"Ezagutzen nuen mundu hau, niretzat ez da arraroa"
Jon Txakartegi, Lagun Aro GBCko entrenatzaile laguntzailea
Hondarribia-Irun eta Iraurgi Lan Mobel taldeetako entrenatzailea izan ostean, momentuz bere ibilbidearen gorenera iritsi da Jon Txakartegi altzatarra; Lagun Aro Gipuzkoa Basketekin ACB Liga ezagutzen ari da.
Espero zezakeen halako aukera bat, eta iritsi denez, ahalik eta zuku gehien atera nahi dio. Azken hiru denboraldietan GBCra lotuta egon ostean, harrobiko taldea utzi eta lehen taldeko entrenatzaile laguntzaile postua hartu du Jon Txakartegik (Altza, 1977). Entrenatzaile gaztearen orain arteko esperientziaren berri jaso du Irutxuloko Hitzak.
Aste polita bizitzen ariko zarete, asteburuan Joventuti 70-93 irabazi ostean, ezta?
Bai, bai! Giroan nabaritzen dugu, garaipena behar genuen. Orain arte lan txukuna egin genuen, baina partidetan zorteak gure aurka egin zuen, eta lau txandatan galdu genuen hiru puntuko aldearekin. Irabazi beharra genuen, eta etxetik kanpo egitea eta 23 puntuko aldearekin… ba oso polita da! Astelehenean bertan nabaritu genuen jokalariak pixka bat lasaiago zeudela, eta irribarretsuago.
Esan duzun bezala, partida bat baino gehiagotan puntu alde gutxirengatik galdu duzue. Guztia zorte kontua izan da?
Ez da zortea bakarrik izan. Guk akatsak egin izan ditugu, baina azkenean partida gauza txikiengatik irabazi edo gal dezakezu. Azken partidetan, batez ere etxean, gure akatsengatik aurkariek zigortu egin gaituzte. Batez ere, Alacantaren aurkakoa gogorra izan zen. Unicaja eta Valentziaren aurka ere galdu genuen etxean, baina talde indartsuak dira eta gauzak oso ongi egin behar dira irabazteko. Ongi aritu ginen, baina azkenean beraiek ere ongi jokatu zuten, eta ezin izan genuen irabazi.
Fuenlabrada izango da zuen hurrengo aurkaria. Nondik jo beharko duzue irabazteko?
Irabazteko oso ongi jokatu beharko dugu, eta akatsak zaindu beharko ditugu oparirik ez egiteko. Batez ere defentsan gogorrak izan behar gara, azken partidan bezala; erasoan nahiko ongi gabiltza. Beraiek hirukotan oso onak dira eta jaurtitzaile onak dituzte. Batez ere Ayon zaindu beharko dugu, agian, gaur egun ACB Ligan dagoen bost gogorrena.
Dagoeneko badaramatzazu hilabete batzuk entrenatzaile laguntzaile bezala. Zer moduz orain arteko esperientzia?
Esperientzia oso ona izaten ari da. Gaur egun munduko Ligarik indartsuena da ACB. Oraindik NBA ez da hasi, eta Euroliga aparte utzita, Liga gogorrenean gaude. Niretzat Liga honetan lan egitea, ez dut esango miraria denik, baina bai oso garrantzitsua. Gozatzen ari naiz.
Ez dakit denboraldi hasieran nola jasoko zenuen albistea. Inoiz honaino iristea espero zenuen?
Albistea oso pozik jaso nuen. Ilusio hori betidanik izan dut, batez ere azken hiru denboraldietan, GBCren barruan nengoelako, Azpeitian entrenatzen aritu arren. Klubaren barruan egonik, banekien aukera hori irits zitekeela.
Iraurgi Lan Mobelen egotetik GBCra aldea nabarituko zenuen.
Bai, maila aldaketaz gain, Lan Mobel talde erdi profesionala da, eta GBC oso oso profesionala. Hori asko nabaritzen da, batez ere, klubaren egituran. Esan behar dut Iraurgik oso egitura ona duela, baina hau ACB da eta profesionaltasuna nabari da. Eta noski, jokalarien mailan ere nabaritzen da aldea.
Zure eguneroko bizitzan ere aldaketa nabarituko zenuen, ezta?
Bai aldaketa izan da, baina lehenago ere Hondarribiako emakumeen taldea entrenatu nuen. Hori ere mundu profesionala zen, eta Europan jokatu genuen. Ezagutzen nuen mundu hau, ez da arraroa niretzat.
Asko ikasten ari zara?
Bai! Batez ere Ligari buruz ari naiz ikasten. Jokalariak eta entrenatzaileak aurretik ere ezagutzen nituen, baina orain hobeto ezagutu eta aztertu behar ditut. Jokalariak, entrenatzaileak, taldeak, eraso eta defentsa lana… hori buruz askoz gehiago dakit.
Zein da zehazki zure lana?
Defentsaren arduraduna naiz. Talde guztiak aztertu behar ditut defentsa ikuspuntutik, baita gurea ere. Guztia aztertu eta eguneroko lanean, entrenamenduetan, astea nola antolatu erabaki behar dugu. Hori da nire funtzioa, eta batez ere Sitori laguntzea ahal dudan guztian.
Zer moduz ari zara moldatzen Sitorekin elkarlanean?
Oso entrenatzaile zorrotza da Sito, dena jakitea gustatzen zaio. Eta berak jakiteko, guk ere jakin behar dugu. Ordu asko sartzen ditu lanean, ez bakarrik kantxan, baita bulegoan ere. Dena perfektu egotea gustatzen zaio.
Iraurgikoekin harremanetan jarraitzen duzu?
Bai, noski. Batez ere, Julen Olaizola eta Mikel Motosen bidez. Beraiek Azpeitian jokatzen dute, eta gurekin lan egiten dute. Egunero hitz egiten dut Iurgi Caminos entrenatzailearekin edota bigarren entrenatzailearekin, kudeatzailearekin…
Olaizola eta Motos jokalari gazte donostiarrak aipatu dituzu. Noiz izango dute benetako jauzia emateko aukera?
Hori oso oso zaila da. ACBn partida bakoitzean minutu bat jokatzea ere oso zaila da. Beraiek lehen urratsa eman dute eta hori ez da batere erraza. Orain, poliki-poliki, benetan hemen jokatzeko aukera itxaron beharko dute.
Jon Kortaberria eta Porfi Fisacen bisita jasoko dute Donostia Arenan:
Lagun Aro GBCren lagun zahar bat itzuliko da larunbatean, 20:00etan, Donostia Arenara. Ordu horretan eta eszenatoki horretan jokatuko dute Lagun Arok eta Fuenlabradak. Talde bisitariko entrenatzailea Porfi Fisac da, GBCko entrenatzailea izandakoa, bost denboraldiz: 2004-2006(LEB 2), 2006-2007 (Urrezko LEB), 2007-2008 (ACB). Donostiako zaleek asko maite dute Segoviako entrenatzailea, eta ziur igandean ere ongi jasoko dutela.
Bestetik, Fuenlabradako Jon Kortaberria jokalariarentzat ere partida berezia izango da larunbateko norgehiagoka. Bere etxean jokatuko du Kortaberriak, donostiarra baita izatez. Aurreko asteburuan ezin izan zuen Zaragozaren aurkako partida jokatu, horkatila bihurritu zuelako. Hala ere, lesiotik osatu eta larunbateko partidan jokatzeko moduan izango da.
(Argazkia: Mikel Goñi)
