(Argazkia: Estitxu Zabala)
– Nafarroako sei zainzuri
– Urdaiazpiko puska txiki batzuk
Aliolia egiteko:
– Oliba olioa
– Limoi zukua
– Soja
Saltsa egiteko:
– Aguakatea
– Tipula morea
– Tomate freskoa
– Oliba olioa
PRESTAKETA
Denboraldiko Nafarroako zainzuri freskoak erabiltzen dituzte Antiguako Drinka jatetxean, zainzuriak errazio gisa eskaintzeko, hamar euroan.
Lehenengo saltsa bat egiten dute plateraren oinarri gisa jartzeko. Horretarako, aguakatea eta tomatea lauki txikitan moztu behar dira, eta tipula ere puska txikitan mozten dute. Ondoren, osagai guztiak nahastu eta oliba olioa botatzen diote.
Zainzuriak aurretik egosiak izaten dituzte, eta platerera atera aurretik, plantxatik pasatzen dituzte, pixka bat berotzeko. Hiru behatzen tamainako pusketatan mozten dituzte, eta saltsaren gainean jartzen dituzte, zutik.
Urdaiazpikoa plantxatik pasatzen dute, eta zainzurien inguruan jartzen dituzte puska txiki batzuk.
Aliolia egiteko erabiltzen dituzte oliba olioa, limoi zukua eta soja. Irabiagalutik pasatzen dituzte osagai guztiak, eta saltsa pixka bat jartzen dute zainzurien inguruan banatuta.
Elena Cobreros eta Rishi Adhikari; Drinkako arduraduna eta sukaldaria.
“Eskaintza aldakorra dugu, bezeroak ez aspertzeko”
(Argazkia: Estitxu Zabala)
Elena eta Carmen Cobreros ahizpek 2015ean ireki zuten Drinka taberna, Kalaberri zenaren lekuan. Aurretik Grosen izan zuten taberna bat, eta aldaketa oso handia izan dela diote: «Harrituta geratu gara Antiguako giroarekin».
Gustura zaudete orain arte izandako ibilbidearekin?
Elena Cobreros (E. C.): Oso pozik gaude, eta bigarren taberna bat ere ireki dugu, mexikarra, pixka bat aurrerago.
Zein da zuen eskaintza?
E. C.: Bi zati oso desberdin ditugu, taberna eta jantokia, beraz, leku bakoitzerako bi eskaintza desberdin ditugu. Tabernan lan gehiago egiten dugu pintxoekin, ogitartekoekin eta hanburgesekin. Barruan eskaintzen ditugun platerak landuagoak izaten dira, bertako garaiko produktuekin. Astean zehar eguneko platera eskaintzen dugu, aukera egoten da, eta osoa edo bi erdi eskatu daitezke.
Rishi Adhikari (R. A.): Eskaintza aldakorra dugu, bezeroak ez aspertzeko, asko ohikoak izaten dira direlako, eta sukaldeko lana ere aldatzen joaten gara horrela.
Baduzue arrakasta berezia duen plateren bat?
E. C.: Hegaluze hanburgesa. Getariatik hegaluze kilo asko ekartzen ditugu eta ultraizoztua izaten dugu.
Zein jatetxe gomendatuko zenukete?
E. C.: Nire gogokoena Hondarribiko Laia erretegia da. Gure lagun batena da eta produktu oso bereziak izaten ditu beti. Donostian, Groseko Matalauva asko gustatzen zaigu. Taberna txikia da, eta tenperatura baxuan lantzen ditu produktuak.
