Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Txomiñeneak udari ongietorria emango dio Udafestarekin

Irutxuloko Hitza — 2026-06-17 10:39:47

Udaren atarian, eguraldi ona eta festa giroa ospatzera irtengo dira kalera Txomiñenean. Aitzakia, antolatu berri duten Udafesta izango da.

Hala, egitarauak bi hitzordu nagusi izango ditu: hilaren 20ko arratsaldean, larunbatarekin, 17:00etan hasiko dute jaia, adin guztietarako herri jolasekin. Kirol apur bat egin eta gero, ordea, merezitako apetaren txanda izango da; izan ere, pintxo potea egingo dute 19.00etan.

Jarduerez gain, festetako merchandising postua egongo dela iragarri du Lanberri auzo elkarteak.

Etxebizitza publikoa sustatzeko protokoloa garatu du udalak Jaurlaritzarekin batera

Irutxuloko Hitza — 2026-06-16 14:34:18

Hirian etxebizitza publikoa sustatzeko lankidetza eredua bultzatzen jarraitzeko asmoz, gobernu batzarrak udalaren eta Jaurlaritzaren arteko Jarduera Protokolo Orokorraren dokumentu onartu du, hiriko hainbat hirigintza eremutan babes publikoko etxebizitzen edota alokairuko zuzkidura bizitokien eskaintza sustatzeko eta garatzeko.

Etxebizitzak eraikitzeko protokolo horren barruan, hainbat esparru identifikatu dituztela azaldu du Jon Insausti alkateak eta horietan guztietan 5.000 etxebizitza baino gehiago egiteko aukera. Edonola, gune bakoitzak bere lanketa beharko duela gogoratu du. Epe ertain eta luzera begira, “markoa jarri dugu eta kasuz kasu joango gara zehazten nola eraikiko dugun partzela bakoitzean”.

Insaustik aliantzen balioa nabarmendu du: “Lau eskuk bik baino gehiago eraikitzen dute. Etxebizitza erronka partekatua da eta aliantzek indartsuago egiten gaituzte”. Tokiko Gobernu Batzarraren bileraren ondorengo agerraldian ezagutarazi du neurri hori alkateak. Ondoren, kazetarien galdera txandan, Martuteneko kartzela dagoen orubean aurrera eraman asmo duten Txomin II hirigintza garapenari buruz galdetu diote. Kartzela noiz eraitsiko duten zehaztu ez badu ere, behin hustuta, baimenak lortu bezain azkar izango dela aurreratu du Insaustik eta “lehenbailehen” izatea nahi duela onartu.

Lurraren jabeak udala eta Espainiako Justizia ministerioa dira, eta gunearen udala Espainiako Justizia ministerioarekin lursailen banaketa berria lantzen ari dira. 500 bat etxebizitza eraikitzea aurreikusita dago, bakoitza zein motatakoa izango den eta administrazio bakoitzak —udalak, ministerioak eta Jaurlaritzak– zer eraikiko duen erabakiko dute. Hau uztailerako amaituta izatea nahi du alkateak. Eraikiko diren etxeak “tipologia anitzekoak” izatea nahi du alkateak “kasuistika guztiei erantzuteko”, babestea nagusia izango bada ere.

Txomiñeneko anbulatorioa eraikitzeko lursaila dagoeneko Eusko Jaurlaritzarena da

Irutxuloko Hitza — 2026-05-26 13:25:45

Donostiako Udal Gobernuak gaur onartu du Txomiñeneko anbulatorioaren lursaila doan lagatzea Eusko Jaurlaritzari. Arteleku plazan dago lur zati hori, eta lanak abian dira. “Izapide horrekin behin betiko formalizatuko da lursailaren titulartasuna”, adierazi du udalak.

“Hobekuntza handia izango da Loiolako eta Martuteneko bizilagunentzat”, nabarmendu du Jon Insausti alkateak. Horrekin batera, anbulatorio berriak 17.000 biztanle baino gehiago artatuko dituela esan du, “kartzelaren lursailetan eraikiko diren etxebizitzak eta bizilagunak aintzat hartuta”.

Une honetan, zabalik jarraitzen du Txomiñenean dagoen Loiolako osasun zentroa. Loiolako, Txomiñeneko eta Martuteneko herritarrei ematen die zerbitzua, eta aspaldi txiki geratu zela.

«Etxebizitza tasatuen alde egingo dugu, urtetan klase ertaina izan delako ahaztuena»

Irutxuloko Hitza — 2026-04-28 13:40:31

Martuteneko kartzela ixtean eta eraistean, Txomiñeneko bigarren fasea bideratuko dute Donostiako Udalak, Eusko Jaurlaritzak eta Espainiako Gobernuak —400 etxebizitza inguru eraikitzea da aurreikuspena—. Izan ere, lurrak estatuarenak dira, eta argitzeko dago zein motatako etxebizitzak eraikiko diren. Horren inguruan galdeginda, “akordiorik onenaren bila” dabiltzala esan du Jon Insausti alkateak, astearteroko agerraldian.

Iazko martxoan, bigarren fasearen inguruko bilera egin zuten hiru erakundeek, eta David Lucas Espainiako Etxebizitza eta Hiri Agenda idazkari sozialistak adierazi zuen “babesturiko etxebizitzak errazten” ahaleginduko direla: “Etxebizitza eskuragarriak, babestuak eta prezio egokian eros daitezkeenak izatea nahi dugu”. Ildo berekoa da Denis Itxaso Eusko Jaurlaritzako Etxebizitza Sailburua, eta Txominen bigarren fasean eraikiko diren etxe gehienak babes sozialekoak izatearen alde agertu da.

Insaustik, ordea, eraiki beharreko etxebizitzak hiru motatakoak izan behar direla berretsi du: “Infernuan egin nahi dugun modu berean, etxebizitza tasatuak, libreak eta babes sozialekoak eraikitzearen aldekoak gara”. Batez ere, etxebizitza mota baten alde agertu da: “Etxebizitza tasatuen alde egingo dugu, urtetan klase ertaina izan delako ahaztuena. Beheko baremoetan ez dira sartzen, baina merkatu librera joateko gaitasunik ez dute, garestiegia delako. Gizartearen gehiengoa da klase ertainekoa, eta tasatuak horri erantzuten dio”.

Bentaberri jarri du eredu gisa, han mota desberdinetako etxebizitzak daudelako. “Auzoak hori da eskatu diguna, eta kohesio sozialerako eredurik onena dela iruditzen zait”, esan du alkateak.

Patxillardegi baserriaren etorkizunaren inguruan negoziatzen ari dira udala eta Jaurlaritza

Irutxuloko Hitza — 2026-04-20 17:37:53

Egoera oso txarrean daude, aspalditik, Loiolako Hipika bideko etxebizitzen ingurua eta Patxillardegi baserria. Duela bi urte, EH Bilduk aurkeztutako kontrol mozio bat onartu zuen Donostiako Udalbatzak aho batez, eremu horren guztiaren egoera hobetzeko, baina urteotan ez da esku hartzerik egin bertan. Hori dela eta, EH Bilduk interpelazioa aurkeztu du gaurko udal batzordeetan, udal gobernuari gaiaren inguruan galdetzeko.

Duela bi urteko mozioan, udalbatzak, alde batetik, onartu zuen administrazio eskudunari eskatzea administrazio jarduketa egokiak bultzatzeko, “Patxillardegi baserriak merezi dituen segurtasun eta apaindura baldintzak berreskura ditzan, eta era horretan, horrekin monumentu gisa katalogatutako eraikina behar bezala babestu eta oinezkoen segurtasuna bermatzeko”. Bestetik, onartu zuten udal gobernuak “behar adina administrazio jarduera abian jartzea lehenbailehen, mendi hegal horren segurtasun baldintzak berrezartzeko eta instalatutako behin-behineko hesi elementuak kendu ahal izateko”.

EH Bilduk salatu duenez, ordea, “bi puntuetako bat ere ez da bete”: “Alde batetik, Patxillardegi baserria etengabe hondatzen ari da, gure HOEBPBan babes mailarik handiena duen higiezin baten irudi tamalgarria emanez. Bestalde, eta mendi hegalari eta bihurgune aldean dagoen ‘behin-behineko’ hesiari dagokienez, eremu horri behar duen segurtasuna emateko behar diren obrak ez dira egin, eta, ondorioz, garai batean jarritako hesia ere ez da kendu”.

Baserria zaharberritzea

Nekane Arzallus Hirigintza zinegotziak azaldu duenez, Patxillardegi baserriaren etorkizuna da eremua hobetzeko gakoa: “Eusko Jaurlaritzarekin harremanetan gaude, baserria zaharberritzeko beharraren inguruan hitz eginez. Daukagun zalantza da hor bertan zaharberritu behar den edo beste leku batean. Izan ere, baserria kokapen zail batean dago, zulo batean sartuta, eta, hori dela eta, ezin diogu jarraipenik eman Loiolako bulebarizazioaren espaloiari”.

Zinegotziak nabarmendu duenez, baserriaren etorkizuna zehaztuagoa dagoenean eman ahalko diote irtenbidea Hipika bidearen inguruko egoerari. Ordea, ez du esku hartzeen edo erabakien inguruko denbora eperik jakinarazi: “Ea gai garen baserriaren inguruko akordio batera heltzeko Eusko Jaurlaritzarekin, oso garrantzitsua baita”. “Mendi magalari dagokionez, exekuzio subsidiarioaren prozedura abiatu beharko dugu”, gaineratu du Arzallusek.

Txomiñeneko erabilera lagapeneko 109 etxebizitza babestuak irailean entregatuko dituzte

Irutxuloko Hitza — 2026-04-10 13:27:14

Gaur goizean, Txomiñeneko babes ofizialeko 109 etxebizitzen azken fasea bisitatu du Denis Itxaso Eusko Jaurlaritzako Etxebizitza sailburuak. Eraikuntza lanak bukatzen ari dira, eta bizilagunei giltzak irailean ematea aurreikusten dute. Martxoaren 25ean egindako batzar batean horrela jakinarazi zieten.

Itxasok proiektuaren “izaera berritzailea” nabarmendu du, “Euskadiko lehena eta mugarria” delako: “Erabilera lagapena, gizarte lankidetzako eredu aitzindaria da, lurzoruaren titulartasun publikoa babesten duena, etxebizitza eskuratzeko aukera handitzen duena, eta, batik bat, espekulazioa saihesten duena. Formula hori hedatu nahi dugu eta, horretarako, Euskadin etxebizitzaren arloan hain errotuta dauden egitura kooperatiboak indartu behar ditugu”.

Sustapenerako guztira 14,2 milioi euroko inbertsioa egin du Jaurlaritzak, eta “giltza eskuan” modalitatean obra egikaritzeko kontratuarekin lotzen da. Horrela, proiektuaren kontrol ekonomikoa bermatu ahal izan da, aurrekontu desbideratzerik gabe amaitu arte. 2024ko urtarrilaren 26an hasi ziren obrekin, eta Obras Especiales eraikuntza enpresak egin ditu.

Babes ofizialeko 109 etxebizitzek 122 aparkaleku, 109 trasteleku, eta beheko solairuan bost merkataritza lokal ere baditu, “ingurunean erabat integratuta dagoen bizitegi espazioa osatuta”.

Denis Itxaso sailburuak eta beste hainbat agintarik zein ordezkarik egindako bisita.Irekia

Bizikide kooperatiba

Itxasok gaurko ekitaldia aprobetxatu du Bizikide kooperatibari “eredu hori zabaltzen laguntzeko” eskatzeko, “Euskadin hitzaldiak antolatuz, modu planifikatuan eta zabaltzeko helburuarekin”. Ildo beretik, nabarmendu du Txomineko proiektu hau “erreferente” bihurtu behar dela, “etorkizunean eredu kooperatibista handitzea eta indartzea ahalbidetuko digun ikaskuntzaren adibidea delako”.

Bizikide kooperatiba sozietatea 109 bazkidek osatzen dute, eta bazkide horiek modu aktiboan parte hartu dute proiektuaren garapenean, hasieratik. Kooperatibako kide izateko, bazkide bakoitzak batez beste 35.000 euroko ekarpen ekonomikoa egin zuen hasieran, kapital sozialaren kontzeptuan, baina eraikuntza prozesuan ez du ordainketa gehigarririk egin behar izan. Obrak amaitutakoan, eta babes ofizialeko etxebizitzen behin betiko kalifikazioa eta lehen okupazioko lizentzia lortu ostean, bazkideek erabilera lagapeneko eskrituraren bidez eskuratuko dituzte etxebizitzak. Une horretatik aurrera, batez beste 750 euro inguruko hileko kuota ordaintzen hasiko dira.

Kuota hori ez da etxebizitzaren erabilerara mugatzen, eraikinaren funtzionamenduarekin lotzen diren kostu guztiak barne hartzen baititu. Hain zuzen, barnean hartzen ditu: espazio komunak eta zerbitzuak mantentzeko beharrezkoak diren komunitate gastu arruntak; eraikuntza finantzatzeko kooperatibak sinatutako maileguaren amortizazioa eta interesen ordainketa; eta erreserba funtserako ekarpena, higiezina denboran zehar kontserbatzen dela bermatze aldera. Ereduak kudeaketa demokratikoko osagaia ere badu.

Kooperatibak urtean behin egingo du ohiko batzarra, eta bertan bazkide guztiek parte hartuko dute erabakiak hartzeko garaian —kontuak onartzeko eta ekitaldi bakoitzerako kuotak finkatzeko garaian, esaterako—.

Sustapena

Bizitegi multzoa etxadi itxi baten gisara antolatzen da, auzo bizitzaren ardatza izango den barne plaza baten inguruan. 109 etxebizitzak zortzi ataritan banatzen dira. Atari bakoitzak beheko solairua gehi bost goi solairu eta atikoa du, eta, hala, kale nagusiarekin bat datorren bolumetria homogeneoa sortzen da. Barne urbanizazioa irizpide funtzionalen eta irisgarritasun irizpideen arabera diseinatu da, atarietarako sarbideak gainerako hiri-ingurunearekin lotzen dituzten ibilbide argien bidez. Ibilbide horiek zenbait materialekin eta hiri altzarirekin egin dira, hala nola eserlekuekin eta farolekin, plazari izaera propio bereizgarria ematen laguntzen dutenak.

Eraikinak sotoko hiru solairu ditu garaje, trasteleku eta instalazioetarako, guztira 122 aparkalekurekin eta 109 trastelekurekin. Espazio horien antolamenduak osotasunaren funtzionaltasuna eta irisgarritasuna bermatzen du, solairu guztiak —mailarik sakonenak barne— lotzen dituzten igogailuei esker. Etxebizitzei dagokienez, proiektuak askotariko tipologiako etxebizitzak eskaintzen ditu, eskaera profilei erantzute aldera. Gela bateko, biko, hiruko eta lauko etxebizitzak diseinatu dira, desgaitasuna duten pertsonentzat egokitutako unitateak barne. Aniztasun hori modu orekatuan banatzen da atarien artean, eta, hala, zenbait familia premietara egokitutako bizitegi multzo inklusiboa osatzen da.

Beheko solairuan, kalearen mailan, kokatutako merkataritza lokalek osatzen dute proiektua. Lokal horiek inguruko jarduera dinamizatzen lagunduko dute, eta bazkideek berek erabili ahal izango dituzte edo hirugarrenentzat zabal daitezke.

Elkarretaratzea egingo dute larunbatean Ezkiagaren biktimei babesa adierazteko

Irutxuloko Hitza — 2026-04-07 11:42:41

La Salleko ikasle ohi talde batek elkarretaratzea egingo du larunbatean, hilak 11an, Loiolako ikastetxe horretako irakasle izan zen Patxi Ezkiagaren abusu sexualen biktimei babesa adierazteko. Loiolako Topo geltokiaren pareko plazan elkartuko dira, 12:00etan, eta ekintza horren bidez, erasoak jasan zituzten adin txikikoak “ikusarazi eta babesteaz” gain, gizartean hausnarketa sustatu nahi dute. Deialdi “plural, ireki eta inklusiboa” da eta babesa adierazi nahi duen edonor ongi etorria izango da.

Gogoratu behar da, Ezkiagaren biktima izandako ia hogeita hamar lagunek ikastetxeari “erreparazio kolektiboa” eskatu ziola, Arartekoak ere bere txostenean nabarmendu zuen biktimek izandako aitortza falta, eta egun gutxira, La Sallek berretsi egin zuela bere barkamen eskaera.

Txomiñeneko osasun zentroaren lanak 2027an bukatzea aurreikusten du alkateak

Irutxuloko Hitza — 2026-03-03 12:42:17

Arteleku plazako anbulatorio berriaren lanak aurrera doazen bitartean, Donostiako Udalak Txomiñeneko lursaila Eusko Jaurlaritzari doan lagatzea onartu du. Horrela, udal jabetzakoa izateari utzi dio, titulartasuna Jaurlaritzaren esku utzita. Gogoratu behar da, Osasun Sailak 9,4 milioi euro inbertituko dituela.

Goikoene kalearen ondoan dagoen eremuan ari dira lanean, eta osasun zentroaren eraikuntza 2027rako bukatzea aurreikusten du udalak. Horrela baieztatu du gaur Jon Insausti alkateak, Tokiko Gobernu Batzordearen osteko agerraldian. Epeak betetzen ari direla esan du alkateak.

Anbulatorio berriak Antzieta kalean dagoena ordezkatuko du. Eraikinak 3.307 metro koadro erabilgarri izango ditu lau solairutan banatuta. 30 kontsultategi izango ditu: Familia medikuntzarako 21 —hamaika mediku eta hamar erizaintzakoak—, pediatriako bost —hiru mediku eta bi erizaintzakoak—, bi emakumeen arretarako, beste bi fisioterapiarako eta gimnasio bat. Halaber, sei administrari postu izango ditu. Horrez gain, senda gela, odola ateratzeko gela, bestelako probetarako lekua, larrialdiak eta talde jardueretarako gela izango ditu. Hirugarren solairuan, adikzioak artatzeko zentro bat jarriko dute, eta eraikinean Biogipuzkoak ikerketarako bulegoak izango ditu.

Aspaldiko eskaera

Loiola, Txominenea eta Martuteneko bizilagunen aspaldiko eskaera zen, izan ere, txiki geratu da egun artatzen dituen 7.500 bizilagunei arreta emateko; eta are gehiago, datozen urteetan ingurua 17.000 bizilagun izatera iristea aurreikusten dela kontuan hartuta.

Egiako eta Txomiñeneko danborradak, iruditan

Irutxuloko Hitza — 2026-01-20 20:11:08

San Sebastian eguna da Donostiako auzo gehien-gehienetara heltzen den jai bakarra, eta, hain zuzen ere, Urumea ibaia jarraituz, haren ertzean dauden auzoetan gozatu dute askok gaurko jaia. Egiatik hasita, Loiolara jaitsi, Txomiñenera pasatu eta Martuteneraino heldu.

Antzeko ibilbidea eginda, Egiako Donosti Gain, Maria Reina Parrokia-Egiako Tolosarrak eta Aitor Ikastola danborradak harrapatu ditu IRUTXULOKO HITZAk, baita jarraian Txomiñenean Ametzagaña, AMPA Mary Ward eta Lanberri Auzo Elkartea danborradak harrapatu ere. Behean dituzue argazki guztiak ikusgai.

Loiolako santomasetan taloa egiten ikasi dute

Irutxuloko Hitza — 2025-12-21 13:43:42

Sekulako ilarak sortzen dira San Tomas egunean talo bat dastatu ahal izateko. Loiolako santomasetan, ordea, taloa nola egiten den erakutsi diete auzoko haurrei, Hontza elkartean.

Horrekin batera, beste hainbat jarduera egin dituzte: jolasak Eliza kalean eta egun goibela alaitzeko kantu jira. Gainera, jai batzordeak txistorra pintxoak banatu ditu, eta aterpean dastatu ahal izan dituzte.

Hona hemen argazki bilduma:

Palestinari elkartasuna adierazi diote Txomiñenean

Irutxuloko Hitza — 2025-11-17 09:48:54

Palestinaren alde mobilizatu ziren Txomiñenea auzoko bizilagun ugari ostiral iluntzean, Genozidioak jarraitzen du, Palestina askatu! lelopean.

Su etena iragarrita ere, Israelgo Estatuak palestinarrak hiltzen eta Palestina kolonizatzen jarraitzen du, eta “auzoan ere gaia mugitu behar dela” iritzita antolatu zuten hainbat bizilagunek elkarretaratzea: “Ezin gara isilik geratu”. Palestinar herri osoa izan zuten gogoan, baina, bereziki, Israelgo Estatuak hil dituen milaka haur palestinarrak.