Patxi Lopez lehendakariak Euskotreneko Altzako geltokiaren lehen harria jarri du

Mikel Goñi

2012/06/18

Ezkerretik eskuinera: Ernesto Gasco Garraio sailburuordea, Iñaki Arriola Garraio sailburua eta Patxi Lopez lehendakaria.

Patxi Lopez Eusko Jaurlaritzako lehendakariak Garraio sailburu Iñaki Arriolak lagunduta jarri du Donostialdeko Metroak Altzan izango duen geltokiaren lehen harria. Geltoki berria metroaren Herrera-Altza tarteari dagokio eta ekitaldian azaldu dutenez, 2015ean erabilgarri egotea espero dute. Ernesto Gasco zinegotzi eta Garraio sailburuordeak egin ditu anfitrioi lanak agerraldian eta lehendakariari zein sailburuari proiektuaren xehetasunak azaldu dizkie.

1.040 metroko zatia da, eta lurpetik joango da. Lanak 31 hilabetan bukatzea aurreikusi dute. Aurrekontua, berriz, 34 milio euro eta erdikoa izango da. Donostialdeko Metroa tren “soziala” izango dela adierazi du Lopez lehendakariak. Lurraldeko biztanleen %65ari zerbitzua eskainiko diola eta orain arte isolatuta egon diren auzoei lagunduko diela.