Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Egiako bizilagunak «kokoteraino» daude auzoko irisgarritasun arazoekin

Irutxuloko Hitza — 2026-06-23 00:00:59

Egia Bizirik auzo elkarteak kanpaina bat abiatu du aspaldiko eskaera bati ikusgarritasuna emateko. Izan ere, lau urte daramatzate Donostiako Udalari igogailu konkretu bat jartzeko eskatzen: Karmengo Ama eta Ametzagaña kaleak lotuko lituzkeena, Kata taberna dagoen kalexkan. Leku horretan dauden eskailerak ez dira irisgarriak, eta horren ondorioz, mugikortasun arazoak eta zailtasunak sortzen dizkiete hainbat auzotarrei. Hain zuzen ere, bideo bat osatu dute oztopoak dituzten auzotarren testigantzekin.

Horrekin batera, auzo elkarteak elkarretaratze bat egin zuen atzo arratsaldean Plaza Berrin, Egiako Azoka Txikiaren eguna zela aprobetxatuz. Kokoteraino gaude. Katako kalezuloko igogailua orain!!! lelopean, hainbat auzotarrek bat egin zuten protestarekin. Auzo elkartearen ustez, “igogailurik merkeena eta egiteko errazena” da eskatzen dutena. Udalak, ordea, 2017tik hainbat igogailu ditu aurreikusita Aldakonean, Konkorrenean eta Jai Alain, “baina ez dute ezer egin”. Egia esan, aurkeztu berri den Aldakonea eremuko plan berrian, bi igogailu berri egingo dituztela iragarri dute, baina Kutxa Fundazioa arduratuko da horietaz.

Bestalde, udal taldeekin bilerak egiten hasi dira. EH Bildurekin egin dute lehendabizikoa, eta laster elkartuko dira sozialistekin. “Gure helburua da Egiako irisgarritasuna lehentasunezko gai bihurtzea eta auzoak aspalditik egiten duen eskaerari erantzun argia ematea”, adierazi du auzo elkarteak.

Ametzagaña eta Karmenago Ama kaleen arteko gune honetan igogailua jartzea nahi dute.Nagore Garmendia

Sinadurak eta parodia

Esan moduan, aspaldiko eskaera da Kata taberna dagoen kalexkako igogailuarena. 2022ko udaberrian, sinadura bilketa bat egin zuten auzoan, eta 1.000 baino gehiago erregistratu zituzten udaletxean. Ordea, ez zuten udalaren erantzunik jaso. Iaz, Bizipoza jaialdiaren egunean, parodia bat egin zuten; igogailuaren inaugurazio ekitaldia, alkatearen presentziarekin. Noski, ez zen agertu. Aldiz, auzotar asko elkartu ziren, eta argazkiak atera zituzten igogailua jartzeko eskaerarekin.

Orain, “benetako igogailua” nahi dutela nabarmendu du Egia Bizirik-ek, “erraza, merkea, eta, batez ere, beharrezkoa” delako.

Aldakonea eremuan 185 etxebizitza libre, 57 tasatu eta babes ofizialeko 45 eraikiko dituzte

Irutxuloko Hitza — 2026-06-22 16:23:47

Egiako Aldakonea eremuko hiri berroneratze proiektu berria aurkeztu dute Kutxa Fundazioak eta Donostiako Udalak. 285 etxebizitza berri inguru eraikiko dituzte, ingurune jasangarriago eta inklusiboagoa batekin; espazio berde berriekin, oinezkoentzako ibilbideekin eta irisgarritasuneko hobekuntzekin.

Onkologikoa lekuz aldatu ondoren, Aldakoneako magalaren zati bat berritzeko proposamenaren xehetasunak eman dituzte Jon Insausti Donostiako alkateak eta Ander Aizpurua Kutxa Fundazioko zuzendari orokorrak. Bizitegi kopurua eta mota aldatu dituzte, eta eremuaren irisgarritasuna bermatzeko neurriak aurreikusi dituzte.

Hain zuzen ere, plan berriak etxebizitza eskaintza zabaltzeko aukera emango duela nabarmendu dute. Esan moduan, 285 etxebizitza berri inguru eraikiko dituzte, eta eskaintza publikoa %58koa izango da, ezarritako gutxienekoa baino handiagoa. Izan ere, Kutxa Fundazioaren patronatuan EH Bilduk eta PSE-EEk haien ordezkarien gehiengoa baliatu zuten Aldakonean ahalik eta etxebizitza publiko kopuru handiena eraikitzea sustatzeko. Horrela, udalak hiri berroneratze proiektua aldatzea onartu zuen. “Proiektu hau ekaineko osoko bilkurara eramateak adierazten du donostiarrentzat irtenbideak bizkortu nahi ditugula, proiektu ausart, berritzaile eta asmo handikoen bidez. Aldakonea adibide ona da, ohiko estandarretatik harago doan etxebizitza babestuaren aldeko apustuarekin eta Donostiako klase ertain zabalaren beharrei erantzuten dien tipologia anitzarekin”, adierazi du Jon Insausti alkateak.

Kontuak kontu, babes sozialeko 45 etxebizitza eta 52 etxebizitza tasatu eraikitzea aurreikusi dute, baita 30 zuzkidura bizitoki ere. Era berean, garapenak eremuan egun dauden bizitegiei “modu ordenatuan eta errespetuz erantzutea” aurreikusten du, gaur egun bertan bizi diren pertsonek etxebizitza berriak proiektuarekin bat datozen baldintzetan eskura ditzaten ahalbidetuz. Horrela, eraitsiko diren 57 etxebizitzari beste bizileku bat ematea aurreikusi da, eta beste bizileku bat emateko etxebizitza babes publiko tasatuko etxebizitzatzat hartuko da. Bestalde, aldaketa honek Nazaret, Aldakonea egoitza eta San Antonio villa eraikuntza finkatzea aurreikusten du.

Jon Insausti Donostiako alkatea eta Ander Aizpurua Kutxa Fundazioko zuzendari orokorra, Aldakonea magalaren aurrean.Donostiako Udala

Ingurune berdeagoa

Aldakonearen eraldaketak ingurune “atseginagoa, berdeagoa eta osasungarriagoa” sortzea ahalbidetuko duela nabarmendu dute, “topaketarako, aisialdirako eta elkarbizitzarako espazio berriekin”. Proiektuak landaredi eremuak zabalduko ditu, eta haur parkeak, atseden eremuak eta egoteko lekuak gehituko ditu, auzokideen gozamenerako pentsatuak. Guztira, 7.198 metro karratu egokituko dira berdeguneetarako, eta 361 zuhaitz berri landatuko dira, ingurunearen ingurumen eta paisaia kalitatea hobetzen laguntzeko.

Horrez gain, proiektu berriak auzoko irisgarritasuna eta mugikortasuna hobetuko ditu. Eremuak igogailuak, ibilbideak eta oinezkoentzako pasabide irisgarriak izango ditu, eta espaloiak zabaldu eta egokituko dira, pertsona guztien joan-etorriak errazteko. Jarduera horretan, bizikletentzako 440 toki eta aparkatzeko 900 leku egongo dira, eta auzoko zirkulazioa hobetuko da.

Gainera, proiektuak 8.000 metro karratu inguru izango ditu hirugarren sektoreko erabileretarako, eta zerbitzuak, jarduera ekonomikoa eta hurbileko merkataritza ezartzeko aukerak sortuko ditu, auzoaren autonomia eta bizitasuna indartuz. Horrez gain, saneamendu eta drainatze sareak berrituko dira, eta hiri azpiegiturak modernizatzen eta espazio publikoaren kalitatea eta funtzionaltasuna hobetzen lagunduko da.

Aldakonea magaleko hiri berroneratze proiektu berriaren simulazioa.Kutxa Fundazioa

Hurrengo urratsak

Aldakoneako proiektuak aurrera jarraituko du datozen hilabeteetan, aurreikusitako hirigintza tramitazioaren arabera. Aste honetan, Plan Orokorraren eta Plan Bereziaren aldaketari hasierako onarpena emango diote ekaineko udalbatzarrean, eta 2027rako onarpena osatzea aurreikusten da. Ondoren, eremuaren antolamendua eta urbanizazio proiektua garatuko dira. Obren hasiera geroagoko fase batean kokatu dute, 2028 inguruan.

Komisaria misto berria Egiako Nestor Basterretxea plazan jarriko dute

Irutxuloko Hitza — 2026-06-14 11:06:09

Donostiako Udalak urratsa egin du Egian Udaltzaingoaren eta Ertzaintzaren komisaria mistoa jartzeko. Nestor Basterretxea plazan, Tabakalerako sarreraren parean eta Egiako pasabidearen ondoan, bulego berriak eraikitzeko izapideak hasi dituzte.

Azken urteotan ingurunean egindako obrek espazio zabalagoa eta funtzionalagoa ekarri dute, eta udalak komisaria berrira bideratu nahi du, hegalaren azpiko espazioa itxiz eta plazara begira fatxada berri bat jarriz. Xehetasun azterlanaren xede den espazio honek 553 metro karratuko azalera du.

Egiatarren irisgarritasun arazoak bildu ditu Egia Bizirik elkarteak bideo batean

Irutxuloko Hitza — 2026-06-10 09:33:23

Egiatar askok egunero hainbat zailtasun dituzte auzoko irisgarritasun hutsuneen ondorioz. Egoera hori ikusarazteko, Egia Bizirik elkarteak bideo baten bildu ditu auzotarren testigantzak, oztopo horiek euren egunerokoan duten eragina kontatzen.

Urteak daramatzate Ametzagaña kaletik Karmengo Ama kalera doazen eskaileretan igogailua jartzeko eskatzen. Eskailera horiek auzoko bi eremuren arteko lotura nagusia dira, adineko askok, gurpil aulkian dabiltzanek edo mugikortasun arazoak dituzten herritarrek “zailtasun handiak” dituzte egunero eskailerak erabiltzeko, eta egoera horrek bizilagun askoren “autonomia eta bizi kalitatea” baldintzatzen ditu.

Hori horrela, eta igogailuaren instalazioa teknikoki “bideragarria” da jakinda, ez dute ulertzen beharrezko azpiegitura hori oraindik martxan jarri ez izana. Bideoa zabaltzearekin batera, datozen asteetan udal ordezkariekin eta udal taldeekin bilerak egingo dituzte egoeraren berri eman eta irtenbide zehatzak eskatzeko. “Gure helburua da Egiako irisgarritasuna lehentasunezko gai bihurtzea eta auzoak aspalditik egiten duen eskaerari erantzun argia ematea”, zehaztu dute elkarteko kideek.

Gainera, hilaren 22an, beren eskaera zabaltzeko mobilizazioa egingo dutela ere jakinarazi dute. Plaza Berrian izango da, 19:00etan.

Egiako Aldakonea eremuko hirigintza plana aldatuko du udalak

Irutxuloko Hitza — 2026-06-09 12:57:07

Kutxa Fundazioaren patronatuak otsailean adostutakoari jarraiki, Egiako Aldakonea eremuko hirigintza planaren hasierako planteamendua berriz aztertzea onartu du Donostiako Udaleko Tokiko Gobernu Batzordeak gaur (hilak 9).

Horrela, Egiako gune hori eta Altzako Eraikuntza Institutuaren eremua deslotuko dituzte, izan ere, bi eremuak operazio berean sartuta, Egian etxebizitza libreak lehenestekoa eta babestuak eta zuzkidurazkoak Altzara eramatekoa zen udala.

Aldakoneako lursailaren jabea, ordea, Kutxa Fundazioa da, eta EH Bilduk eta PSE-EEk fundazioaren patronatuan haien ordezkarien gehiengoa baliatu zuten otsailean, Aldakonean ahalik eta etxebizitza publiko kopuru handiena eraikitzea sustatzeko. Horrela, Tokiko Gobernu Batzordean planteamenduaren aldaketa onartuta, Donostiako Udalbatzak berretsi beharko du orain erabaki hori, ondoren Aldakoneako hirigintza garapena abiarazteko.

EH Bildu, pozik

EH Bilduren udal taldea “pozik” agertu da, bere esanetan, “EAJk bere politika zaharkituak eta kontinuistak norabide egokian bideratu dituelako eta gizartearentzat onuragarriak diren proposamen arrazoizkoak onartzeko prest dagoelako, osoko bilkura honetan dagoen gehiengo aurrerakoiarekin bat eginez”. Gaineratu dutenez, aurreko planteamenduarekin, “periferian babes publikoko etxebizitzak eraikitzeko joera betikotzen zen, egiatarrek eta donostiarrek beren auzoen bihotzean etxebizitza bat eskuratzeko aukera gutxituz”.

Gladys eta antinuklearren memoria, gogoan

Irutxuloko Hitza — 2026-06-06 14:57:20

Euria naturaren parte da eta haren babeslea zen Gladys del Estal egiatarra. Ingurumena babestearen alde, energia nuklearraren eta Bardeako Tiro Poligonoaren aurkako mobilizazio batean hil zuen Guardia Zibilak Tuteran duela 47 urte. Zehazki, 1979ko ekainaren 3an, eta data horren bueltan jada ohitura bilakatu den ekitaldia egin dute larunbat goizean askorentzat Gladys Enea den Egiako parkean.

Lainoek eutsiko zutela bazirudien ere, euritsua izan da omenaldia. Bulebarretik abiatu dira dozena bat txirrindulari eta ibilbidea osatu dute parkearen atarira 12:00ak aldera iritsita “Gladys gogoan zaitugu” oihukatu dute bidean. Helmugara iritsi eta parkeko sarreran zeudenei batu zaizkie. Parkeko hesian, jarrita zegoen Gladys gogoan, 47 urte hil zutela pankartari beste bat gehitu dio atarian: “Gladys” eta Del Estalen aurpegiaren irudia zituen. Hura zintzilikatu ondoren, txaloak, eta jarraian, kantak.

Handik trikitilariak buruan erromerian igo dira Del Estalen oroigarri den monolitora. Iritsi ahala krabelinak banatu dituzte eta biribila osatuz kokatu dira zabalgunean. Oroigarriaren ondoan, omenduaren irudi bat txuri-beltzean. Aurreskua dantzatu dute eta lore eskaintza egin dute jarraian. Krabelinak jarri dituzte ontzi batean inguruan eta haren barruan, lore sorta. Arrosa bat ere utzi diote irudian. Bitartean, gazte batek gitarra lagun zuela abestu du.

Nuklearren aurkako oihua

Ondoren, antolakuntzako Rakelek aurtengo idatzi irakurri dut, oraingoan, nuklearren aurkako mezua izan du ardatz. Herritarren poltsikoaren eta segurtasunaren kontura “suspertu” nahian dabiltzala gaitzetsi du, gogoratuta Europako Batasunak “energia berde” gisa sailkatu zuela erregai fosilen horniketa arazoen ondorioz 2020an, eta egungo egoera ere greenwashinga egiten ari direla energia nuklearraren alde. Ondorioz, duela hilabete Txernobylgo hondamendiaren 40. urteurrenean egin moduan, memoria antinuklearra aktibatzeko beharra aldarrikatu dute.

1970 eta 1980ko hamarkadetan Hego Euskal Herrian lau zentral nuklear ezarri nahi izan zituztela gogoratu du, baita EAJk zioela “energia mota hori gabe kandelak beharko genituela argitzeko eta azak baino ez genuela izango jateko” ere. Urteak pasatu badira ere, “kapital globalizatua” berriro “tematu” da energia nuklearra bultzatzen, baina lehen ere zituen arazoak gainditu gabe: uranioarekiko mendekotasuna, segurtasun eza, hondakinak eta kostua. Gainera, “alternatiba ekologikoa”ez dela frogatzeko, 2026ko gertaeretan oinarritutako datu batzuk ere eman ditu. “Berriro diogu, bide bakarra dago, energia berriztagarriak bultzatzea, baina energia fosilak ordezkatzeko edo kontsumoa jaisteko, inola ere kontsumoa handitzeko”.

“Ez, ez, ez, nuklearrik ez”, oihu egin dute bertaratutakoek. Ondoren, jota pare bat eta hitz batzuk eskaini dizkio adineko emakume batek, eta Txoria txori abestuta amaitu dute omenaldia. Hamaiketakoa dastatu aurretik, azken hitzak esan ditu Juan Mari Beldarrainek. Azaldu du udalari eskatu ziotela Del Estalen omenezko plaka aldatzeko, zaharkitua baitago; eta hamasei hilabete ondoren, erantzunik jaso ez zutenez; eskaera berretsi zutela. Erantzuna, ordea, bera izan da: isiltasuna. “Udal honi diogun errespetu bera digula dirudi”, gehitu du.

Jarraian, ekitaldiko irudi batzuk:

Auzoa bere historiaz apaintzen ari dira Egian

Irutxuloko Hitza — 2026-04-10 00:00:15

Egiako milaka argazki bildu, dokumentatu, gorde eta webgunean eskuragarri jarri ditu 2019tik hona Teila Fabrikan egoitza duen Gordegia auzoko artxibategi grafikoak, eta horretan jarraitzen dute kideek, nekaezin. Azken hilabeteotan, ordea, argazki batzuk kalera ateratzen ari dira, modu iraunkorrean auzoa apaindu dezaten; auzoaren historiaren zati txiki horiek auzoko paisaiaren parte bihur daitezen.

2024ko maiatzean egin zuten lehenengo «esperimentua», orduan azaldu zutenez: «Plaza Berri ondoan [Iruresoro plaza] hutsik dagoen lokalean hainbat argazki jarri ditugu modu xume batean, esperimentu gisa, kalean horrelako erakusketa batek zenbat iraun dezakeen ez dakigu eta. Aurreko erakusketan erabilitako zenbait argazki berrerabili ditugu horretarako. Aspalditik auzoa irudi historikoekin apaintzeko asmoa dugu, itxita dauden erakusleihoak baliatuz, besteak beste. Espero dugu auzokideen gustukoa izatea egitasmoa eta zaintzen laguntzea, gehiago eta hobeto jartzeko asmoa dugu!».

Esan eta egin. Auzotarren gustukoa izan zen ideia, eta, dagoeneko, Teila Fabrikaren babesarekin, bost lekutan ikus daitezke Egiako argazki zaharrak, Gordegiaren eskutik: Karmengo Andre Mariaren kaleko hiru puntutan, Tejeria kalean eta Egia kalean. Eta ez dira azkenak izango: «Jarraituko dugu!», ohartarazi zion Karlos Trenor Gordegiako kideak erreportaje hau sinatzen duen kazetariari, kalean harrapatu zuenean orrialde hauetan ikus ditzakezuen argazkiak egiten.

Bost lekutan ikus daitezke Egiako argazki zaharrak, eta ez dira azkenak izango: «Jarraituko dugu!», ohartarazi du Karlos Trenor Gordegiako kideak

Haurrak, lanak, sagardotegiak eta beste

2024ko probaren ostean, Karmengo Andre Mariaren kaleko Kontxi arropa dendaren kanpoaldean jarri zituzten lehenengo argazkiak, 2025eko martxoan. 1950ean kale hori bera nolakoa zen ikus daiteke argazki nagusian, baita bertan Tetuan taberna eta garbitokia zuten Tetuan familiako hainbat kide eta auzoko zenbait etxe historiko ere. Jose Luis Tetuanek emandako argazkia da hori.

Horren parean, gutxi gorabehera, jarri zuten hurrengoa, iazko abuztuan. Iruresoro plaza baino pixka bat beherago, hain zuzen ere, dotore jantzitako lau haur ikus daitezke argazki handi batean. Gordegiak irudian bertan idatzitako informazioaren arabera, 1968 ingurukoa da irudia, eta atzealdean Lasarte etxea eta Eguren marmol enpresa ikus daitezke.

Karmengo Andre Mariaren kaleko 38. zenbakian Gordegiak jarri duen argazkia.Beñat Parra

Kontxi dendaren kanpoaldean ikusgai dauden irudiak, Gordegiaren eskutik.Beñat Parra

2025ean hasitakoa aurten jarraitzen ari dira Gordegiako kideak, eta, hain zuzen ere, urtarrilean bertan jarri zuten hurrengo irudia, Egia kalean. Hain zuzen ere, Joxepa janari denda zenaren 1940ko hamarkadako irudi eder bat jarri zuten orduan, non lau emakume ikus daitezkeen dendako mostradorean. Horma horretan espazioa sobran zuten, ordea, eta berriki bete dute, Aitona Celedonioren eta Faustino Eizmendi sagardotegiaren irudi banarekin. Gordegiako kideek azaldu dutenez, «Aitona Celedonio Matti Navas irudi emailearen birraitona zen eta mandatuak egitea zuen lanbide, 1940ko hamarkadan»; hain justu, kupelez betetako gurdi bat eramaten ageri da irudian. Eizmendi sagardotegiari dagokionez, iruditik metro eskas batzuetara dagoen Eizmendi burdindegiaren lokalean egon zen urte luzez, eta 1957koa da bertan ikus daitekeen irudia, Felix Lopez Galarretak egindakoa eta Garbiñe Eizmendik Gordegiari emandakoa.

Egia kalekoa osatu aurretik, otsailean, 24. Korrika ate joka zegoenean, 2007ko Korrikako irudi batekin apaindu zuten Tejeria kaleko horma bat. 15. Korrika zen hura, eta bertan haur gisa agertzen diren auzotar asko dabiltza gaur egun, ia hogei urteren ondoren, auzoan gora eta behera, mila saltsatan sartuta.

Tejeria kalean Gordegiak jarritako irudia, 15. Korrikakoa.Beñat Parra

Iruresoro plazaren ondoan Gordegiak jarritako irudia.Beñat Parra

Azkenik, Karmengo Andre Mariaren kalearen goialdean dago orain arte ikusgai jarri duten azken argazkia. 1950eko hamarkadako irudi bat da, Felix Lopez Galarretak egindakoa, eta Ametzagaña kalea eraikitze lanetan ikusten da bertan, baita Karmengo Andre Mariaren kaleko 42. (Leonenea) eta 32. zenbakietako etxe historikoak ere: «Inguru horrek guztiak Iruresoro zuen izena», zehaztu du Gordegiak.

Auzoak saltokiek, tabernek, auzotarrek, auzoetako herri mugimenduek eta ohiturek egiten dituzte, baina baita historiak ere. Egian argi dute hori, eta historia denen eskura jartzeko lanean dabiltza buru-belarri, auzoa egiten jarraitzeko.

Lanari ekin diote Ikusmira Berriak programak hautatutako sei zinemagileek

Irutxuloko Hitza — 2026-03-19 12:32:44

Ikusmira Berriak egonaldi programak aukeratutako sei zinemagileak hilaren 9tik lanean ari dira Tabakalerako Zinea eta Ikus-entzunezko laborategian. Apirilaren 19ra arte beren ikus entzunezko proiektua garatzeko denbora, lekua, testuingurua eta baliabideak izango dituzte Ekain Albite, Rod Llaverias, Ines Nunes, Gala Hernandez, Kavich Neang eta Valeria Hofmann sortzaileek.

Programaren lehen egunetan lan saioak partekatuko dituzte Florencia de Mugica, Javier Martin eta Olimpia Pont Chafer adituekin. Halaber, datozen asteetan, proiektu bakoitzerako espresuki aukeratutako profesionalen aholkularitza izango dute, beren beharretara oinarrituta: Maria Alche, Anna Ciennik, Tizza Covi, Desiree de Fez, Santiago Fillol, Alexandre Koberidze eta Juliana Rojas izango dira proiektuen tutoreak. Halaber, Harkaitz Cano idazleak, Lucile Hadžihalilovic zinemagileak eta Victor Iriarte zuzendariak idazketa eta irudi sorkuntzarako tailerrak emango dizkiete.

Ekainean, egoiliar bakoitzak garapenerako 5.000 euroko diru laguntza bat jasoko du, bi egonaldien arean bere proiektuan lanean jarraitzeko. Irailean, Zineladiarekin batera, Donostiara itzuliko dira, egonaldiko azken bi asteak egiteko. Fase horretan, beren proiektua industriako profesionalei aurkeztu ahal izango diete, eta hitzorduen agenda pertsonalizatua izango dute proiektuetan parte hartzeko interesa duten pertsonekin.

Ikusmira Berriak egonaldi programa Zinemaldiak, Tabakalerak eta Elias Querejeta Zine Eskolak antolatzen dute. Hamabigarren aldia da aurtengoa.

Federico Garcia Lorcako igogailua hilabete egongo da itxita konponketa eta mantentze lanengatik

Irutxuloko Hitza — 2026-02-16 11:09:05

Federico Garcia Lorca pasealekuko igogailua, Egia parkera doan Gladys del Estal pasabidearekin lortzen duena, gutxienez hilabetez egongo da zerbitzuz kanpo, premiazko konponketa eta mantentze lanengatik. Hiri mantentze eta zerbitzuetako zinegotziak Carlos Garciak azaldu duenez, programatutako lanak dira, igogailuak “premiazko esku hartzea behar duelako azken egunetan erregistratzen ari ziren arazoak saihesteko”.

Hori horrela, lanen bidez, hobekuntza elektronikoak eta kontrolekoak jarri, eta trakzio talde elektrikoa eta trakzio kableak eta poleak berrituzko dituzte. Halaber, seinaleztapenak, telezerbitzu sistema, ebakuazioa automatiko sistema, karga sentsorea eta LED argiztapena aldatzeko baliatuko dituzte.

Sailaren kalkulu teknikoen arabera, lanek lau asteko iraupena izango dute, eta lehenago amaituz gero, udalak jakinaraziko du; eta 30.000 euroko kostua dute.

Egiako eta Txomiñeneko danborradak, iruditan

Irutxuloko Hitza — 2026-01-20 20:11:08

San Sebastian eguna da Donostiako auzo gehien-gehienetara heltzen den jai bakarra, eta, hain zuzen ere, Urumea ibaia jarraituz, haren ertzean dauden auzoetan gozatu dute askok gaurko jaia. Egiatik hasita, Loiolara jaitsi, Txomiñenera pasatu eta Martuteneraino heldu.

Antzeko ibilbidea eginda, Egiako Donosti Gain, Maria Reina Parrokia-Egiako Tolosarrak eta Aitor Ikastola danborradak harrapatu ditu IRUTXULOKO HITZAk, baita jarraian Txomiñenean Ametzagaña, AMPA Mary Ward eta Lanberri Auzo Elkartea danborradak harrapatu ere. Behean dituzue argazki guztiak ikusgai.

Glenna Cabello kontsul venezuelarra elkarrizketatuko dute Egian

Irutxuloko Hitza — 2025-12-18 08:56:21

Dialogoak elkarrizketa zikloa abiatu dute Egiako Teila Fabrikan, eta Glenna Cabello Venezuelako Bolibartar Errepublikak Bilbon duen kontsulatuko burua izango da lehenengo gonbidatua. Gaur (hilak 18) izango da saioa, 18:30ean, doako sarrerarekin. Ekhiñe Atorrasagasti kazetariak gidatuko du saioa.

Venezuelaren egungo egoeraz luze eta zabal mintzatuko da Cabello. Hain zuzen ere, gero eta ezegonkorragoa da Venezuelako egoera politiko eta soziala eta, azkenaldian, Nicolas Maduroren gobernuaren eta chavismoaren aurkako gero eta jarrera oldarkorragoa agertzen ari da Donald Trump buru duen AEBetako gobernua.