Hurrengo lau urteko inbertsioak adostu dituzte Bilduk eta EAJk
«Hiriaren interesak beste ezeren gainetik» jarri dituztela nabarmendu du Eneko Goia bozeramaile jeltzaleak
Udal aurrekontua aurrera ateratzeko Bilduk ez zuen oposizioko udal taldeekin akordiorik lortu, eta horrek 2011ko aurrekontua luzatzera behartu zuen udal gobernua. Egoera horrek inbertsioak traba ez ditzan, EAJ eta Bildu ados jarri dira eta 2015a bitartean garatu nahi dituzten inbertsioak hitzartu dituzte. 2012ko egitasmoak burutzeko 20 milioi euro bideratuko dituzte. Denera, hurrengo lau urteetan 78 milioi euro esleitu nahi dituzte. Aurten, 20 milioi bideratuko dituzte; 2013an, 34,6 milioi; 2014an, 18 milioi; eta 2015ean, bost.
Bi udal taldeen artean hurrengo urteetarako lehentasunak ezartzeko gai izatea txalotu du Juan Karlos Izagirre alkateak. Krisi egoeran eta 11.000 donostiar langabezian egonik are garrantzi handiagoa duela nabarmendu du. Udaletxeak «ekonomia pizgarri» izan behar duela erantsi du.
Eneko Goia EAJko bozeramaileak «arduraz» eta «zuhurtziaz» aritu direla azpimarratu du. «Hiriaren interesak beste ezeren gainetik jarri ditugu», azaldu du. Bat datoz bi udal taldeak zuhur ibiltzeko garaiak direla argi uzterakoan. «Diru sarrerarik ez badago, gasturik ez da egongo», argitu du Jabi Vitoria Ogasun ordezkariak.
Illunbe «oso ondo» doa
Inbertsio planari ekiteko aurten 25 milioi euro biltzea aurreikusi dute bi taldeek. Hamar milioi euro zorpetuz lortuko lirateke, 1,2 milioi euro aldundiak emango lituzke, Añorgako eta Loiolako errepideak udalaren esku uzteagatik, eta bederatzi milioi euro Illunbe aisialdi guneko salmentatik lortuko lirateke.
Alkateak ez du zehaztasun handirik eman, baina saltzeko prozesua «oso ondo» doala esan du. «Inbertsio planean jaso dugu, negoziatzen ari garelako, egunetik egunera aurrera goaz», erantsi du Jabi Vitoriak. Kaleratu berri diren epaiek aurrera eginez gero, gainera, udalak orain arte ordaindutakoa baino kalte ordain handiagoari egin beharko dio aurre. Hori dela eta, plana zehazterakoan «malguak» izan direla azaldu du Iñaki Gurrutxaga EAJko zinegotziak. Aurten gauzatuko diren diru sarrerak 25 milioko euroak izatea aurreikusi duten bitartean, inbertsioetara 20 milioi bideratzea erabaki dute. Bost milioi euro gordetzeak «sor daitezkeen ezustekoak erantzuten lagunduko du», gaineratu du Gurrutxagak.
PP eta PSE-EE
PPko zinegotziak, hain justu, diru sarrerek «inolako bermerik ez» dutela kexu dira. Inbertsio plana eztabaidatzeko, gainera, haiengana ezta sozialistengana ez dutela jo salatu dute. «Donostiar guztien diruarekin egin nahi dituzte inbertsioak, baina biztanleriaren erdia ordezkatzen dugun udal taldeak albo batera utzi dituzte», salatu du Ramon Gomez bozeramaileak. Ernesto Gasco PSE-EEko zinegotziak, bestetik, EAJren jarrera kritikatu du, ez baitu begi onez ikusi urte osoa Bildu kritikatzen egon ondoren orain haiekin adostasunera heltzea. Gascoren ustez, Bildu hirian nahiz Gipuzkoan agintzen jarraitzearen «konplizea» da EAJ. Argi ibiltzeko ohartarazi die Gascok jeltzaleei, haren kontra joan baitaiteke akordioa.
Eneko Goiak udal gobernuarekin lortutako akordioa hiriaren mesederako dela erantzun du. Bide batez, Bildu laguntzen badu, «berari bost axola» zaiola adierazi du. Beste alderdi batzuk, aitzitik, hiriaren interesen alde egin beharrean, «norbanakoaren interesak eta alkatetzara iristeko gogoa» lehenesten dituztela azaldu du.
Oposizioko gainontzeko alderdiek, dena den, datorren astelehena arte inbertsio planari zuzenketak aurkezteko aukera izango dute. Ondo bidean, maiatzaren 30ean onartuko luke udalbatzak 2012-2015 inbertsio plana.
Autobus geltokiaren kokalekuaren inguruan ez dute ezer argitu
Inbertsio planarekin batera, autobus geltokiaren kokapenaren inguruan akordiorik ote dagoen ez dute Bilduko eta EAJko ordezkariek argitu. Hala ere, geltokia egiteko dirua aurten badagoela argitu dute; luzatutako udal aurrekontuak azpiegitura horretarako zazpi milioi euro gordeta dituelako.
