DYA-k sorosle titulua eskuratzeko ikastaroa emango du

Mikel Goñi

2012/06/19

Berpizte teknikak jorratuko dituzte DYAren Sorosle eta Sorospen ikastaroan. (Argazkia: Maitane Aldanondo)

DYA elkarteak Sorosle eta Sorospen ikastaroa emango du Donostian. Sorosle titulua eskuratzeko balio izango duen kurtsoa uztailaren 2an hasiko da, eta hiru astez luzatuko da. Guztira 30 ordu izango dira, eta uztailaren 20ra arte izango da, egunero bi orduz jardungo dutela, 10:00etatik 12:00etara. Bestalde, EHUko ikasleentzat aukera askeko 2 kredituko balioa izango du ere.

Ikastaroa ONCE elkarteak Etxaide kalearen 14. zenbakian duen aretoan egingo da. Izena emateko, berriz, 943-46 46 22 telefonora deitu beharko da. Ikasle plazak mugatuta daude antolatzaileen arabera, “kalitatea” bermatzearren. Era berean, 100 euroko kostua izango du.

Ikastaroan parte hartzeko ez da beharrezkoa izango aldez aurretiko sorospen ezagutzak izatea, eta egunerokotasunean aurki daitezken arriskuei aurre egiteko teknika eta jakin-beharrekoak jorratuko dituzte. Sorosle titulua eskuratzeko, berriz, horiek guztiak ikasi direnaren froga izango den proba gainditu beharko da.