Bihotzari eragiteko paseoak

Mikel Goñi

2012/06/28

Ekimeneko parte hartzaileek hamar minututan egin zuten Okendo plazatik Kontxarako tartea. (Argazkia: Mikel Goñi)Mikel )

Arazo kardiobaskularrak dituzten pertsonen artean ariketa fisikoa sustatzeko, hirian zeharreko lau zirkuitu antolatu ditu Poliklinika Gipuzkoak ‘Ibilbide bihotz-osasungarriak’ izenean bilduta; herritar guztiei irekita dago osasun ekimena. Arazo kardiobaskularrak dituzten pertsonei zuzenduriko Ibilbide bihotz-osasungarriak abian jarri ditu Poliklinika Gipuzkoak Donostiako udalaren laguntzarekin. Ekimenak ariketa fisikoaren garrantziaz ohartarazi nahi ditu bihotz gaixotasunak dituzten pertsonak. Herritar orori irekitako jarduera honetan bospasei kilometroko paseoak egingo dituzte asteazkenero datozen bi hilabetetan.

Atzo egin zuten Ibilbide bihotz osasungarriak ekimenaren lehen saioa, eta bertan 40tik gora pertsonak hartu zuten parte. Horietako batzuk Poliklinikako errehabilitazio zentroko pazienteak ziren; beste batzuk, berriz, Bihotz Osasuntsu elkarteko kideak. Azkenik irrati eta egunkarien bidez ekimenaren berri izan zuten parte hartzaileak ere bildu ziren Bengoetxea kaleko Sorospen Etxera, hori izango baita ibilbide guztien abiapuntua.

Ebakuntza kardiobaskularra izan dutenen elkartea da Bihotz Osasuntsu, eta Errenteriako Manuel de Prado bertako kidea da. «Bihotz arazoak izan ditugunok asko ibili behar dugu, nahiz eta eguraldi txarra izan». De Prado kezkatuta dago ekimen hauek ez dutelako behar besteko jendea erakartzen, eta jarduera fisikoari «beldurra kentzeko» balio behar dutela uste du. Iritzi berdina dauka Idoia San Emeterio Poliklinikako fisioterapeutak. Ibilbidea hasi aurreko luzatze ariketa saioa berak gidatu zuen, «gauzak ondo egin behar direlako».

Luzatze ariketak egin zituzten Okendo plazan, oinezko ibilbideari ekin baino lehen. (Argazkia: Mikel Goñi)

San Emeteriok azaldutakoaren arabera, gaixo hauentzako ibilbide egokiak lauak dira, baina, dena den, «esfortzua egin behar dute gaixoek». Hori dela eta, bost eta sei kilometro arteko lau ibilbide prestatu dituzte. Denak Bengoetxea kaleko Sorospen Etxean hasiko dira, eta Haizearen Orraziraino, Burdinazko Zubiraino, Anoetako estadioraino edo Pasealeku Berriraino iritsiko dira. Paseoak 9:30ean hasiko badira ere, antolatzaileak 8:00etan izango dira abiatze gunean, nahi duenari tentsioa neurtzeko. Fisioterapeutak ezinbestekotzat jotzen baitu «norberak ondo dagoen jakitea».

Juan Manuel Jauregi herreratarrak duela hilabete hasi zuen ebakuntza ondorengo errehabilitazioa, eta «gustura» hartu du atari zabaleko saioa itsas bazterrean egitea. «Hala ere, pixka bat freskoago egotea ez legoke gaizki».

Antolatzaileek pentsatuta zuten lau ibilbideak txandakatzea datozen zortzi astetan. Hala ere, atzoko deialdiaren arrakasta ikusita, San Epifaniok ñabardura egin zuen. «Ez dugu baztertzen beste lau astez luzatzea».