Irutxuloko Hitza

Sanjoanak, auzoz auzo, iruditan

Irutxuloko Hitza — 2026-06-24 10:58:13

Piztu da sugarra Donostiako auzo eta herrietan; beroaldi izugarriaren aurrean, txinpartek eztanda egin dute bart gauean San Joan bezperarekin, eta irudi ederrak utzi dizkigu, hiriko txoko desberdinetan.

Hain zuzen ere, hemen dituzue Donostiako auzo eta herri gehienetako San Joan bezperako irudiak; Antiguakoak, Egiakoak, Loiolakoak, Sagueskoak, Parte Zaharrekoak, Zubietakoak, Aietekoak, Intxaurrondo Zaharrekoak, Herrerakoak, Intxaurrondokoak, Larratxokoak, Martutenekoak, Amarakoak eta Amara Berrikoak:

Antigua: Joseba Parron San Sebastian argazkilariaren eskutik.

Egia: Asier Gonzalez de San Pedro argazkilariaren eskutik.

Loiola: Nagore Garmendia Artanoren eskutik.

Sagues: Asier Gonzalez de San Pedro argazkilariaren eskutik.

Parte Zaharra: Aratz Garcia Zaldua argazkilariaren eskutik.

Zubieta: Jon Arroyoren eskutik.

Aiete: Aieteko euskara batzordearen eskutik.

Intxaurrondo Zaharra: Beñat Parra Rodriguezen eskutik.

Herrera: Herrerako jai batzordearen eskutik.

Intxaurrondo: Plazara Goaz euskara batzordearen eskutik.

Larratxo: Larratxoko jai batzordearen eskutik.

Martutene: Martuteneko auzo elkartearen eskutik.

Amara: Aitor Erkizia argazkilariaren eskutik.

Amara Berri: Aitor Erkizia argazkilariaren eskutik.

Datozen egunetan irekiko dute Anoetako estadio txiki berritua

Irutxuloko Hitza — 2026-06-23 12:08:24

Prest dago Anoetako estadio txiki berritua, eta datozen egunetan irekiko dutela baieztatu du Jon Insausti alkateak, Tokiko Gobernu Batzorde osteko agerraldian. “Ekaina bukatu baino lehen prest egongo da. Lizentzia batzuk falta dira, erremate batzuk, baina horretan lanean dabiltza udaleko teknikariak”, adierazi du alkateak.

Hobekuntza ugari egin dituzte estadio txikian. Esaterako, atletismoko pisten zoladura berritu dute, belar naturaleko azalera birdimentsionatu dute —errugbi zelaiak guztira 113 x 70 metroko belar naturala izango du, homologazio araudiaren arabera—, lehiaketak birkokatu dituzte aldi berean egin ahal izateko —luzera, hirukoitza, pisua, mailua, diskoa, xabalina, …—, estalki berria jarri diote, eta gimnasioak zein aldagelak berritu dituzte.

Harmailari dagokionez, 1.298 lagunentzako edukiera izango du, eta horietatik 26 mugikortasun murriztua dutenentzako izango dira.

Topoaren Anoetako geltokiaren atari berria, ia prest: «Udazken hasieran egongo da funtzionamenduan»

Irutxuloko Hitza — 2026-06-22 13:11:17

Aurrera doaz topoaren Anoetako geltokiaren atari berriaren lanak, eta hedabideentzako bisita egin dute astelehen goizean geltokian Susana Garcia Chueca Mugikortasun Jasangarriaren sailburuak, Jokin Aperribai Realeko presidenteak, Miguel Angel Paez Azpiegituren eta Mugikortasun Jasangarriaren sailburuordeak, Antonio Lopez ETSko zuzendari nagusiak eta kirol taldeko ordezkaritza batek.

Sailburuak azaldu duenez, Anoetako geltokiaren bigarren atariaren egitura amaituta dago, eta estaldura lanei ekin diete langileek. Horrela, Eusko Jaurlaritzaren aurreikuspena da azpiegitura hori “udazken hasieran” irekitzea. Garciak eta Aperribaik euren hitzartzeak hasi dituzte “doluminak” adieraziz joan den astean metroaren igarobidearen lanetan hildako langilearen gertukoei.

Atari berria funtzionamenduan jartzean, bi atari izango ditu, beraz, Anoetako geltokiak: egungoa eta udazkenean irekiko dutena. Izan ere, Anoetako geltokiaren eraberritze integraleko proiektuaren barruan sartzen dira gainazaleko bigarren atari horren eraikuntza, egungo atariaren birmoldaketa eta nasen berriztapena eta luzapena. Era berean, “inguruko bideen berrantolaketa konplexu eta sakona egin da”, sailburuaren hitzetan. “Atari berriaren helburua Anoetako terminalaren edukiera hobetzea da, haren fluxuak hobetuz, batez ere pertsona asko biltzen diren ekitaldietan (partidak, kontzertuak, eta abar)”, gaineratu du.

Horrela, bigarren ataria martxan jartzen dutenean hasiko dituzte egun funtzionamenduan dagoenaren birmoldaketa lanak, “bi eraikinek beharrezko koherentzia izan dezaten”, sailburuaren hitzetan. Era berean, Garciak nabarmendu du “lanen lehen faseetan, inguruko bideen berrantolaketa osoa” egin zutela, “Aita Donostia plazako biribilgune zaharra barne, Donostiako Udalak zirkulazioaren arloan ezarritako jarraibideei jarraituz”. “Etapa horren ondoren, eragindako zerbitzuak desbideratu ziren, hau da, lurpeko elektrizitate, telefono edo ur horniduren hodiak, nasetarako sarbide berriko pantailak (hormak) egin aurretik”, gaineratu du.

Hiru milioi joan-etorri

Sailburuak azaldu duenez, Anoetakoa gehien erabiltzen den bigarren geltokia da, 2025ean hiru milioi joan-etorri erregistratu baitzituzten: “Obra honek pertsonen fluxua errazten du partida eta ekitaldietan, Anoetara joaten diren herritarren segurtasun eta erosotasun baldintzak hobetuz”. Gaineratu duenez, “zelaiaren inguruan oinezkoentzako espazioak zabaltzea lortu da”.

Horrela, “Gipuzkoak aurten biziko duen garraioaren iraultzaren” testuinguruan kokatu du Garciak Anoetako geltokiko bigarren ataria, Altza-Galtzaraborda tartea “hilabete barru baino lehenago irekitzearekin” eta “udazkenean” abiaraztekoak diren metroaren igarobidearekin batera —%50eko gainkostua aurreikusi zuen joan den astean Garciak—.

Paella lehiaketa eta jana Amara Berriko sanjoanetan, larunbataz gozatzeko

Irutxuloko Hitza — 2026-06-20 17:24:29

San Joan bezperaren bueltan antolatzen ditu urtero Ikasbide kultur elkarteak Amara Berriko sanjoanak, eta, hain zuzen ere, asteburu honetan ari dira ospatzen jaien asteburu indartsua.

Larunbat goiz osoan zehar, eguraldia lagun, giro ederra egon da auzoko kaleetan, eta, ohiko legez, paella lehiaketa arrakastatsua egin dute Probestu plazan. Eta, noski, baita paella jana ere, are arrakastatsuagoa.

Jarraian, irudi bilduma ikus dezakezue:

Kantuan omendu dute Joxean Urbieta

Irutxuloko Hitza — 2026-06-19 12:11:44

Amara Berriko Xirula Mirua musika eskolak ateak itxiko ditu 42 urteko ibilbidearen ondoren. Izan ere, martxan jarri zuen Imanol Urbietaren seme Joxeanek erretiroa hartuko du. Musika irakasteaz ez ezik, euskaraz egiteko toki bat ere izan da eta auzoan eusk kulturaren alde egindako lana eskertzeko, egungo ikasleek, ikasle ohiek, gurasoek eta lagunek ezusteko omenalditxoa egin zioten ostegun iluntzean. Azken eskola amaitu eta ikasleak agurtzeko atera zenean, dozenaka lagun zain zituen ondoko plazatxoan.

Erik semearen lagunek eta Xirula Mirulako haurrek dantzatu zioten Agurra, eta musikariek lagunduta, bere aitak sortutako Bizitza kantu bat da, Behin betik eta Txoria nintzela kantak abestu zizkioten, berari espresuki sortutako pare bat ere, eta opari, oroigarri batzuk eman zizkioten. Hunkituta jaso zituen denak, baita besarkada eta muxu pila ere.

Ez zuen hitzik egin nahi izan, eskerrak eman soilik, ezta askotan askok eskatuta ere, txisterik (txar) kontatu. Zahatoari trago bat egin zion, “gure santua”, esan ondoren, eta ohartarazpen bat ere. “Ez naiz gauza hauen zale, baina onartu egin behar dira. Gauza hauen zale, bai alde. Beraz hurrena jubilatzen denak, ederra dauka!”. “Mila esker! Badakizue non gauden, zeozer behar baduzue, etorri”. “Txispun eta etxera” esanez, agurtu zituen bertaratutakoak, baina une hori amaiera izatetik urruti zegoen, opari, marrazki, muxu eta besarkada eman nahi zioten haurrek eta helduek inguratu baitzuten. “Ez al duzue etxera joan behar?” galdetu bazien ere, denei kasu egiteko tartea hartu zuen Urbietak.

Loiolako Erriberako auzo elkarteak Eusko Legebiltzarrera eraman ditu bere aldarrikapenak

Irutxuloko Hitza — 2026-06-10 10:45:52

Eusko Jaurlaritzak Loiolako Erriberan libre dauden azken lursailak zuzkidura bizitokiak eraikitzeko erabili nahi ditu, zerbitzuetarako aurreikusita bazeuden ere. Zehazki, 83 zuzkidura bizitoki eraiki nahi dituzte auzoaren sarreraren ondoan dagoen lursailean eta 200 Iesu elizaren ondokoan. Kopuru handiegiak direla eta auzoak zerbitzuak behar dituela iritzita, proiektu horien aurka agertu da azken hilabeteotan Loiolako Erriberako auzo elkartea, eta bere aldarrikapenak Eusko Legebiltzarreko Lurralde Plangintza, Etxebizitza eta Hiri Agenda Batzordera eraman zituen asteartean.

Hain zuzen ere, Javier Santos auzo elkarteko bozeramailean parte hartu zuen batzordean: “Ez gatoz pribilegioak eskatzera, auzoaren jatorrizko diseinuaren bigarren zatia betetzeko eskatzera gatoz: auzotarrei zerbitzuak eta gizarte bizitza ematen zizkiena”. Gogorarazi zuen, halaber, auzoak 6.000 biztanle inguru baditu ere, ez duela osasun zentrorik, haurtxokorik, gaztelekurik edo jubilatuen elkarterik.

Horregatik, zuzkidura bizitokien aurretik, halako zerbitzuen beharra analizatzea eta zerbitzu horiek martxan jartzea lehenesteko eskatzen ari da auzo elkartea. Horren harira, “ez gara klasistak”, gaineratu zuen Santosek batzordean.

“Enpatia”

Santosen hitzartzearen ostean, PPk batzordean bertan egindako galderei erantzunez, Denis Itxaso Etxebizitza sailburuak Loiolako Erriberako bizilagunei erreferentzia egin zien, “ardura eta enpatia” eskatuz: “Etxebizitzaz ari garenean, komeni da jakitea gaur egun ahots gutxien dutenak emantzipatu ezin diren gazteak, bakarrik bizi diren adinekoak edo etxebizitza eskuragarririk aurkitzen ez dutenak direla. Horietako batzuk Loiolako Erriberako kide dira eta aukera bat merezi dute”, azaldu zuen sailburuak.

Dortsal guztiak agortu ditu AB Krossak, hamaikagarrenean ere

Irutxuloko Hitza — 2026-05-30 23:18:50

Irteera eta helmuga, Isabel II.a hiribidean jarritako arkuan zeuden. Hobe esan, askuetan, gaur bi baitzeuden, Irutxuloko Hitzak ere jarri baitu berea. 19:00etan abiatu dira eta ordubete baino lehen partaide denak bueltan ziren. Bide ertzetan, ohi bezala, jende ugari bildu da korrikalariei txalo egin eta animoak emateko. Turkesa kolorea aukeratu dute aurten kamisetarako eta hura soinean parte hartu dute askok. Ohialean, haur eta heldu baten eskuak marraztuta daude, familia asko erakartzen baititu AB Krsosak, eta helmugan asko errepikatzen den irudia da gurasoek seme-alabak eskutik helduta dituztela osatzea azken metroak.

Sorreran auzoan euskara sustatzea zuen xede, orain, gainera, helburu gehigarri du kirola sustatzea. Asmatu dutela dirudi, hasierako urteetan ibilbidean begira egoten ziren haurretako batzuk, egun, partaide baitira. Hala esan adierazi du antolatzaileetako batek Probestu plazan sari banaketa hasi aurretik, indarberritzeko mokadutxoa amaitu denean.

Sari banaketa hasteko, zozketan egokitutako opariak banatu dituzte. Ondoren, Naiara Sarasolak eta Javier Abadek IRUTXULOKO HITZAren urtebeteko harpidetza jaso dute opari, lehen amaratarrak izan baitira. Podiumeko mailetara igo direnak, berriz, honakoak izan dira: emakumezkoetan, garailea zer den izatea badakien Eguzkiñe Zabaleta izan da lehena, Olatz Irazoki oiartzuarra, bigarren, eta Nerea Sanz donostiarra, hirugarrena; eta gizonezkoetan, aldiz, Jon de la Cuestabeasaindarra, Ioritz Etxeberria igeldotarra eta Imanol Gonzalez altzatarra, hurrenez hurren.

Talde argazkia eta Peloxen kontzertuarekin luzatu dute arratsaldea. Hori izan da bukaera, baina arratsaldeari lasterketa baino bi ordu lehenago ekin diote, haurrei bideratutako jarduerekin. Margotzeko aukera izan dute, baita jolastu eta askaria jatekoa ere. IRUTXULOKO HITZAk bere materiala erosteko postua jarri du eta antolatzaileek edari salmenta egin dute. Bien bitartean, parte hartzaileak beren dortsala jasotzeko aukera izan dute.

Jarraian, probako hainbat argazki:

Loiolako Erriberako, Intxaurrondoko eta Groseko haurreskola berrien lanak bukatu dituzte

Irutxuloko Hitza — 2026-05-27 15:43:53

Donostiako Udalak lehen zikloko hiru haurreskola berrien obrak amaitu ditu, eta 2026-2027ko ikasturtean irekiko dituzte. Haurreskola berri horiek Loiolako Erriberan, Intxaurrondon eta Grosen daude, eta 89 plaza berri eskainiko dituzte zero eta bi urte bitarteko haurrentzat. Horren bidez, eskari historiko bati erantzuten zaio, hain zuzen ere orain arte eskaintza nahikorik ez zuten hiriko eremuetan.

“Haurreskoletako plaza berri bakoitza aurrerapauso zehatz bat da, emakumeek lan-bizitzaren eta seme-alabak zaintzearen artean hautatu behar ez izateko. Orain arte haurreskolarik ez zuten auzoetan eskaintza publikoa zabaltzea berdintasun-politika bat ere bada”, adierazi du Ane Oiarbide Berdintasuneko zinegotziak.

Eusko Jaurlaritzaren diru laguntza bati esker egin dira obrak. Ekarpen hori Europar Batasunak Next Generation EU funtsen bidez finantzatutako Suspertze, Eraldatze eta Erresilientzia Planaren barruan dago, eta 1.828.313,70 euroko aurrekontua izan du guztira.

Hiru haurreskola berriak

Loiolako Erriberako haurreskolak, Gabriel Laffitte plazan kokatua, 34 plaza eskainiko ditu: zortzi plaza, urtebetetik beherakoentzat, eta 26, urtebetetik bi urtera bitarteko haurrentzat. Intxaurrondokoak, Baratzategi kaleko 19. zenbakian, 21 plaza izango ditu, honela banatuta: zortzi, urtebetetik beherakoentzat, eta hamahiru, 1 eta 2 urte bitartekoentzat. Bestalde, Groseko Zemoria kaleko 20. zenbakiko haurreskolak ere 34 plaza izango ditu, eta horietatik zortzi urtebetetik beherakoentzat izango dira, eta 26, 1 eta 2 urte bitarteko haurrentzat.

Datozen asteetan matrikulazio prozesua abian jarriko da, herritarren arretarako UdalInfo udal zerbitzuaren bidez. Plaza esleipenaren kudeaketa Eusko Jaurlaritzaren zerbitzuaren ardura izango da. Zerbitzu horrek haurreskola publikoetarako sarbidea koordinatzen du, eta leihatila bakarra da haur hezkuntzako lehen zikloan plaza eskatzen duten familientzat.

“Emakumeak lan merkatuan berdintasun baldintzetan sartu eta mantentzeko faktore erabakigarrienetako bat da oraindik ere haur hezkuntzan plaza bat eskuratzea”, nabarmendu du Oiarbidek. Gaineratu duenez, “eskaintza publikoa, doakoa eta etxetik gertukoa bermatzea tresna eraginkorrenetako bat da berdintasunean aurrera egiteko eta emakumeek beren karrera profesionalaren eta seme-alaben zaintzaren artean hautatu beharrik ez izateko”.

Hamaikagarren AB Krossak badu bere kamiseta

Irutxuloko Hitza — 2026-05-15 10:04:48

Maiatzaren 30ean egingo dute 11. AB Krossa, euskararen aldeko Amara Berriko herri lasterketa, eta dagoeneko iragarri dute zein izango den aurtengo kamiseta. Turkesa kolorekoa da aurtengoa eta lasterketan izena emanda eskuratu daiteke.

Berritsu euskara elkarteak antolatu du proba, IRUTXULOKO HITZAren laguntzarekin, urteroko legez. Aurten, era berean, Niessen laguntzaile berria dauka AB Krossak.

Loiolako Erriberak behar dituen zerbitzuak lehenestea nahi dute

Irutxuloko Hitza — 2026-04-24 00:00:50

Eusko Jaurlaritzak Loiolako Erriberan libre dauden azken lursailak zuzkidura bizitokiak eraikitzeko erabili nahi ditu, zerbitzuetarako aurreikusita bazeuden ere. Zehazki, 83 zuzkidura bizitoki eraiki nahi dituzte auzoaren sarreraren ondoan dagoen lursailean eta 200 Iesu elizaren ondokoan. Kopuru handiegiak direla iritzita, ahotsa altxatu du auzo elkarteak: «Loiolatik gertuen dagoen lursailean, kirol ekipamenduak zeuden aurreikusita, eta Amara Berritik gertuen dagoenean, aurreikusita zegoen Eusko Jaurlaritzak Gipuzkoan dituen zerbitzu guztiak zentralizatzeko eraikin bat egitea. Horrela aurreikusita zegoen auzoa definitzeko plana egin zenetik», azaldu du auzo elkarteko kide eta bozeramaile Javier Santosek.

Loiolako Erriberan bizitoki horiek guztiak pilatzea «astakeria» dela salatu du auzo elkartekoak: «Suposatuko luke Donostiako auzo batean eraikitzea hurrengo urteetan Bizkaia osoan eraikiko duten zuzkidura bizitokien kopuru bera». Gaineratu duenez, bizitoki eredu horrek agintarientzat duen «abantaila da hiri antolamenduko plan orokorraren gainetik pasatu zaitezkeela, zuzkidura bizitokiak eraikitzeko ez dutelako etxebizitza araudia aplikatzen, bizitegi larrialdiko araudia baizik».

Imanol Pradales lehendakaria eta Jon Insausti alkatea Loiolako Erriberan, zuzkidura bizitokien inguruko agerraldi batean.EAJ

Zerbitzuen beharra

Aipatu moduan, lursail horiek zerbitzuetarako zeuden aurreikusita, eta auzoak halakoen beharra duela nabarmendu du Santosek. Bereziki, etorkizunean anbulatorio bat beharko dutela uste du: «Anbulatorioari dagokionez, Amara Berriren mende gaude, dagoeneko 30.000 bizilaguni zerbitzua ematen diena (Loiolako Erribera, Amara Berri eta Morlans). Txomiñenean anbulatorio berri bat eraikiko dute, Txomiñeneari, Lorategi Hiriko bizilagunei eta, etorkizunean, kuartelen eta kartzelaren eremuetan biziko direnei zerbitzua emango diena; beraz, hori ere kolapsatu egingo dela uste dugu. Eta ona etortzen badira bizitzera beste 250-300 pertsona, tartean arreta sanitarioa beharko duten adinekoak, sistema are gehiago kolapsatuko da». Gaur egun, daukatenarekin «moldatu» daitezkeela dio, baina «250-300 bizilagun berri» hartzen baditu Loiolako Erriberak, «argi» dugu beste anbulatorio bat beharko duela: «Eta badakigu ez daukatela egiteko asmorik».

Anbulatorioa, ordea, ez da duten behar bakarra: «Ez daukagu haurtxokorik, gaztelekurik ezta adinekoentzako gunerik ere, Loiolara edo Amara Berrira joan behar dugu. Egin dezakegu, baina 6.000 biztanleko auzo bat gara, eta ez da gutxi».

Lursail horiek zerbitzuetarako zeuden aurreikusita, eta auzoak halakoen beharra duela nabarmendu du Santosek

«Kopuru minimo arrazionala»

Auzo elkartekoen ustez, Loiolako Erriberan eraiki beharrekoa eraikita dago, baina zuzkidura bizitokiak eraikitzera badoaz, «kopuru minimo arrazionala» izatea eskatzen ari dira, 283 horietatik urrun.

Era berean, egitekotan, donostiarrentzat egitea nahi dute: «Jaurlaritzaren irizpideekin, adibidez, Getxon urtebetez erroldatuta dagoen pertsona batek, zerrendan Donostiako baten gainetik badago, lehenago jasoko du bizitoki horietako bat. Hau da, ez du erraztuko Donostiako gazteen emantzipazioa bere horretan». «Behin erabakia hartuta, esajerazio bat iruditzen zaigu Bizkaian bezain beste zuzkidura etxe eraikitzea auzo honetan, dorre altuak eraikiz. Kopuru minimo arrazionala eraikitzen bada, eskatzen dugu udalaren menpekoek funtzionatzen duten moduan funtzionatzea, horiek ez direlako gaizki funtzionatzen ari Donostian; Jaurlaritzarenak, aldiz, bai», gaineratu du Santosek. Ahotsa are gehiago goratzeko, aldarrikapen horiek guztiak kalera aterako dituzte gaur, 18:00etan: bi lursailak lotuko dituzte, manifestazio baten bidez.

Gaska kiroldegiko gimnasioa berritu dute erabiltzaileentzat

Irutxuloko Hitza — 2026-04-09 13:10:25

Bihar irekiko dituzte Jose Antonio Gaska udal kiroldegiko gimnasioak, berritu eta ekipamendua hobetu ondoren. Donostiako Udalak kirol instalazioak modernizatu ditu 21.000 euroko inbertsioa eginez. Orain, 195 metro karratuko azalera du, erabiltzaileei kalitate handiagoko zerbitzua eskaintzeko.

Zehazki, gimnasioan lan hauek egin dituzte: zoruak eta hormak berritu dituzte, eta makinen zein entrenamenduko beste elementu batzuen hornidura areagotu eta eguneratu da. Era berean, espazioak berrantolatu dira, eremu berriak txertatu ahal izateko eta aretoaren funtzionaltasuna hobetzeko.

Gaska kiroldegiko gimnasioa.Donostia Kirola

Hobekuntza nagusien artean, pisu libreko eremua bere horretan mantendu da, baina materiala berritu dute. Kardio eremua handitu dute makina berriekin eliptikoak, arraun ergometroak eta bizikleta estatikoak. Gainera, bi eremu berri sortu dituzte: indar makina gidatuak dituen eremu bat eta entrenamendu funtzionalerako espazio espezifiko bat.

Iñaki Gabarain Kiroletako zinegotziak nabarmendu du Gaskan egindako hobekuntzarekin, besteak beste, gimnasioen ekipamendu sarea indartzen jarraitzen duela udalak: “Egun 5.000 metro karratutik gorakoa da sare hori, eta horrelako jarduketen bidez, oro har espazio modernoago, irisgarriago eta moldakorragoen aldeko apustua egiten dugu”.

EAJ eta PSE-EE ez daude ados Loiolako Erriberako 83 zuzkidura etxebizitzen banaketarekin

Irutxuloko Hitza — 2026-03-04 12:23:55

Etxebizitza da Donostiak duen behar eta arazo nagusienetakoa. Era berean, etxebizitza da EAJren eta PSE-EEren arteko desadostasun gehien sortzen ari dena. Loiolako Erriberako lursail batek sortu zuen lehen talka, auzoko elizaren parean eta trenbidearen ondoan dagoen eremuan dagoenak. Han eraiki beharreko zuzkidura etxebizitza kopuruarekin ez daude ados udal gobernua osatzen duten bi alderdiak. Jeltzaleek 400 etxebizitza kabitzen direla diote, eta sozialistek 200.

Orain, berriz, ez daude ados Loiolako Erriberako beste lursaileko zuzkidura etxebizitzen nolakotasunarekin. Errepide nagusitik gertu dagoen auzoko lursailean 83 zuzkidura etxebizitza eraikitzea adostu zuten alde guztiek. Berez, adinekoentzako eta gazteentzako izango direla dio bere garaian Etxebizitza Sailak eta Donostiako Udalak sinaturiko hitzarmenak. Halere, Jon Insausti alkateak atzo iragarri zuen etxebizitza guztiak soilik irisgarritasun arazoak dituzten adinekoentzat izango direla. Batez ere, Bizigune programaren bidez etxebizitza lagatzen duten horientzat.

Etxebizitza Sailak, ordea, 83 zuzkidura etxebizitza horiek adinekoen eta gazteen artean banatuko direla berretsi zuen. Are gehiago, kopuru zehatzak eman zituzten. 70 urtetik gorako adinekoentzako, bi gelako 28 etxebizitza eraikiko dituzte. Aldiz, gela bakarreko 55 apartamendu egingo dituzte gazteentzat. Legeak horrela dioelako egin da banaketa hori; 36 urtetik beherakoentzako izan behar dute etxebizitza garapenen %40a.