Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Beroa eta desnibela gainditu dituzte 44. Igeldoko Igoera Herrikoian

Irutxuloko Hitza — 2026-06-20 16:23:14

Igeldoko San Pedro jaien lehenengo pauso gisa, 44. Igeldoko Igoera Herrikoia egin dute hamarnaka lagunek larunbat goizean. Beroari aurre eginez, giro ederrean gainditu dute Ondarretatik Igeldorainoko desnibela korrikalariek.

Horrela, Iratxe Etxegoien, Amaia Insausti eta Nerea Arrizabalaga izan dira azkarrenak nesketan eta Aitor Etxeberria, Ioritz Etxeberria eta Oier Etxeberria mutiletan. Igeldoko azkarrenak, aldiz, Maddi Cenzano (37:53) eta Aratz Urruzmendi (31:34) izan dira.

Jarraian, Asier Gonzalez de San Pedro argazkilariaren irudi bilduma ikus dezakezue:

Igandean itxiko dute Igeldoko Ekaitz erretegi historikoa

Irutxuloko Hitza — 2026-05-28 10:54:26

Maiatzeko azken asteburua izango da aste honetakoa, eta, horrekin batera, Igeldoko Ekaitz erretegiaren —Polipaso gisa ere ezaguna da— azken asteburua ere izango da. Hain zuzen ere, El Diario Vasco egunkariak aurreratu zuenez, hilaren 31n itxiko dute Donostia eta Orio arteko taberna eta jatetxe ezaguna, egungo arduradun gehienen erretiroarengatik.

Mari Jose, Izaskun eta Maite Etxabe ahizpak dira egungo arduradunak, eta 38 urtez erretegia gidatu ostean, hiru ahizpetako bik erretiroa hartuko dutelako itxiko dute Ekaitz, ez baitute belaunaldi erreleborik. Haien aurretik, Polipaso izeneko erretegi bat egon zen baserri horretan bertan, eta horregatik da ezaguna izen horrekin, oraindik ere.

Igeldoko ostalaritza establezimendu ezagunenetako eta maitatuenetako bat da Ekaitz edo Polipaso, eta, beraz, hutsune handia utziko du bere bezeroen artean.

Energia burujabetzaren aldeko urratsak egiten ari dira

Irutxuloko Hitza — 2026-03-13 00:00:34

Plazaratzeko unea iritsi da, pausoak ematen jarraitzeko. Pasa den astean aurkeztu zuten Igeldoko Komunitate Energetikoa (IKE), eta argi dute helburua: energia burujabetza. Horretarako, hiru urteko lanaren emaitza jarri dute oinarri gisa. 78 bazkide eta familia dituzte, sei enpresa eta bi elkarte. Ibiltzen hasiberria den Igeldoko toki entitate txikiaren bultzada behar dute orain, baita bazkide gazteak ere. «Herriak harrera polita egin dio. Egia esan, oso pozik gaude. Datorren astean, bazkideon batzarra dugu, eta baloratuko dugu herrian IKEren aurkezpenak izandako oihartzuna», dio Nekane Urruzmendik, IKEko kontseilu errektoreko lehendakariak.

Dagoeneko lau instalazio fotovoltaiko daude martxan. «Lehen hiruak abendutik, eta laugarrena urtarriletik», zehaztu du Urruzmendik. Horri esker, Igeldoko familien ia herenaren kontsumo energetikoa jasangarriagoa dela nabarmendu du. Plaka fotovoltaiko horiek IKO dendaren eta hiru etxebizitza pribaturen teilatuetan jarri zituzten. Momentuz, ez dituzte gehiago jarriko, baina etorkizun hurbilean aukera berriak aztertuko dituzte.

Igeldoko Komunitate Energetikoa energia berdea kontsumitzeko helburua duen irabazi asmorik gabeko kooperatiba da. Urruzmendik azaldu duenez, komunitatearen jarduera nagusia jatorri berriztagarriko energia ekoiztea da, bazkideek autokontsumitzeko: «Egungo energia eredua aldatzeko konpromisoa hartu dugu, pausoz pauso, Igeldon ere %100 eredu berriztagarria lortzeko».

Bustinzuri etxeko instalazio fotovoltaikoa da jarri dituzten lauetako bat.IKE

Hiru urteko bidea

2023ko otsailean, energia komunitateei eta energia berriztagarriei buruzko hitzaldi bat egin zuten Igeldon. Eneko Maioz gonbidatu zuten, Orexako alkatea zena orduan, eta, orain, Orexako energia komunitateko presidentea dena. «Berak animatu gintuen Igeldon energia komunitate bat sortzera, eta halaxe egin genuen. 2023ko martxoan herriko hainbatek talde sustatzailea sortu genuen, eta lanean hasi ginen», gogoratu du Urruzmendik.

Hilabete batzuk pasatu zituzten herritarrekin hitz egiten, bazkideak bilatzen eta beste. Azkenik, 2023ko abenduan sortu zuten kooperatiba. Aldiz, 2024an erabaki zuten plaka fotovoltaikoak jartzea, eta Donostiako Udalarekin jarri ziren harremanetan. «Estalki publikoak lagatzeko eskatu genien, horietan plakak jartzeko. Hasieran, baiezkoa eman zigun sozialisten esku zegoen Ingurumen Saileko arduradunak. Gerora, ordea, ezezkoa jaso genuen, donostiar guztien alde egin nahi zuelako gai horretan», deitoratu du.

Bitartean, Gipuzkoako Aldundiko laguntzetara aurkeztu ziren, «eta asko lagundu ziguten». Denboraz larri ibili ziren arren, laguntzak eskatzeko epea luzatu zieten, eta estalki pribatuetan plaka fotovoltaikoak jartzeko baimenak lortu zituzten. «Bazkide dezentek eskaini zizkiguten haien teilatuak, baina Goienerrek egokienak ziren hiruak aukeratu zituen, eta leku horietan jarri genituen», azaldu du Urruzmendik.

Aurrera begira

IKE ofizialki aurkeztu berritan, kontseilu errektoreak lanean jarraitzen du. «Azken batzarrean, bazkideei esan genien 2026an ez genuela proiektu berririk proposatuko. Batetik, Toki Entitate Txikiaren zain gaudelako. Nahi dugu komunitatearen parte izatea. Duela gutxi martxan jarri denez, lanpetuta daude, eta denbora eskatu ziguten», esan du Urruzmendik. Horrekin batera, «leku fisiko» baten bila dabiltza IKEren kudeaketa «zentralizatzeko», eta instalazio fotovoltaikoen sistema bat ere martxan jarri nahi dute.

Igeldo hasi da bere energia berriztagarri propioa sortzen

Irutxuloko Hitza — 2026-03-05 17:00:06

Hiru urteren ostean, “malkartsua” izan den bide baten amaiera etorri da gaurkoan: Igeldoko Komunitate Energetikoak (IKE) bere lehen plaka fotovoltaikoak martxan jarri ditu. Horrelaxe jakinarazi du Nekane Urruzmendi IKEko errektore kontseiluko lehendakariak, herritarrez eta erakundeez babestuta.

IKEk hiru urte daramatza lanean, eta 78 bazkide ditu egun, tartean, herriko sei enpresa eta bi elkarte. Beraz, lau instalazio fotovoltaiko hauek martxan jartzean, “Igeldoko familien ia herenaren kontsumo energetikoa jasangarriagoa dela” adierazi du Urruzmendik.

Halaxe nabarmendu dute, baita ere, Eneko Dorronsorok, Igeldoko Toki Entitate Txikiko ordezkariak, Iñigo Garciak Donostiako Ekologia zinegotziak eta Jose Ignacio Asensiok Aldundiko Jasangarritasuneko diputatuak.

Dorronsorok herritarrei eman dizkie eskerrak, erakundeen elkarlana errazteagatik. Garciak, norabide berean, herritarren protagonismoa nabarmendu du trantsizio ekologistan aurrera egiteko. Azkenik, Asensiok, igeldotarrak zoriondu ditu, egitasmo “aitzindaria” dela aitortuz. Asensiok esan duenez, hasieratik babestu dute proiektua, eta egitasmoarentzat 82.000 euro jarri dituztela gogora ekarri du, ia-ia osorik finantzatuz, alegia.

%100 berriztagarria lortzeko

IKE, Igeldoko Energia Komunitatea, energia berdea kontsumitzeko helburua duen irabazi asmorik gabeko kooperatiba da. Urruzmendik azaldu duenez, komunitatearen jarduera nagusia jatorri berriztagarriko energia ekoiztea da, bazkideek autokontsumitzeko: “Egungo energia eredua aldatzeko konpromisoa hartu dugu, pausoz pauso, Igeldon ere %100 eredu berriztagarria lortzeko”.

IKEren helburu nagusiak honakoak dira: “energia subiranotasunean sakontzea, trantsizio sozioekologikoa sustatzea, igeldotarren izaeran sustraitua dugun auzolanaren bidez kostuak murriztu eta faktura elektrikoan aurreztea, pobrezia energetikoan bizi diren gure bizilagunen inklusioa sustatzea eta herritar guztien gizarte kohesioa bultzatzea”. Egitasmo hau Goienerren laguntzarekin burutu duten lehen proiektua da, bazkideen ekarpenen eta Gipuzkoako Foru Aldundiaren eta Donostiako Udalaren diru laguntzen bidez finantzatua.

Xabi Alonsoren txaletaren sarbidearen inguruko salaketa artxibatu du Fiskaltzak

Irutxuloko Hitza — 2026-01-22 12:02:26

Donostiako Fiskaltzak artxibatu egin du Xabi Alonso futbol entrenatzaile tolosarraren Igeldoko Txalin eremuko txaletaren sarbidearen inguruko salaketa. Haritzalde Naturzaleen Elkarteak eta Ekologistan Martxan elkarteak iazko udan aurkeztu zuten Donostiako Udalaren eta Alonsorekin lotura estua duen Tavaro XXI enpresaren aurkako salaketa, “prebarikazioagatik”. Salaketa hori gehiago zabaldu zuten urrian, dokumentazio gehiago aurkituko zutelako.

Salaketa “prebarikazioagatik eta ondasun publikoen usurpazioagatik” jarri zuten, luxuzko txaletaren jabeei leporatuta inguruko bide bat erabiltzeko baimena iraungita egonda ere erabiltzea: “Salaketa jarri dugu Txalingo ur biltegira sartzeko bidearen erabilerari dagokionez, Igeldon, nahiz eta zegoen baimena, legezkotasun zalantzagarria duena, 2025eko martxoaren 21ean iraungi den eta luzaezina den”, azaldu zuten iazko udan.

Salaketa artxibatzeko, hainbat hedabidek iturri juridikoak aipatuta azaldu dutenez, Fiskaltzak argudiatu du argitu egin behar dela galtzada hori erabilera publikokoa izango den edo zerbitzu publikokoa izaten jarraituko duen, eta hori udalak erabaki beharko duela. Era berean, Fiskaltzaren aburuz, kasu honetan, Donostiako Udalak ez du legea saihesteko asmo deliberaturik eduki. Alonso Real Madrileko entrenatzaile gisa kaleratu zuten egun berean artxibatu zuten salaketa, urtarrilaren 12an.

Txalet “ilegala”

Gogoratu behar da 2024an txaleta eraikitzeko lizentzia bertan behera utzi zuela Donostiako Administrazioarekiko Auzien 3. Epaitegiak, Haritzalde Naturzaleen Elkarteak eta Igeldoko Ieltxo Kultur Elkarteak 2022an aurkeztutako salaketa baten harira. Horren arabera, txaleta eraitsi egin beharko litzateke. Epaiari errekurtsoa jarri zioten enpresak eta udalak Euskal Autonomia Erkidegoko Justizia Auzitegi Nagusian, eta ebazpenaren zain daude oraindik.

Txalingo txaletaren inguruko salaketa zabaldu dute, «dokumentazio berria» aurkitu ondoren

Irutxuloko Hitza — 2025-11-12 08:00:58

Haritzalde eta Ekologistak Martxan elkarte ekologista eta naturazaleek Donostiako Udalaren eta Tavaro XXI S.L. enpresaren aurkako salaketa jarri zuten Gipuzkoako Fiskaltzan ekainean, Igeldoko Txalin eremuko txaletaren harira. Salaketa “prebarikazioagatik eta ondasun publikoen usurpazioagatik” jarri zuten, luxuzko txaletaren jabeei leporatuta inguruko bide bat erabiltzeko baimena iraungita egonda ere erabiltzea. Orain, dokumentazio gehiago aurkitu dutela azaldu dute eta, beraz, salaketa zabaldu egin dutela.

Gogoratu behar da txaleta eraiki zuen enpresa horrek, Tavaro XXIk, harreman zuzena duela Xabi Alonso futbolari ohi eta egungo gizonezkoen Real Madrileko entrenatzailearekin duela urte asko, egungo administratzaile bakar ofiziala Nagore Aranburu enpresaria bada ere, Alonsoren emaztea —Miguel Angel Periko Alonso futbolari ohi eta Xabi Alonsoren aitak ere karguak eduki ditu enpresa horretan—.

Era berean, gogoratu behar da 2024an, txaleta eraikitzeko lizentzia bertan behera utzi zuela Donostiako Administrazioarekiko Auzien 3. Epaitegiak, Haritzalde Naturzaleen Elkarteak eta Igeldoko Ieltxo Kultur Elkarteak 2022an aurkeztutako salaketa baten harira. Horren arabera, txaleta eraitsi egin beharko litzateke. Epaiari errekurtsoa jarri zioten enpresak eta udalak Euskal Autonomia Erkidegoko Justizia Auzitegi Nagusian, eta ebazpenaren zain daude oraindik.

Dokumentazio berria

Salatzaileek azaldu dutenez, udal dokumentazioa aurkitu dute, dioena “Marugel higiezinen enpresaren jabetzakoa den txaleta dagoen finkaren lurzati nagusia ez dela landa lurzoru ‘birjina’, lizentzia emateko espediente guztietan agertzen den moduan; aitzitik, dokumentazio hori 2007tik golf eskolarako dela eta Plan Berezi bat duela frogatzen duena (plan horren onarpena 2007/7/2ko GAOn argitaratu zen)”. “Hau da, partzela horretatik txaletetik abiatzen den eta bide publiko batera iritsi nahi duen edozein bide igaro behar da, eta ez da edozein landa lur, baizik eta eremu ordenatu bat, eta, beraz, ez du bide berririk irekitzeko aukerarik ematen, erantsitako planoan islatzen direnak izan ezik: lehendik dagoen Txalingo biltegira sartzeko bidea, udal jabetzakoa eta erabilerakoa, eta Agiti bidera lotzeko bidea, golf eskolari dagokiona”, gaineratu dute elkarteek.

Hain zuzen ere, aipaturiko Plan Bereziaren izapideetan, naturazaleen hitzetan, “argi geratu zen partikular batek ezin zuela erabili ur biltegiaren bidea, udaleko Hirigintza zuzendariak bere garaian jakinarazi zuenez. Gipuzkoako Foru Aldundiak berretsi zuen, 2005ean (GAO, 2005/7/6), golf eskolaren lehen proiektua ukatu zuela, biltegiko bide hori eskolara sartzeko bide gisa erabili nahi zuena”. Hain zuzen ere, elkarteek gogorarazi dute Plan Berezi horren bigarren bertsio bat aurkeztu zuela jabetzak 2007an, golf eskolara Agiti bidetik sartzeko, ur biltegiko bidetik ordez.

“Legez kanpoko errepide bat”

Horrela, Haritzaldek eta Ekologistak Martxanek ondorioztatu dute “2005etik, bai udalak bai Marugelek bazekitela deposituko bidea ez dela partikularrek erabiltzeko egokia, eta lurzatian 2007an onartutako Plan Berezian jasotakoa soilik eraiki zitekeela”. Gaineratu dutenez, “2018an, Marugelek bere finkaren 10.000 metro koadroko bereizketa eskatu zuenean, Tavarori saldu zitzaion lursail independente bat sortzeko, eta egungo txaleta hartzeko balio duenean, ‘ahaztu’ egin zuten Plan Berezi hori bazegoela eta biltegiko bidearen erabilera partikularra ezinezkoa zela, eta artifizialki sortu zuten lursail bat etxebizitza batekin, sarbiderik ez zuena eta eduki ezin zuena. Beraz, gaur egungo egoera da Tavarok udal biltegiko bidea bidegabe erabiltzeaz gain, udal tolerantziarekin, legez kanpoko errepide zati bat eraiki duela golf eskolako lurretan.

Horregatik, dokumentazio hori aurkeztu eta salaketa zabaldu dute Fiskaltzan, baita eskatu ere “lizentziaren prozesu horren berri eman duen udal arkitektoari galdeketa egiteko”. Era berean, galdera bat utzi dute airean: “Nola azaltzen da udalak eta Marugelek Plan Berezi hori eta partikularrek eremu horretan lizentziak emateko prozesu osoan udal deposituaren bidea erabiltzearen aurkako txosten horiek ‘ahaztu’ izana eta auzitegietan lizentzia hori legezkoa dela esatea?”.

Igeldoko udal pilotalekua berritzeko lanak bukatu dituzte

Irutxuloko Hitza — 2025-10-14 13:18:16

Donostia Kirolak jakinarazi duenez, bukatu dira Igeldoko udal pilotalekua berritzeko lanak. Maiatzean hasi ziren, eta duela egun gutxi amaitu dute obra. Beraz, frontoia dagoeneko erabilgarri dago. Construcciones Echaide enpresa arduratu da lanez, eta kostua 118.559 eurokoa izan da. Igeldoko herritarrek aurrekontu parte hartzaileen bidez eskaturiko proiektu bat da.

Egindako obrari dagokionez, helburu nagusia zen euri urik ez sartzeko itxitura jartzea, bai alboko fatxadaren eta estalkiaren arteko zuloaren bidez, bai aldameneko urbanizazioaren bidez. Gainera, frontoiaren kanpoaldeko fatxadak eta ezkerraldeko pareta saneatu eta margotu dira, baita frontisaren gainean txapazko itxitura bat jarri ere, instalazio horretan eguzkitan sortzen ziren itsualdiak konpontzeko.

Igeldoko pilotalekua 1912an inauguratu zen, ageriko frontoi gisa. 1994an estalkia instalatu zen eta, 2001ean, alboko eta atzeko itxitura egin zen, orain hobetu dena.

Tximistarriko hondakin uren ponpaketa estazioa berrituko dute

Irutxuloko Hitza — 2025-09-09 12:00:48

Donostiako Udalak Igeldoko Tximistarri zonaldean dagoen hondakin uren ponpaketa estazioa hobetuko du. Onartu duten proiektuak 510.891 euroko aurrekontua du, eta bost hilabeteko egikaritze epea ezarri dute.

Instalazioaren funtzionamendua optimizatzea da helburua, baita ere instalazioaren mantentze eta kontserbazio lanak hobetzea eta erraztea. Batetik, egungo instalazioaren ontziaren biltegiratzea handitzea eta errendimendua eta energia kontsumoa hobetuko dituen ponpak aldatzea proposatu dute. Bestetik, leku batetik azalera batera aldatzea erabaki dute, mantentze eta kontserbazio lanak errazteko.

Kokapen berri horri esker, egungoa dagoen lekutik 90 bat metrora, inguruko etxebizitzetara igaro ahal izango da, bai obrek irauten duten bitartean, bai instalazioa mantentzeko eta kontserbatzeko lanek irauten duten bitartean.

Satrustegi dorrea, galtzeko arrisku egoeran

Irutxuloko Hitza — 2025-09-05 00:00:19

Igeldo mendiaren magalean dago Satrustegi dorrea, 1883an eraikitzen hasi zirena, Patrizio Satrustegi baroiaren eskariz. 1995ean, Eusko Jaurlaritzak Kultur Ondasun izendatu zuen eraikina, legezko babes maila gorena duena, baina Ancorak salatu du eraikinean legez kanpoko hotel bat eraiki nahi dutela.

Hain zuzen ere, elkarteak Paisajes de Asturias S.L. sozietateak sustatutako proiektua eskuratu du, eta bertan jasotzen diren datuak jakinarazi ditu. Sociedad Paisajes de Asturias S.L. sozietatea Quiron taldeko presidente Victor Madera medikuak eratu zuen. Madera Forbes zerrendan dago, bere aberastasun pertsonal handiagatik, eta estatuan banatutako 25 jauregi baino gehiago erosi ditu, luxuzko hotel bihurtzeko helburuarekin; tartean, Satrustegi dorrea bera.

Jatorrizko planoak galdu diren arren, Euskadi.eus webgunean agertzen denez, tradizio militarraren arabera badakite Seldon Bornun arkitektoak egin zuela proiektua, eta berak zuzendu zuela eraikuntza. Satrustegi dorrea lau solairuko eraikina da, harlanduz egina. «Fatxadaren erdigunea laua da eta baoetan hexagono formako bi dorre ditu, bai garaieran eta bai aurre aldera fatxadaren erdiko zati nagusiari gailentzen zaizkionak. Bigarren solairuaren mailan bi dorreak lotzen dituen terraza edo balkoi bat dago. Terraza edo balkoi hau lehenengo solairuaren mailan dagoen beste terraza edo ataripearen sabaia da eta hortxe dago sarrera nagusia», zehazten du aipaturiko webguneak. Eraikinak inguruan lorategia dauka, Pierre Ducasse Donostiako lehenengo udal lorezainak egina.

Legez kanpoko jarduera

Ancoraren arabera, «jauretxea bananduta eta altzari baliotsuak kenduta, jabe berriek ekipamendu turistiko bihurtu nahi dute. Anbizio handiko programa hori osatzeko, eranskin berriak eraiki behar dira, aurreikusitako erabilera guztiak hartuko dituztenak», deitoratu dute.

Kasu honetan, ordea, eraikinak babes bikoitza du, Euskadiko Monumentu eta Donejakue Bideari lotutako elementu izendatu zutelako. Hala ere, salatu dutenez, «legezko oztopoak saihesteko, ad hoc arau aldaketa sustatzen ari da, udalaren oniritziarekin».

Ikusi beharko da hiriak beste eraikin babestu bat galtzen duen, beste hotel bat eraiki ahal izateko. Asko dira halakoak hirian, eta eraikin historikoak, zoritxarrez, gero eta gutxiago.

Pintxo lehiaketarekin ekin diote asteburu luzeari igeldotarrek

Irutxuloko Hitza — 2025-06-28 21:21:33

Atzo hasi ziren sanpedroak, Igeldoko toki entitate txikia martxan jarri zenetik lehenak, eta bost egunez izango dute haietaz gozatzeko aukera bai igeldotarrek bai hara bertaratzen direnek. Luzea izan asmo duten asteburuari ekiteko, berriz, pintxo lehiaketa egin dute eguerdian. Hamabost epaitu behar izan dituzte irabazlea aukeratzeko, denak oso bestelakoak eta askotarikoak irudietan ikus daitekeen moduan.

Gustuko tokian, aldaparik ez

Irutxuloko Hitza — 2025-06-22 11:38:35

Ez dute Igeldoko San Pedro jaiak iragartzeko antolatzen, baina bai giroa berotzeko. Hain zuzen ere, parte hartzaileek hartzen dute beroaldia Igeldoko Igoera Herrikoia bukatzeko. Atzo egin zuten 43. igoera, eta hainbat ausartek parte hartu zuten.

Ondarreta hondartzatik abiatu eta Mendizorrotzeraino joan ziren lasterka, 6,5 kilometroko ibilbidea aldapatsua gainditzeko. Gizonezkoetan Aitor Etxeberria izan zen azkarrena, Xabier Lukin bigarren eta Jon Zubeldia hirugarren. Emakumezkoetan, berriz, Amagoia Iribar izan zen onena, Elena Silvestre bigarren eta Karen Irizar hirugarren. Azkenik, bikote mistoen artean Elena Beristain eta Asier Aranburu izan ziren irabazleak.