Gipuzkoa Basketek taldearen aurkezpena egingo du arratsaldean
Gipuzkoa Basketek 2011-2012 denboraldiko taldearen aurkezpena egingo du gaur arratsaldean. Erakundeetako arduradunen, babesleen eta prentsaren aurrean aurkeztuko dute taldea, 20:00etan, Zuloaga plazan. Gainera, aurkezpena irekia izango da eta nahi duen edonor hurbildu daiteke jokalariak eta gainontzeko kideak bertatik ezagutzera.
Aurkezpena aste honetan egiteak badu bere zentzua, denboraldi-aurrea ahaztu eta ACB Ligari begira jarri behar baita dagoeneko Sito Alonsok zuzentzen duen taldea. Asteburu honetan bertan hasiko da Liga, eta Lagun Arok etxean jokatuko du lehen partida, Obradoiroren aurka.
