Euskararen alde egotetik euskararen alde egitera pasa nahi dute
Euskal Herrian Euskaraz-ek euskaltzaleen esperientziak eta eguneko gertaerak sare sozialetan zabaltzeko dei egin du, #EgotetikEgitera traola erabiliz.
Bulebarreko kioskoan egin dute agerraldia. (Argazkia: Lide Ferreira)
Aldaketak eragiteko, euskaldunek iniziatiba hartzea ezinbestekoa
Horrenbestez, aldaketak eragiteko, praktika sumisoa gainditu, eta praktika burujabearen aldeko hautua indartu nahi dute. Euren ekimenaren bidez euskaltzaleengan eragin nahi dute, aldaketak eragiteko euskaldunek iniziatiba hartu behar dutela erakutsiz. Baina ez hori bakarrik, baita euskaltzale erdaldunengan eta horien jarrera erosoan eragin ere, hizkuntza eskubideen bermean eragin edota egunerokoan euskaldunek bizi dituzten gatazkan agerian utzi nahi dituzte. Aldaketak tamainan emateko komunitate moduan jokatu behar dutela uste dute. Ideia hori indartzeko abenduaren 3an komunitatea batu eta indartzea dute helburu gisa. Horregatik dei egiten diete euskaltzale orori, beraiekin batera euskaraz bizi daitezen, eta egun horretan beraien esperientziak eta eguneko gertaerak sare sozialetan zabal ditzaten, #EgotetikEgitera traola erabilita. EHE-ek ere egungo egoerara egokitu nahi du. Horretarako, ikasturte honetan egingo duten Izan, Egin, Eragin, Euskal Herrian Euskaraz gogoetaren berri ere eman dute. Aldaketak eragin nahi dituen gogoeta da, herritarren parte hartzea sustatu, eta bereziki herritarren ahalduntzetik aldaketak eragin nahi dituena. “Euskaldun izan, euskaraz egin, aldaketak eragiteko”, nabarmendu dute.
