Musika Parkean ekimeneko piknika bertan behera utzi dute
Bihar egitekoa den McEnroe taldearen kontzertua, berriz, Aiete kultur etxera lekualdatu dute.
Donostia Kulturak jakinarazi duenez, astebururako iragarrita dagoen eguraldi kaskarrak aldaketak eragin ditu Musika Parkean ekimenean.
Batetik, bertan behera utzi dute Aieteko parkean bihar, apirilak 28, egitekoa zen piknika. Bestetik, programatuta zegoen McEnroe talde getxoztarraren kontzertua mantentzen bada ere, atari zabalean izatetik, aterpean izatera igaro da. Hain zuzen ere, Aiete kultur etxearen barruan egingo dute. Hitzaldi aretoan egingo dute musika emanaldia, 18:00etan, eta sarrera doakoa izango da. Hala ere, aretoaren mugak direla eta, 150 pertsona baino gehiago ezin izango dira sartu.
