Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Udalbatzaren gehiengoari «kasu egin», eta Infernuan alokairuzko etxebizitza tasatuak eraikitzeko eskatu dio EH Bilduk alkateari

Irutxuloko Hitza — 2026-06-02 16:17:13

Donostiako Udaleko azken udalbatzarrean, EH Bildu, PSE-EE eta Elkarrekin Donostia Ibaetako Infernua eremuan alokairu erregimeneko etxebizitza tasatuak egitearen alde agertu ziren. Hau da, udalbatzaren gehiengoa agertu zen horren alde. Hori dela eta, EH Bilduk, ohar baten bidez, Jon Insausti alkateari eskatu dio “argitu dezala osoko bilkuraren gehiengoari kasu egingo ote dion, Infernuan alokairuko etxebizitza tasatuak eraikitzeko”. Izan ere, “EAJ buru duen gutxiengo batek norabide horretan doan edozein proposamen oztopatu baino ez du egiten”, EH Bilduren ustez.

Ricardo Burutaran EH Bilduko zinegotziak gogorarazi duenez, Infernuan “aukera bat sortu da, Etxegintzako eskatzaileen gehiengoari erantzuteko, udalari kostu ekonomikorik eragin gabe, gainera. Eta aukera bat izateaz gain, bideragarria ere bada, Eusko Jaurlaritzako Etxebizitza saileko arduradunak aukera hori badagoela adierazi eta defendatu baitu”. “Alokairu errentak berrikusteko aukera izatea proposatzen dugu; helburua, bizikidetza unitateen diru sarreretara egokitzea hauek aldaketaren bat izango balute”, gaineratu du EH Bilduk.

“Klase ertaina delakoaz alkateak egiten duen defentsa ez da halakoa”, gaineratu du oposizioko alderdiak. Ildo beretik, Burutaranek salatu duenez, “Etxegintzaren kontseiluaren baitan kalitatezko botoarekin eta, beraz, osoko bilkuraren gehiengoaren aurka hartutako erabaki honen bidez, sustatzaile pribatu bati utzi nahi zaio, gehienez ere lau milioi euroren truke, etxebizitza sozialak eraikitzeko, lurzorua transmitituz gainera, etxebizitza tasatuak prezio altuagoan saldu ahal izateko”.

“EAJk eta PPk ez dute inolako arrazoirik eman azaltzeko zergatik ez duten onuragarri ikusten babes ofizialeko etxebizitzak, sozialak zein tasatuak, eraikitzeko erabiliko den lurzorua administrazio publiko baten esku egotea”, kritikatu du EH Bilduk, baita nabarmendu ere “etxebizitza eskatzaileen benetako zerrendari erantzungo dion produktu bat” sortu behar dela: “Zerrenda horrek alokairua lehenetsi behar dugula esaten du. Eta horrek ez du esan nahi salmenta erregimeneko etxebizitza tasatua ere egon ezin daitekeenik, baina alokairu erregimenean ere egon behar du, eta alkateak ukatu egiten du hori”.

Ordenagailu kuantikoa baliatuta, alzheimerraren aurkako terapia berriak ikertuko dituzte

Irutxuloko Hitza — 2026-04-10 12:58:56

Osasun saila da IBM Quantum System Two ordenagailu kuantikoa baliatuko duen lehen ikerketa proiektuaren buru eta alzheimerraren aurkako terapia berrien ikerketari eta gaitza tratatzeko botiken garapenari bultzada “iraultzailea” emateko baliatuko du. Zehazki, konputazio kuantikoa erabiliko dute jomuga terapeutiko berriak identifikatzeko, funtsezkoak direnak alzheimerra tratatzeko etorkizuneko botiken garapenean.

Milaka gene eta prozesu biologikok eragiten dute gaitz hori, beraz, “oso zaila” da elkarregain horiek guztiak ohiko metodo informatikon bidez aztertzea. Hori dela eta, algoritmo kuantikoak baliatuko dituzte, datu biologiko kopuru handiak prozesatzeko eta aztertzeko gai direnak, aurrekaririk gabeko kalkulu gaitasunarekin. Biobizkaia ikerketa institutuko taldea ari da algoritmo zehatzak prestatzen.

Jomuga terapeutikoak identifikatu ondoren, garun organoideetan balioztatuko dituzte, hau da, pazienteen beraien zelulekin laborategietan garatutako ehun eredu txikietan. Horiek aukera ematen dute proposatutako tratamenduak ingurune erreal eta pertsonalizatuan eraginkorrak diren ikusteko. Laborategian lortutako informazioa baliagarria izango da, halaber, algoritmoak berrentrenatu eta hobetzeko, baita teknologiaren eta biologiaren arteko etengabeko hobekuntza zikloa sortzeko ere.

Basque Quantum, IBM Cleveland Clinic, Osakidetza eta Osasun sailaren arteko aliantza estrategikoaren proiektua da. Eusko Jaurlaritzak lehentasuna eman nahi dio osasunaren arloan duen aplikazio zuzenari eta espero du proiektu honek Euskadi “biomedikuntzaren elitean” kokatzea. Alzeimerrarekin hasi diren arren, euskal osasun zerbitzuak beste gaixotasun batzuetan ere esploratuko du algoritmo hauen erabilera, IBMren Cleveland Clinic-eko osasun kuantikoko taldearekin duen aliantza estrategikoari esker.

Infernuko bi udal lursailak Eusko Jaurlaritzari lagatzea proposatu dute EH Bilduk, PSEk eta Elkarrekin Donostiak

Irutxuloko Hitza — 2026-04-09 16:54:30

EH Bilduren ekimenez, hilaren 14ko Etxegintzaren administrazio kontseiluan eztabaidatuko dute Infernua eremuko bi lursail Eusko Jaurlaritzari lagatzea. PSEren eta Elkarrekin Donostiaren udal taldeek ere bat egin dute proposamen horrekin. Etxebizitza babestu guztia, tasatua barne, alokairu sozialera bideratzea eskatuko dute. “Donostiako Udalari lau milioi euro aurrezteko aukera emango lioke operazio honek”, nabarmendu du udal talde abertzaleak.

Etxegintzaren azken kontseiluan aurkeztu zuten proposamena, eta orain Donostiako Udaleko “gehiengo aurrerakoiaren” atxikimendua duela diotela. Horrela, EH Bilduk, PSEk eta Elkarrekin Donostiak, datorren asteko kontseiluaren gai zerrendan bi puntu sartzeko eskatu dute: “Lehena, etxebizitza babestuaren eraikuntza esku pribatuetan uzteko proposamena bertan behera uztea; eta bigarrena, horren ordez, bi partzelak Eusko Jaurlaritzako Etxebizitza Sailari lagatzea, etxebizitza publiko guztiak Administrazioak sustatu ditzan eta, gainera, guztiak alokairu erregimenean izan daitezen”.

EH Bilduren iritziz, “albiste ona” da Donostiarentzat, “alokairuan babes publikoko etxebizitzaren aldeko apustu irmo hori bermatzen duen gehiengo progresista bat baitago”. Horrekin batera, “bultzatzen diren politikak onuragarriak dira termino ekonomikoetan hiritarrentzat”.

Etxegintzaren asmoa

Hiru udal taldeak Etxegintzak Infernuko bi udal lursail horietako aurreikusi dutenaren kontra daude. Hain zuzen ere, bi partzelak lizitaziora ateratzeko asmoa dute, arlo publikoaren eta pribatuaren arteko lankidetzan, erregimen orokorreko etxebizitza babestuak eta tasatuak eraikitzeko. Gainera, udalak diru publikoa jarri beharko luke sustapen pribaturako; 4 milioi euro inguru.

“Gure ustez, beste aukera batzuk daude lursail publiko horiek kudeatzeko, udalari kosturik eragin gabe eta lur publikoa esku pribatuetara transferitu gabe. Horri esker, etxebizitza parke publiko bat sortuko genuke, merkatu librearen kontrapisua egingo lukeena eta herritarrek etxebizitza izateko duten eskubidea bermatuz”, adierazi du Ane Oiarbide sozialisten bozeramaileak. Aldiz, kritikoagoa izan da Victor Lasa Elkarrekin Donostiaren bozeramailea: “Benetako zentzugabekeria da eta herritar guztien diruarekin ustezko galera pribatuak sozializatzeko beste saiakera bat da”.

Ibaetan prest daude Korrikarako

Irutxuloko Hitza — 2026-03-18 09:42:29

Korrika heltzear den bakoitzean egiten duten moduan, aurten ere euskararen aldeko horma irudia egin dute Ibaetan hainbat auzokidek, 24. Korrikaren testuinguruan. Goiko argazkian ikus daitekeenez, koloretsua da margotu duten horma irudia, Korrikako iruditeria du eta Ibaetan euskara gara leloa dauka idatzita.

24. Korrika bihar (hilak 19) hasiko da, Atharratzetik (Zuberoa). Hilaren 29ra arte, Euskal Herri osoa zeharkatuko du euskararen aldeko egitasmo erraldoiak, eta asteazkenean (hilak 25) helduko da Donostiara. Hain zuzen ere, goiz osoa pasatuko du hiriko kaleetan barrena, eta 12:30ak aldera sartuko da Ibaetan.

Ibaetako jai batzordeko kideek, ordea, ez dute asteazkenera arte itxaron beharko Korrika bizitzeko, izan ere, ohiko legez, kilometro bat erosi dute Donostiatik kanpo: Arguedasen (Nafarroa) hartuko dute lekukoa larunbat honetan (hilak 21), “Erriberako euskaltzaleekin batera”, nabarmendu dutenez.

Giro ederrean ospatu dituzte jaiak Ibaetan

Irutxuloko Hitza — 2026-03-09 09:40:36

Joan den asteburuan Aingeru Zaindariaren ermitako erromeria egin ostean, jaiak bere horretan ospatu dituzte asteburu honetan Ibaetan, ostiraletik igandera. Hain zuzen ere, ez dute aspertzeko astirik eduki egunotan auzoan: kontzertuak, danborrada, sagardo dastaketa, jolasak eta abar.

Nabarmentzekoak dira, besteak beste, larunbat gauean auzoan barrena egin zuten herri danborrada eta igande goizean ospatutako Sagardo Eguna, giro ederrean; jarraian, bi jarduera horietako argazki bildumak aurkituko dituzue.

Herri danborradako argazkiak eta bideoa, Asier Gonzalez de San Pedroren eskutik:

Sagardo Eguneko argazkiak, Asier Gonzalez de San Pedroren eskutik:

Udalak bizkortu egin du Infernuan eta Loiolako Erriberan etxebizitza publikoen eraikuntza

Irutxuloko Hitza — 2026-03-03 11:36:52

Donostiako Udal Gobernuak bi izapide onartu ditu etxebizitza publikoaren eraikuntza azkartzeko. Batetik, Eusko Jaurlaritzari obra lizentzia bat eman diote Loiolako Erriberan 83 zuzkidura etxebizitza eraikitzeko —adinekoentzat eta gazteentzat—. Bestetik, Donostiako Etxegintzari Ibaetako Infernua eremuko bi lursail laga dizkiote, babesturiko 270 etxebizitza egiteko.

“353 pertsona edo familiari beren bizitza proiektua Donostian garatzen jarraitzeko aukera emango diguten proiektuak onartu ditugu”, nabarmendu du Jon Insausti alkateak. Erabaki horrekin, udalak hiriko etxebizitzaren arazoari “garrantzia” ematen diola gaineratu du.

Infernuko bi partzelen lagapenari esker, Donostiako Etxegintzak lehiaketa publikoa lizitatu ahal izango du, garapen berri horretan babes publikoko 270 etxebizitza eraikitzeko aukera emango duena. Horrekin batera, garapen horretan bultzada berezia emango dio udalak etxebizitza tasatuaren modalitateari. Izan ere, egingo diren etxebizitza publikoen erdiak, ezarritako baremoen ondorioz, etxebizitza soziala eskuratzeko aukerarik izan gabe etxebizitza librearen merkatuan sartzeko ere ahalmenik ez duten donostiarrentzat izango dira.

Loiolako Erriberan, berriz, Eusko Jaurlaritzako Etxebizitza Sailak 83 zuzkidura etxebizitza eraikiko ditu. Eraikin horiek irisgarritasun arazoak dituzten etxebizitzetan bizi diren eta horiek Bizigune programari uzten dioten Donostiako adinekoentzat dira oso-osorik. Gero, beraien etxebizitzak gazteei alokatu ahal izango zaizkie berme guztiekin. “Horrela bi arazo aldi berean konpontzen ditugu: etxetik ateratzeko zailtasunak dituzten adinekoen irisgarritasuna eta alokairuko etxebizitzak arrazoizko prezioan izateko beharra”, azaldu du Insaustik.

Ermitako pulpituari so, eta jan-edanen eskean

Irutxuloko Hitza — 2026-03-01 16:18:13

Goian da saria, eta baita ere zaindaria. Martxoaren lehena behar den moduan ospatu dute Ibaetako jaietan. Aingeru Zaindariaren egunak fededunak, eta, batez ere, fede oneko herritarrak elkartu ditu egunaren izen bera duen ermitaren bueltan. Pareko etxean egiten ari diren lanek eremua nabarmen mugatu eta estutu badute ere, denak kabitu dira.

Meza osteko saldak piztu du bisitarien gosea, eta tabernan ez dute atsedenik hartzeko astirik izan. Bitartean, trikitilariek girotu dute goiza, ohiko eguerdiko bertso saioaren aurretik. Agertokia da halabeharrez aldatu behar izan dutena. Plaza eta oholtza faltan, ermitaren aurrealdean jarri dira musikariak eta bertsolariak. Leku faltagatik, dantza saiorik ez da izan, baina antolatzaileek datorren urtean berreskuratzeko asmoa agertu dute.

Jan-edanen artean, apokalipsirik iragartzeko asmorik gabeko lau zaldizkoak igo dira ermita aurreko aldarera. Ohiko lauak, ezker-eskuin: Sebastian Lizaso, Beñat Gaztelumendi, Andoni Egaña eta Unai Gaztelumendi. Bi aita eta bi aitona, haiek aitortu dutenez. Elkarri zirika aritu dira, gustuko duten moduan. Batetik, bi beteranoek txapela eraman dutelako, soilduriko buruak estaltzeko. Bestetik, aita izan berri den Beñati, pixoihalak jartzen badakien eta lorik egiten ote duen galdegin diote. Ordea, dagoeneko bi seme-alaba dituen Unai anaiak esan du haren ilobak zortziko txikian egiten duela negar.

Iazko urrian zendu zen Joxe Mari Gorritiberea Gorriti zumaiarra ere gogora ekarri dute, haren animaliekin urtetan parte hartu zuelako Aingeru Zaindariaren egunean. Horrez gain, iazko mozorro festa aipatu dute –Egañak aurpegi zuriko pailazoz jantzita zer esana eman zuen—, festek inauteriekin bat egin zutelako. Bukatzeko, berriz, puntutan aritu dira giroaz, tabernak izandako arrakastaz, fedeaz, okupazioaz eta beste.

Goizeko giroaren argazkiak jarraian ikus ditzakezue:

Ibaetako jaietako emanaldiak iragarri dituzte

Irutxuloko Hitza — 2026-02-12 11:24:05

Hiru talde eta musika jartzaile bat. Erritmo oneko menua prestatu dute Ibaetako jaietarako. Martxoaren 7an, Udda, Ezpalak eta Bide Batez taldeak ariko dira zuzenean, Lautximeneta frontoian. 22:00etan hasiko dira emanaldiak. Ondoren, La Fulana musika jartzaileak girotuko du gaua goizaldera bitarte.

Illarrako etxebizitza garapenarekin aurrera egiteko «konfiantza» du udalak

Irutxuloko Hitza — 2026-02-10 16:56:05

Donostiako Udalak Illarra (Ibaeta), Villa Ereski (Munto), deposituak (Munto) eta Erregenea (Igeldo) eremuen hiri antolamendurako plan orokorra aldatu beharko du, dagoeneko eraikitzen hasi diren etxebizitzen planaren aurrera jarraitzeko. Horrela ebatzi du EAEko Justizia Auzitegi Nagusiak, bigarrenez. Izan ere, 2024an partzialki baliogabetu zuen eremu horietako HAPOaren aldaketa. Besteak beste, babesturiko etxebizitza kopurua %40tik %75era igotzea eskatu zuen.

Orain, orduko epaia behar bezala ez betetzea egotzi dio udalari, eta, 2025eko uztaileko osoko bilkuran harturiko erabakia baliogabetu du. HAPOa lehen epai horretara egokitzeko dokumentua onartu zuen udalbatzak. Udalbatzarreko erabaki horri esker hasi ziren Illarrako 250 etxebizitzak eraikitzen.

Kontrako bigarren epaiaren aurrean, Jon Insausti alkatea “kezkatuta” agertu da, “gurpilean makilak ari direla” uste duelako: “Garapen urbanistiko bat abian jartzean, horrelako gatazkak sortzeak kezkatzen nau. Illarrakoa da horren eredu”. Horrela ere, lanekin aurrera jarraitzeko, udalak “konfiantza” duela gaineratu du, “udaleko zerbitzu juridikoek ondo jokatu dutela diotelako, Illarrako garapena 2024ko epaira egokituz”.

Hain zuzen ere, udaleko zerbitzu juridikoak bigarren epaia aztertzen ari dira. “Epaileari epaia azaltzeko eskatu diogu, udalari ez behartzeko plan orokorraren beste aldaketa bat izapidetzera, etxebizitzen garapena bi urtez atzeratuko lukeelako”, deitoratu du Insaustik.

Bigarren epaiaren harira, Ezker Anitzak Nekane Arzallus Hirigintza zinegotziaren agerraldia eskatu zuen atzo. “Interes orokorrak ez zaintzea eta gutxi batzuen negozioa erraztea”, leporatu dio udal gobernuari Ezker Anitza alderdiko kide eta Elkarrekin Donostia udal taldeko zinegotzi Arantza Gonzalezek.

Ibaetan ikasleentzako erresidentzia berri bat eraikitzeko prozesua abiatu du EHUk

Irutxuloko Hitza — 2025-09-03 17:37:26

Euskal Herriko Unibertsitateak (EHU) maiatzean jakinarazi zuen Ibaetako campusean ikasleentzako erresidentzia berri bat eraikiko zuela, eta proiektua gauzatzeko prozesua abiatu du orain. Hain zuzen ere, egoitza berria eraikitzeko eta ustiatzeko proiektua idazteko, eraikitzeko eta ustiatzeko prozedurari hasiera emateko ebazpena argitaratu du unibertsitateak. Jarduketarako aurreikusitako aurrekontua 21.478.000 eurokoa da, eta gauzatzeko epea 30 hilabetekoa. Egoitzaren kontzesioa, bestalde, 37 urtekoa da, EHUk ohar baten bidez azaldu duenez.

Albistearekin pozik agertu da Juana Goizueta Vertiz Gipuzkoako campuseko errektoreordea, oharrean nabarmendu duenez: “Oso albiste ona da ikasturtea hasteko, urrats berri bat egin baitugu gure campusean ikasleentzako egoitza berri bat izateko bidean aurrera egiteko. Mugarri garrantzitsua da, eta bat dator gure gain hartzen dugun konpromisoarekin: Gipuzkoako campuseko ikasle askok aurre egin behar dioten etxebizitzen arazoa arintzeko lan egitea, arazo horrek familiei erakartzen dien esfortzua kontuan hartuta. Gure nahia da 2026an lanak hastea”.

Egoitza berria Manuel de Lardizabal pasealekuaren eta Berio pasealekuaren artean dagoen lursailean egingo dute, Unibertsitate Egoitzaren, Zuzenbide Fakultatearen eta Ignacio Maria Barriola zentroaren artean. 3.462 metro koadroko azalera du eremuak, eta, gaur egun, partzialki okupatuta dago Hezkuntza Museoa, ikasgelak eta unibertsitateko jangela dituen solairu bateko pabiloi batez. Eraikin hori eraitsiko dute, erresidentzia berria. Bi solairu edukiko ditu sestra azpian eta bost sestra gainean, 200 oherekin, 176 sukalde partekaturekin, hogei sukalde indibidualekin, 60 plazako aparkaleku batekin eta hainbat eremu komunekin.

EHUk gogorarazi du Miguel Agud Querol egoitzako logelen okupazioa %100ekoa izan dela azken urteotan, eta itxarote zerrenda handia dagoela: “2012an handitu ondoren, 424 plaza izatera iritsi zen guztira, eta gaur egun ez dira nahikoa eskaera handiari erantzuteko”, gaineratu du erakunde publikoak.

Janen ibilaldia egingo dute Ibaetan larunbatean

Irutxuloko Hitza — 2024-04-30 13:57:08

Janen ibilaldia antolatu dute aurten ere Donostian maiatzeko lehenengo asteburuan, munduko hainbat hirietan egin ohi den moduan, Jane Jacobs (Scranton, Pensilvania, AEB, 1916—Toronto, Kanada, 2006) hirigile eta aktibistaren jaiotegunaren bueltan. Aurten, Ibaeta auzoan egingo dute Donostiako ibilaldia, eta, hain justu, Jacobsen jaiotegunean bertan izango da ibilaldia, hilaren 4an, larunbatean. Nerea Lizarralde kazetariak eta Impact Hubeko Victor Aspe eta Alvaro E. Olaizek gidatuko dute Ibaetako ibilaldia, eta edonor joan daiteke, doan, aurretik izena eman gabe.

09:30ean abiatuko dute ibilaldia, Lugaritzeko topo geltokitik. Ibaetako EHUren campusera joango dira handik, Zapatari eremua zeharkatuz, eta, 11:30ean, geldialdia egingo dute ikasgelategian. Koldo Mitxelena parkera iritsiko dira 12:00etan, eta Illarra bideko El gallinero ezagutuko dute, baita hegoaldeko zuhaitz igelaren inguruko informazioa jaso ere. 13:00etan, Portuetxera iritsiko dira, Igara bidetik jarraituko dute eta 14:00etan bukatuko dute, Infernuan. Ibilaldirako berotzen joateko, pasa den igandeko ETB1eko Herri Txiki, Infernu Handi saioa ikus dezakezue, Ibaeta izan baitzuten hizpide saio horretan Mikel Pagadik eta Miren Nogalesek.

Ibaetako Janen ibilaldiaren kartela.Impact Hub

Impact Hub taldeak antolatzen ditu Donostiako Janen ibilaldiak, 2012tik. Helburua da kaleetan barrena ibiltzea da eta kaleetan gertatzen dena zein gertatu dena kontatzea. Mugikortasuna, segurtasuna, zarata, etxebizitza motak, memoria kolektiboa, aldarrikapenak eta beste hainbat dira ibilaldietan ukitu ohi dituzten gaiak. Ibaetaren aurretik, Egian, Parte Zaharrean, Loiolan, Amaran, Altzan, Grosen, Añorgan, Amara Berrin, Intxaurrondon eta Bidebietan egin dituzte ibilaldiak. Pandemiaren eraginez, bi urtez ezin izan zuten ibilaldirik egin, baina 2021ean, Txomiñeneari buruzko dokumental bat egin zuten.

Parte Zaharrean ere

Egun berean, hilaren 4an, Janen beste ibilaldi bat ere egingo dute Donostian, Emakumeak eta Hiria Foroak eta udaleko Berdintasun Sailak antolatuta. 11:00etan abiatuko dira Bretxatik, eta Parte Zaharrean barrena ibiliko dira.

🗓️EGUNA/DIA: Maiatzak 4 Mayo
⏰ORDUA / HORA: 11:00
📍LEKUA / LUGAR:
Alde Zaharretik Barrena
Adentrándonos en la Parte Vieja
🟪ANTOLATZAILEA / ORGANIZA:
Emakumeak eta Hiria
Foroa / Foro Mujeres y Ciudad
Departamento de Igualdad / Berdintasun Saila pic.twitter.com/DbwDS57p7P
— DSSEmakumeen Etxea (@DSSEmakumeenEtx) April 26, 2024