Zozketarako txartel bila
Martxoa amaieran egingo den babes ofizialeko etxebizitzen zozketetan izena emateko ilara luzeak osatzen ari dira egunotan Etxegintzako bulego aurrean.Epea hilaren 15ean amaituko da.
Astebete dute zortea tentatuz pisua lortu nahi dutenek Donostiako Etxegintza Enpresa Erakunde Publikoaren zerrendetan izena emateko. Epe amaieraren gertutasunak bultzatuta, Mandasko Dukearen kaleko Etxegintzaren bulegora jendetza bertaratzen ari da egunotan. Horren jakitun, ateak ireki aurretik zain daudenen ilara luzatuz doa goizeko 09:00ak hurbildu ahala. Ordu erdi lehenago bederatzi lagun besterik ez bazeuden, 29 dira pertsiana igotzen hastean.
Lehenak 45 minutuz hotzari aurre egin dio; agiriak eman ondoren irtetean, ordea, ezer gutxirako balio izan diola daki. «Aurrekoan paper bila etorri nintzenean zozketan parte har nezakeela esan zidaten, eta orain diru sarrera nahikoa ez dudala». Hala ere, alde ona aurkitu dio gertaerari. «Hurrengorako datuak jada badituzte».
Joan ezin zuen seme-alabaren agiriak eramatera bertaratutako emakume batek aurreko egunetako jende pilatzea zuen gogoan, zain zegoela. «Aurreko eguneko ilara izugarria ikusita, irekitzerako etorri naiz, goiz jaiki behar izan badut ere». Beharraren isla omen da biltzen den jendetza. «Gazteek behar itzela dute eta babes ofizialeko etxe gehiago egin beharko lituzkete, Andoainen bada ere».
Martxo amaieran zozketatuko diren Puio-Lanberri, Pagola, Morlans , Araotz Etxea, Illarra edota Loiolako Erriberako 428 etxebizitza –274 salgai, 116 alokairuan eta 38 tasatuak– nahikoa ez badira ere, batzuen irtenbidea izango dira. Alokairurako aukera izateko, 3.000 eta 35.000 euro arteko diru sarrera behar da. Erosteko, berriz, 9.000 eta 35.000 euro artekoan, eta tasatuetan, 12:000 eta 45.000 euro artean.
Inkesta
Iñaki Lucas Ulia «Zerrendetan izena emango dudan lehen aldia da eta erosteko etxebizitza eskatuko dut. Tokatzearekin nahikoa dut, berdin zait non. Babes ofizialeko etxeak egiteari ondo deritzot, denok ezin baitugu etxebizitza libre bat erosi. Kopuru egokia eraikitzen dituztela uste dut, ezin baitira pila egin eta zero okerrago litzateke. Amarekin bizi naiz, eta agian, alokairuan hartuko dut, baina lehenik zortea dudan ikusiko dugu. Unai Lertxundi Gros «Agiri guztiak ondo dauden ikustera etorri naiz. Berdin zait pisua alokairuan, erosita edota oparituta. Bereziki zaila da gazteontzat etxebizitza izatea, utzitako etxe batean bizi naiz eta babes ofizialekoak nahikoa ez direla uste dut. Eskaintza eta eskaria ikusi besterik ez dago. Ia hamar urte daramatzat zerrendetan eta hainbat zozketetan izan naiz. itxaropena ez dut galdu, baina…». Laura Asensio Martutene «Hiru bat urte dira izena eman nuenetik. Aukera gehiago izateko alokairuan eta erosteko eskatu dut. Lehen orduan etorri naiz, gero telefonoa ez dutelako hartzen. Eskatzen duen jende kopurua ikusita, gutxi dira babes ofizialeko etxeak. Gurasoekin bizi naiz orain, eta tokatzen ez bazait, denborarekin, etxea erosiko dut. Zozketa egunean ilusioa duzu eta tokatzen ez denean, desilusioa». Izaskun Leon Loiola «Zerrendetan hiruzpalau urte daramatzat. Alokairuan eta erosteko eskatzen dut, aukera gehiago izateko. Alokairuko pisu batean bizi naiz eta hala jarraituko dut, zorioneko izan ezean. Irtenbide aparta da babes ofizialeko etxebizitza tokatzea. Egokitzen ez zaidala ikusten badut, azkenean, librea erosiko dut. Oraingoan lortuko dudan ez dakit, beste zozketa batzuk pasatu baititut, baina itxaropena denok dugu».
