"Prestatzeko denbora sobera izango dugu datozen bi hilabeteetan"
Ligako atsedenaldi luzea hasi du Bera Bera Eskubaloiak, eta ez du partida ofizialik jokatuko urtarrila arte
Ongi baino hobeto ekin dio Bera Bera Eskubaloiak EHF Kopari. Europako lehiara itzultzea zen taldearen nahirik handiena eta ez du nola hala joaten utziko. Joan den asteburuan lehen kanporaketako bi partida jokatu ditu taldeak Belgikako DHW Antwerpenen aurka, eta biak irabazi ditu, 44-14 eta 37-15. Lehen lehiakidea kanporatuta, El Lada Togliatti talde errusiarra izango da Bera Beraren hurrengo aurkaria. Joanekoa Errusian izango da, otsailaren 4ean edo 5ean; eta itzulerakoa, Donostian, otsailaren 11ean edo 12an. Reyes Karrere entrenatzailearekin hitz egin du Irutxuloko Hitzak, bai Europako lehiaz, bai ABF Ligaz ere. «Bagenekien Belgikako Liga ez dela oso indartsua eta gu ginela irabazteko faboritoak. Hala ere, askotan, halako egoeretan, partida nahastu daiteke, aurkariaren jokoarekin kutsatuta. Baina ez ginen horretan erori, taldeak seriotasunez jokatu zuen eta gozatu egin genuen», azaldu du Karrerek asteburuan jokatutako partiden inguruan.
Datorren aurkariari, ordea, errespetu handiagoz begiratzen dio Karrerek, aurkaritzat inork nahi ez zuen taldea baita. «Bidaia luzea egin beharko dugu Errusiaraino, eta konplikatua izango da. Kanporaketako indartsuenetakoa da eta ez genuen euren aurka jokatu nahi, baina kitto. Ezin dugu gehiago pentsatu, bi hilabetetara aurrean izango ditugu eta gure helburua kanporaketa igarotzea da». Taldeak dakiten guztia ona denez, ongi prestatu beharreko norgehiagokak izango direla argi dauka Karrerek. «Badakigu jokalari gazteak eta garaiak dituela taldeak, Ligako sailkapenaren erdialdetik daudela… aztertzeko denbora daukagu eta ikusiko dugu».
Ligan, lan bikaina
Argi dauka Karrerek EHF Kopako datorren kanporaketa gainditzeko, estrategia zehatz bat erabili beharko dutela. Edonola ere, prestatzeko denbora izango dute, ABF Ligaren geldialdi luzea dela eta. «Prestatzeko denbora sobera izango dugu datozen bi hilabeteetan. Edonola ere, atseden luzeegia da. Denboraldi-aurrean ongi prestatu ginen eta orain jokatu egin nahi dugu; geldialdi hau gehiegizkoa da». Atsedenaldi egun batzuk hartu ostean, berriro entrenamenduei ekingo diete, baina hutsuneak izango dituzte. Izan ere, taldeko lau jokalari deitu dituzte euren selekzioekin Munduko Txapelketa jokatzera joateko: Antonella Mena, Dara Carvalho, Bea Fernandez eta Eli Pinedo.
Edonola ere, berriro ere Liga eta EHF Kopa uztartzearena ongi daramatela dio Karrerek. «Lehia gehiagotan parte hartzen duten taldeek askoz hobeto jokatzen dutela pentsatzen dut. Guk aurreko asteazkenean jokatu genuen, gero larunbat eta igandean, eta asteartean berriro. Horrek esan nahi du atsedena ona bada, aurre egiteko modua dagoela, eta guri ongi joan zaigu», dio harro entrenatzaileak.
Ligari begira, momentu honetan sailkapeneko hirugarren postuan daude, eta oso talde indartsuei aurre egiteko gai direla erakutsi du Bera Berak. Atsedenaldia hasi aurreko azken partida, asteartean jokatu zuten, Saguntoren aurka. Oso ongi aritu zen Bera Bera eta 21-25 gailendu zen. «Oso pozik nago. Gainera, oso partida polita izan zen eta atezaina oso ongi aritu zen. Bagenekien partidak zuen garrantzia eta oso fin aritu ginen defentsan. Emaitzak argi uzten du 21 gol bakarrik jaso genituela eta hori ia nahikoa izan daiteke irabazteko».
Orokorrean, Ligako lehen zatiaren inguruan, irakurketa oso baikorra egin du Karrerek. Akatsa bilatzen hasita, ordea, badaki zertan hobetu behar duen taldeak. «Talde ona daukagu, baina 25 gol inguru sartzen badizkigute, irabazteko arazoak izaten ditugu. Hau da, Leongo berdinketak eta Elxen galdu izanak mina egiten jarraitzen digute». Edonola ere, aurrera baikortasunez begiratzen du entrenatzaileak, oso lan ona egiteko gai direla ziur baitago. «Aurrera begiratzea besterik ez zaigu geratzen, horrela jarraitzen badugu, ongi bukatuko baitugu. Sailkapenean hirugarrenak gara, Saguntorengandik gertu, pozik egotekoa da». Hala, entrenatzaileak gogoan du Sagunto, Alicante eta Itxako bezalako talde handien aurka jokatuta ere, goian jarraitzen dutela.
Reyes Karrere, partida batean taldekideei aginduak ematen (Argazkia: berabera.com)
