Hamaika Telebista eskuko telefonoetara iritsi da
Hamaika Telebista eskuko telefonoetan errazago ikusteko aplikazioa aurkeztu dute gaur. Euskarazko komunikabide honen zuzenekoa eta grabaturiko saioak ikusi ahal izango dira Android sistema eragilea duten gailuetan.
Telebista katearen komunikazio arduradun Inaxio Esnaolak azaldu du programatxoaren nondik norakoa: “Aplikazioa sinplea da, eta horregatik da erabiltzeko erraza. Bost botoirekin Hamaika Telebistaren mamia deskubritu ahal duzu nahi duzunean, nahi duzun tokian”. Zuzeneko emisioa mugikorrean segitzeko aukera ematen duen lehendabiziko euskarazko telebista direla adierazi dute Hamaika Telebistaren arduradunek.
Programak bost aukera eskainiko dizkio erabiltzaileari bost botoiren bidez:
Hamaika.tv: Web orriaren bertsio egokitura zuzenean sartzeko esteka da.
Saioak: Saioak berriz ere ikusteko esteka da.
Zuzenekoa: Telebista une horretan zabaltzen ari den edukia ikusteko esteka da.
Twitter: Telebistaren Twitter kontura sartzeko esteka da.
Facebook: Telebistaren Facebook kontura sartzeko esteka da.
