Indiari buruzko ikastaroa antolatu du Calcuta Ondoan elkarteak
Calcuta Ondoan gobernuz kanpoko erakundeak Indiaren egungo egoera jorratzeko ikastaroa antolatu du. Elkarteak osatu nahi du komunikabideek Ekialdeko herrialde horren inguru ematen duten irudia. Izan ere, ekonomia hazkundea da Indiari buruz zabaltzen den ideia; baina, Donostiako GKE-ko kideek diote kontakizun horretan giza eskubideen urratzeak eta pobrezia bera ahaztu egiten direla.
Hori dela eta, Calcuta Ondoanek Eskubideentzako mehatxu zahar eta berriak Indian izeneko ikastaroa antolatu du. Ikastaroak zortzi saio izango ditu, eta giza eskubideen kontzeptua, brahmanismoaren ezaugarri patriarkalak, Indiaren aniztasuna eta erbesteko tibetarrek Indian duten egoera bezalako gaiak jorratuko dituzte.
Zuzenbide fakultatean izanagatik, nahi duenak eman dezake izena martxoan gauzatuko den ikastaroan parte hartzeko. Matrikulak 20 euro kostatuko ditu, eta ikasmaterialak barneratzen ditu. Informazio gehiago jaso nahi duenak, Calcuta Ondoan elkartearen webgunean, edo 943-43 18 49 telefonoan jaso dezake.
