Petra Elser, aurkezpenean, azalpenak ematen. (Argazkia: Aritz Sorzabal)
Banaiz Bagara elkarteak sortutako proiektu berria da Euskara Plus. Eskaintzen dituen zerbitzuen bitartez, langile eta lana bilatzen ari diren pertsonen euskarazko komunikazio gaitasunak hobetzea du helburu. Aldi berean, enpresa eta lan bila ari direnen arteko zubilana bermatu nahi du, enplegurako aukera berriak sortzeko asmoz. Bide horretan, etorkinen beharrak kontutan hartu dituzte bereziki, baina herritar guztiei zabalduta dago proiektua.
Bada, Euskara Plus egitasmoak tresna berri bat izango du aurrerantzean. Hain zuzen ere, Banaiz Bagara elkarteak proiektuaren webgunea jarri du abian: Euskaraplus.eus. «Langile eta enpresen artean komunikazio zubiak eraiki nahi ditugu. Webgunea langileak eta enpresak elkarrekin harremanetan jartzeko tresna izango da», adierazi du elkarteko zuzendari Petra Elserrek.
Aniztasuna
Euskara Plusen izaera webgune berriaren leloarekin labur daiteke: Euskara eta enpleguaren plaza, mundu anitz batean. «Lanbide guztietan sortzen da komunikazioa. Guk komunikazioa eta hizkuntza erabiltzeko aukera eskaintzen dugu. Ez dugu bakarrik hizkuntza irakasten, lanbidean hizkuntza nola erabili ere», adierazi du Elserrek.
Gainera, Banaiz Bagarak ez du bakarrik bezeroekiko komunikazioa nola izan behar duen erakusten, langileen artekoa ere aintzat hartzen du: «Bezeroarekin euskaraz aritu zaitezke, eta gero sukaldera joan eta gaztelaniaz hitz egin lankidearekin. Egunerokoan gertatzen den errealitate bat da hau, baina ez da lan prestakuntza arloan lantzen. Guk hizkuntzaren erabilera inguru elebiduna kontutan hartuta lantzen dugu», esan du.
Banaiz Bagarak eskaintzen dituen tailerrak formatu eta iraupen desberdinekoak dira. Elkarteko zuzendariaren hitzetan, «hizkuntza ikastaroak eskaintzen ditugu, baina ikastaroa hitzak duen kutsu akademikotik aldentuta. Komunikatzeko teknikak irakasten ditugu, baita hizkuntza erabiltzeko beldurrak nola gainditu ere».
Elserrek elkartearen lanarekin lortu nahi duten beste erronka baten berri eman du: «Etorkin bat ikusten dugunean, kanpotarra denez gazteleraz hitz egin behar diogula pentsatzen dugu. Hori oso barneratua dugu. Hori aldatzea da gure erronka handienetako bat, etorkina ere euskaraz aritu daitekeelako».
Euskara Plus egitasmoari proiektu piloto batekin ekin zioten Tolosan. Orain gainontzeko herrietan zabaltzeko prest daude, Donostian ere. Bhabendra Bhandari Nepalekoa da, eta duela hiru urte etorri zen Donostiara bizitzera. Egian bizi da, eta euskaraz mintzatzeko gai da: «Hainbat gauza erakutsi dizkigute; komunikatzeko gaitasuna izatea, kurrikuluma nola prestatu eta bakoitzak dituen arlo onak eta txarrak identifikatzea, tartean. Nire euskara ez da oso ona, baina denborarekin hobetuko dudala ziur nago».
Webgune berrira bueltatuz, langile eta enpresen arteko zubilana egiteko helburu horren baitan, albisteak ere bilduko ditu atariak. Sagardotegiei buruzko erreportaje bat egin dute, esaterako; langileak noiz eta nola kontratatzen dituzten azaltzen du. Era berean, Kebab jatetxe bateko jabeari egindako elkarrizketa bat dute zintzilik: zerbitzua euskaraz emateko aukera badutela erakutsi nahi dute horrela, etorkina izan arren.