Baratzeko produktuen arrakasta
Piratek badute ajeari agur esan eta jai giroan indarrez beterik jarraitzeko edabea: Amaia eta Ainarak prestatutako tomate kopa. Koadrilen Egunez antolatutako pintxo hotzen lehiaketan sortutako jakia da.
Piratak berpizteko dosiak ez du aparteko sekreturik, etxeko eta kalitatezko produktu naturalak baino ez. Karlos Argiñanoren esanak betez, bi pirata gazteek garaian garaiko produktuei ahalik eta etekinik handiena atera eta kopan edateko tomate entsalada sortu dute.
Nafarroan eta Oiartzunen dituzten baratzetatik jasotako tomateei, tipula, olioa, antxoa txikiak eta ozpinetako pipermina erantsi diete. Kolore gorri biziko jakia, pirata nahiz Parte Zaharreko edozein tabernetako barrarako erakargarria. Bi gazteak taberna horietako jaberen batek ikusiko balitu sukaldean lan egiteko eskaintza luzatuko lieke. Izan ere, 23 urteko gazteek badute sukaldean eskarmentua, baita sariak eskuratzen ere. Ainara, esaterako, Zurriola ikastolako gozo lehiaketan hiru aldiz izan da txapeldun. Nata bizkotxoa, sagar tarta eta melokotoi tarta izan dira epaimahaiaren aho sabaiak goxatutako gozoak. Amaiak etxetik kanpora bizitzen jartzean lortu du lapikoak gobernatzea. Hala, tomate entsaladaz gain, sukaldari bakoitzak lortu du mahaiaren bueltan jarritako gonbidatuak liluratzeko platera. Amaiak, esaterako, guakamoleari hartu dio tamaina. Ainarak, berriz, arroza egiten da iaioa. Barazkiekin, paella, risottoa… Arrakasta ziurtatua du arrozarekin.
Bi sukaldari gaztekin batera, inprobisaziorako gaitasun paregabea erakutsi dute La Flamenkan egindako pintxo dastaketa herrikoian parte hartu duten beste zenbait piratek. Mahai zurien gainean zituzten produktuekin pintxo koloretsuak sortzeko gai izan dira minutu gutxian.
Mikelek, esaterako, Kontxako badiako kresalak zipriztindutako pintxo sorta osatu du, Kantauri itsasoak eskainitako jakiak izan baitira bere pintxoen oinarri. Itsasoak diseinu eta egituraketa prozesuan izan duen garrantzia aintzat hartuz, Pakito izena jarri dio sorkuntzari, badian hilabete luzez ibilitako izurdea gogoan hartuz.
Muskuiluak olio-ozpinetan eta antxoak baliatuta, gose premia larria denerako irtenbidea bilatu du Mikelek. Antxoen gazitasuna goraipatzeko asmoz, gainera, roquefort gazta erantsi dio pintxoetako bati. Artelan gastronomikoa laguntzeko eta nazioarteko ikutua emateko, ogi alemaniarra erabili du.
Itsasoko nahiz baratzeko produktuekin denek izan dute tripa zorriak ixiltzeko mokadua.
