Eusko Jaurlaritzako Segurtasun Sailak salatu du futbol partida bateko epaile bati jazarri diotela ertzaina izateagatik
Eusko Jaurlaritzako Segurtasun Sailak salatu du Donosti Cup futbol txapelketako epaile batek jazarpena eta irainak jasan zituela atzo arratsaldean, Zubietan (Gipuzkoa). Epailea ertzaina delako jazarri zioten, Segurtasun Sailaren arabera. Gizonak Ertzaintzak lagunduta utzi behar izan zituen kirol instalazioak. Segurtasun Sailak ohar batean jakinarazi duenez, neurketa jokatzen ari zirenean, bi taldeen arteko giroa okertzen hasi zen, eta epaileak, bertako arduradunekin hitz egin eta gero, partida amaitutzat eman zuen arauzko denbora bete baino lehen. Partida bukatu aurretik, epaileak txartel gorria erakutsi zion talde gipuzkoar bateko jokalari bati. Orduantxe, Segurtasun Sailaren arabera, talde horretako jokalariek epailea inguratu zuten, eta haren aurka oihuka hasi ziren. Epaileak berarengandik urruntzeko keinua egin zuenean, ikusle batzuk ere zelaira sartu ziren, eta epaileak babestua joan behar izan zuen aldageletara. Behin barruan zela, Segurtasun Sailaren esanetan, hainbat irain entzun zituen; besteak beste, «Epailea zipaioa», «Zipaio putakumea» eta «Txakurra»; baita Ertzaintzaren aurkako oihuak ere. Ertzaintzaren zenbait patruila bertaratu ziren, eta epaileari instalazioetatik segurtasunez ateratzen lagundu zioten. Gaitzespena Gertatutakoa «onartezina» dela adierazi du Segurtasun Sailak, eta elkartasuna adierazi dio ertzainari. Era berean, herritarrei eskatu die «iraganeko garaiak gogorarazten dituzten jokabideak» ez normalizatzeko, eta babesa adierazi die «gizarte bidezkoago baten alde lan egiten duten ertzain guztiei». Txapelketaren antolatzaileek, berriz, adierazi dute halako jokabideek ez dutela lekurik lehiaketan, eta iragarri dute gertatutakoa aztertuko dutela etorkizunean neurriak hartzeko. Era berean, nabarmendu dute parte hartu duten talde gehienek kirol legez jokatu dutela. Bestalde, Ertzaintzako Esan eta Euspel sindikatuek ere gogor kritikatu dute gertatutakoa, eta Instituzioei eta kirol arduradunei gaitzespen irmoa eskatu diete, baita ustezko erasotzaileen aurkako neurriak hartzea ere.
Zahar etxeetako gatazkari irtenbidea emateko eskatu dio ELAk Gipuzkoako Foru Aldundiari
Gipuzkoako zahar etxeetako eta eguneko zentroetako langileek greba egin dute atzo eta gaur. Aldundiari neurriak eskatzen dizkiote langileak «prekaritatetik» ateratzeko eta kaleratzeak eta murrizketak atzera botatzeko. Horretarako, egoera salatzeko manifestazio bat egin dute Ordizian (Gipuzkoa), ELAk deituta, eta Gipuzkoako Foru Aldundiak lan gatazka konpontzeko baliabideak jar ditzala eskatu dute. Soka luzeko lan gatazka da Gipuzkoako zahar etxeetakoa. Greba mugagabean dauden egoitzetan, 243. greba egunera iritsi dira. ELAk oso larritzat jo du langileen egoera. Azken urteetan lan baldintzek okerrera egin dutela azpimarratu dute, eta langileak gero eta prekarioagoak direla, batez ere emakumeak. Horren adierazletzat daukate gero eta lanaldi partzial gehiago egotea, soldata arrakala areagotzea, lan karga «izugarriak» edukitzea eta lan osasuneko arazoak gero eta gehiago izatea. Ordizian, manifestariak kalera atera dira, eta, lan gatazka konpontzeko baliabideak eskatzeaz gain, exijitu dute herriko San Jose egoitzan enpresak kaleratutako grebalaria berriro lanera itzul dadila. Atzo Donostiara eraman zituzten aldarrikapenak.
Berastegi, Berrobi eta Elduain Tolosarekin lotzeko autobus zerbitzua indartuko du Gipuzkoako Foru Aldundiak
Gipuzkoako Foru Aldundiko Mugikortasun, Turismo eta Lurralde Antolaketako Departamentuak Berastegi, Berrobi eta Elduain Tolosarekin lotzeko autobus zerbitzua (TO02) indartuko du datozen asteetan. Horretarako, lau zerbitzu berri jarriko ditu martxan linea horretan. Azahara Dominguez foru diputatuak azaldu du asmoa dela erabiltzaileen beharrei «erantzun hobea» ematea. Zerbitzu berriak uztailaren 13tik aurrera abiatuko dituzte. Egun horretatik aurrera, TO02 lineak gaueko bi zerbitzu berri izango ditu astelehenetik ostiralera: 22:30ean Tolosatik Berastegirantz eta 22:50ean Berastegitik Tolosarantz —orain arte, linea horrek ordubete lehenago arte eman izan du zerbitzua, 21:30era arte eta 21:50era arte, hurrenez hurren—. Udako hilabeteetan ordutegi horri eutsiko diote, baina, irailaren 1etik aurrera, eguneko azken autobusa 22:10ean irtengo da Tolosatik, eta 22:30ean Berastegitik. Gainera, irailaren 1etik aurrera, autobus linea horrek beste bi zerbitzu berri ere izango ditu astelehenetik ostiralera: Tolosatik 05:50ean irtengo da lehena, eta Berastegitik, 06:10ean. «Zerbitzu berri horiei esker, Renferen Aldiriko trenekin lotura egiteko aukera erraztuko da», esan du Dominguezek. «Zera nahi dugu, pertsona guztiek, udalerri txikietan bizi direnek batez ere, zerbitzu eroso, seguru, eskuragarri eta egunerokoa erraztuko duten ordutegiak izatea. Inor ez dadila behartuta egon ibilgailu pribatua erabiltzera, beste norbaiten mende egotera edo garraio publikoaren eskaintza egokirik ez izateagatik lan aukerei uko egitera. Garraio publikoaren alde egitea pertsona guztientzako aukera berdinak izango dituen Gipuzkoaren alde egitea da».
Gipuzkoako Foru Aldundiak 281 lanpostuko lan deialdi publiko bat egingo du
Gipuzkoako Foru Aldundiak iragarri du hemezortzi hautaketa prozesu egingo dituela enplegu publikoko 281 lanpostu betetzeko. Hain zuzen ere, gobernu kontseiluak oinarri arautzaileak eta oinarri horiei dagozkien deialdiak onartu ditu gaur goizean, «langile berriak modu progresibo eta egonkorrean gehitzen jarraitzeko» eta «foru langileen belaunaldi erreleboari heltzeko» asmoz. Irune Berasaluze foru bozeramaileak aurreratu du lehen azterketak ez direla 2027ko urtarrilaren 11 baino lehenago hasiko, kanpainetan laguntzeko erdi mailako teknikarien hautaketa prozesua salbu —abenduaren 1etik aurrera egin ahal izango da azterketa hori—. Onartu berri duten deialdiko postu gehienak administraziorako izango dira: 153. Horietatik 150 Gipuzkoako Foru Aldundiarenak izango dira, eta gainerako hirurak Gipuzkoako Batzar Nagusienak. Foru bozeramaileak dio deialdi horrek «langile taldearen berrikuntza bermatzeko» modua emango duela, baita kalitatezko zerbitzu publikoak ematekoa ere. «Hamarkada bakar batean langileen erdiek hartuko dute erretiroa. Hortaz, datozen urteetan beharrezkoa izango da profesional berriak modu egonkorrean sartzea». Deialdiak Gipuzkoako Aldizkari Ofizialean argitaratuko dira aurki, eta orduan irekiko dute izena emateko epea. Epe hori dagokion iragarkia Estatuko Aldizkari Ofizialean (BOE) argitaratu eta hogei egunera amaituko da.
Bi lagun atxilotu dituzte Iruñean eta bat Hondarribian, indarkeria matxista egotzita
Sanferminetako lehen egunean sei salaketa egin dituzte eraso sexistei buruzko informazio gunean, Iruñeko Gazteluko plazan. Salaketen artean bost ukituak jasateagatik egin dira, eta beste bat, irainak jasateagatik. Iruñeko Udalak ohar baten bidez adierazi duenez, ukituak egitea egotzita salatu dituzten bost lagunetatik bi atxilotu dituzte, hain zuzen, salaketak jarri ostean. Sanferminetan, Gazteluko plazako informazio gunea jarri dute martxan, eraso sexistak jasan dituzten edo jasan ditzaketen emakumeei arreta eta informazioa emateko. Bertan, profesional espezializatuek artatzen dituzte emakumeak, eta, behar izanez gero, udalaren arreta eta laguntza protokoloa aktibatzen dute. Dena den, lehen egunean profesional taldeak ez du protokoloa aktibatu behar izan. Udalaren arabera, informazio guneak arreta konfidentziala eskaintzen du, eta emakumeek anonimotasunez jaso dezakete laguntza nahiz informazioa, hala eskatuz gero. 76 urteko atxilotu bat Hondarribian (Gipuzkoa), berriz, 76 urteko gizon bat atxilotu du Ertzaintzak, Santiago Bidea egiten ari ziren emakumeei sexu erasoak egitea egotzita. Poliziak adierazi duenez, gizonak bakarrik zeuden emakumeekin hitz egiten hasten zen eta haien baimenik gabe musu ematen zien, eta ukituak egin. Joan den astean jaso zuten lehenbiziko salaketa: emakume batek adierazi zien Santiago Bidea egiten ari zela, eta Hondarribia inguruan gizon batekin topo egin zuela; harekin mintzatu eta gero gizona musukatzen hasi zitzaion, emakumeak ihes egitea lortu zuen arte. Ikerketa abiatu zuten, eta gutxienez beste sei kasuren berri izan zuten. Polizia eraso guztiak gertatu ziren lekura joan zen, eta gizona emakume bat erasotzen saiatu zela ikusita, han bertan atxilotu zuten.
Zaldibiako Udalbatzak herriko eskola garraioa bermatu dezala eskatu dio Eusko Jaurlaritzari
Zaldibiako hainbat gazte Ordiziako Oianguren ikastetxera joaten dira Lehen Hezkuntza amaitutakoan, herrian ez baitute DBH Derrigorrezko Bigarren Hezkuntzako zentrorik. Orain arte autobusez egin dute herritik instituturako bidea, baina zuzendaritzak irailetik aurrera DBHko 3. eta 4. mailan izango diren ikasleen familiei zera jakinarazi die, Eusko Jaurlaritzako Hezkuntza Sailak ez diela eskola garraioko zerbitzurik eskainiko datorren ikasturtetik aurrera. Herrigunetik ikastetxera lau kilometro baino gutxiago daudelako hartu dute erabakia. Zaldibiako Udalbatzaren eta guraso elkartearen haserrea piztu du neurri horrek. Udalbatzaren irudiko, Hezkuntza Sailak ez du kontuan hartu erabaki horrek zer-nolako eragina izango duen Zaldibiako gazteen eta familien egunerokoan, aukera berdintasunean, hezkuntzarako eskubidean, jasangarritasunean eta landa eremuen garapenean. «Neurri hori mantenduko balitz, irailetik aurrera egunero institutura joan-etorria egiteko bide zail, kaltegarri eta arriskutsua izango dute Zaldibiako berrogeitik gora ikaslek. Familien auto pribatuen menpe ibili beharko dute, inoiz gerta liteke garraio publikoan ez kabitzea edo autoentzat egindako errepidean oinez edo bizikletaz ibili behar izatea. Argi eta garbi, irtenbide desegoki eta kaltegarriak dira guztiak». Horrenbestez, Udalbatzak zera eskatu dio Jaurlaritzako Hezkuntza Sailari: erabakia berraztertu dezala, elkarrizketarako bide bat ireki dezala inplikatutako gazteen familiekin, «bidezkoagoa, seguruagoa eta koherenteagoa izango den konponbide bat» bilatzeko. «Beharko balitz, Zaldibiako Udala prest dago bitartekaritza lanak egiteko edo konponbide baten alde lan egiteko. Izan ere, aldebakarreko erabaki ulertezin eta zerbitzu publikoen murrizketa hori ikusirik, Zaldibiako ikasleek eta haien familiek Jaurlaritzaren erabakiarekiko desadostasuna agertu dute. Uste dugu Hezkuntza Sailaren betebeharra dela haurrei eskola garraioa jartzea».
