Siete C: “Aurrera egin dugu, iraganari uko egin gabe”
Raizdx atzean utzi, eta Siete C izenarekin berriz jaio egin da laukote donostiarra. Hil egin dira, berriz jaiotzeko, eta biziberrituta itzultzeko. Familia diskoa aurkeztuko dute apirilean.
Siete C taldeko kideak. MAKOKI
Halere, argi zuten Raizdx baino izen hoberik aurkitu ezean ez zutela izena aldatuko. «Azken momentuan bururatu zitzaigun. Zenbakiekin jarraitzen dugu. Bestalde, jendeak gure izena ondo esateko arazoak zituen. Izen berriarekin jendeak erraz esan eta gogoratu ahal izatea nahi genuen», aitortu du Abuinek. «Iker eta Raulen etxean elkartzen ginen beti, 7. Cn. Han egin genituen bilera guztiak. Horra, izenaren azalpena», esan du Gomezek.
Istorio txikiz osatutako istorioa
Familia izena du diskoak: «Beti izan gara familia bat, hala bizi izan gara, eta hala sentitzen dugu. Piña bat gara». Amaran duten entsegu lokalean sortutako abestiak dira. «Jotzen eta inprobisatzen dugun guztia grabatu egiten dugu. Gero, entzuten dugunari buelta batzuk ematen dizkiogu», esan du Abuinek. «Horrela ez zara oroitzapenez bizi behar. Gustatzen bazaizu, berriro har dezakezu. Musikari gisa hazi egiten zara, gainera. Akatsak ere ikusten dituzu. Zeure musika ezagutzeko modua da», ziurtatu du Gomezek.
Siete Cren ustez, disko berria «istorio txikiz egindako istorioa da. Hari nagusi bat dago, guztiak elkartzen dituena. Pulp Fiction eta Four Rooms bezala, baina zinema izan beharrean, musika da». Pertsona baten bilakaeraren inguruko hitza sortu dituzte: «Jendea gure abestiekin identifikatzea nahi dugu. Hori da gure asmoa”
Hasiera batean, disko bikoitza kaleratzea izan zen taldearen asmoa. Bata, zuzenean eta akustikoan grabatutakoa. Bestea, elektrikoa: «Baina arestian esan dudan moduan, ez zuen aurrera egin. Akustikoa izugarri gustatu zitzaigun eta horrekin egin genuen aurrera», azaldu du Abuinek. «Guztira bi urteko prozesua izan da diskoa. Hasieran, ordea, beste abesti batzuk egiten hasi ginen, eta horiek kanpoan utzi genituen. Abesti berriak duela sei hilabetekoak dira. Hiruzpalau egunetan grabatu ditugu kanta guztiak», gaineratu du.
Jotzeko modua aldatu duten arren, taldekideen ustez ez da ezer aldatu: «Ez dugu esfortzurik egin beste zerbait egiteko. Horrela atera da, guztiok geunden ados. Gero eta rockeroagoak ginen Raizdxen. Hau ere kañeroa da, akustikoa bada ere. Pop alternatiboa, indie dela esango nuke», esan du Abuinek.
Abestiak «gordinak eta oso zuzenak» direla diote. «Akustikoa da, baina ez dago baladarik. Aurreko diskoetan abesti oso desberdinak bildu ditugu. Funkya zegoen. Rocka ere bai, eta new metala. Esperimentatzen ari ginen. Oraingoan soinua homogeneo bihurtu nahi genuen».
Eginaren eginez aldatu dute soinua: «Orain beharbada musika desberdina entzuten dugu, baina lehen entzuten genuena ere gustatzen zaigu. Aurrera egin dugu, iraganari uko egin gabe».
Ikerrek eta Raulek sortu zuten Raizdx: «Taldea osatu aurretik ez genuen elkar ezagutzen. Iker parranda batean ezagutu nuen. Baxu jotzaile baten bila zebilen. Jotzen hasi eta hiru urtera, Guido sartu zen, eta duela bi urte, Alejo», kontatu du Abuinek.
Mogamboko musika eszenan sortu zen. Trigger Travis, Yaw, Cohen, Krilin edota The Hostile taldeekin batera. Duela bi urte eman zuten azken kontzertua, Groseko Zipotz jaietan. «Zortzi urte denbora asko da. Bi disko eta maketa bat kaleratu genituen. Donostia eta inguruko tabernazulo eta eszenatoki guztietan izan gara. Ahal genuen toki guztietan jo genuen. Burgoseraino iritsi ginen. Bilbo eta Gasteizen ere izan ginen».
Kontzertu gosez
Gogotsu daude musika eszenara itzultzeko, Siete C taldearekin aro berri bati ekiteko, eta urte hauetan guztietan ikasitakoa gogoan dute, akatsak berriz ez errepikatzeko: «Raizdx desagertu eta berriz agertzen zen bapatean. Diskoa ateratzen genuen, kontzertu pila bat egiten genituen, eta desagertu egiten ginen. Eta ustekabean, berriz agertzen ginen eszenatokian. Jotzeari uzten badiozu hil egin zarela dirudi. Orain oreka mantendu nahi dugu. Serioago edo, lan egin. Eta ahal badugu, musikaz bizi», onartu du abeslariak.
Gaztelaniaz abesten du Raul Abuinek: «Ingelesez abesten hasi nintzen, baina karaokea dela dirudi. Abestiak, hitz egiten duzun hizkuntzan sentitzen dituzu. Gaztelania, gainera, oraindik ezezaguna da musikan. Fonetika, ordena… Buelta asko ematen dizkiot hitzei. Euskaraz oraindik ez naiz ausartzen. Ez dut guztiz menperatzen, eta nik gaztelaniaz hitz egin ohi dut». «Badirudi ingelesak beti ondo geratzen dela, esaten duzunaz ideiarik ez baduzu ere», dio barrez Gomezek.
Gustura daude soinu berriarekin: «Orain kontzertuetan zer gertatzen den kusi behar dugu. Esentzia bera da. Pertsona berak gara. Energia beste modu batekoa izango da». Donostian, hurrengo apirilaren 14an izango dira zuzenean, Altxerrin.
Hurrengo kontzertuak: Apirilak 8. Beasainen, Koiote tabernan, 22:00etan.
Apirilak 9. Oiartzunen, Rockmusic dendan. Apirilak 14. Donostikluba zirkuituaren programazioaren barruan, Pajaro Sunrise taldearekin joko dute (Altxerri, 22:00). Sarrera: 5 euro.
Apirilak 16. Familia diskoaren aurkezpena, Parte Zaharreko Akerbeltz tabernan, 20:00etan. 
