Asier Azpiroz final laurdenetarako sailkatu da
Final zortzirenen azken saioarekin, osatu egin dute hurrengo fasean lehiatuko diren 30 bertsolarien zerrenda.
Gipuzkoako Bertsolari Txapelketaren azken final zortzirena jokatu zen larunbatean, Azpeitiko Soreasu antzokian. Maider Arregik bildu zituen puntu gehien (489,5), eta zuzenean sailkatu zen azaroaren 3an, Tolosan, egingo diren final laurdenetara. Asier Azpiroz zubietarrak berriz, puntuazio bera eskuratu zuen baina bigarren sailkatu zen larunbateko norgehiagokan. Nolanahi ere, puntuazioak txapelaren lehian jarraitzeko aukera eman dio, lehen kokatu baita puntuazioz final laurdenetara sailkatu direnen artean.
Larunbateko saioa bukatzearekin bat, erabakita geratu ziren final laurdenetan aritu direnen zerrenda. Hala, lehian jarraituko duten 30 bertsolarien artean, hiru donostiar izango dira: Unai eta Beñat Gaztelumendi anaiak, eta Asier Azpiroz. Manex Mujika, berriz, txapelketatik kanpo geratu da, ez baitzuen puntuazio nahikoa eskuratu Andoaingo norgehiagokan.
Gauzak horrela, Unai eta Beñat Gaztelumendi anaiek topo egingo dute Errenteriako norgehiagokan. Unai Gaztelumendi puntuazioagatik sailkatu da urriak 20ko lehian (puntuazioz hamargarrena); Beñat Gaztelumendi, berriz, azken txapelketaren garailea izanik, zuenean zegoen sailkatuta. Asier Azpirozen kasuan, berriz, Azkoitian jarraituko du lehia, Baztarnatxo antzokian jokatuko baititu final laurdenak urriaren 26an.
Bost final laurdenetatik, hemezortzi bertsolari pasatuko dira finalaurrekoetako hiru saioetara, eta Gipuzkoako Bertsolari Txapelketako finala abenduaren 14an izango da, Illunben.