OSAGAIAK:
– Tipula
– Piper berdea
– Piper gorria
– Piper txorizeroa
– Bakailao papurtua
– Ardo zuria
– Koinaka
PRESTAKETA:
Lehenengo puska txikitan moztu behar dira piper berdea, piper gorria eta tipula, eta dena xigortu, olio pixka batekin. Garden antzean jartzean, koinak pixkat bat bota behar zaio, eta flanbeatu.
Gero, su hori kentzean, piper txorizeroa bota behar zaio, hiru goilarakada, gutxi gorabehera. Dena erregosten utzi behar da, eta ardo zuria bota behar zaio. Bukaeran, bakailaoa jarri behar da, eta hiru bat minutuz egiten utzi. Horrela, pixka bat gordina geratuko da bakailaoa, eta ez da lehortuko. Platera atera aurretik, berriro pixka bat berotu behar da, eta orduan egongo da jateko puntu egokian.
Oier Lorente eta Asier Okariz, Herria tabernako kideak
Oier Lorente eta Asier Okariz, errazio banarekin, txerri masailak eta ajoarrieroa. (Argazkia: Estitxu Zabala)
“Bereizten gaitu freskotasunak, goxotasunak eta etxeko mimoak”
Lau lagunek daramate Herria taberna: Asier Okariz, Oier Lorente, Ibon Abad eta Aitor Olaizola. Abenduan ireki zuten taberna, hilabetez itxia egon ondoren, eta berritu dituzte bai itxura bai eskaintza ere. Okariz sukaldean dabil, eta Lorente barran; biekin hitz egin dugu.
Zerk bultzatuta ireki duzue taberna?
Oier Lorente (O. L.): Herriak auzoan lan sozial handia egin du, eta horrekin jarraitzearen aldeko apustua egin nahi izan dugu. Gainera, Ikusi genuen ekonomikoki bizirauteko potentziala bazuela.
Zer moduz doakizue?
O. L. : Orohar oso eskertuak gaude bezero guztiekin, erantzun ona jasotzen ari gara. Eguneroko poteoa mugitzen ari da pixkanaka, eta sukaldean gehienbat asteburuetan ikaragarrizko lana dugu.
Zerk bereizten du Herria taberna besteengandik?
O. L. : Sukaldeari bira bat eman diogu, eta taberna eraberritu dugunez, kalitatezko zerbitzua ematea da helburua. Etxeko janaria eskaintzen dugu; bertako produktuekin lan egiten dugu, hemen eginak, horrek dituen ondorioekin. Denboraz gehiago kostatzen zaigula dakigu, baina goxotasun gehiagorekin egindako jakiak dira. Badakigu ez dugula puntako eskaintza, baina sukaldean bereizten gaitu freskotasunak, goxotasunak eta etxeko mimoak.
Zer eskaintzen duzue?
Asier Okariz (A. O.): Ohiko errazioak, pintxoak eta ogitartekoak ditugu. Eguneko platera edo entsalada zortzi euro dira, postrearekin eta ardo kopa batekin. Norbaitek nahi izanez gero menu oso bat, aukera du bi platerak eskatzeko. Asteburuetako menu berezia ere badugu, eguerdietarako, 17 euroan. Hori da orain gure erronka handiena.
Eskaintzen ditugun errazioak, adibidez, pertsona bakarrarentzat izaten dira, baina tamaina nahiko handia dute. Buztinezko kazoletan ateratzen ditugu, eta harrera ona izan dute. Bezeroek ikusten dute ona dela eta etxekoa. Kroketek, esaterako, arrakasta handia dute. Hiru motatakoak ditugu: urdaiazpikoarekin, Cabrales gazta eta intxaurrekin, eta onddoekin. Txipiroientzako, hore bat egiten dugu frijitzeko, eta jendeak asko eskertzen du; igande eguerditan bereziki.
Hiru ogitarteko dituzue, ezta?
A. O.: Hori da, aldaketa egin dugu. Ogitarteko bat betikoa da; xolomoa, piperrak eta gazta. Bestea da oilasko bularrarena, letxuga eta tipularekin, eta Herria saltsa botatzen diogu, baratxuria duen saltsa berezia. Herria ogitartekoa da hirugarrena, perretxikoak plantxan, tipula potxatua, tomate lehorra, eta ahuntz gazta ditu. Hiruak goxoak eta desberdinak dira.