Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Añorga Eguna ospatzen ari dira elkarteko kirol taldeak

Irutxuloko Hitza — 2026-06-06 17:20:33

Añorga Kultur eta Kirol elkartea bere eguna ospatzen ari da eguerditik. Frontoian, kirol atal guztiek elkarrekin bazkaldu aurretik, talde argazkiak atera dituzte. Egin ahala, esertzen joan dira, bakoitza zegokien lekuan. 400 bat lagun elkartu dira mahaien bueltan, eta asko badira ere, batzuk falta ziren. Izan ere, kirolarietako batzuek probak zituzten gaur eta ezin izan dute parte hartu, esaterako, triatletek. Otorduaren ondoren, bingoan jokatu dute eta festa giroa jarri dute Siwanaba eta Arte DJ-ek.

Hona Joseba Parron San Sebastianek goizean zehar egindako argazkiak:

Añorga Txikin 120 etxebizitzako bi eraikin egiteko lizentzia eman du udalak

Irutxuloko Hitza — 2026-06-02 14:52:42

Donostiako Udalak beste urrats bat egin du Añorga Txikiko Añorgako Geltokia hirigintza plana aurrera eramateko. 120 etxebizitzako bi eraikin egiteko lizentzia onartu dute, lokalak eta garajeak barne.

“Eraikin horiek eraikitzeak, eremua urbanizatzeko proiektua berriki onartzearekin batera, bultzada handia emango dio Añorga auzoaren ingurua berrituko duen garapen berri horri”, adierazi du Jon Insausti alkateak.

Añorga Txikin 250 etxebizitza eraikitzeko proiektua maiatza erdialdean onartu zuen behin betiko udalak. 50 tasatuak eta beste 50 alokairu sozialekoak. Auzotar asko kritiko agertu dira hasieratik proiektu horrekin, eta, hain zuzen ere, proiektua “auzotarrak entzun gabe” onartu zutela salatu zuen auzo elkarteak azaroan.

Ehun urteko dantzaren haria ez da eten

Irutxuloko Hitza — 2026-05-22 00:30:23

Mendea eta dantza gurutzatzen diren lekua da Añorga. Belaunaldiz belaunaldi iraun duen tradizioaren eta transmisioaren eredu da Arkaitz Añorgako Dantzariak taldea. Gipuzkoako dantzen historian toki nabarmena du, eta Euskal Herriko dantzak ikasiz eta irakatsiz bete ditu ehun urte. Hain zuzen ere, mendeurrenaren ospakizunekin hasteko, bihar, 1926-2026 Ehun urtez dantzan ikuskizun berezia eskainiko dute Añorgako frontoian, 22:00etatik aurrera.

Frontoiaren alboko plazan elkartu gara Nerea Unanue, Egoitz Irazabalbeitia, eta Gari Otamendi eta Lierni Otamendi anai-arrebekin. Lehen biak dantzariak eta egungo dantza irakasleetako bi dira, Joseba Astarberekin batera. Beste biek, berriz, lotura estua dute dantza taldearekin, eta mendeurreneko liburuaren idazketa prozesuan murgilduta dabiltza, beste hainbat kiderekin batera. Gainera, Gari dantzaria eta taldeko irakasle ohia da, eta Lierni dantza taldeko musikaria.

Dokumentatua dagoen lehen emanaldia 1926ko martxoaren 26koa dela nabarmendu dute. Sinbolikoki, ordea, Karmengo Amaren egunean kokatzen da dantza taldearen sorrera. Hau da, uztailaren 16an. «Añorgako Kultur eta Kirol Elkartea [AKKE] 1922an sortu zen. Hasieran, kultur jarduera zabaltzea zen helburua. Horrela, 1926an Jose Lorenzo Pujana dantza maisua kontratatu zuten, Gipuzkoa mailako garaiko esanguratsuetako bat. Askotan zuzentzen gaituzte, batzuetan diogulako Rezola fabrika izan zela maisua kontratatu zuena, eta, beste batzuetan, AKKE. Ordea, gogoratu behar da Rezolaren altzoan sorturikoa dela AKKE. Pujanak herriko dantzariak trebatu zituen egun seinalatuetan dantzatu ahal izateko», azaldu du Garik.

Añorgako dantza taldea hauspotu zuen beste pertsona garrantzitsu bat Josema Mendiola izan zen. «Bera, sortzez, Goiatz herrikoa da, baina umetan etorri zen Añorgara bizitzera. Dena dela, Argia dantza taldean sartu zen, eta, gerora, Añorgako dantza taldearekin bat egin zuen maisu gisa, irakaslerik gabe geratu zirelako. Hamarkada hori, Argia dantza taldearen garai oparoena izan zen, eta Añorgara dantza batzuk eta dantza ulertzeko manera ekarri zituen Mendiolak», adierazi du Garik.

Añorgako Dantzariak taldea 1920ko hamarkadan.Gorga

Izen propioa

1926an dantza taldea sortu zutenean, ez zioten izenik jarri, soilik Añorgako Dantzariak ziren. Beraz, Arkaitz izena gerora jarri ziotela esan du Garik: «Guk dakigunez, Joxean Lizarribarrek proposatu zuen Arkaitz izena. Argiako dantzaria izan zen eta Berria Taldeko administrazio kontseiluko presidentea. Añorgako harrobiari keinu bat egiteagatik proposatu zuen izen hori. 1967koak dira izenaren lehen aipamenak, gure dokumentazioaren arabera».

1970eko hamarkadara bitarteko euskal dantzaren transmisioa maisuen bidezkoa zen, eta dantza taldeek ez zuten izenik, soilik herriaren izena hartu ohi zuten. «Horregatik, gure taldearen jatorrizko izena Añorgako Dantzariak da, oraindik erabiltzen duguna», zehaztu du Liernik. «Transmisioa maisutik maisura egiten zen, eta esan dezagun frankismoaren garaian, 1960ko hamarkada bukaeran eta 1970eko hamarkadaren hasieran, joera bat sortu zela taldeei izena jartzeko. Euskal Kantagintza Berriarekin izan zuen harremana. Testuinguru horretan, gureari Arkaitz izena jartzea proposatu zuten», gaineratu du Garik.

Dantza taldearen sorreran eta hurrengo hamarkadetan, gizonen izenak soilik ageri dira. «Hasieran, soilik gizonezkoen taldea zen, bai. Bost urte geroago sortu zuten lehen neska taldea, 1931n», esan du Liernik. Aldiz, aurreneko emakumezko irakasleak Isidra Telleria —fandangoa eta arin-arina irakasten—, eta Zaldua ahizpak izan ziren. Gerora, 1970eko hamarkadan, Josema Mendiolarekin batera, Begoña Huegun aritu zen, eta oso garrantzitsuak izan ziren 1980ko hamarkadan, Mendiolak utzita izan zuen tartean, Garbiñe Berasategi, Sara Azkarate eta Miren Azkarate.

Donostiako Argia taldeak Añorgako dantzariei egindako ekarpena ere nabarmendu nahi izan dute lauek: «Zehazki, nabarmentzekoak dira Argia taldeko Juan Antonio Urbeltz dantzaria eta Marian Arregi haren emaztea eta musikaria».

1980ko hamarkada

Arkaitz Añorgako Dantzariak taldeak 1980ko hamarkadan egonkortu zuen egungo egitura. Ordutik, euskal dantza belaunaldiz belaunaldi transmititzea izan da helburua, eta haria ez da eten. «Ez da eten, baina azken hamarkadetan gorabeherak izan ditugu. Batez ere, maisuen belaunaldi aldaketa egiteko eta transmisioa bermatzeko», adierazi du Irazabalbeitiak. «Uste dut momentu jakinetan, planteatu izan diogula geure buruari ea zer nahi dugun, dantza taldea desagertzea edo gutariko bakoitzak geure burua aurkeztea. Beti dago norbait azken momentuan urratsa egiten duena».

Irazabalbeitiak berak aitortu duenez, ez da «gustagarria» denen aurrean jarri «eta agintzen hastea, irakasle moduan». Dena dela, haria ez eteteko «beharrezkoa» dela uste du: «Hori bai, dantza maisu ardura hartzen duzunean, dantzari izateari uzten diozu astean zehar, nahiz eta gerora ikuskizunetan dantza egin».

Arkaitz Añorgako Dantzariak taldearen emanaldi bat.Arkaitz Añorgako Dantzariak

Oinarria eta emanaldi seinalatuak

2009. urtea mugarri gisa ageri da Arkaitz Añorgako Dantzariak taldearen historian. Hasieratik oinarri gisa izan zituzten Ezpata dantza eta Brokel dantza eguneratu eta XXI. mendera egokitu zituzten. «Gure jatorrizko bi dantzak ziren, eta biei balioa eman genien. Hasieratik egin ditugu bi dantzak, eta gerora moldatu ditugu koreografiak eta jantziak. Generoa bateratu genuen dantzari taldeetan eta arropetan. Gainerakoan, lau lerroko ezpata dantza sartzeaz aparte, ez genituen gauza asko aldatu», azaldu du Garik.

Hain zuzen ere, dantza horiekin lotuta, urtean hiru emanaldi finko dituzte: Añorgan bi, maiatzean eta uztailaren 16an, Karmengo Amaren egunean, eta Donostian bat, abuztuaren 15ean, Ama Birjinaren egunean. Dantza taldeak urtean zehar duen dinamika «Euskal Herri osoko dantza ondarea ikastea eta berrikastea» dela dio Garik: «Izan ere, urtero dantzarien joan-etorria izaten dugu, eta berriei dantza horiek irakatsi behar zaizkie. Landurikoa emanaldien bidez erakutsi ohi dugu, eta, horretarako, hainbat emanaldi ditugu. Batetik, Añorgako egun garrantzitsuetan, maiatzean eta uztailean, eta, bestetik, Donostiako Aste Nagusian. Beste bi emanaldiekin alderatuta, maiatzekoa da urtero aldatzen dena. Beste biak finkoagoak dira».

Maiatzeko emanaldia «urteko lanketa erakusteko sortu» zela gaineratu du Irazabalbeitiak: «Azken batean, urtero dantza berdinak lantzeak dantzarien motibazioa gutxitu dezake. Horregatik, dantza emanaldi desberdin batek motibatzen gaitu eta ditu dantzariak». Hiru horiekin batera, laugarren bat ere aipatu du Liernik: «Dibertimendua». Otsailean izaten da, inauterien bueltan, eta 2022az geroztik egiten dute.

Urtean beste bi edo hiru emanaldi ere egiten ditu Arkaitz Añorgako Dantzariak taldeak. «Donibane Lohizuneko dantzaldian parte hartzen dugu. Euskal Herriko probintzia bakoitzeko dantza talde bat gonbidatzen dute, eta Gipuzkoaren izenean gu joaten gara. Aurten, beste batzuk sortu zaizkigu, eta baliteke lotura izatea mendeurrenarekin», nabarmendu du Liernik. «Nire ustez, taldea sasoi onean dago, eta horregatik emanaldi gehiago proposatzen dizkigute», gehitu du Garik.

Ehun urte geroago

Hain zuzen ere, azken urteotako egoerarik onenean iritsi da mendeurrenera Arkaitz Añorgako Dantzariak taldea. «Dantzari asko gaude, 35 inguru helduen taldean. Aldiz, haurrak 45 bat dira, hiru taldetan banatuta», esan du Unanuek. Urtero bi dantzari berri izan ohi ditu helduen taldeak, Irazabalbeitiak nabarmendu duenez: «Ez da erraza izaten haurrek helduen talderako trantsizioa egitea. DBH garaia ez da erraza izaten dantzari horiek mantentzeko».

Gainera, dantza taldearentzat «urte onak» izaten ari direla dio Unanuek: «Iaz, Boisera gonbidatu gintuzten, eta horrek asko motibatu zuen taldea, konpromisoari dagokionez, entseguetara etortzeko eta dantzatzeko. Aurten ere, mendeurrenaren harira, dantzariek konpromisoa dute behar den moduan ospatzeko. Horregatik iruditzen zaigu Arkaitz momentu onean dagoela. Ikusiko dugu datorren urtean!».

Aipatu moduan, 1926-2026 Ehun urtez dantzan ikuskizun berezia egingo dute bihar, Añorgako frontoian, 22:00etan. Ikusi ahal izango denaren aurrerapen txiki bat egin nahi izan du Irazabalbeitiak: «Mendeurrena gure ohiko dantzetatik ateratzeko aitzakia moduko bat izan da. Noski, betidanik transmititu izan dizkiguten dantzak eskainiko ditugu: Oñatikoak, Lapurdikoak, Zuberoakoak, soinu zaharrak… Bestalde, pizgarri moduan, Argia dantza taldearen hiru pieza hartu ditugu, eta gure dantza taldearen ezaugarrietara egokitu ditugu. Horrek esan nahi du helduen taldeko dantzari gehienek ez zituztela dantza horiek ezagutzen. Erronka bat izan da, eta gauez eskainiko dugu dantza horien guztien bilduma».

Arkaitz Añorgako Dantzariak taldearen emanaldi bat, Añorgako frontoian.Arkaitz Añorgako Dantzariak

Mendeurreneko festa

Añorgako frontoian egingo duten dantza erakustaldiaz harago, mendeurreneko festa bat ere prestatzen ari dira. Iraila bukaeran izango dela aurreratu du Unanuek: «Belaunaldien arteko dantza ikuskizuna izango da. 200 dantzari inguruk parte hartuko dugu. Zaharrenak ez dira horren zaharrak, 70 urteren bueltakoak direlako. Jende askok eman du izena, haientzat dantza eta taldea oso garrantzitsuak izan direlako. Hainbat belaunalditako hamabi bat talde egin ditugu, eta entseguak egiten ari gara Añorgako zinema zaharrean. Ilusioarekin eta motibatuta etortzen dira, eta hori benetan pozgarria da».

Iraileko emanaldia ere Añorgako frontoian izango da. Bazkari bat ere egingo dute alboko plazan, eta festa ez dela faltako diote lauek.

Asmoak eta erronkak

Ehun urteak beteta, datozen urteei begira jarri dira, eta Unanuek hartu du hitza: «Erronka nagusiena da urte luzez dantza irakasle gisa arituko den norbait topatzea. Urte asko daramatzagu Egoitzekin, eta bere azken urtea izango da. Duela bi urte, Egoitz zen maisu bakarra, eta laguntzaileak behar zituela esan zigun. Horregatik, jarri ginen irakasle Joseba eta biok ere. Hiruren artean ardura orekatzea lortu dugu. Nire ustez, hainbat maisuren arteko talde lana da egokiena transmisioarekin jarraitzeko».

Egungo helduen dantza taldean erreleboa hartzeko gaitasuna duten dantzariak daudela uste dute, baina landu beharreko prozesu bat dela aitortu dute.

Hasieran aipatu moduan, Arkaitz Añorgako Dantzariak dantza taldearen ehun urteko historia jasoko duen liburua prestatzen dabiltza. «Azken 25 urteotako historiari emango diogu garrantzia, aurreko 75 urteei buruzko liburua kaleratu genuelako 75. urteurrenean. Ez dugu errepikatu nahi, eta urte horien laburpen moduko bat jasoko dugu», aurreratu du Liernik. Abenduan argitaratzeko asmoa dute, Durangoko Azoka pasatuta. Izan ere, beraien helburua dantza taldearen ehun urteko historia dokumentatzea da.

Mendeurrena beteta, Añorgak dantzan jarraituko du urteak zenbatzen, dantzak ikasten, irakasten eta jendaurrean erakusten.

Belartzako harri betelanaren aferan «faltsukeriatan» dabil udala, Haritzalderen arabera

Irutxuloko Hitza — 2026-05-20 14:47:24

Añorgako Belartza Goikoa eremuko harri betelan ilegala kentzeko lanak maiatzaren bukaeran bukatuko dituztela adierazi zuen Nekane Arzallus Hirigintza zinegotziak asteleheneko udal batzordeetan, El Diario Vasco hedabideak jaso zuenez. Aspaldiko afera da isurketa ilegal horrena, eta, hain zuzen ere, Arzallusen adierazpenen inguruko oharra argitaratu du Haritzalde Naturzaleen Elkarteak, “Donostiako Udalak dioena gezurtatzeko”.

“Zazpi urte dira EAEko Auzitegi Nagusiaren 219/2019 epaiak legez kanpokotzat jo zuela ezkutuan eta Donostiako Udalaren babesean utzitako 120.000 metro kubiko lur eta arroka isurtzea, 2016an Mercadona eta McAutoren obretan”, gogorarazi du elkarteak. “Epai judizial horretan, EAEko Justizia Auzitegi Nagusiak udalari eta VUSA enpresari isurketa guztiak kentzea ez ezik, parajea jatorrizko egoera naturalera lehengoratzea ere eskatu zien”, gaineratu dute.

Haritzalderen arabera, “VUSAk eta udalak epaia estrategia desberdinekin betearaztea saihestu dute zazpi urte hauetan”. “Larria, nabarmena eta justifikaezina da Donostiako Udalak EAEko Justizia Auzitegi Nagusiaren epaia ez betetzeko izan duen konplizitatea eta ekintza eza, eta Haritzaldek bost aldiz eskatu behar izan du epaia betearazteko laguntza judiziala, azkena, 2025eko martxoan”.

“Faltsukeria”

Testuinguru horretan, “udala gezurtatzeko” oharra helarazi dute naturazaleek, aipatu moduan “Udalak adierazi du maiatzean 8.150 metro kubiko kentzearekin epaia betearaziko dela. Faltsukeria oso larri baten aurrean gaude, gezur nabarmen baten aurrean, eta ez da Donostiako Udalak enpresa honen alde egiten duen lehen aldia. 2025eko uztailaren 7an, udalak antzeko baieztapen faltsua egin zuen, ordura arte 66.188 metro kubiko kendu zirela jakinarazten zuen dokumentu bat epaitegira bidali zuenean, eta, horrekin batera, ‘lursail horretako lur guztiak atera zirela, lekuz aldatzeko konpromisoa zuten tonak betetzat emanez'”.

“Lotsagabekeria horren aurrean”, Haritzaldek peritu topografiko bat aurkeztu zuen epaitegian, “edozein behatzailek bertan ikus dezakeena frogatzeko: 2025eko azaroan 40.000 metro kubiko isurketa baino gehiago geratzen zirela”. “Epaia betetzeko zazpi urteko atzerapenen eta oztopoen ondoren, eta desobedientzia eta iruzur prozesalaren gisako kutsu penala hartzen ari dela dirudienaren aurrean, udalen eskumenik ezari buruzko azken tesi horri eustea zaila da. Belartza Goikora mugitze hutsarekin, edonork egiazta dezake gaur egun 30.000 metro kubikotik gorako isuri hondatzaile bat hainbat hektareatan zehar hedatzen dela, sei metroko altuera eta hondatutako paisaia naturalarekin”, gaineratu du elkarteak.

Era berean, “legezkotasunaren mugan” aritzea leporatu diete udalari VUSAri: “Nekane Arzallus zinegotziaren azken adierazpen horien eta 2016az geroztik metatzen diren irregulartasun eta legez kanpoko egitekoen aurrekari guztien batura nahikoa zantzu dira udala VUSA enpresarekin hitzartutako jarduera batean legezkotasunaren mugan maniobrak egiten ari dela ulertzeko, epaia ez betetzeko”.

Añorgan 250 etxebizitza eraikitzeko proiektua behin betiko onartu du udalak

Irutxuloko Hitza — 2026-05-19 13:28:36

Donostiako Udal Gobernuak joan den urteko azaroan eman zion hasierako onarpena Añorgako Geltokia hirigintza eremua urbanizatzeko proiektuari, eta behin betiko onartu du gaur (hilak 19) Tokiko Gobernu Batzordeak. Horren bidez, udalak 250 etxebizitza eraikiko ditu bertan, horietatik, 50 tasatuak eta beste 50 alokairu sozialekoak. Auzotar asko kritiko agertu dira hasieratik proiektu horrekin, eta, hain zuzen ere, proiektua “auzotarrak entzun gabe” onartu zutela salatu zuen auzo elkarteak azaroan.

Jon Insausti alkatearen arabera, astearteko ohiko prentsaurrekoan azaldu duenez, “ingurua nabarmen berroneratuko da eremu hori Añorga Txikiko gainerako eremuekin integratuz, errekaren ondoan aisialdirako berdegune bat sortuz, bide konexioak hobetuz eta garraio publikoarekin konexio hobeak eginez, baita igogailu berri bat sortuz ere, auzoaren irisgarritasuna erraztuko duena”.

Era berean, azken hilabeteotan, “klase ertainean” jarri du fokua Insaustik etxebizitzari dagokionean, eta hala egin du Añorga Txikiko ere: “Proiektuak etxebizitza mota ezberdinak dituzten sustapen berrien garapenean bizkorrak izateko helburuari erantzuten dio, auzo kohesionatuak eta erdi mailako klasea nagusi diren auzoak lortzeko helburuarekin”.

Aurrekontua eta xehetasunak

Añorgako Geltokia hirigintza eremuan bost etxebizitza eraikin, Añorga errekastoaren erriberako parke gune bat, aparkaleku bat eta oinezkoentzako hainbat plaza eta aisialdirako guneak eraikitzea aurreikusten du udalak, Insaustik azaldu duenez.

Era berean, “berrurbanizazio osoa” egingo dute, inguruari “espaloi zabalagoak, aparkaleku antolatua eta zoladura eta hiri zerbitzu berriak” emanez. Proiektuaren aurrekontua 10.949.812 eurokoa izango dela aurreikusten du udalak, eta gauzatzeko epea hemezortzi hilabetekoa izango da.

1.100 etxebizitza

Alkateak prentsaurrekoan gogorarazi du gaur egun “1.100 etxebizitza” eraikitzen ari dela udala Donostian: “Lorategi Hiria, Añorga Txiki eta Infernua. Eta Illarrako garapenekin, Txomin II. fasearekin eta Jolastokietarekin ia 1.000 etxebizitza gehiago izango ditugu. Datozen hilabeteetan hasiko dira garapenak”. “Hori guztia eta gehiago egin behar dugu Donostian bizi proiektua eraiki nahi dutenentzat aukerak sortzen jarraitzeko”, gaineratu du Insaustik.

Ekainean eta uztailean egingo dute Añorgako Jolas Etxea Pilota Txapelketa

Irutxuloko Hitza — 2026-05-13 16:54:42

Añorga Kirol eta Kultur Elkarteak Jolas Etxea eskuz binakako txapelketa antolatu du aurten ere Añorgako frontoian, gizonezko senior eta emakumezko promesa mailetan. Zortzi bikote lehiatuko dira gizonezkoetan eta sei bikote emakumezkoetan. Beheko irudian ikus ditzakezue bikote parte hartzaileak eta partidak.

Ekainaren 7tik uztailaren 12ra egingo dute txapelketa. Final-laurdenetatik hasiko dira, eta igandeetan jokatuko dituzte partidak: ekainaren 7an, 14an, 21ean eta 28an. Finala uztailaren 12an izango da, Añorgako jaien barruan.

Sariei dagokionez, hauek izango dira finalean emango dituzten sariak: gizonezkoen senior mailan, bikote azpitxapeldunak 300 euro eta garaikurra jasoko du eta bikote txapeldunak 350 euro, txapela eta garaikurra. Emakumezkoen promesa mailan, aldiz, bikote azpitxapeldunak 100 euro eta garaikurra jasoko du eta bikote txapeldunak 150 euro, txapela eta garaikurra.

Añorga Txikiko lanak abisatu gabe eta bizilagunen eskaerak entzun gabe hasi dituztela salatu du auzo elkarteak

Irutxuloko Hitza — 2026-04-08 09:46:33

Añorga Txikin 248 etxebizitza berri eraikitzeko proiektuaren testuinguruan, Añorga hiribidean lanak egiten hasi dira egunotan, zenbait aparkaleku eta eremu itxiz eta inguruan eragozpenak sortuz. Horren aurrean, Añorgatxikitarrak auzo elkarteko kideek salatu dute lanak “bizilagunekin kontsultatu gabe eta auzo elkarteari abisatu gabe” hasi dituztela.

Gogorarazi dutenez, lanak hasi aurretik, hiru eskaera zehatz egin zizkion auzo elkarteak Donostiako Udalari: “Auzoan aparkaleku arazoa dugunez, kenduko ziren tokiak ordezkatzeko konponbideak bilatzea; ikastola dagoela kontuan hartuta, obretako kamioiak ez ibiltzea sarrera-irteerako ordutegietan eta bizilagunengan eragina izango zuen edozein neurri edo lan hasi aurretik, aldez aurretik jakinaraztea”.

Añorga Txikiko lanak.Añorga Txikiko Auzo Elkartea

Aldiz, udalak eskaera horiek kontuan hartu ez dituela deitoratu dute, baita esku hartzea abisatu gabe hasi izana ere. Hedabide honi azaldu diotenez, salaketa publiko egin aurretik, lanen inguruko informazioa eskatu dute udalean: “Oraindik ez dugu erantzunik jaso, baina badirudi espaloiak handitzen ari direla, bizilagunekin kontsultatu gabe eta auzo elkarteari abisatu gabe. Gainera, dirudienez, dozenaka aparkaleku desagertuko dira”.

Era berean, astelehenean, Pazko astea pasatuta, Amassorrain ikastolaren jarduna abiatuko da, eta lanak eskaerak kontuan hartu gabe martxan daudela ikusita, “kezkatuta” agertu dira, sortu daitezkeen eragozpenengatik.

Añorga Txikiko lanak.Añorga Txikiko Auzo Elkartea

Añorgako oinezkoentzako eta bizikletentzako zeharbidea berrituko dute

Irutxuloko Hitza — 2026-03-11 10:00:58

Auzotarrak eta erabiltzaileak ez ziren gustura geratu 2022an udalak Añorgako zeharbidean egindako lanekin. Oinezkoentzako eta bizikletentzako egokitu zuten, baina ez zen oso txukun geratu. Hori dela eta, udalak berriz ere berrituko du Errekaldeko eta Rezolako biribilguneen arteko zatia.

“Zeharbidea berritu bazen ere, ez zen nahikoa izan. Hori dela eta, txukuntze lan batzuk egingo ditugu, urbanoagoa eta atseginagoa izan dadin. Auzoko paisaian hobeto txertatzea da helburua”, adieraz du Jon Insausti alkateak.

2022an berritu ez ziren udal azpiegiturak hobetuko dituzte. Oinezkoentzako espaloiak sortuko ditugu, eta bidegorri txukunago bat jarriko dute. Era berean, lorategi eremu zabalak sortuko dituzte.

Bi gauetan izango dituzte kontzertuak Añorga Txikiko jaiek

Irutxuloko Hitza — 2025-08-29 00:00:21

Auzo txikia da Añorga Txiki, baina baita bizia ere, eta horren isla dira bere jaiak: «Talde motor txiki bat gabiltza dena koordinatzen, baina, halaber, auzoko jende asko dago gure inguruan, jaien antolaketan laguntzen eta parte hartzen, tartean gazte asko», nabarmendu du jai batzordeko kide Silvia Osesek.

Gazte horietako bat da Jon Calzada batzordekidea, eta biek nabarmendu dute aurten ere «haur, gazte zein helduentzako» jarduerak antolatu dituztela irailaren 5ean eta 6an ospatuko dituzten jaietarako. Hemen daukazue egitarau osoa.

Berritasun batzuk

Bi berritasun nagusi dituzte aurtengo Añorga Txikiko jaiek: futbito txapelketa eta ostiraleko kontzertuak. Lehenengoari dagokionez, 18 urte inguruko auzotar talde batek antolatu duela nabarmendu dute jai batzordekoek: «Hori oso garrantzitsua iruditzen zaigu, gazte-gaztetatik dabiltzalako horrela gazteak jaien antolaketan. Bi egunez edukiko dugu txapelketa: ostiralekoa haurrentzako da, eta larunbatekoa, edonorentzat».

Bigarren berritasuna kontzertuei dagokiena da: «Aurten, ostiral gauean ere edukiko ditugu kontzertuak, ez soilik larunbatean. Gainera, adin desberdinetako jendearen gustukoak izan daitezkeen taldeak edukiko ditugu ostiralean: Mr. Luken lehenengo, gero Rock Kam Broom eta gero auzoko DJ-ak. Larunbatean, iaz ere etorri zen Olgetan erromeria taldea edukiko dugu lehenengo, eta ZKN Brothers DJ-ak ondoren».

Añorga Txikiko erraldoiak eta buruhandiak, 2024ko jaietan.Añorga Txikiko jaiak

Funtzionatzen dutenak

Berritasunetatik harago, noski, urtero arrakasta izaten duten jarduerak mantendu dituzte aurten ere: «Arrakasta handia izaten du, adibidez, arratsaldeko mozorro poteoak; jende asko animatu ohi da eta dibertigarria izaten da», azaldu dute batzordekideek. Ez dira faltatuko, ezta ere, larunbat goiz-eguerdiko sagardo eta sardina dastaketa maitatua eta ondorengo tortilla lehiaketa: «Auzotar ugarik hartzen dute parte, 45 inguruk; gurearen moduko auzo txiki batentzat asko da! Giro polita egoten da, lehia osasuntsu eta bizia egoten delako: askotan, familia bereko bi tortilla aurkezten dira eta euren arteko lehia egoten da, adibidez», nabarmendu dute.

Bestalde, iazko arrakasta ikusita, aurten ere mojitoak eskainiko dituzte larunbateko paella janaren ostean, alkoholdunak zein alkoholik gabeak, latin zumba saioarekin. Era berean, «aspaldiko partez», txaranga batek girotuko du larunbat arratsaldeko poteoa eta auzotarrak «ilusio handiz» daude.

Ziur larunbat gaua ederki luzatuko dutela añorgatar askok, baina jai batzordekoek gogorarazi dute igandean ongietorria izango dela laguntza oro, jai gunea garbitu eta txukun uzteko: «Laguntzera etortzeko eskatzen diegu auzotarrei, eta jaietan zehar ere edozein gauzatan laguntzera animatzen ditugu». Eta, ondo pasatzera ere deitu dituzte herritarrak: «Kalera jaitsi daitezela, denontzako moduko jarduerak antolatu ditugu eta! Eta auzokoak ez direnak ere etortzera animatzen ditugu, noski, beso zabalik hartuko ditugu!».

Baserriz baserri ibili dira Añorgako oilasko biltzaileak, dantzan, eskean eta giro ederrean

Irutxuloko Hitza — 2025-07-14 13:22:24

Azken txanpan murgiltzen hasi dira Añorgako Karmengo jaiak, gaur ospatzen ari diren Kuadrillen Egunarekin (hilak 14). Tradizioari eutsiz eta asteburuko neke eta ajeari aurre eginez, oilasko biltzaileak goizean goiz abiatu dira Jolas Etxetik, baserriz baserri eskean eta dantzan aritzeko.

Dantzatzeko, mokadua egiteko eta zintzurrak bustitzeko hainbat geldialdi egin dituzte, hala nola, Gaztelumenditarren etxean eta Errekalde elkartean. Jai giro ederrean ibili dira, eta horren erakusgarri da Joseba Parron San Sebastian argazkilariak egindako irudi bilduma, jarraian ikus dezakezuena.

Asteburu bakarrean, baina betiko indarrarekin datoz Añorgako karmenak

Irutxuloko Hitza — 2025-07-04 00:00:33

Dena batera izango da aurten; añorgatarrentzako gogorra, baina hobeto. Bakoitzak bere indarrak kudeatu beharko ditu», dio Añorgako jai batzordeko kide Jon Altunak aurtengo Karmengo jaiei buruz. Izan ere, horixe da berritasun nagusia: «Jaiak asteburu bakarrera mugatzea erabaki dugu, esperimentu gisa. Sentipena genuen ia uztaila osoa pasatzen genuela jaietan». Egitarau osoa hemen daukazue.

Horrela, etzi Jubilatuen eguna izango bada ere, ostegunean hasiko dira jaiak bere horretan, aurtengo beste berritasun nagusiarekin: kuadrillen arteko herri kirol desafioa.

Betikoak ez du huts egingo

Zikiroaren egun arrakastatsua, beraz, ostiralean izango da, mozorro festarekin: «Añorgarekin lotura duen edonork egutegian markatuta duen eguna da», nabarmendu du Altunak. Parrandak luze jo ohi du añorgatarrentzat, baina «berpizten» dira larunbateko kontzertuetarako: aurten, Ezpalak, Tapia eta Leturia Band eta Zurrunbilo Fest.

Igandean, bertso afaria daukate, Altunaren hitzetan, «autokontrol ariketa bat» izango dena, jaiak ez duelako etenik: «Kuadrillen eguna astelehenera pasatu dugu, eta oilasko biltzaileak 08:00etan aterako dira baserriz baserri». Horrez gain, gauera arte jarduera ugari prestatu dituzte egun horretarako.

Karmen egunarekin itxiko dituzte jaiak, eta ondoren baloratuko dute hurrengo urtean asteburu bakarreko formatua errepikatzea edo bi asteburuetara itzultzea. Motzagoak edo luzeagoak, gauza bat argi dago Añorgako jaietan: ez da aspertzeko astirik egongo!