Mozambikeko haurrek Leire Larretarekin ikasi zuten saskibaloian jokatzen. (Argazkia: Bera Bera)
Bera Bera kirol elkartea eta Haurralde Fundazioa Zure laguntza gure bizitza proiektuan murgilduak daude. Gobernuz kanpoko erakunde bat da Haurralde, eta Mozambikeko emakumeen artean bereziki kirola sustatzeko lanean ari da, Bera Berako saskibaloi sailaren laguntzarekin. Azken batean, saskibaloiaren baloreak elkartasunarekin, esfortzuarekin eta kooperazioarekin irmoki lotuak egon daitezkeela erakutsi nahi dute. Eta bi aldeek indarrak batuta, euren helburuak azkarrago lortzea espero dute.
Proiektuari hasiera emateko, Bera Berako entrenatzaile bat Mozambiken bertan egon zen udaran. Leire Larreta donostiarra izan zen Bera Berak Chimoio herrira bidalitako entrenatzailea. Bertan, Haurraldek haurrentzako aterpea du, eta Mozambikeko Matsatse erakundeak kudeatzen du. Helburu zehatz bat izan zuen Larretak, bertako 8-16 urte arteko haur eta gazteekin saskibaloi talde bat osatzea. Ez zuen lan erraza izan, bertakoentzat saskibaloia guztiz arrotza baitzen ordura arte. Baina esperientzia horrek proiektuaren lehen harria jartzeko balio izan zuen. Hala, hortik abiatuta, lanean jarraitzeko asmoa dute.
Helburuak oso argi
Bai Bera Berako eta bai Haurraldeko kideek oso argi dute zeintzuk diren euren akordioaren helburuak. Guztiak ere jakitera emateko, txukun-txukun bildu dituzte euren proiektuan. Helburu nagusiak hiru dira: Berdintasuna, kultur aniztasuna eta gizon eta emakumeen arteko parekotasuna bultzatzea; Gipuzkoan bizi diren etorkinak kirolaren bidez gizarteratzea; eta kirola neska eta emakumeen hezkuntzarako eta elkartasunerako erraminta bihurtzea.
Helburu nagusi horietaz gain, ordea, badituzte bigarren mailako helburuak ere. Izan ere, bi elkarteen ustez, egungo gizartean emakumeen kirola gizonezkoena baino gutxiago baloratzen da. Hori dela eta, berdintasunean sentitzen ez diren neska eta emakumeen aldeko lana egingo dute bereziki. Gainera, kirol arloko helburuei aurre egiteko, Bera Berak Donostia Basket Neskaken laguntza jasoko du; Donostiako emakumezkoen saskibaloi talde indartsuenak batzen dituen multzoa. Izan ere, Espainiako Bigarren Mailan jokatzen duen EHU Ibaeta taldeaz gain, Bera Berako harrobiko taldeak ere barneratzen ditu.
Matsatseko lehoiak izena jarri diote Leire Larretak Mozambikeko Chimoio herrian sortutako taldeari. Izen horrekin, bideo bat ere osatu dute, bertan egindako lanaren berri emateko. Horretaz gain, ordea, beste hainbat jarduera egingo ditu Bera Berak datozen hilabeteetan: Elkartasun bazkaria, marrazki eta bideo lehiaketa, berdintasun eta sentsibilizazio hitzaldiak, emakumeen kirol erakustaldiak… momentuz antolatutako jarduera guztiak abendua eta maiatza artean egingo dituzte, eta interesa duten guztientzat zabalik egongo dira.
‘Zure laguntza gure bizitza’
Jarduerak 2011-2012
- Abenduak 4. Elkartasun bazkaria egingo dute, Groseko Manteo kiroldegian, 14:00etan. Helburua Afrikako kirola babestea da. Edonorentzat irekia izango da eta bazkariaz gain, afrikar dantzak, haurrentzako jokoak, elkartasun bingoa eta beste hainbat ezusteko egongo dira. Bazkarirako txartelak Manteon eta Haurralde Fundazioan bertan eskuratu daitezke.
- Abendua-Martxoa. Lehiaketa: Zergatik jokatzen dut saskibaloian?
- 12/17 urteko gazteek marrazki edo komiki baten bidez erantzun beharko dute galdera. Saria, Londreseko Olinpiar Jokoetara joateko bi hegazkin txartel izango dira.
- 18 urtetik gorakoek, berriz, bideo batean erantzun beharko dute galdera (gehienez 5 min.). Saria Mozambikera hilabeteko bidaia izango da; bertan, Matsateko lehoiak taldea koordinatu beharko du sarituak.
pOtsaila. Berdintasun eta sentsibilizazio jardunaldiak: Kirola, elikadura eta generoa. Kirol Etxean egingo dituzte jardunaldiak.
- Maiatzak 27. Osasunarengatik Kilometro bat ekimena. Amara Osinagako bizilagunen elkartearen laguntzarekin, ibilaldia egingo dute auzoan barrena, 10:00etan. Anoetan bukatuko da ibilaldia eta emakumeen kiroletako hainbat erakustaldi egingo dituzte. Parte hartzeko 3 euro ordaindu beharko dira, eta bildutako dirua emakumeen kirol talde batentzako izango da.
- Informazio gehiagorako. Haurralde fundazioa edo Bera Bera.
