Txapelketako arduradunak, Zubietan egindako aurkezpenean. (Argazkia: Estitxu Zabala)
Gazteen Nazioarteko XXVII. Txapelketa antolatu du aurten ere Realak. Bertan, etorkizuneko futbol jokalari profesionalak batuko dira. Berrikuntzekin dator, gainera. Izan ere, azken urteetan ez bezala, berriro ere zortzi talde lehiatuko baitira. Zehazki, apirilaren 22tik 25era jokatuko dute txapelketa eta atzo bertan egin zuten aurkezpena arduradunek: Alex Uranga kontseilaria eta Luki Iriarte, harrobiko taldeen arduraduna. Aurkezpenean beraiekin batera izan ziren Kutxako Iñaki Almandoz eta Aldundiko Iñaki Ugarteburu.
Realarekin batera, puntako bost klub historiko lehiatuko dira: Real Madril, Valentzia, Vila-Real, Osasuna eta Espanyol. Horiekin batera, Gipuzkoako talde konbinatua eta Senegaleko selekzioa ere arituko dira, nor baino nor. «Lopez Ufarte Txapelketara Senegaleko talde kadete bat etorri zen eta maila zutela ikusi genuen. Beraz, ongi arituko direla uste dugu», adierazi zuen Iriartek. Bestetik, txapelketan parte hartu nahi zuten zortzi talde baino gehiago zeudenez, Realak aukeraketa egin behar izan zuela argitu zuen Urangak. Hala, esaterako, Athletic, kanpoan geratu da.
Ostiraletik astelehenera
Txapelketa etzi hasiko da eta asteleheneko finalekin bukatuko da. Bi multzotan banatuko dituzte taldeak eta multzo bakoitzeko bi talde onenak iritsiko dira finalera.
Gipuzkoako hainbat zelaietan jokatuko dituzte partidak; horrek ikusle gehiagorengana iristeko aukera emango baitio txapelketari. Hala, ohiturari jarraituz, sarrerengatik bildutako dirua zelaiak kudeatzen dituzten klubentzat izango da. «Zenbait zelaietan bi partida jarraian jokatuko dituzte, bi arrazoirengatik. Batetik, gero eta zailagoa delako belar naturaleko zelaiak aurkitzea. Bestetik, zelaietan ikusle gehiago elkartzea errazagoa izango delako», azaldu zuen Iriartek.
Norgehiagoka guztiak 30 minutuko bi zatitan banatuak egongo dira. Finala, ordea, 35 minutuko bi zatik osatuko dute eta ETB Sat kateak zuzenean botako du, 12:00etan. Zubietako Jose Luis Orbegozo zelaian jokatuko dituzte azken bi partidak: hirugarren eta laugarren postua jokatzekoa eta finala.
Gazteen Nazioarteko Txapelketa
1. Jardunaldia: Apirilak 22, ostirala.
– Real Madril-Senegaleko selek.: Hondarribiako Hondartza zelaian,
11:30ean.
-Reala-Vila-Real: Oiartzungo Ugaldetxo zelaian, 16:00etan.
-Gipuzkoako Kon.-Osasuna: Beasaingo Loinaz zelaian, 16:00etan.
-Espanyol-Valentzia: Beasainen, 17:30ean.
2. Jardunaldia: Apirilak 23, larunbata.
-Real Madril-Vila-Real.: Hendaiako Ondarraitzen, 16:00etan.
-Reala-Senegaleko selek.: Azkoitiko Txerloian, 16:00etan.
-Gipuzkoako konbi.-Espanyol: Bergarako Agorrosinen, 16:00etan.
-Osasuna-Valentzia: Bergaran, 17:30ean.
3. jardunaldia: Apirilak 24, igandea.
-Espanyol-Osasuna: Zarauzko Asti zelaian, 16:00etan.
-Vila-Real-Senegal: Zarautzen, 17:30ean.
-Gipuzkoako konbi.-Valentzia: Azpeitiko Garmendipe zelaian, 16:00etan.
-Reala-Real Madril: Azpeitin, 17:30ean.
4. jardunaldia: Apirilak 25, astelehena.
-3-4 postuak: Zubietako Jose Luis Orbegozo zelaian, 11:00etan.
-Finala: Zubietako Jose Luis Orbegozo zelaian, 12:00etan (ETB Sat).
