Musika aukeratu dute Aieteko Gurutzeaga parrokiaren arduradunek mende erdiko ibilbidea ospatzeko. Abendura arte luzatuko den programa 15 kontzertuk osatzen dute. Era berean 50. urteurrena nabarmentzeko ekimen horri iraila aldean, auzoko jaiekin batera, egingo den erakusketa gehitu behar zaio.
Pedro Albizuri parrokoak kontzertu sortaren aurkezpenean azaldu zuenez, «esfortzu galanta izan da programa osatzea; baina, era berean, erraza izanda. Guk parrokian koru txikia daukagu.Baina hor barruan dauden gehienek beste abesbatzetan parte hartzen dute. Eta bakoitza joan da bere korura ea prest leudeken kontzertua gurean egiteko».
Larunbatean izango da sorta honetako lehen kontzertua. Hain zuzen ere, arratsaldeko 20:30etik aurrera, Marta Matheuk beteko baitu eliza bere ahots goxoez, Arkaitz Mendoza piano jotzailea lagun izango duela.
Gurutzeaga bera izango da emanaldi guztien egoitza; izan ere, 1926an eraiki zuten elizak primerako akustika baitauka. Parrokia izendatu zuteneko 50. urteurreneko kontzertuak elizan izango badira ere, programa itxiko duen arte erakusketak Aieteko kultur etxean hartuko du ostatu. Ikusgai izango duten bilduma osatzeko auzotarren laguntza eskatzen ari dira. Hauek egindako lanak erakusgai jartzeaz gain, salmentan ipini nahi dituzte ere. Modu horretan, parrokiak dituen proiektu ezberdinetarako dirua eskuratu nahi dutela.
Batzuei Zorionak zuri bakarra abesten diete beraien 50. urtemugan. Aieteko Gurutzeagari, berriz, hamabost alditan kantatuko diote hemendik urte bukaera arte.
KONTZERTUAK GURUTZEAGAN, 20:30EAN:
- Otsailak 12. Marta Matheu sopranoa.
- Otsailak 26. Cum Jubilo abesbatza.
- Martxoak 12. Ensemble Polonaise.
- Martxoak 26. Schola Gregorianista Donosti Ereski.
- Apirilak 16. Aita Garaioa abesbatza.
- Maitzak 7. Arkaitz Mendoza organo jotzaile eta Erlantz Fernandez tronpeta jotzailea.
- Maiatzak 21. Ekintza abesbatza.
- Ekainak 11. Araoz Gazte eta Araoz Gaztetxo.
- Ekainak 25. Hondore abesbatza.
- Irailak 18. Gurutzeaga Eskola.
- Urriak 14. Donosti Ereski abesbatza.
- Urriak 29. Goratzar abesbatza.
- Azaroak 12. Musikalis.
- Azaroak 26. Itxaso abesbatza.
- Abenduak 30. Aita Donostia abesbatza.
