Erriberako Bost Zubiak lasterketa antolatu dute
Urriaren 25ean jokatuko dute lehia eta 16 urtetik gorako edonork parte har dezake
Loiolako Erriberak ere auzoko herri lasterketa izango du laster. Izan ere, datorren urriaren 25eko jai egunarekin bat eginez, Erriberako Bost Zubiak izeneko krosa egongo da jokoan, lehen aldiz. Guztira 10’2 kilometroko ibilbidea egin beharko dute partaideek eta irteera eta helmuga Erriberako Mikel Laboa zubian izango ditu.
Izen ematea zabalik
Lasterketan 16 urtetik gorako edozein interesatuk parte har dezake, eta izen ematea dagoeneko zabalik dago. Horretarako, www.herrikrosa.com webgunea bisitatu behar da eta bertan aipatutako pausoak jarraitu. Bihar da izen ematea 10 euroren truke egiteko azken eguna, ostegunetik aurrera 16 euroko kostua izango baitu. Gehienezko partaidetza 500 lagunekoa izango da.
