Oihala altxatuko du gaur dFeriak

Irutxuloko Hitza

2012/03/12

Factoria de Fuegos, Studio Emiliano Pellisari, Goncalo Waddington eta Kabia konpainiek emanaldiekin hasiko da jaialdia. Gaur eta osteguna bitartean 22 konpainien dantza eta antzerki lanak izango dira ikusgai Kabia euskal antzerki konpainiak emango dio hasiera gaur dFeriari, Intxaurrondo kultur etxean (16:15). ‘Rojo al agua’ (Ubera gorriak) ikuskizuna aurkeztuko du.Bi pertsonaia elkartuko dituzte obra honetan. Alde batetik, Shakespeare-en Ofelia. Eta bestetik, Virginia Woolf idazle ingelesa.

Gazteszenan (18:00) Goncalo Waddingtonek ‘Rosmersholm’ ikuskizuna taularatuko du. Henrik Ibsen egilearen obra ezagunaren bertsioa da. Portugesez emango dute, eta gaztelaniazko azpitituluekin izango da ikusgai.

Studio Emiliano Pellisarik Cantica II lana aurkeztuko du Viktoria Eugenia Antzokian (20:30). Argiek, akrobaziak, musikak eta jolasak bat egingo dute ikuskizun honetan.

Gauean, 23:00etan, Arabako Factoria de Fuegos konpainiak ‘Itzulera’ obra aurkeztuko du Viktoria Eugenia Klub aretoan. Zuzeneko musika, dantza, ikus-entzunezkoak eta hiru hizkuntzatan egindako interpretazioa (euskara, ingelesa eta gaztelania). Denetik eskainiko du ikuskizunak. 80ko hamarkadako Londresera doan euskal gazte baten istorioa kontatuko dute.