Lau jardunaldi denboraldia biribiltzeko
Donostiarra Santurtziko estropadan. (Argazkia: Eusko Label liga) Eusko Label ligako Donostiarrak lau jardunaldi ditu aurretik emaitza hobeak lortu eta sailkapenean gora egiteko, baita banderaren bat irabazteko aukera izateko ere. Galiziako uretan izango dira Donostiarrako arraunlariak datorren asteburuan, Aresen eta Boiron jokatuko baitituzte estropadak larunbatean eta igandean, hurrenez hurren. Bi estropada horien ostean Kontxako bandera izango da jokoan, eta irailaren 19an ekingo diote berriz ligari, azken bi estropadak jokatzeko. Bermeon eta Portugaleten egingo diren estropada hauetan lehen zortzi sailkatuak arituko dira bakarrik, azken lauek playoff estropadak jokatuko baitituzte leku berean jaitsierak eta igoerak definitzeko.
Donostiarrak seigarren postuan amaitu zuen joan den urteko denboraldia, eta azken lau estropadak jokatu aurretik postu berean da, 114 punturekin. Zierbena da aurretik duen taldea, lau puntu gehiagorekin, eta Urdaibai eta Orio ere gertu dituzte donostiarrek, zazpi eta zortzi puntura hurrenez hurren.
Aste bereziak izan dira Donostiarrako mutilentzat, emaitza ezberdinak bildu baitituzte azken asteetan. Zarautzeko banderan hamargarren izan ziren bi jardunaldietan, eta horrek postu asko jaistea eragin zuen, eta Santurtziko banderan zortzigarren izan ziren. Joan den igandean, baina, estropada bikaina egin zuten, bigarren postua eskuratu baitzuten Sestaon. Hondarribiak irabazi zuen bandera, baina Donostiarra bi segundu baina gutxiagora geratu zen. Eusko Label ligan bandera bat irabazi du aurtengo denboraldian oraingoz Donostiarrak, Kontxako uretan.
Euskotren liga, berriz, joan den astean amaitu zen, Zarauzko banderaren ostean. Donostiarra bigarren geratu zen bi estropadetan, eta Arraun Lagunak hirugarren izan zen banderaren bi jardunalditan. Emaitza hauekin, Donostiarrak eta Arraun Lagunakek playoff postuak ekidin dituzte aurten, eta arazorik ez badago Euskotren ligan arituko dira datorren denboraldian ere. Donostiarrak bi bandera irabazi ditu denboraldi honetan, Zierbenako eta Orioko uretan, eta Arraun Lagunakek ezin izan du banderarik etxera eraman.
