Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Jonas Paukste izango da Askatuak Gipuzkoaren historiako jokalari altuena

Irutxuloko Hitza — 2026-06-24 13:41:22

Askatuak Gipuzkoa saskibaloi taldeak Jonas Paukste lituaniarra fitxatu du 2026-2027ko denboraldirako. Hain zuzen ere, azken egunotan iragarri duten hirugarren fitxaketa da.

25 urte ditu, pibota da eta 2,24 metroko altuerarekin, klubaren historiako jokalaririk altuena izango da. “Hala ere, ziur gaude zure ondarea datu hori baino askoz haratago joango dela: Zure lana eta errendimendua dela eta, pieza garrantzitsu bat izango da taldearen barruan”, adierazi du klubak.

Paukstek ondo ezagutzen du Euskal Herria, Lituaniatik kanpo izan zuen lehen esperientzia Baskoniaren beheko mailetan izan zelako. Aldiz, azken sasoiak Zamorarekin jokatu ditu Lehen eta Bigarren FEB mailetan.

Udako mugikortasuna kudeatzeko neurrien plana abiatu du udalak

Irutxuloko Hitza — 2026-06-24 13:09:46

Aurten ere, Donostiako Udalak hainbat neurri jarri ditu martxan udako hilabeteetan trafikoa arautzeko. Batez ere, bisitari gehien izaten diren uneetan sortzen diren eragozpenak arintzeko. Bestalde, garrantzia berezia emango diete garraio publikoari eta hiriko aparkaleku periferikoen sareari.

Informazio kanalak hobetzea, trafikoa modu eraginkorragoan eta baliabide gehiagorekin arautzea, disuasio aparkaleku berriak sustatzea eta garraio publikoko sistemak hobetzea izango dira, besteak beste, datozen hilabeteetan hiriko mugikortasuna antolatzeko gakoak.

Udalaren webgunean zerrendatu dituzte neurri guztiak.

Gladys Enea izango da anfitrioi, udako ingurumen zinema zikloaren 13. edizioan

Irutxuloko Hitza — 2026-06-24 12:51:51

Cristina Enea Fundazioaren aire zabaleko zinema zikloa uztailaren 3an abiatuko da. Aurten, ekimena bere hastapenetara itzuliko da eta proiekzio guztiak Gladys Enean egingo dituzte. Erabaki horren arrazoia, gune hori herritarrei ireki zitzaieneko lehen mendeurrena ospatzea da. Hori dela eta, ingurumen gaiekin lotura izateaz gain, filmek keinu bat egingo diete 1926. urteari edo parkeei.

Azken bost urteetan zikloak bere jarduera eremua beste auzo batzuetara zabaldu bazuen ere, edizio honetan Gladys Enea izango da protagonista bakarra. Iñigo Garciak, Donostiako Udaleko Ingurumen zinegotziak, azpimarratu du ziklo honek indartu egiten duela “ondare naturalaren, hiri bizitzaren eta bizikidetzaren arteko lotura”, eta gaineratu du ingurumen kultura “hurbilekoa eta integratzailea” izan daitekeela.

Eskainiko diren hiru proiekzioak doakoak izango dira, sarrera librearekin lekua bete arte, eta beti 22:30ean hasiko dira. Programazioak adin guztietarako hiru izenburu biltzen ditu: ekainaren 3an, Cariño, he encogido a los niños (Joe Johnston, 1989); uztailaren 10ean, El maquinista de la general (Buster Keaton, Clyde Bruckman, 1926) eta uztailaren 17an, Belle Époque (Fernando Trueba, 1992).

Aitor Gabilondoren estreinako filma Euskal Herriko tortura polizialei buruzkoa izango da

Irutxuloko Hitza — 2026-06-24 11:56:09

Gidoilari eta ekoizle gisa ibilbide esanguratsua egin ondoren, Aitor Gabilondo sortzaile donostiarrak bere lehen filma zuzenduko du. Euskal Herriko tortura polizialari buruzkoa izango da, eta EITBren partaidetza izango du. Besteak beste, Patria —Fernando Aranbururen eleberriaren egokitzapena—, Yo adicto eta Salvador telesailen sortzailea da.

“Ordaindu gabeko zorra” kitatzeko gogoa duela adierazi dio Europa Press agentziari: “Patria egin nuenean konturatu nintzen, aurreikusi gabe, zor sentimendu bat sortu zela nigan torturaren eta estatuko terrorismoaren biktimekiko. Nahigabe handia hartu nuen serie hori batere bat ez natorren kontakizun bakar eta behin betiko moduko bat finkatzeko erabili zelako. Ordutik, historia osatzeko beharra izan dut”.

Hainbat urtetako ikerketaren emaitza izango da filma. Izan ere, Gabilondok bilerak egin ditu biktimekin, auzitegiko medikuekin, epaileekin, abokatuekin, guardia zibilekin, politikariekin, ikertzaileekin eta lekukoekin. Proiektuaren abiapuntua Kriminologiaren Euskal Institutuak (KREI) egindako Euskal Herriko tortura eta tratu txarrak ikertzeko proiektua da.

Istorio honen bitartez, Gabilondok “egia, justizia eta erreparaziorako eskubidea duten eta sistematikoki ukatu diren istorioak dituzten beste biktima baztertu horiei” ahotsa emango die: “Atxilotuek torturak ETAren kontsignei jarraituz asmatzen zituztela eta gezurra zela esaten ziguten”.

«Parte hartze errekorra», Onditz 39. triatloian eta Donostiako Emakumeen 16. Triatloian

Irutxuloko Hitza — 2026-06-24 11:54:45

Hilaren 27an eta 28an egingo dituzte Onditz 39. triatloia eta Donostiako Emakumeen 16. Triatloia, eta Donostiako Atletikok iragarri duenez, izen emate guztiak agortu dira, probak hasi baino aste batzuk lehenago. Datu horrek “parte hartze errekorra” suposatzen du.

Ekainak 27: Triatloi egokitua eta Emakumeen Triatloia

Ekainaren 27ko jardunaldia berrikuntza garrantzitsu batekin hasiko da: 14:45ean, lehen aldiz, Triatloi Egokitua – Gipuzkoako Txapelketa egingo da, kirol inklusiboari balioa emanez.

15:00etan, berriz, Donostiako Emakumeen 16. Triatloia hasiko da. Proba hori emakumeek kirolean parte hartzea sustatzeko erreferentea da, eta izaera irisgarri eta jai girokoa du. Parte hartzaileek 300 metroko igeriketa, zortzi kilometroko txirrindularitza eta bi kilometroko oinezko lasterketa osatu beharko dituzte.

Ekainak 28: Onditz Triatloia

Ekainaren 28ko 9:15ean, estatu mailako triatloi olinpiko beteranoenaren txanda izango da: Onditz 39. triatloiarena. Lehiaketa horretan, kirolariek 1.500 metro igeri, 38,5 kilometro bizikletan eta hamar kilometro oinez egin beharko dituzte, Kontxako badia eta Igeldo mendia zeharkatuz, besteak beste.

Antolatzaileek diotenez, txapelketa inklusiboa gehitzeak eta lortutako inskripzio errekorrak indartu egiten dute Donostiako Atletikok aukera berdintasunarekin, inklusioarekin eta bizi ohitura osasungarriekin duen konpromisoa.

IRUTXULOKO HITZA, gainera, Emakumeen Triatloiaren babesle da, eta komunitatea sendotzeko eta auzoa zaintzeko elkarlanean dihardu, materiala eta edukia eskainiz.

Euskal selekzioaren ofizialtasuna aldarrikatu dute Antiguan: «Lortu arte ez gara isilduko!»

Irutxuloko Hitza — 2026-06-24 11:52:28

7 Baietz euskal kirol selekzioen ofizialtasunaren aldeko plataformak deituta, euskal selekzioaren aldeko elkarretaratzea egin zuten astearte arratsaldean Antiguan, Gurea euskal selekzioa! lelopean. Egunotan AEBetan, Kanadan eta Mexikon jokatzen ari diren gizonezkoen Munduko Futbol Koparen testuinguruan egin zuten mobilizazioa.

Hain zuzen ere, “hutsune batek” elkartu zituen Gaskonia plazan, azaldu zutenez, “sare digital, telebista zein bestelako hedabideak betetzear diren hutsune erraldoi batek”: “Gizonezkoen Munduko Futbol Kopa da, datuen arabera, mundu mailako kirol ikuskizunik jarraituena […]. Eta gu, euskal herritarrok, esku hutsik sentituko gara, beste behin ere, festatik kanporatua izan den haurraren gisan”.

Datu batzuk ere jarri zituzten mahai gainean: Munduko Futbol Kopan “zazpi euskal herritar” ari direla parte hartzen eta “euskal herritarren %75ak baino gehiagok” babesten dutela euskal selekzioaren ofizialtasuna. “Datuak datu, gure herri eta auzoetako jokalariak espainiar eta frantziar elastikoak soinean ikusi beharko ditugu aurtengo udan zehar. Gure izateko eskubidea ukatzen duten estatuak ordezkatuko dituzte”, deitoratu zuten.

Horrela, kirola eta politika nahastu behar ez direla diotenen aurrean, bi alor horiek “uztartzearen” alde egin zuten. “Euskal selekzioak ofiziala izan behar du, eta lortu arte ez gara isilduko!”, gaineratu zuten.

Era berean, Euskal Herrian “herri bakarra” dagoela aldarrikatu zuten, “Algortatik Gasteizera, Gasteiztik Hendaiara, Hendaiatik Trebiñu zein Basaurira”. Horren harira, hurrengo deialdiei adi egotera deitu zituzten herritarrak: “Atzoko Jose Angel Iribar, Joane Somarrabia, Oihana Azkorbebeitia, Edurne Pasaban edo Acero anaiengatik, eta bihar-etzi Euskal Herrian sortuko diren izarrentzako”.

Donosti Cup txapelketaren ediziorik «nazioartekoena» izango da aurtengoa

Irutxuloko Hitza — 2026-06-24 10:16:45

Uztailaren 6tik 12ra bitartean, Gipuzkoa munduko oinarrizko futbolaren epizentroa izango da berriro, Donosti Cup txapelketaren 34. edizioaren ospakizunarekin. Ekitaldiaren aurkezpen ofiziala atzo arratsaldean egin zuten udaletxean, eta bertan nabarmendu zutenez, aurtengoa “historiako ediziorik nazioartekoena” izango da: zehazki, 32 herrialdetako 910 talde bilduko ditu txapelketak.

Guztira 90 herrialdetako kirolariei eman die ongietorria ekitaldiak, urte hauetan guztietan. Aurtengo atzerriko ordezkaritza handiena Ameriketako Estatu Batuek izango dute 92 talderekin, eta haien atzetik Frantzia eta Mexiko nabarmenduko dira, 54 eta 10 talderekin, hurrenez hurren.

Gipuzkoak, ordea, 363 talde eta 6.500 jokalari inguru izango ditu, eta datu horrek 2026an Gipuzkoako kirolari gehien bilduko dituen kirol ekitaldia bihurtzen du Donosti Cup. Horrez gain, egoera zaurgarrian dauden gipuzkoar gazteen parte-hartzea errazteko, Rural Kutxa-Donosti Cup bekak jarri dira martxan, aurten ere.

Emakumezkoen futbola eta elkartasuna indartuz

Emakumezkoen futbolak presentzia izugarria izango du edizio honetan, 3.000 jokalari baino gehiago eta 200 talde inguru lehiatuko baitira. Testuinguru horretan, Donosti Cup Women’s Day ospatuko dute Anoetako estadio txikian, eta, lehen aldiz, Vicky Lopez Saria emango diote txapelketako jokalari nabarmenenari.

Inklusioari eta elkartasunari dagokienez, Donosti Authentics Cup lehiaketaren seigarren edizioa jokatuko da zortzi talderekin, eta Angola, Katalunia eta Palestinako hainbat elkartetako taldeak gonbidatu dituzte. Gainera, Gazan bertan Donosti Cup Gaza txapelketaren lehen edizioa egingo da hamabi talde gazatarren parte-hartzearekin, Champions Club elkartearen eta Donosti Cup Fundazioaren laguntzari esker.

Azpiegiturak eta lurralde osoko eragina

Antolakuntzari begira, Anoetako estadioaren obrak direla eta, inaugurazio ekitaldi nagusia uztailaren 7an egingo dute, Illunben. Bertan 20.000 lagun biltzea espero denez, ekitaldia bi saiotan banatuko da (18:30 eta 21:30). Txapelketak irauten duen bitartean, 2.254 partida baino gehiago jokatuko dira Gipuzkoa, Bizkaia, Nafarroa eta Ipar Euskal Herriko 50 herritan banatutako 60 zelaietan.

Guzti honek eragin turistiko eta ekonomiko handia ekarriko dio lurraldeari. Antolatzaileen datuen arabera, 16.000 jokalari eta 10.000 senide eta lagun inguru etorriko dira, eta guztira 124.000 gau inguruko egonaldia sortuko da.

Lizarraren inguruan dantzatu dira udal agintariak

Irutxuloko Hitza — 2026-06-24 09:35:57

Azken urteotako San Joan bezpera beroenetako bat bizi zuen bart Donostiak, baina hori ez zen oztopo izan urteko gaurik laburrenaz gozatzeko. Hain zuzen ere, Donostiako auzo eta herri gehienetan piztu zituzten suak eta aritu ziren dantzan, baita Parte Zaharreko Plaza Berriko ekitaldi instituzional eta tradizionalean ere.

Ohiko legez, Donostiako Udaleko zinegotziek plazaren erdian jarritako lizarraren inguruan dantzan aritu ziren agintariak, eta ekitaldian parte hartu zuten, baita ere, Udaleko Txistulari Taldeak, Goizaldi dantza taldea eta Arkaitz, Eskola, Gero Axular eta Trebeska taldeetako bikoteek. Agintariek fandangoa eta arin arina dantzatu zituzten, lizarrari su eman aurretik zein ondoren. Kalejirarekin eta lizarraren azalaren banaketarekin amaitu zuten ekitaldia, Udal Txistulari Taldeak erromeriaren erritmora.

Jarraian, Joseba Parron San Sebastian argazkilariaren irudi bilduma:

77 emanaldi eskainiko ditu 61. Jazzaldiak, tartean, euskal artisten proposamen zabal batekin

Irutxuloko Hitza — 2026-06-23 15:03:17

Donostiako 61. Jazzaldiak musika eta jai giroz blaituko du hiria uztailaren 22tik 26ra bitartean. Aurtengo edizioan guztira 77 kontzertu programatu dira hamabi agertokitan banatuta, eta horietatik 47 doakoak izango dira.

Aurten, gainera, Donostiako Jazzaldia Sariak hiru pertsonaia nabarmeni emango zaizkie: David Murray eta Joe Lovano saxofonistei eta Miguel Martin orain arteko Jazzaldiko zuzendariari.

Nazioarteko izarrak eta ziklo bereziak

Munduan erreferentzia diren artistak pasatuko dira oholtza gainetik. Horien artean, antolakuntzak “munduko interprete onenetakoak” diren lau emakumeen presentzia nabarmendu nahi izan dute: Diana Krall, Samara Joy, Carmen Lundy eta Cécile McLorin Salvant.

Era berean, aurtengo programazioak jazzaren historia betiko aldatu zuten Miles Davis eta John Coltraneren jaiotzaren mendeurrena ospatuko du. Horretarako, lau kontzertu berezi antolatu dituzte Trinitate plazan: Davisen omenez, Marcus Miller eta Erik Truffaz-Antonio Lizana arituko dira, eta Coltraneri eskainita, Azar Lawrence Quartet eta Charles Tolliver.

Bertako talentua

Jazzaldiak tokiko talentua balioan jartzeari ere eutsi dio aurten ere, eta 30 euskal talderen kontzertuak antolatu ditu. Hala, Zurriola hondartzako Keler Guneak doako zortzi kontzertu eskainiko ditu. Agertoki jendetsu horretan nazioarteko izarrak, bluesaren puntako figurak eta mestizajea jorratzen duten taldeak entzun ahal izango dira, baita tokiko euskal taldeak ere, hala nola ETS, Kokoshca, Nøgen eta HOFE.

Sarrerak, erritmo onean

Dagoeneko, 11.000 sarrera baino gehiago saldu dira munduko 32 herrialdetan, antolatzaileek adierazi dutenez. Zenbait kontzertutarako sarrerak jada agortuta daude eta itxarote zerrenda zabalik dago, beste zenbaitetarako: horiek dira uztailaren 25ean Trinitate plazan egingo den Charles Tolliver eta Marcus Millerren saioa, eta Kursaaleko Pat Metheny-en eta uztailaren 26ko Diana Krallen emanaldiak.

Emaitza bikainak lortu dituzte Fortunako kirolariek Espainiako eskrima egokituko txapelketan

Irutxuloko Hitza — 2026-06-23 12:35:21

Espainiako Gurpil Aulkiko Eskrima Txapelketa jokatu zuten larunbatean Donostiako Pio Baroja kiroldegian, sablearen, floretearen eta ezpataren modalitateetan. Fortuna klub donostiarreko hainbat kirolarik hartu zuten parte, baita emaitza bikainak lortu ere.

Espainiako Gurpil Aulkiko Eskrimako Txapelketako sableko azken probako podiuma, Pio Baroja kiroldegian. Ezkerrean, Ayem Oskoz donostiarra eta, erdian, Alexander Prior donostiarra.Espainiako Eskrima Federazioa

Hain zuzen ere, sableko azken proban lehiatu zirenen artean egon ziren Fortunako Alexander Prior eta Ayem Oskoz donostiarrak, eta lehenengo eta bigarren postuetan gelditu ziren, hurrenez hurren. Espainiako gurpil aulkiko sable modalitateko eskrimaren amaierako podiumean, txapeldun gelditu zen Prior, eta Oskoz hortik kanpo gelditu zen.

Nabarmentzekoa da, halaber, ezpataren modalitateko azken proban bigarren gelditu zela Prior eta hirugarren Fortunako Manuel Quesada; azken podiumetik kanpo gelditu ziren, ordea. Euskadiko Sable Txapelketa ere jokatu zuten larunbatean Pio Barojan, eta bi lehiaketetako irudi bilduma hemen ikus dezakezue, Fortunaren eskutik.

Espainiako Gurpil Aulkiko Eskrimako Txapelketako irudi bat, Pio Baroja kiroldegian.Fortuna KE

Udaltzaingoak eta suhiltzaileek amarralekua izango dute kirol portuan badiako segurtasuna hobetzeko

Irutxuloko Hitza — 2026-06-23 11:07:58

Donostiako Udalaren eta Euskadiko Kirol Portuak (EKP) erakundearen arteko hitzarmenari esker, Udaltzaingoak eta suhiltzaileek ontzi batentzako amarralekua izango dute kirol portuan. Horrela, badiako zaintza lanak hobetu ahal izango dituzte. Era berean, bi aldeek koordinazioa eta eraginkortasuna hobetzeko sortzen diren batzordeetan parte hartzea adostu dute.

Zodiac motako ontzi pneumatikoarentzako amarraleku bat izango dute. Ibilgailu hori erabiliko dute igeriketa probetan, estropadetan, Kontxako badian bainulariak erreskatatzeko operazioetan eta, oro har, Kontxako badiaren eta Urumea ibaiaren bokalean segurtasuna kontrolatu eta bermatzearekin zerikusia duten jardueretan.

“Akordio honek agerian uzten du zein garrantzitsua den erakundeen arteko lankidetza herritarrentzako zerbitzuak hobetzeko, kasu honetan segurtasunarena badia bezalako leku garrantzitsu batean”, nabarmendu du Jon Insausti alkateak.

100 udaltzain gehiago

Alkateak duela egun batzuk iragarri moduan, udan 100 udaltzain gehiago izango dira Donostiako kaleetan, “segurtasuna, ordena eta bizikidetza bermatzeko”. Batez ere, fluxu gehien ematen diren lekuetan ibiliko dira, “kostako lerroan eta autobus geltokian”.

Bestalde, Udaltzaingoak lau patruila auto berri izango ditu, renting sistemaren bidezkoa. 66.792 euroko aurrekontua zehaztu du horretarako, eta ibilgailuak bost urtez erabili ahal izango dituzte. Erabaki honek, Udaltzaingoaren patruila ibilgailuen flota berritzeko eta handitzeko beharrari erantzuten dio, eta, aldi berean, ingurumen inpaktu negatiboa murrizten laguntzen du.