Eskubide zibil eta politikoen defentsan dinamikaren aurkezpena, atzo, udaletxeko prentsa aretoan.
Eskubide zibil eta politikoak defendatzeko herri harresia sortzeko beharra adierazi zuten hiriko hainbat eragilek atzo eguerdian udaletxean egindako agerraldian. STEE-EILAS, LAB, Amnistiaren Aldeko Mugimendua, Gazte Independentistak, Aralar, ezker abertzalea, Eusko Alkartasuna, Alternatiba eta EHNE dira dinamikaren sustatzaileak, eta datorren asteetan emango dute ezagutzera erasoei “stop” esango dien ekimen berria.
LABeko Lurdes Erasok eta gazte independentistak-eko Eneko Pontestak irakurritako idatzi bateratuan salatu zutenez, egungo testuinguru politikoan, “batzuek Euskal Herriko gatazka politikoa gainditzeko urrats esanguratsuak” egin dituztenean, beste batzuek “etengabeko traba eta erasoak eskaintzen dituzte”. Horren adibide, azken hilabeteetan ezarritako debekuak eta erabaki juridikoak aipatu zituzten: Alberto Gonzalez intxaurrondotarraren atxiloketa; Mikel Vargas, Asier Coloma eta beste hamabost gazte donostiarrei ezarritako kartzela zigorrak eta Oihana Agirre egiatarraren espetxeratzea.
Eraso guztiekin “behingoagatik” amaitzea exijitu, eta konponbidearen aukera “zapuztu” nahi duen jarrera horren aurrean, ideologia anitzeko herritarrak antolatzeko premia nabarmendu zuten eragileek. Horretarako, “donostiarren konpromisoa eta mobilizazioa” beharrezkotzat jo zituzten. Euskal Herrian izandako ekimenen haritik, “elkartu eta eskubide zibil eta politikoen alde harresi sendoa eraikitzeko deia zabaldu nahi dugu”, adierazi zuen Pontestak.
Alberto Gonzalez – Gazte independentista
Alberto Gonzalez. (Argazkia: Maitane Aldanondo)
«Lekuz kanpo dagoen jokaera iruditzen zait»
Alberto Gonzalez (Intxaurrondo, 1983) San Sebastian egunean irten zen kartzelatik, hilabeteko zigorra bete ondoren.
Zein da zure kasua?
2003ko urrian atxilotua izan nintzen, Baltasar Garzonek zerrenda prebentiboen aurka egindako operazio batean. Bi urte eta lau hilabetez atxiloaldi prebentiboan egon nintzen, 2006eko otsaila arte. 30.000 euroko bermea ordainduta irten, eta 2009ko abendua arte astero sinatzera joan behar izan nuen. 2010eko maiatzean, sei urteko espetxe zigorra ezarri zidan Espainiako Auzitegi Nazionalak. Helegitea jarri nuen Espainiako Auzitegi Gorenean, eta iazko apirilean, bi urte eta erdira murriztu zidan zigorra. Atxiloaldi prebentiboan egondako denborarekin betea nuen.
Orduan, zergatik atxilotu zintuzten joan den abenduan?
Kartzela zigorrarekin batera, 4.000 euroko isuna ezarri zidaten. Hori ordaindu ez nuenez, hilabeteko espetxe zigorra betearazteko, abenduaren 22an atxilotu ninduen Espainiako Polizia Nazionalak. Martutenen astebete igaro nuen, eta gero, Daroca-ra (Zaragoza) urrundu ninduten.
Halakorik espero zenuen?
Hilabeteko espetxe zigorra izanda, eta ihes egiteko arriskurik gabe, data zehaztea espero nuen. Prest nengoen betetzeko, eta ezustekoa izan zen, abisatu gabe, noiz bete erabakitzeko aukerarik ere ez zidatelako eman. Lekuz kanpo dagoen jokaera iruditzen zait. Testuinguru berrian bestelako pausoak behar dira.
Zein da zure egungo egoera?
Hilaren 20an libre utzi ninduten, eta ez dut inolako zorrik.
