian pantaila erraldoi bat jartzea, Espainia finalera iristen bada.

Realarekin konparazio bat egiteko ere aprobetxatu du gaia: “Gogoan dut Realaren kopari buruz hitz egiterakoan, pantailari buruz ez genuela hitz egin finalera iritsi ziren arte. Beraz, zuhurtzia bera izango dugu. Hori bai, bihar goizean beste egoera batean egongo gara. Beharko balitz, prest nago kiroletako zinegotziarekin hitz egiteko”.

Hain zuzen ere, Iñaki Gabarain Kiroletako zinegotziak El Diario Vasco egunkariari baieztatu dio udalak pantaila erraldoi bat jarriko duela, Espainia finalera iristen bada. Era berean, esan du pantaila hori ez litzakeela Alderdi Ederren jarriko, hiriko beste toki batean baizik.

Furgoneta batek su hartu zuen Intxaurrondon astelehenean, eta espaloian jarraitzen du

Irutxuloko Hitza — 2026-07-02 13:01:05

Furgoneta batek su hartu zuen astelehenean Intxaurrondon, Telesforo Aranzadi kalean. Suhiltzaileek esku hartzea egin zuten sua itzaltzeko, eta ibilgailua kalte nabarmenak jasan bazituen ere, ez zen inor zauritu. Gertakariaren arrazoiak ikertzen ari dira.

Udaltzaingoak eremua zintaz itxi zuen, baina furgonetak bertan jarraitzen du, hainbat auzotarrek hedabide honi jakinarazi diotenez, egoera salatuz. Hain zuzen ere, hiru egun egingo ditu dagoeneko ibilgailuak espaloiaren erdian utzita.

Palestinako genozidioa salatzeko «ekintza sinbolikoa» egin dute Intxaurrondon

Irutxuloko Hitza — 2026-06-29 16:38:28

Intxaurrondo Palestina taldeak “ekintza sinboliko bat” egin zuten larunbatean, auzoko Bernart Etxepare plazan, “Israel Gazan egiten ari den genozidioa salatzeko eta Palestinako herriarekiko elkartasuna adierazteko”, taldeak azaldu duenez. Ekintzaileek ekintzaren bideoa helarazi diote hedabide honi, eta hemen ikus dezakezue.

Hain zuzen ere, plazako urmaela kolore gorriko margo ekologikoz tindatu zuten, “Gazan egunero isurtzen den odola irudikatzeko”, nabarmendu dutenez. “Erabilitako tindagaia biodegradagarria da, ingurumena errespetatzen du eta denborarekin berez desagertzen da”, zehaztu dute.

Horrez gain, plazako lurrean “haur palestinarren hil oihalak” irudikatu zituzten, “bonbardaketetan eta eraso militarretan hildako milaka haurren memoria gogora ekartzeko”. Gazako genozidioa salatzeko eta palestinar herriarekin elkartasuna adierazteko pankartak ere jarri zituzten urmaelaren inguruan.

“Ekintza honen bidez, gogorarazi nahi dugu ezin dela normaltzat hartu egunero herritar zibilak, haurrak, osasun langileak eta kazetariak hiltzea, ospitaleak, eskolak eta etxeak suntsitzea eta milioika pertsona gosera eta desplazamendura kondenatzea. Herritarrei dei egiten diegu isilik ez geratzeko. Isiltasuna eta axolagabekeria ere konplizitate forma bihur daitezke halako krimenen aurrean”, nabarmendu dute. Era berean, erakunde publikoak eta nazioarteko komunitatea ere interpelatu dituzte: “Exijitzen diegu behingoz neurri eraginkorrak har ditzatela: su eten iraunkorra, genozidioaren amaiera, Israelgo Estatuarekiko konplizitate politiko, ekonomiko eta militarraren etetea eta Palestinako herriaren eskubideak errespetatuko dituen irtenbide justu baten aldeko benetako konpromisoa hartzea”.

Ogi Berriko hainbat langilek eta langile ohik euren egoera salatu dute: soldata ez ordainduak eta beste

Irutxuloko Hitza — 2026-06-29 14:40:03

ESK sindikatuak deituta, Ogi Berri okindegi enpresa ezaguneko hainbat langilek eta langile ohik elkarretaratzea egin zuten larunbatean Intxaurrondon, Galizia pasealekuan dagoen Ogi Berri establezimenduaren aurrean. Sindikatuak nabarmendu duenez, “Ogi Berri marka komertzialari lotutako Lacustre S.L. eta Iturrin S.A. enpresen soldaten ez ordaintzea salatzeko” atera ziren kalera. Intxaur jaiak ospatu zituzten asteburuan Intxaurrondon, eta, hain zuzen ere, Sagastieder plazako oholtzara igo, eta euren egoeraren berri eman zuten bertatik ere langileek eta langile ohiek.

ESKren arabera, ostiralean, “Lan Ikuskaritzak Lacustre S.L. enpresako langileek aurkeztutako hainbat salaketaren ebazpenak jakinarazi zituen. Enpresari dagokion lan eta banku dokumentazioa eskatu eta kontratuak, nominak eta ordainketa egiaztagiriak aztertu ondoren, Lan Ikuskaritzak egiaztatu du soldatak behin eta berriz legez ezarritako epez kanpo ordaintzen zirela. Horren ondorioz, enpresari formalki eskatu dio hemendik aurrera soldatak garaiz ordain ditzala”.

Ogi Berriko hainbat langile eta langile ohi, Intxaur jaietako oholtzan; euren egoeraren berri eman zuten jaietan ere.ESK

Horrez gain, sindikatuak nabarmendu duenez, “espediente horietako bitan, Lan Ikuskaritzak ondorioztatu du enpresak ordezkapenerako aldi baterako kontratuak lege iruzurrean erabili dituela, kontratu horiek justifikatzeko emandako arrazoia ez zetorrelako bat benetako egoerarekin. Hori dela eta, enpresari eskatu dio kontratu horiek mugagabe bihur ditzala”.

Horrela, “zor diren kopuru guztiak berehala ordaintzea, etorkizuneko soldatak garaiz abonatzea eta lege iruzurrean egindako kontratazioekin amaitzea” exijitu du ESKk. Sindikatuak gaineratu du, era berean, “plantillaren zati handi bat emakumeek eta migratutako pertsonek” osatzen dutela: “Kolektibo horiek askotan zailtasun handiagoak izaten dituzte enpresen gehiegikeriak salatzeko, lana galtzeko edo diru sarrerarik gabe geratzeko beldur direlako”.

Donostiako haur eskola berrietan emateko izena ekainaren 29an zabalduko dute

Irutxuloko Hitza — 2026-06-24 15:47:20

Gros, Intxaurrondo Hegoa eta Loiolako Erribera auzoetako haur eskola berriak irailaren 4an irekiko dira. Horietan izena emateko ezohiko epe bat ezarri dutela jakinarazi du Donostiako Udalak. Izan ere, Haurreskolak Partzuergoarekin batera sustatu eta handitu egingo baita 0-2 urteko haur hezkuntzako sare publikoa, eta, hala, haur eskola berri batzuk ere izango dira.

Interesa duten familiek ekainaren 29tik uztailaren 8ra, biak barne, izango dute eskabideak Udalinforen bulegoetara bertara joanda aurkezteko modua. Deialdi hau 2025ean eta 2026an jaiotako haurren familiei eta legezko tutoreei egina da.

“Izena emateko aparteko epe hori berri ona da lana, bizitza pertsonala eta familia uztartu ahal izateko baliabide publikoak behar dituzten Donostiako familia askorentzat. Haur eskoletan leku gehiago izateak eta plaza horiek eskuratzeko modua errazteak lagundu egiten du familiek euskarri gehiago izan ditzaten haurrak hazteko etapa garrantzitsu horretan”, nabarmendu du Ane Oiarbide Berdintasuneko zinegotziak.

Haur eskola berriak

Duela gutxi bukatu ziren hiriko hiru haur eskola berrien lanak. Guztira, 89 leku publiko berri izango dituzte 0 eta 2 urte bitarteko haurrek. Hala, orain arte mota horretako baliabide gutxiago zituzten auzoetan, hezkuntza eta kontziliazio eskaintza handiagoa izango da.

Loiolako Erriberakoa Gabriel Laffitte plazan dago, 34 toki izango ditu; horietatik zortzi urtebetetik beherakoentzat izango dira. Aldiz, 26 leku urte 1 eta 2 urte bitarteko haurrentzat. Intxaurrondo Hegoa eremukoa, berriz, Baratzategi kalean dago. 21 toki izango ditu; zortzi urtebetetik beherakoentzat eta hamahiru urtebetetik 2 urtera bitartekoentzat. Azkenik, Grosekoa Zemoria kalean dago, eta 34 toki eskainiko ditu; zortzi urte bat baino gutxiagoko haurrentzat, eta 26 leku urte 1 eta 2 urte bitarteko haurrentzat.

Sanjoanak, «Intxaurrondoko euskal giroari eusteko»

Irutxuloko Hitza — 2026-06-19 00:00:44

Egun bakarreko egitarauarekin, baina ederki ospatzen dituzte San Joan jaiak Ipar Intxaurrondon, Bernart Etxepare plaza jai gune gisa hartuta. Urteroko legez, San Joan bezperan bertan ospatuko dituzte jaiak, hilaren 23an. Hemen daukazue egitarau osoa.

Arratsaldean hasiko da jai giroa eta afaldu ostean piztuko dute sua. Hain zuzen ere, sua eta haren inguruko dantzaldia izaten da jende gehien elkartzen duen jarduera, jai batzordeko kide Leire Gallastegiren hitzetan: «Auzoko dantzariek asteak pasatzen dituzte euskal dantzak prestatzen eta auzotar dezente etortzen dira ikustera».

Horrela, jaietako kartela da aurtengo berritasuna, Gallastegiren arabera: «Lauaizeta ikastetxeko DBHko laugarren mailakoen artean kartel lehiaketa egin dugu, beraz, beraiena da aurtengo kartela».

Intxaurrondotarrak jaietan parte hartzera deitu ditu Gallastegik, baita antolaketan ere: «Boluntario kuadrilla zabal bat behar izaten dugu eta lanak merezi du, beraz, ea hurrengo urtean gehiago garen antolaketan!».

Intxaur jaiek hamargarren urteurrena ospatuko dute, hazkunde etengabean

Irutxuloko Hitza — 2026-06-19 00:00:02

Noiz joko ote dute goia Intxaur jaiek? Duela hamar urte berreskuratu zituzten Sagastieder plazan egiten dituzten jaiak, eta hamarkada honetan etengabe egin dute gora: egitarau zabalagoa, parte hartzaile gehiago, gazte gehiago, heldu gehiago, haur gehiago eta dena gehiago. Horrela, hamargarren urteurrena ospatzera doazen honetan, COVID-19aren pandemiaren ostetik «egonkortuta» dagoen jai batzordeak lau eguneko jai indartsuak antolatu ditu aurten ere: «Hamargarren urteurrena dela eta, oso motibatuta gaude», nabarmendu du Manex Mendiburu jai batzordeko kideak. Egitarau osoa hemen daukazue.

Hamar urteotan antolatu dituzten Intxaur jaien aurretik, ordea, bazen jairik Sagastieder plazan, Kaldero Jaun jaiak hain zuzen ere, auzotar batzuek «hogei bat urtez» antolatu zituztenak, Mendiburuk gogorarazi duenez. Jai haiek antolatzeari utzi eta urte batzuetara jaio ziren Intxaur jaiak, auzoko jai giroa berreskuratu nahian.

Horrela, hamargarren urteurrenaren bueltan, aitortza egingo diete Kaldero Jaun jaiak antolatzen zituzten auzotarrei: «Txupinazoan, hitza eman nahi diegu, aitortza gisa, hortik gatozelako». Horrez gain, auzoan intxaurrondo bat ere landatu nahi du jai batzordeak, Intxaur jaien hamargarren urteurreneko lekuko gisa bertan gera dadin.

Aitortza egingo diete Kaldero Jaun jaiak antolatzen zituzten auzotarrei: «Txupinazoan, hitza eman nahi diegu»

Bigarren eszenatokia

Berritasun nagusi gisa, agertoki bakarra izatetik, bi agertoki izatera pasatuko dira jaiak, Mendiburuk azaldu duenez: «Basoa deitu diogu eszenatoki berriari. Agertoki nagusiaren atzealdean egongo da, zuhaitzak dauden eremuan, eta DJ-entzako izango da». Horrez gain, ostiral eta larunbat gauean ogitartekoak saltzeko jarriko duten txosna da beste berritasun nagusia.

Jai batzordeko kideak eta jaien inguruan mugitzen diren kuadrilla gehienak gazteak izanik ere, jaiak auzoko heldu zein haurrentzako ere izatea da antolatzaileen helburua, eta, horregatik, haurrentzako eta helduentzako jarduera gehiago sartu dituzte aurtengo egitarauan, azken urteotakoei eustearekin batera.

Horrela, biharko Intxaur Krosarekin motorrak berotu, eta ostegunean abiatuko dituzte jaiak, nahiz eta txupinazoa ostiralean izango den. «Horrenbeste hazi dira jaiak, ostegunak hartu duela auzokoontzako egunaren izaera, ostiralean eta larunbatean beste auzoetako jende asko etortzen baita», nabarmendu du Mendiburuk. Jaiak hazi izanarekin «oso pozik» daudela gaineratu du, eta, noski, Intxaur jaiez gozatzera animatu ditu herritarrak: «Mundu guztia da ongietorria!».

Erromeria ederra egin dute Uliako mintegietan, euriari aurre eginez

Irutxuloko Hitza — 2026-06-08 09:32:12

Urteroko legez, Intxaurrondo Zaharreko jai batzordeak antolatuta, erromeria egin zuten larunbatean Uliako mintegietan, egun osoko egitarauarekin. Eguzkiari aurre egin behar izan diote beste urte batzuetan, baina aurten, aldiz, euriari egin behar izan zioten aurre; hala ere, giro ederrean pasatu zuten eguna hamarnaka lagunek.

Goizean ireki zituzten guneko ateak, haurren jolasak egiteko. Eguerdian, hainbat kidek paellak prestatzen zituzten bitartean, Revolutionary Brothers reggae taldearen musikak jarri zuen giroa, gosea egiten joateko. Eguraldiaren ondorioz, aterpean egin zuten paella jana, eta, berriz ere, reggae doinuak izan ziren nagusi arratsaldean zehar, Revolutionary Brothers taldearekin.

Jarraian, eguneko irudi bilduma ikus dezakezue:

Erromeria egingo dute Uliako mintegietan larunbatean

Irutxuloko Hitza — 2026-06-03 10:01:14

Erromeria antolatu du aurten ere Intxaurrondo Zaharreko jai batzordeak, Uliako mintegietan. Larunbatean izango da, ekainaren 6an, eta egun osoko egitaraua prestatu dute, haur, gazte zein helduentzako jarduerekin.

11:00etan hasiko da festa, haurrentzako tailerrarekin, hamaiketakoarekin eta jolasekin, Intxhaurgunearen eskutik. 12:30etik aurrera, Revolutionary Brothers reggae taldearen musikak girotuko du gunea, bazkarien aurretik: 13:30ean bazkalduko dute haurrek eta 14:30ean helduek (paella). Bingoan jolastuko dira bazkalostean, eta 17:30etik 21:00etara, Revolutionary Brothers eta Lagunak taldeak kontzertua emango du. Bazkarirako txartelak Zulo Zahar eta Erdikoa tabernetan eta Artatxiki dendan daude salgai.

Loiolako Erriberako, Intxaurrondoko eta Groseko haurreskola berrien lanak bukatu dituzte

Irutxuloko Hitza — 2026-05-27 15:43:53

Donostiako Udalak lehen zikloko hiru haurreskola berrien obrak amaitu ditu, eta 2026-2027ko ikasturtean irekiko dituzte. Haurreskola berri horiek Loiolako Erriberan, Intxaurrondon eta Grosen daude, eta 89 plaza berri eskainiko dituzte zero eta bi urte bitarteko haurrentzat. Horren bidez, eskari historiko bati erantzuten zaio, hain zuzen ere orain arte eskaintza nahikorik ez zuten hiriko eremuetan.

“Haurreskoletako plaza berri bakoitza aurrerapauso zehatz bat da, emakumeek lan-bizitzaren eta seme-alabak zaintzearen artean hautatu behar ez izateko. Orain arte haurreskolarik ez zuten auzoetan eskaintza publikoa zabaltzea berdintasun-politika bat ere bada”, adierazi du Ane Oiarbide Berdintasuneko zinegotziak.

Eusko Jaurlaritzaren diru laguntza bati esker egin dira obrak. Ekarpen hori Europar Batasunak Next Generation EU funtsen bidez finantzatutako Suspertze, Eraldatze eta Erresilientzia Planaren barruan dago, eta 1.828.313,70 euroko aurrekontua izan du guztira.

Hiru haurreskola berriak

Loiolako Erriberako haurreskolak, Gabriel Laffitte plazan kokatua, 34 plaza eskainiko ditu: zortzi plaza, urtebetetik beherakoentzat, eta 26, urtebetetik bi urtera bitarteko haurrentzat. Intxaurrondokoak, Baratzategi kaleko 19. zenbakian, 21 plaza izango ditu, honela banatuta: zortzi, urtebetetik beherakoentzat, eta hamahiru, 1 eta 2 urte bitartekoentzat. Bestalde, Groseko Zemoria kaleko 20. zenbakiko haurreskolak ere 34 plaza izango ditu, eta horietatik zortzi urtebetetik beherakoentzat izango dira, eta 26, 1 eta 2 urte bitarteko haurrentzat.

Datozen asteetan matrikulazio prozesua abian jarriko da, herritarren arretarako UdalInfo udal zerbitzuaren bidez. Plaza esleipenaren kudeaketa Eusko Jaurlaritzaren zerbitzuaren ardura izango da. Zerbitzu horrek haurreskola publikoetarako sarbidea koordinatzen du, eta leihatila bakarra da haur hezkuntzako lehen zikloan plaza eskatzen duten familientzat.

“Emakumeak lan merkatuan berdintasun baldintzetan sartu eta mantentzeko faktore erabakigarrienetako bat da oraindik ere haur hezkuntzan plaza bat eskuratzea”, nabarmendu du Oiarbidek. Gaineratu duenez, “eskaintza publikoa, doakoa eta etxetik gertukoa bermatzea tresna eraginkorrenetako bat da berdintasunean aurrera egiteko eta emakumeek beren karrera profesionalaren eta seme-alaben zaintzaren artean hautatu beharrik ez izateko”.

Ekainaren 20an egingo dute Intxaur Krosa

Irutxuloko Hitza — 2026-05-07 09:35:42

Ekaineko azken asteburuan egingo dituzte, ohiko legez, Intxaurrondoko Intxaur jaiak (ekainak 25-28), baina, horren aurretik, Intxaur Krosa antolatu dute aurten ere, hirugarren urtez jarraian. Hain zuzen ere, ekainaren 20an egingo dute aurtengo krosa, 12:00etan, Ametzagaina parkean barrena.

4,7 kilometroko ibilbidea osatu beharko dute parte hartzaileek, tartean, aldapa gogorrak gaindituta. 5 euroko prezioa du izen emateak, eta 600 662 326 telefono zenbakira Whatsapp bidez idatzita eman daiteke izena, ekainaren 14ra arte. Motorrak berotzeko, hemen ikus ditzakezue joan den urteko Intxaur Kroseko argazkiak.

Munduko txoko berrietara bidaiatu, Intxaurrondotik

Irutxuloko Hitza — 2026-04-27 12:18:00

Bueltan da Ibiltariaren Astea. Haizalde Elkarteak eta Donostia Kulturak 32. aldiz antolatu dute mundua beste ikuspegi batetik ezagutzeko aukera eman nahi duen saio sorta. Astelehenetik ostegunera bitartean, maiatzaren 4tik 7ra, egingo dituzte emanaldiak, Intxaurrondo Kultur Etxean, 19:00etan. Sarrera librea da edukiera bete arte.

Aurtengoa bereziki hunkigarria izango da, jardunaldien sortzaile eta gidari izandako Felix Etxeberria lehenengoz ez delako egongo. Urtarrilean hil zen Etxeberria, eta bere alaba Mirenek hartu du lekukoa. Hain zuzen ere, aurtengo lau saioetako lehena berari eskaini diote.

Maiatzak 4, astelehena. Bizitza bidai, Felix Etxeberria solasaldian, haren senide eta lagunek berarekin partekatutako bizipen, oroitzapen eta anekdotak gogora ekarriko dituzte.
Maiatzak 5, asteartea. ¿La mejor ruta del mundo? saioan, Mikel Bringas donostiarrak Perun dagoen munduko zikloturismo ibilbide erakargarrienetako bat aurkeztuko du.
Maiatzak 6, asteazkena. Latitude galduetan: Gizakiak. Izotza. Bizitza aurkezpenean Ivan Santamaria gasteiztarrak Antartida, Svalbard, Groenlandia eta Islandia bezalako mapetako ertzetan agertzen diren leku urrunetara eramango ditu bertaratutakoak.
Maiatzak 7, osteguna. El mundo a través de sus historias: viajar desde lo humano hitzaldian Raquel Garcia Plaza mediku eta bidaiariak azalduko du leku turistiko edo enblematikoen bila ibiltzeari utzi, eta bere ofizioaren bidez harreman humanoetan arreta jarri duela: tokian tokiko kosmobisioetatik bizipenak ulertzen saiatzea helburu.

Saio bakoitzaren ondoren mokadutxo bat hartzeko aukera egongo da bertan, modu informalagoan bidaien inguruko esperientzia trukaketa eta solasaldiak errazteko

Horrez gain, maiatzaren 4tik 29ra bitartean, Ivan Santamariaren argazki erakusketa ikusgai izango da. Irudietan ohiko bizitzatik aldenduta dauden basamortu izoztuak, zonalde polarrak, artikoak eta antartikoak, isolatuak eta bakartiak islatzen dira, modu ikusgarrian. Naturaren boterea miresteko paisaia amaiezinak, non bizitza, baldintza gordinetan ere, aurrera ateratzen eta loratzen ere badakien.