Uztailaren 18an jarriko dute martxan Topoaren Altza-Galtzaraborda tartea
Saihesbide berriak Amara eta Pasaia arteko geltoki guztietan 7,5 minutuko maiztasunak eskaintzea ahalbidetuko du.
Eusko Jaurlaritzako, ETSko eta Euskotreneko ordezkariak, Pasai Antxoko Topo geltokian.Irekia 
Eusko Jaurlaritzako Mugikortasun Sailak jakinarazi duenez, Topoaren Altza-Galtzaraborda tarte berria uztailaren 18an hasiko da zerbitzua ematen. Horren inguruko xehetasunak eman dituzte gaur goizean Susana Garcia Chueca Mugikortasun sailburuak, Miguel Angel Paez Azpiegitura eta Mugikortasun sailburuordeak, Antonio Lopez ETSko zuzendari nagusiak eta Javier Seoane Euskotreneko zuzendariak. Pasai Antxoko Gure Zumardia plazaren azpiko geltokian egin dute agerraldia.
Saihesbide berria martxan jartzean, Altzak geltokia dagoeneko ez da irteera gabekoa izango. Izan ere, lotura izango du laster estreinatuko duten Pasai Antxoko lur azpiko geltoki berriarekin. Gerora, terminal zaharra desegin eta Pasai Antxo zeharkatzen duen zubibidea kenduko dute.
Obra zuzendariak azaldu duenez, geltoki berriaren atondoaren barruan amaitu dira Altza eta Galtzaraborda arteko plaka gaineko trenbidea egikaritzeko lanak. Hala, Galtzarabordatik hurbilen dagoen tartea, balasto gaineko trenbidea, baino ez da falta. Terminala ia amaituta dago, eta trenbideko obra zibila ekainean amaituko da, sarrerako koralina eta metal arotzeriako erremateak, aireztapen esparruetako trenkadak eta gela teknikoak egitearen faltan.
Instalazioei dagokienez, geltokiaren muturretan dauden nasa azpiko aireztapenak eta larrialdikoak mihiztatzen ari dira. Era berean, seinaleztapen lanek aurrera jarraitzen dute, eta katenaria zurrunari dagozkion barrak jartzeko lanak hasi dira.
Galtzarabordan, berriz, aurrera egin da hormak zimendatzeko lanetan, eta lanak egiten ari dira bai hormen amaieran, bai plaka balasto trantsizioko lauzan eta tunelaren irteeraren eta geltokiaren beraren artean dagoen balasto gaineko trenbidean. Sareko puntu hori estaltzeko proiektu aurreratuta dagoenez, sarea trenbide bakarrean iritsiko da Galtzarabordara eta tarte horretan hurrengo hilabeteetan bigarren bidea jarriko da.
Altzako eta Galtzarabordako geltokien arteko saihesbidean zerbitzua ematen hasteak Amara eta Pasaia arteko geltoki guztietan 7,5 minutuko maiztasunak eskaintzea ahalbidetuko du –orain arte maiztasun hori Herreraraino bakarrik zegoen, eta Altzan eta Pasaian 15 minutuko itxaronaldiak zeuden–.
