80 urte dira estropadak lehen aldiz irratian zuzenean eman zituztela

Irutxuloko Hitza

2015/09/03

Joseba Zubimendi, 1935eko lehen zuzeneko emisio hartan.

1935eko irailaren 19an Joseba Zubimendik (Donostia, 1898-Kanbo, 1939) zuzenean eman zituen irratian Donostiako estropadak. Irrati bidez egindako lehen zuzeneko kontakizuna izan zen hura. Eta horrela kontatu ahal izan zien entzuleei bistan ikusia, nola Pasai San Pedrok Hondarribiari irabazi zion urte hartako bandera. Irailaren 19a osteguna zen; itsasoaren egoera medio, 1935ean bigarren eguneko estropada lau aldiz atzeratu behar izan zuten eta ez zen iraileko bigarren igandean jokatu ahal izan, ohi den moduan. Estropada zuzenean irratitik emateko, argazkietan ikus daitekeenez, linea mikrofonikoa bota zuten Union Radio Donostia irrati etxearen emisio zentrotik mendiaren magaleraino. Garaian ziotenez, irratiak “irragiña [emisorea] Txubillo-mendian du (Igeldo ez da mendi orren izena, andik ordu-erdiko bidean dagoen erriarena baizik) eta irratola [estudioa] Donosti uri barrenean.”

Emisioaren artxiboko irudi bat.

Handik bi egunetara, El Día egunkariko euskal orrian honakoa idatzi zioten “Donostiako irratietxeari”: “Lengo estropada egunean Gazteluan giñan ta ez genun zuek edatuko berririk entzun. Baña esan digutenez gure euskera gozoari toki egin zenien ta hainbeste euskaldun aboa zabil eukiak dituzue estropadako goraberak entzuten”. Garaian, Kontxako estropadak lehen mailako ikuskizuna eta fenomenoa ziren Euskal Herrian, eta are gehiago donostiarrentzat eta bereziki abertzale eta euskaltzaleentzat. Eta ez bakarrik kirol ikuspegi batetik. “Estropadak… San Sebastian Donostia biurtzen duten estropadak. Zorionekuak bitez” idatzia da El Día egunkariko euskarazko orrian. Aquarium-eko Gure Xabiertxo erakusketan panel berezia dago gertakari honi buruz. Irailaren 27a arte zabalik izango da.