Material berritzaile baten aurkikuntzan parte hartu dute DIPC-ek eta CFM-ek
Gainazalean eroale baina bolumenean isolatzaile den material baten aurkitzaileetako bi dira Donostia International Physics Center DIPC eta Materialen Fisika Zentroa (CFM). Nazioarteko ikertzaile taldean parte hartu dute Donostian egoitza duten bi erakunde hauek. Aurkitutako materialak, bere ezaugarriak direla eta, konputazio kuantikoan baliagarria izan daitekeela iragarri dute erakunde hauen partaide den Euskal Herriko Unibertsitatetik. Izan ere, tasun horiei esker egonkorragoa baita material berria eta magnetikoki eraldatzeko aukera hobeak ematen baititu.
Nazioarteko taldeak horrelako aurkikuntza egiteko ezinbestekoa izan da teoria alorrean lan egin duten Tomsk-eko (Errusia), Halle-ko (Alemania) eta Donostiako zientzialarien ekarpena; beraiek isolatzaile topologiko exotikoak maila teorikoan iragarri zituzten lehenengoz. Iragarpen horri jarraituta, Bakuko (Azerbaijan) kimikariek halako konposatuen kristal bakun bateko lagina sortu zuten. Lagina Zurich-eko (Suitza) eta Hanburgoko (Alemania) ikertzaileek aztertu zuten orduan, eta iragarpen teoriko guztiak berretsi zituzten.
