Donostia 2016k eta Kontseiluak bat egin dute Hizkuntza Eskubideak Bermatzeko Protokoloa osatzeko

Batzorde Zientifikoko nazioarteko adituak aurkeztu dituzte, gaur lehen bilera egin ostean.

Estitxu Zabala

2015/12/01

Tabakaleran egin dute Batzorde Zientifikoaren aurkezpena. (Argazkia: Estitxu Zabala)

Bilerak egiten ari dira egunotan Tabakaleran, Hizkuntza Eskubideak Bermatzeko Protokoloa osatzeko. Hain zuzen ere, Donostia 2016 Fundazioak eta Euskararen Nazioarteko Erakundeek Kontseiluak bat egin dute, lan hori betetzeko, eta Batzorde Zientifiko bat osatu dute nazioarteko hainbat aditurekin. Zehazki, hamabost kidek osatuko dute batzordea, Hizkuntzalaritza eta zuzenbide arloetako nazioarteko adituek eta izen handiko akademikoek; gaur horietako hamahiru aurkeztu dituzte. Hizkuntza eskubideak bermatzeko neurri zahatzak bilduko dituen dokumentua izango da protokoloa; eta 2016ko abenduan aurkeztuko dute. Bileraren ostean komunikabideen aurrean hitz egin dute Donostia 2016ko zeuzendari Pablo Berastegik eta Kontseiluko idazkari nagusi Paul Bilbaok. Protokoloa osatzeko bidea ondo doala nabarmendu dute, eta zehaztu dutenez, 1996an Bartzelonan osatutako Hizkuntza Eskubideen Deklarazio Unibertsalaren segida moduko bat izango da. Protokoloaren irizpide nagusiak marraztu zituen Talde Antolatzaileak , martxoan. Orain, Batzorde Zientifikoak bere ekarpen kualitatiboak egingo dizkio, gaur eta bihar, eta protokoloaren lehen zirriborroaren oinarriak adostuko ditu. Ondoren, Europako gizarte eragileen adostasunez garatuko dute, eta esan bezala, 2016eko abenduaren 8tik 10era aurkeztuko dute Donostian, Europako Hizkuntza Aniztasunaren Goi Bileran. Hona hemen kontseiluko kideak:

Alexandra Buchler. Literature Across Frontiers erakundeko zuzendaria, eta Erresuma Batuko itzultzaile elkartearen zuzendaritzako kidea.
Conchur O Giollagain. Gaelikoaren ikerketetan irakaslea, Highlands Unibertsitatean. Gaelikoa biziberritzeko ikerketa sarearen zuzendaria.
Davyth Hicks. ELEN Europako Hizkuntza Berdintasunaren Aldeko idazkari nagusia, eta Eurolangeko zuzendaria.
Robert Dunbar. Edinburgoko Unibertsitateko irakaslea, eta zuzenbidean aditua.
Elin Haf Gruffydd Jones. Hedabide eta sorkuntza industriako irakaslea, Aberystwytheko Unibertsitatean, Galesen. Mercator Institut for Media, Language aand Culture erakundeko zuzendaria.
Ewa Chylinski. ECMI Gutxiengoen Aferetarako Europako Zentroaren lurralde zuzendaria Kaukason. ESLA, Europako Segurtasun Lankidetzako Antolakundean hainbat programa garatu ditu.
Ferran Suay. Psikologian doktorea, eta Valentziako Unibertsitatean psikobiologia irakaslea. Herritarrek hizkuntzekiko duten portaera lantzen du.
Iñaki Martinez de Luna. Soziologoa, Eusko Jaurlaritzako Prospekzio Soziologikoko Kabinetearen arduraduna. Bat soziolinguistika aldizkariaren zuzendaria.
Iñigo Urrutia. Zuzenbide administratiboko irakaslea EHUn. Hizkuntza eskubideak eta hezkuntza sistema tesia garatu zuen.
Jaume Vernet. Zuzenbide Konstituzionalean katedraduna. Consell de Garanties Estatutaries de Catalunya erakundeko kidea.
Johan Haggman. European Bureau for Lesse Used Languages bulegoko aholkulari ohia, eta Europako Batzordeko eta Parlamentuko aholkularia.
Maria Pilar Garcia Negro. A CoruñakoUnibertsitateko irakaslea. Hizkuntza Eskubideen Deklarazio Unibertsalaren idazleetako bat.
Miquel Strubell. Linguamon hizkuntza aniztasunaren katedrako zuzendari ohia. Europako Kontseilurako aholkulari lanak egin ditu.

Azken bideoak