Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Zortzi hamarkadako iraganari, agur

Irutxuloko Hitza — 2026-06-19 00:00:30

Itsasertzean, 1890ean eraikitako Ondarretako kartzelaren lekukoa hartu zuen Martutenekoak, 1948an. Presondegiak berezko ditu mugak eta murruak, finean, askatasun eza; baina agerikoa omen zen, txarraren barruan, Urumea ertzeko azpiegitura hobea zela, itsasoaren hezetasunak dena hartzen zuen Gezalaren kartzela baino. 78 urte geroago, Zubietakoak ordezkatu du Martutene, edonolako ur masatik urruti, eta masifikazioa atzean utziko duten gune zabalagoekin. Desagertzear dela, Martutenekoak itsasbeheran hareatzan agertzen diren arrokak baino aztarna iraunkorrago eta agerikoago bat utz dezan eskatu dute, bertan izan direnengan utzitako arrasto sakonaren pare eta ohore.

Peñaflorida kondearen Bernategi baserriaren lurretan altxatu zuten kartzela. 1942an saldu zion orubea udalari, 18 pezetatan metro koadroa, eta honek Espainiako Estatuari eman zion bertan eraikitzeko. Lehen harria 1944ko urriaren 7an jarri zuten, «solemnitate eta parafernalia» handiko ekitaldi batean. Garaiko agintari zibil eta militar ugari elkartu ziren, tartean, Rafael Lataillade alkate frankista, harria bedeinkatu zuen Carmelo Ballester gotzaina, eta hura jarri zuen Eduardo Aunos Justizia ministroa.

Bitxikeria gisa, El Diario Palentino egunkariak ekitaldiari buruz argitaratutako albistearen arabera, udalak eta aldundiak abagunea baliatu zuten Aunos omentzeko, eta honek Gipuzkoari buruzko hitz politak esan zituen, hala nola «probintzia kuttuna» zuela eta «ahazten azkena» izango zela, baita honakoa ere, euskarari dagokionean: «Bertako hizkuntza milurtekoak inongo gutxiespenik gabe elkarbizitzen jakin zuen Espainiaren alkatzar inperialen azpian».

Presoek amaitua

Agintari frankista hark jarritako harriaren inguruan, gainerako elkartzeko ardura Construcciones Tomas Altunarena zen, baina atzerapenak medio, preso errepublikazaleek amaitu zuten lana. Ordurako, Martuteneko ziegetan baziren presoak. Zehazki, 1948ko apirilaren 30ean eta maiatzaren 3an heldu ziren lehenak. La Voz de España-k maiatzaren 1ean jaso zuen Ondarretako kartzelaren azken egunak zirela. «Atzo hasi zuten presoen lekualdatzea Martuteneko presondegira. Arratsaldean, 49 emakume lekualdatu zituzten, kontingente femeninoa osatzen dutenak. Aste erdirako egingo dute preso guztien lekualdatzea eraikin berrira».

Bi egun geroago, egunkari berak Martuteneko lehen zuzendari Guillermo Gonzalez Carrascosaren hitzak biltzen zituen erreportaje bat kaleratu zuen. Bertan adierazi zuenez, «kartzela berria zabala da, ondo atondua eta frontoi bikaina du», baita euritik babesteko aterpea ere. Halaber, guztira bost patio zituen, nagusia «bikaina» testuaren arabera, eta emakumezkoak gainerako presoengatik bereizita zeuden. Ziega «altu, zabal eta aireztatuak» ziren, bakoitzean hiru preso bizi ziren eta dutxak «ugariak» ziren. Igandeko mezarako aldarea ere ez zen falta.

Deskribapenak eraikinaren ontasunak erakutsi arren, ezin da ahaztu frankismo garaiko kartzela bat zela eta hormen arteko errealitatea, oso bestelakoa. Ireki berritan Martutenen sartu zuten Jokin Inza militante nazionalistak Hombres libres en una patria libre liburuan kontatu zuen bertan ematen ziren zigorrak. Baina ez zen izan bakarra. 1960ko hamarkadan mugimendu antifrankistak indarra hartu zuenean, errepresio gogorra hasi zen eta kartzela diktaduraren kontrako preso politikoz bete zen. Batzuk kontatu ahal izan bazuten, beste batzuek, ez.

Iragan beltza

Itxaropen kolorezko hitzetan Martuteneko hormetako batean gazteleraz idatzita dago «biharko egunaren txarrena etorkizunik ez izatea da» leloa. Biharrik ez zuen izan Vicente Lertxundi Mayorrek. 1962an, barruan jasotako jipoiaren ondorioz hil zen kartzela atarian. Borreroek kanpora atera zuten erantzukizuna saihesteko. Manuel Thomas Gomes portugaldarra, berriz, «ezustean hil zen», beste batzuk mediku arreta ez jasotzearen ondorioz, eta etsipenak jota, ziegan —edo behin irtenda— bere buruaz beste egin dutenak ere izan dira hamarkada hauetan.

Zubietako kartzelaren inaugurazio ekitaldia egin zuten astelehenean, eta gogoan izan zituzten 1990etik 1997ra bitartean ETAk hildako Martuteneko espetxeko hiru funtzionarioak—Angel Jesus Mota Iglesias, Jose Ramon Dominguez Burillo eta Francisco Gomez Elosegui—. Urumeako espetxean bertan jarrita egon den plaka eraman dute Norte III izenekora.

Ez da inongo presondegitako murruetan idatzita egongo, baina esaldi historiko batek dioenez, «edozein presoren egitekoa da ihes egiten saiatzea». 1985eko uztailaren 7an Joseba Sarrionandia eta Iñaki Pikabeak gauzatutako ihesaldiak gainerakoak estali ditu, baina beste batzuk ere izan dira, oihartzun eta iraupen historiko askoz laburragoarekin, agerikoa denez. Lehena, 1950ean egin zuten. Celestino Uriartek antolatu zuen eta hiru kiderekin batera —Ramon Peña Azkue, Alberto Harina Salado eta Eugenio Urrutia Anduaga— Martutenetik atera zen, funtzionarioz jantzita.

Jada ez dago ihes egiteko inor, masifikatutako ziegak hutsik daude. Datozen hilabeteetan botako dute kartzela eta bere barruan gertatutako guztia oroituko duen elementuren bat gordetzeko eskaera egin dute hainbat elkartek. Bizilagun berriak izan arren, aurretik izandakoak ere gogora daitezen.

Martuteneko «isurketa kutsatzaile» bat salatu du Eguzkik

Irutxuloko Hitza — 2026-06-17 13:20:24

Eguzki talde ekologistak salatu zuenez, “beste isurketa kutsatzaile bat” gertatu zen asteartean (hilak 16) Martutenen, 27 Industrialdetik Urumea ibaira. Ekologistek azaldu dutenez, Martuteneko Sarroeta auzo elkarteak eman zien isurketaren berri, eta gogorarazi dute herenegun beste isurketa kutsatzaile bat izan zela Gipuzkoan: “Alegian nabaritu zuten gasolio isuria, Amezketa ibaitik Oriara iritsi zena”.

“Uda atarian gaude eta udan, normalean, ugaritu egiten dira isurketa salaketak. Oporrak direla eta, enpresa batzuek “garbiketa” egiten dute, eta, oro har, ibaiek eta errekek ur gutxiago eramaten dutenez –egunotan bezala, beroaldia dela eta–, isurketa ‘arrunta’ ere urteko beste hilabeteetan baino nabarmenago ageri ohi dira”, nabarmendu du Eguzkik. Ohikoak izanik ere, ordea, ohartarazi dute isurketak ez direla “normaltzat” jo behar, “ibai, erreka nahiz itsasoko urak nolanahi kutsatzea ez baita inolaz ere normala”. “Beraz, irmoki salatu egin behar dira”, gehitu du talde ekologistak.

Horrela, isurketaren bat ikustean, “lehenbailehen” 112 larrialdi zenbakira deitu behar dela gogorarazi dute: “Handik jarriko dute martxan protokoloa, Ura agentziako ikuskatzaile bat isuria detektatu den lekura joatea aurreikusten duena”. 112 zenbakira deitu ostean, Eguzkirekin harremanetan jartzera animatu dituzte herritarrak, eguzki.eguzki@gmail.com helbidera mezu bat bidaliz: “Ahal dugun neurrian, jarraipena egiten saiatuko gara eta, hala badagokio, publikoki salatuko dugu”.

Martuteneko espetxeko ondare historikoa babesteko neurriak hartzeko eskatu du GEBehatokiak

Irutxuloko Hitza — 2026-06-16 10:05:52

Zubietako espetxe berria inauguratuta, Martuteneko kartzela ixtear dira, eta, horren harira, bertako “ondare historikoa babesteko deia” egin du Euskal Herriko Giza Eskubideen Behatokiak (GEBehatokia). “Martuteneko espetxea errepresio frankistaren adierazle nabarmena izan zen, batez ere salbuespen egoerako aldietan, 1968ko salbuespen egoeraren adierazgarri nagusiarekin. Balio izugarria du, beraz, Gipuzkoako eta Euskal Herriko memoria historikorako”, nabarmendu du erakundeak.

Martxoan 24 elkarte memorialistek egindako proposamenaren ildotik egin du eskaera GEBehatokiak, Martuteneko espetxea “memoria leku” izendatzeko eskatu baitzuten. Izan ere, 78 urteko historia du kartzelak, tartean frankismo garaikoa, eta giza eskubideen urraketa larriak egin dituzte bertan estatuko segurtasun indarrek. Zubietako espetxe berrian ETAk hildako Martuteneko espetxeko hiru langileren omenezko plakak jarriko dituzte; momentuz, ez dute iragarri estatuko indarrek egindako giza eskubideen urraketak gogoratzeko oroigarririk jarriko dutenik.

Eraikina eraistea eta bertan etxebizitzak eraikitzea da Eusko Jaurlaritzaren eta Donostiako Udalaren asmoa; hori dela eta, bi erakunde publiko horiei eskatu diete “elementu adierazgarriren bat” gordetzeko, “sortutako mina eta egia historikoa ahalik eta gehien errespetatuz”.

Horrela, Donostiako Udalarekin, Gogora Institutuarekin eta Eusko Jaurlaritzako Etxebizitza Sailarekin abian dauden elkarrizketek eskaera horiei erantzun bitartean, GEBehatokiak “premiazkotzat” jo du “eraikinean dagoen ondarea babesteko neurriak hartzea”: “Ez da lehen aldia, balio historikoa duen eraikin bat itxi eta eraitsi bitartean, jendea bertara sartzen dela ondarea lapurtzeko edo eraikuntza degradatzen duten gizalegearen aurkako ekintzak egiteko. Euskal Herriko adibide bat Espainiako Armadak Iruñeko Ezkaba mendiko San Kristobal gotorlekua zaintzeko eta mantentzeko betebeharrak bertan behera utzi izana da”.

Neurri proposamenak

Martuteneko presondegiaren “itxieraren ondoren, prozesu bat irekitzen da, Eusko Jaurlaritzak Espainiako Erresumaren ondare nazionalari itzuli behar diolako —bere garaian, espetxe politikaren transferentziaren esparruan eman zitzaion kudeaketa—, hirigintza proiektuari ekiteko Eusko Jaurlaritzari berriro utzi aurretik”, azaldu du GEBehatokiak, baita gaineratu ere “luzatu daitekeen administrazio prozesu bat” dela, eta “eraikinaren zaintza nori legokiokeen argi ez dagoen aldiak sor ditzake”.

Hori dela eta, Eusko Jaurlaritzari, eraikinaren egungo kudeatzaileari, honako neurri hauek har ditzala “iradoki” diote: “Aranzadi Zientzia Elkartearekin elkarlanean, balio historikoa duten elementuen bilduma, katalogazioa eta artxiboa egitea premiatzen dugu. Bere garaian, eta Donostiako alkate ohi Eneko Goiaren bultzadaz, espetxearen artxiboaren zati handi bat Eusko Jaurlaritzak kudeatzen dituen artxibo historikoetan gorde zen; premiazkoa da gainerako artxiboak leku berera eramatea. Segurtasun neurriak bermatzea, eraikina hondatu ez dadin.

“Ekimen hau orokorrago baten barruan kokatzen da, non Euskal Herriko eta Espainiako hainbat unibertsitatetako historialariak eta historia irakasleak eztabaida bat bultzatzen ari diren, artxibo horiek guztiak, Espainiako Barne Ministerioko Artxibo Historikokoak edo Espainiako Armadakoak barne, herrialdeko artxibo historikoetara eramateko eskatuz”, nabarmendu du GEBehatokiak, baita gehitu ere “zigorgabetasunarekin amaitzeko aldarrikapen garrantzitsua eta beharrezkoa” dela.

Txomin Letamendiren kasua

Ildo horretatik, hain zuzen ere, GEBehatokia “pozik” agertu da “Espainiako Barne Ministerioko Artxibo Nagusitik, azkenean, Txomin Letamendi Muruaren espedienteko dokumentazio osoa” bidali dietelako, “zirriborrorik eta zentsurarik gabe”. “Emaitza horrek erakusten du lanak eta gaiari eusteak emaitzak ematen dituztela eta zigorgabetasunaren horma pitzatzeko aukera ematen dutela”, gaineratu dute.

Txomiñeneko anbulatorioa eraikitzeko lursaila dagoeneko Eusko Jaurlaritzarena da

Irutxuloko Hitza — 2026-05-26 13:25:45

Donostiako Udal Gobernuak gaur onartu du Txomiñeneko anbulatorioaren lursaila doan lagatzea Eusko Jaurlaritzari. Arteleku plazan dago lur zati hori, eta lanak abian dira. “Izapide horrekin behin betiko formalizatuko da lursailaren titulartasuna”, adierazi du udalak.

“Hobekuntza handia izango da Loiolako eta Martuteneko bizilagunentzat”, nabarmendu du Jon Insausti alkateak. Horrekin batera, anbulatorio berriak 17.000 biztanle baino gehiago artatuko dituela esan du, “kartzelaren lursailetan eraikiko diren etxebizitzak eta bizilagunak aintzat hartuta”.

Une honetan, zabalik jarraitzen du Txomiñenean dagoen Loiolako osasun zentroa. Loiolako, Txomiñeneko eta Martuteneko herritarrei ematen die zerbitzua, eta aspaldi txiki geratu zela.

Martutenen gentrifikazioak nola eragiten duen aztertuko dute

Irutxuloko Hitza — 2026-05-05 10:57:50

Martuteneko Sarroeta auzo elkarteak hitzaldi interesgarria antolatu du ostegun honetan, maiatzak 7, 18:30ean Martuteneko Gaztelekuan. Gentrifikazioak auzoan duen eragina aztertuko dute adituen eta herri mugimenduen eskutik. Ondorioak ulertu eta alternatibak elkarrekin bilatzea izango da erronka eta horretarako Koldo Telleria arkitektoa eta Bizilagunekin plataforma izango dira.

Koldo Telleria Andueza (Segura, 1972) arkitekturan lizentziatua da EHUn, Hirigintzan diplomatua ere bada eta Sevillako UPOn eta Antropologian Master bat dauka. Hiri Kolektiboa sortu zuen 2002an eta hirigintzarako hainbat parte-hartze prozesu diseinatu, zuzendu nahiz gauzatu ditu Euskal Herriko testuinguru ezberdinetan. Saharan, Mozambiken eta Pakistanen aritua da kooperazio lanetan. EHUko arkitektura eskolan irakaslea da. Gaur egun, hirigintza eta lurralde antolamenduan gizartearekin elkar lanean eta ikerketan dihardu.

Donostian desazkunde turistikoaren aldeko dinamika sustatzen du Bizilagunekin plataformak. Azken urteetan, hamaika dinamika abiatu ditu turistifikazioaren eraginaren inguruan, baita erdialdetik urruntzen diren auzoetan duen eraginaren inguruan. Asier Basurto bertako kideak liburua argitaratu berri du Argia-rekin eta hedabide honetan elkarrizketatu dugu.

Adifek 6,6 milioi euro baino gehiago bideratuko ditu Barkaiztegiko pasabide berria egiteko

Irutxuloko Hitza — 2026-04-15 11:16:17

Abiadura handiko trenaren obra egiten ari den Adif enpresak 6,6 milioi euro baino gehiagoko lizitazioa egin du Martuteneko Barkaiztegi auzoko pasabide berria eraikitzeko. Madril-Hendaia linearen gainean jarriko dute ibilgailuentzako eta oinezkoentzako zubibide berria. Horrela, trenbide sarearen bi aldeetako zirkulazioa lehengoratuko dute, 2021eko maiatza hasieran eten zutena.

Martuteneko tren geltokitik Barkaiztegi auzunera bitarteko mugikortasuna hobetu eta berrezarriko dute. Zehazki, gaineko pasabide berri bat eraikiko dute, ibilgailu astunen joan-etorrietara egokiturikoa. Oinezkoen pasabidea, berriz, kendu zutena baino hobeagoa eta zabalagoa izango da.

Proiektua aurrera eramateko, hainbat faktore aintzat hartu dituzte. Besteak beste, Martuteneko pasealekua eta Barkaiztegi auzunea lotzeko beharra, geltokiaren kokapena eta Barkaiztegiko bidearen baldintzak. Horrekin batera, trenbide linearen eta Urumea ibaiaren arteko espazioa kontuan hartu dute.

Auzoan ez ezik, Araban ere hartuko dute Korrikaren lekukoa Martutenekoek

Irutxuloko Hitza — 2026-03-13 12:01:47

24. Korrikarako motorrak berotzen ari dira herritarrak Euskal Herriko hamaika txokotan, baita Donostian ere, noski. Hain zuzen ere, Martuteneko auzo elkarteak eta euskara batzordeak iragarri dute kilometro bat erosi dutela Duranan (Araba), hilaren 25ean Martutenen bertan hartuko duten lekukoaz gain. Horrela, Martutenekoek hilaren 27an hartuko dute lekukoa Duranan, gauerdian, eta auzotarrak parte hartzera deitu dituzte.

Horretarako, hara joateko autobusa antolatu dute, baita egitaraua ere. Hilaren 27ko 20:00etan, musika jarriko dute Martutenen, baita ogitartekoak jateko aukera eskaini ere. 22:30ean abiatuko da auzoko autobusa Duranarantz eta, aipatu moduan, gauerdian hartuko dute lekukoa. 02:00ak aldera, Martutenera itzuliko dira, autobusean. 30 euroren truk, ogitartekoa eta autobuserako txartela eskuratu dezakete herritar guztiek, 15 euroren truk auzo elkarteko bazkideek eta 5 euroren truk haurrek.

Beheko karteletan dituzue xehetasunak, baita Martuteneko Korrika Kulturaleko jarduerak ere.

Txomiñeneko osasun zentroaren lanak 2027an bukatzea aurreikusten du alkateak

Irutxuloko Hitza — 2026-03-03 12:42:17

Arteleku plazako anbulatorio berriaren lanak aurrera doazen bitartean, Donostiako Udalak Txomiñeneko lursaila Eusko Jaurlaritzari doan lagatzea onartu du. Horrela, udal jabetzakoa izateari utzi dio, titulartasuna Jaurlaritzaren esku utzita. Gogoratu behar da, Osasun Sailak 9,4 milioi euro inbertituko dituela.

Goikoene kalearen ondoan dagoen eremuan ari dira lanean, eta osasun zentroaren eraikuntza 2027rako bukatzea aurreikusten du udalak. Horrela baieztatu du gaur Jon Insausti alkateak, Tokiko Gobernu Batzordearen osteko agerraldian. Epeak betetzen ari direla esan du alkateak.

Anbulatorio berriak Antzieta kalean dagoena ordezkatuko du. Eraikinak 3.307 metro koadro erabilgarri izango ditu lau solairutan banatuta. 30 kontsultategi izango ditu: Familia medikuntzarako 21 —hamaika mediku eta hamar erizaintzakoak—, pediatriako bost —hiru mediku eta bi erizaintzakoak—, bi emakumeen arretarako, beste bi fisioterapiarako eta gimnasio bat. Halaber, sei administrari postu izango ditu. Horrez gain, senda gela, odola ateratzeko gela, bestelako probetarako lekua, larrialdiak eta talde jardueretarako gela izango ditu. Hirugarren solairuan, adikzioak artatzeko zentro bat jarriko dute, eta eraikinean Biogipuzkoak ikerketarako bulegoak izango ditu.

Aspaldiko eskaera

Loiola, Txominenea eta Martuteneko bizilagunen aspaldiko eskaera zen, izan ere, txiki geratu da egun artatzen dituen 7.500 bizilagunei arreta emateko; eta are gehiago, datozen urteetan ingurua 17.000 bizilagun izatera iristea aurreikusten dela kontuan hartuta.

Udalak Torrua Zaharreko lursaila garbitu du, bi urteren ondoren

Irutxuloko Hitza — 2026-02-26 13:07:06

Zabor pilaketaren ondorioz, bizilagunen kexak eragin izan dituen Torrua Zaharreko lursaila erabat garbitzeari ekin diote udal langileek gaur goizean, aurretik abisatu gabe. Martuteneko 27 Industrialdea dagoen orubean esku hartzeari ekin aurretik, udaleko zerbitzu teknikoek hainbat ikuskapen bisita egin dituzte, metatutako hondakinen irismena ebaluatu, eta beharrezko jarduerak zehaztu dituzte garbiketaren, segurtasunaren eta osasungarritasunaren ikuspegitik.

Hala, lurzatia osorik garbitu dute, utzitako hondakinak erretiratuz eta araudiaren arabera kudeatuz. Ondoren, itxitura perimetrala egin edo sendotu dute, hesiak disuasio eta babes funtzioa behar bezala betetzen duela bermatuz. Azkenik, kontrol eta jarraipen neurri osagarriak hartuko dituzte, isuri berriei aurre hartzeko, baita zonaldearen aldizkako zaintza ere.

27 Industrialdearen ondoko Torrua Zaharreko lursaila, zikinkeriaz beteta, asteazkenean.EH Bildu

Bi urteren ondoren

Otsaileko udalbatzarra egin dute gaur, eta, hain justu, EH Bilduk lursailaren egoeraren inguruko mozioa aurkeztu du, udal gobernuari eskatuz eremua garbitu zezala. Hain zuzen ere, Garbiñe Alkiza zinegotzia mozioa aurkezten ari zen bitartean zeuden makinak eremu horretan, zaborra kentzen: “Ez da kasualitatea izan, bere utzikeria zuritzeko ahalegina baizik. Gogoratu nahi dugu urtarrilean Arartekoa ere mintzatu zela egoeraz”, salatu du EH Bilduk.

Ildo beretik, oposizioko taldeak gogorarazi du “duela bi urte” eraman zuela auzia estreinakoz udalbatzarrera: “Orduan Plan Berezi bat egitea eskatu genuen partzela horri beste erabilera bat emateko, eta udal gobernuak ezetz esan zigun. Geroztik, zaborra pilatzen joan da. Gaur berriro ekarri dugu kontrol mozioa, izan ere azken bi urteetan bi aldiz egon gara 27 Industrialdeko langile eta erabiltzaileekin, eta haien kezka helarazi digute gaiarekin”.

Garbiñe Alkiza EH Bilduko zinegotziak 27 Industrialdearen ondoko lursailaren egoerari buruzko mozioa aurkeztu du udalbatzarrean.EH Bildu

Hiri Mantentze eta Zerbitzuetako zinegotzi Carlos Garciak udalbatzarrean azaldu duenez, horrelako lursailetan esku hartzeko beharrezkoak diren administrazio prozedurak izapidetu behar dira, baita hiri mantentze, osasun publiko eta ondarearen arloan eskumena duten udal arloen arteko koordinazioa ere, aurrekontu partida edukitzeaz gain. Halaber, herritarren eta enpresen erantzunkidetasuna eskatu die, “izan ere, hondakinak legez kanpo biltegiratzea arau haustea da, hiri osoari kalte egiten dio eta herritar guztiengan eragina duten kostu ekonomikoak eta ingurumenekoak sortzen ditu”.

Martuteneko Apostolutza eremuan etxebizitzak eraiki ahal izango dituzte

Irutxuloko Hitza — 2026-02-24 12:00:06

Donostiako Udalak duela bost urte baimendu zuen Martuteneko Apostolutza eremuaren birsortze partziala. Leku horretan zegoen Sortzez Garbia parrokia eta kapera bat. Atzerapenak atzerapen, udalak behin betiko onartu du eremu hori birpartzelatzeko proiektua.

Helburua da hiri antolamendurako plan orokorrean (HAPO) aurreikusitako hirigintza antolamenduaren ondoriozko onurak eta kargak jabeen artean ekitatez banatzea.

Birpartzelazio horrek eremua berroneratzea ahalbidetuko du, 42 etxebizitza eraikitzea aurreikusten den hirigintza garapenarekin; 26 etxebizitza libre, zortzi tasatu eta zortzi alokairu sozialekoak.

Omenaldi polita egin dio Martutenek 35 urteren ondoren ateak itxiko dituen Txoko Berri tabernari

Irutxuloko Hitza — 2025-12-23 16:59:36

Gaur esango du agur Martutene auzoko taberna ezagun eta maitatu batek: Txoko Berri tabernak, hain zuzen. Nela eta Joakin Espainiatik etorri ziren auzora bizitzera 1980ko hamarkadan, eta 35 urtez kudeatu dute taberna. Gaur hartuko dute erretreta.

Pasa den larunbatean omenaldia egin zioten auzokideek, Martujaiak taldeak antolatuta: Txalaparta, txapela, loreak, kantuak… Denetarik izan zen bikoteari egin zioten espero gabeko omenaldian. “Urrutitik etorri arren, auzokoak zarete, Martutenez Harro”.

Nelak eta Joakinek hitza hartu zuten, eta bizilagun eta bezeroen maitasunari eskerrak emateaz gain, gauza bat utzi zuten argi: “Auzotik ikusiko gara”.